Congress chuan kalphung aiin mitinte thleng phak hmasawnna a ngai pawimawh hmasa ber ṭhin." Eric.R.Zomuanpuia. Treasurer, LDCC.

 

Lunglei.3rd.March.2025: Lunglei Dist Congress Committee chuan vawiin chawhma dar 11:00 khan LDCC Bhavan ah Devotion leh Political Session hun an hmanga inkhawm hi Pu JH.Kawllianmawia G.S in a kaihruaia Pu S.Challiana Senior Wing Vice President in hunserh a hmang.

   Political Session huna thusawitu Pu Eric.R.Zomuanpuia LDCC Treasurer chuan tunhnaiah Local Council leh Village Council inthlan a hun aia thla ruk a hmain ZPM sawrkarin min inthlantir a chutiang chu ni mahse ZPM leh MNF te rin aia tam Pathian leh mipuite duhsakna avangin  Congress Candidate te thlan tlin an ni a. Mipui min vote tu zawng zawngte hnenah lawmthu kan sawi mawlh mawlh a ni a ti. Inthlan hun pangaiah inthlang ni phei ila hei aia tam mipuite zarah LC leh VC hi kan form thei ngei ang tih hi a sawi chian ngamin ka hria Pu Eric-a chuan tiin Engvangin nge kan tih chuan thingtlang kuthnathawktute ZPM lakah an beidawng mek a, sawrkar hnathawkte ni se ZPM in an beisei a pha lo tih thu chu an sawi nuam tih a ni mek. 

Eirukna leh hlemhletna do ber a in chhal, rinawmna thutiam la ngattu ten tunhnaiah LADC sawrkar tharah eirukna leh hlemhletna avanga Court in thiam loh a chantir chu CEM a  ruatin sawrkarna an siam a. Hemi avang hian eirukna hua nia insawi Party hian eirukna a huat loh zia chu sawi loh, a vulh liantuah a ṭang mek a ni a ti a Kohhran leh mipuite pawh an zah zo tawh lo ni berin alang a ti bawk. Eirukna leh hlemhletna in kan ram min luhchilh nasat avangin BCM rorelna sang meuhin ngaihtuahin eirukna sum a welcome lohna thuchhuah a siam nghe nghe a Hetiang anih mek laiin LADC ah eiruk thubuai nei mek CEM atan ZPM in an dah lui ngat hi an tana ṭawngṭaisaktute mit a tihkham ka ring a ni LDCC Treasurer chuan a ti.

   Kum 2023 inthlanah ZPM chuan sawhthing Kg khat Rs 50/- in an lei vek tur thu mipuiah an intiam a. Sawhthing hralh a hun chho mek a, hetihlai hian kum hlui thlah zana tlangval che ṭha in ti tak thla kua a ral hnua, a chetṭhatna nu a bih ruk san zuk an tih ang mai hian ZPM Sawrkar hi a che mai ang tih a hlauhawm hle a, tun dinhmun a sawrkarin Sawhthing a leisak tawh hi hriat theih chinah quintal 16,103 niin chu chu Agriculture mithiam ten kumin a Sawhthing thar tur an beisei atanga chhutin 2% chauh tihna a ni Pu Eric-a chuan a ti. Kuminah hian Sawhthing hi Quintal Nuai 9 atanga Nuai12 vel thar beisei a ni a. Chuvangin, Sawrkarin a intiam ang ngeiin chhuanlam zawng lova, mipui pawisa Sawhthing lei nana ṭhahnem tak a lo DAH tawh hmang hian lei zawh sak ngei se. Sawrkarin heng a lei bak te hi chak zawka lei turin ruahmanna siam bawk se tih hi ka ngen tak meuh meuh a ni a ti.

    LDCC Treasurer chuan Congress chuan kalphung aiin mitinte thleng phak hmasawnna a ngai pawimawh hmasa ber ṭhin a. Hei hi Pathian mission pawh niin Lal Isua pawhin Juda Lal Ram din thar a, Jerusalem kulh tun din leh aiin mitin in chhandamna an chan thei nan leh rahbeh a awm ten zalenna an hmuh leh theih nan a rawn kal a ni. Chutiangin, Congress pawhin mitin thleng phak NLUP changtlung zawk a sawrkar chuan a kalpui leh dawn a. Rilṭam chungin hna ṭha a thawh theih loh ang bawkin chhawrtlak mi ṭha leh huaisen pawh a chher chhuah theih loh bawk a ni. 

Ram mipuiin dinhmun ṭha an neih zet a, lei rem an rah hmasak phawt chuan hmasawnna kawng kan zawh leh thei ang tih hi a rinawm. Congress sawrkar laiin NLUP hmangin mirethei zawk ten lei rem an rap ṭan a, chhawmdawl zuina tur NEDP a kalpui chhoh mek laiin a tlaksan a, mi tam zawk dinhmun sawhngheh hman lovin an awm phah a ni. Mirethei te dinhmun sawh nghehna tur Vaibelchhe tam tak  NEDP pawisa chu MNF ministry chuan nawm chen nan a hmangin, a  mukbang ta kha a pawi takzet Pu Eric.R.Zomuanpuia chuan tiin, Chhimlam a bikin Lunglei hmasawnna tur an tiṭhuanawp zui ta bawk a ni. 

Tun sawrkar thlengin Congress hunlai a ruahmanna ṭha leh hmalakna ang kha hriat zui tur a awm ta meuh lo a. Congress sawrkarah Planning leh Programme ṭha tak tak hmangin Mizoram chu ṭhalaite khawvelah siam tum a hmalak a ni a. Heng MYC leh LESDE Dept. hmangin chhawrtlak ṭhalaite tân ruahmanna tam tak a neih bakah Central Service thleng a ṭhalaite in ziak tling thei turin hmalakna a nei a. Ṭhalaite sumdawnna lama rahbi thar tuk sakin Entreprenuer movement pawh thui tak a kalpui hman a ti a. 

Amaherawh chu, Kamrul-a te sawrkar leh zawrh theih ang ang zuar mektu, zu rim nam pawh zawrh leh tum mek, sumdawng kalphungthar sawrkar-ah ṭhalaite an hawihai ta der mai chu a ni. Kan ram chu ṭhalaite tan khuavang kallai ang tih ang maiin sawrkar hna lak mumal awm si lo. Sumdawnna kawng thar zawh turin a ngam awm bawk chuang si lo. A reh tlawk tlawk a ni ber. Heng avang hian  Ṭhalaite tân hmathlir nei ṭha Congress a sawrkar leh hunah ṭhalaite khawvel thar a inher chhuak leh ngei a beiseiawm Pu Eric-a LDCC Treasurer chuan tiin, mipuite vanduaina ber chu sawrkar laipuiah leh Mizoramah Congress a sawrkar lo hi a ni awm e. 

Kum 2028 General election lo awm turah hian Congress in sawrkarna a chan leh ngei theih nan Pathian ring chungin NLUP changtlung zawk leh ṭhalaite hmakhua ngaiin Planning leh Proramme ṭha tak te hmangin hma kan la leh dawn a. Zoram mamawh chhanna ni turin Congress kan inbuatsaih leh mek niin Pu Eric.R.Zomuanpuia LDCC Treasurer chuan a ti a ni.

                                       Issued by Media Department, LDCC.