Rev.Dr.K.Thanzauva Education Consultant  hovin Siaha-ah Lesson Plan chungchang inzirtirna an nei.

Lunglei the 3rd April 2025: Samagra Shiksha, Siaha buatsaihin vawiin chawhma dar 10:30 khan Rev Dr K Thanzauva, Education Consultant, Govt of Mizoram hovin Seminar Hall, Govt Saiha College, Siaha-ah town chhunga school Headmaster/Headmistress /Principal-te tan improvement of classroom teaching (Promotion of Lesson Plan) chungchang inzirtirna neih a ni a, Pu T Chatlua, Addl DPC, Siaha chuan he hun hi a kaihruai a ni.

Pu K Beingiachhie, Sr EO (MS) MADC chuan Mizoram zirna siamtha tura Sawrkar in a ruat Education Consultant in Siaha district a lo tlawh chu lawmawm a tih thu a sawi a, Siaha district in zirna lama harsatna a tawh mek te tarlangin vawiin programme chuan harsatna an tarlan tak te a sutkian ngei a beisei tih a sawi. Headmaster-te kutah School thatna leh thathlohna thui tak a innghat a ti a, zirlai naupang mai bakah zirtirtute khalh ngil a, thawhhona tha tak siam theitu an ni tiin Ram innghahna zirlai naupangte chu thahnemngaihna tak tak nen tha taka kaihhruai a tul takzet a ni, a ti bawk.
Education Consultant Rev Dr K Thanzauva chuan thusawiin India ramah zirna (education) tihchangtlun tumin hmalakna hrang hrang a lo awm tawh a. Chung zinga pawimawh tak Kothari Commission chungchangte sawiin mitin tan an ban phaka education a awm theih nana Right to Education Act te, Free and Compulsory education chungchangte tarlangin zau zawk leh huapzo zawka hmalaknate chu a ropui hle a ti.
Rev Dr K Thanzauva chuan zirna in a tum ber chu Naupangte rilrua ngaihtuahna leh nunphung dik (moral transformation) thlen a, Ram leh Hnam tana mi tangkai (responsible citizen) an nih theih nana chher a ni a. Education a that phawt chuan Mizoram leh hmun danga khawtlang harsatna tam tak te chu pumpelh theih a rin thu a sawi. Ram tlu chhe mek siamtha turin education a pawimawh ber a, school building-te leh a kalphung hrim hrimte chu siamthat nan hun duh rei deuh dawn mahse mahni classroom theuha theihtawp chhuah a, Ruahmanna felfai tak nen zirtirna kalpui dan tur duan lawkna (Lesson Plan) mumal tak neih a pawimawh hle a ti. National Education Policy (NEP) 2020 chuan danglamna nasa tak a thlen a, Chung zinga pawimawh tak chu ‘ competency in education’ - a ni a, chutiang tura inbuatsaih theuh turin a fuih hlawm a, khawtlang, ram leh hnam chhanchhuak turin zirna chawikan kawngah theihtawp chhuahho turin kalkhawmte a sawm a ni.

Lunglei DAH&VO aṭanga ran vulhtu/mipuite hnena ngenna

Lunglei, 2025 Ṭau thla ni 3: Vawiin khan Lunglei District Animal Husbandry & Veterinary Officer Dr Ngurzidingi Sailo chuan a hnuaia mi ang hian ran vulhtu/mipuite hnena ngenna thu a chhuah.

"Khua a lo ṭhal chho a, hetih hun lai hi kum tinin ran hri len duh hun lai a nih avangin ran vulhtute kan rante hri laka an him theih nana theih tawp chhuah turin kan inngen a. Ran in vawn fai loh leh ṭawp lutuka dah te hi awlsam taka hri an kai theihna a nih avangin kan ran in te fai takin enkawl i la, ran in mai bakah a vel te pawh fai taka enkawl i tum ṭheuh ang u. Tin, mihringte pawh hri tidarhtu kan nih theih avangin kan ran in te mi dang tlawh pawh lo tura kan fimkhur thiam a pawimawh hle. Hri laka kan ran vulhte an him theih nana pawimawh em em vaccine pek ngai pawimawh i la, a hun takah vaccine pek i ngai pawimawh ang u.

"Tun laiin Mizoram district dangah leh kan ṭhenawm district Lawngtlaiah leh Siahaah te ASF hri a len leh tak avangin vawk eng emaw zat a thi tawh a, chu vangin mipuite, a bikin vawk vulhtute kan fimkhur zual a ngai leh ta hle a. ASF laka Lunglei District kan him zel theih nan theih tawp chhuah tlang i la, ASF hri laka kan him theih nana Lunglei District Magistrate thu chhuah (order) pawh ṭha taka zawmtu nih i tum ṭheuh ang u."

Champhai Forest Division-in ramsa tawlh ruk man

Lunglei, 3rd April 2025: Nimin (3.4.2025 (Nilaini)) chawhma dar 10.30 AM vel khan Champhai Forest Division a thawkte leh Assam Rifles tangkawp chuan Zokhawtharah exotic ramsa chi hrang hrang dan khauh tak- ‘The Wildlife (Protection) Act -1972’ kalh a tawlh ruk te an man a. Exotic ramsa tawlh an man te hi Albino Burmese Python – 1 , African spurred tortoise-27 leh Patagonian mara-3 te an ni.

Heng ramsa Indo-Myanmar international border kaltlanga tawlhruk a inhnamhnawih ni a hriat mi 6 techu man nghal an ni a. Judicial Magistrate, Champhai Judicial District thupek angina Champhai District Jail-ah a dah an ni. He ramsa tawlhruk a inhnamhnawih an man te chu :

(1) Jessie Lalnunmawia s/o Kapkunga, Zokhawthar
(2) Biakzapianga s/o Neicheulian, Zokhawthar
(3) Thawnsuangmuang s/o Sankhawpau,Khawmawi,Myanmar
(4) Lalzuitluangi D/o Sangkhuma Zokhawthar
(5) Denga s/o Neya, Zokhawthar leh
(6) Lalhmangaihthanga s/o Pawibawiha, Zokhawthar; te an ni.

Heng exotic animal tawlhruk an man te hi international market ah chuan Rs 130 lakh vel ni a chhut a ni.

Hei bakah hian March ni 26, 2025 khan Khawzawl Wildlife Division staff te chuan Wildlife (Protection Act -1972 kalh a Khawzawl rama sakhi (barking deer) leh Varung ( Rufous throated partridge) kaptu Biakchungnunga s/o Thansei(L) Khawzawl ,Lungvar Veng chu  a sa kahhlumte nen an man a. Champhai District Court thupek angin  Champhai District Jail-ah dah a ni bawk.

RATION CARD ENG LEH PAWL CHUNG CHANG A CS&CA THUCHHUAH

Dated Lunglei the 3rd April, 2025 : Ministry of Consumer Affairs, Food and Public Distribution, Department of Food and Public Distribution, Government of India thu chhuak angin, tuna NFSA (Card Eng leh Card Pawl) a hming chuang zawng zawngte tana e-KYC kalpui mèk hi 30th April, 2025 thlenga pawh sei a ni. 

Central Sawrkar thuchhuak angin, e-KYC ti ve lote tan a thlawn a dawn fur Central Sawrkar in State Sawrkar-ah ration buhfai a pék kèp tawh dawn loh avangin Card Eng leh Card Pawl a hming chuangte chuan 30th April, 2025 ral hma ngeia e-KYC tih ngei tur a ni.

Chief Minister Thusawi Sawifiah Ngai   -  Editor MIZO AW.

 

Chief Minister Pu Lalduhoma chuan tun Thawtannia Aizawla Aizawl Treasury Office pahnihte Financial Year khar ni an hmanpuinaah “Kuminah hian Rs. 900 crore chuang hret kan chhuahpui dawn a, nikumah khan Rs. 500 crore vel kan chhuahpui thung a. Hei hian kan sum leh pai dinhmun a lo that deuh deuhzia a tilang a ni,” a ti a. .Chief Minister chuan Mizoram sawrkar sum chhuahpui zat dik tak hi naktukah a chiang tura ngaih a ni a. Rs. 900 crore a chuang tura ngaih a ni. Tihian pension charge lut sa zawng zawng pek fel vek hman a ni a, GPF pawh a lut ang ang pek fel vek a ni a, Medical Bill pawh a lut chin chu pek vek a ni. Nikum kum tawpah khan Rs. 500 crore vel chhuahpui a ni” a ti a ni. 

 He a chunga Chief Minister thusawi hi sawrkar (DIPR) press release-ah leh chanchinbu hrang hrangah hmuh tur a awm a.Chief Minister thusawi hi tak tak a nih chuan a sawi angin Mizoram sawrkar sum leh pai dinhmun a tha hle tihna a ni thei a. A lawmawm hle ang. 

 Chutih lai erawh chuan Chief Minister-in Mizoram sum dinhmun leh a kaihhnawih chungchang a sawi danah hriatthiam awl-ai lo a awm thin a. ZPM sawrkar hnuah Mizoram leibat tlahniam ta anga a sawi te, Gross State Domestic Product (GSDP) tunhma zawnga chhut dan dik loa lo chhut ang leh tunah tidik ta anga a sawi te chu thiam ang anga han zir ve chang pawhin thiamna bik nei lo tan chuan hriatthiam a harsa hle thin. Party dang sawrkar laia sum dinhmun a sawi thin leh ZPM sawrkar hnu tum hnih budget pharh hnua sum dinhmun a sawi chu tak tak a nih chuan a hahdamthlak hle a, a thlamuanthlak thei khawp thin.  

 Tun tuma Rs.900 crore “chhuahpui” a tih chu kum 2024-2025 budget atangin pawisa hman bang a awm a tihna em ni ang?  Lo ni ta se, Mizoram sawrkar chuan sum a neih loh avangin a puk awl lo bawk si a, engtin nge Rs.900 crore chhuahpui (hman bang) a awm theih le? tih loh theih a ni lo. .  Budget Estimate (BE) Budget leh Revised Estimate (RE) inthlauhna a sawina a ni ang han tihsak dawn ila, February 27, 2024-a kum 2024-2025 budget a pharh khan sum hmuh tura hisap (total receipt) leh hmanna tur hisap (total expenditure) chu a inzat chiah a. Ruahman ang chiah chiaha sum hmuh zat leh hman tur zat hman a nih chuan hman ban a awm thei lo a ni. 

 Chubakah kum 2025-2026 budget March ni 4, 2025-a Assembly-a a pharh rual khan kum 2024-2025 budget baka sum hman bak (mamawh belh) supplementary demand Rs.3,512.33 crore chu house pawmpui turin a pharh tel a. Chumi awmzia chu kum 2024-2025 atana budget bakah Rs. 3,512.33 crore hmanbelh a awm tihna niin a lang bawk si a. BE aiin RE chu a hniam zawk thei dawn em ni? a tih theih a ni. 

 Tin, kum 2024-2025 atana sum ruahman sa, sum dawn tawh si, finalcial year tawp (March ni 31, 2025)-a hman (pek) hman loh em ni ang? han ti dawn ila, budget-a ruahmanna awm sa vek, a hmanna tur pawh awm sa vek, la pek chhuah loh chu pawisa chuang bang a ni thei si lo. A chunga tarlan angin Aizawla Treasury pahnih office-ah kum 2024-2025 financial year khar ni a hmanpuinaah sawrkarin kum 2024-2025 chhunga sum a pek chhuah tur, pension charge lut sa zawng zawng pek fel vek hman a ni a, GPF pawh a lut ang ang pek fel vek a ni a, Medical Bill pawh a lut chin chu pek fel vek a ni a ti bawk si. Budget-a ruahman, hmanna tur awmsa vek chu pek chhuah loh a nih avangin pawisa hman bang a ni thei lo a ni.  

  Rs.900 crore chhuahpui chu budget-a awm si lo, kum 2024-2025 chhungin sawrkar laipui atangin entirnan SASCI sum (puk tur, kum 50 hnua rulh tur, pung awm lo) sawrkarin a dawng a ni ang han tihsak dawn ila, heti zat zat hi SASCI loan chu hmuh niin a lang bawk si lo va. A ngaihna hriatthiampui a harsa  em em a ni.

 Chuvangin Chief Minister-in kum 2024-2025 budget atanga Rs.900 crore hman bang kum 2025-2026 kum thara chhuahpui (chhawm tur) tur awma a sawi chu a awm theih dan sawrkarin emaw, Chief Minister ngei chuan emaw, mi naran hriat thiam theih tura sawrkar press release leh media-te emaw  hmangin sawichian (fiah) a ngai a ni. tiin MIZO AW Editor chuan a March 2.2025 Issue Editorialah a ziak a ni.