ZUNZAM EVENING NEWS (2.4.2025 )

Lungleiah IFAD Design Mission Team te nen Mizoram FOCUS 2.0 hnuaia kut hna thawktute tana hma lakna tur project thar ruahman tur chungchang sawi ho a ni

Lunglei, 2025 Vau thla ni 2: International Fund for Agricultural Development (IFAD) ṭanpuinaa Mizoram puma ei leh bara hmasawnna tur leh kut hna thawh chawi kanna tura hma lakna, Mizoram FOCUS (Fostering Climate Resilient Upland Farming Systems in the North East) 2.0 kalpui tur atana project thar duan tur chungchangah vawiin khan Lunglei DC Conference Hall-ah IFAD Design Mission Team te leh line department hrang hrang ai awhte nen ṭhut khawm buatsaih a ni.

He ṭhut khawm hi Lunglei Additional Deputy Commissioner Pi Rochuangkimi Khenglawt chuan a kaihruai a. IFAD Design Mission Team-a Project Technical Lead Pi Ayurzana Puntsagdavaa chuan Mizoram FOCUS 2.0 kalpui dan tur ruahmanna tlangpui a tar lang a. Project Design Team 2 Leader, LRS&WC Joint Director Pi Rosy Lalmuansangi Hmar chuan project design thar duang tura field visit buatsaih a nih thu leh field visit kalpui dan tur tlangpui a sawi fiah a. Line department hrang hrangte leh project-in a nghawng tur agency hrang hrangte nen Lunglei District-a hlawhtling leh chhawrnahawm zawka Mizoram FOCUS 2.0 kalpui a nih theih nana ruahmanna siam dan tur leh hma lak ṭulna lai ngaih pawimawh zawngte sawi ho zui a ni.

IFAD ṭanpuinain Mizorama district pali (Mamit, Kolasib, Champhai leh Serchhip)-ah kum 2018-2019 aṭang khan kum 6 chhung atan FOCUS project hi kalpui a lo ni tawh a. Tuna project thar, FOCUS 2.0 hnuaia hma lakna hi kum 6 chhung (2025-2026 aṭanga 2031-2032) atan Mizorama district zawng zawngah, block 26-ah, khaw 700-ah chhungkaw nuai khat leh mihring nuai 5 velin an chhawr theih tura kalpui tum a ni a. Budget-ah US dollar maktaduai 72.29 vel ruahman niin, IFAD tum tur 63.3%, Mizoram sawrkar tum tur 20%, scheme dang nena convergence aṭangin 11.7% leh beneficiary-te tum ve tur 5% ni tura ruahman a ni a. Mizoram sawrkar Agriculture & Farmers Welfare Department hnuaia Society for Climate Resilient Agriculture in Mizoram (SCRAM) chu Lead Implementing Agency tur a ni.

He hunah hian FOCUS 2.0 hma lakna turah Lunglei District ODOP (One District One Product) thei - balhla - chinna leh balhla aṭanga thil siam vawrh lar leh tihmasawn tura ruahmanna siam dan kawng zawn ni se, tih a ni a. Tui hna humhalh leh tihpun te, lei venhim leh sawngbawl te, thingtlang lo neih thlakna tur ngaihtuah te, kut hna thawktute hmanrua leh bungraw mamawh hrang hrang ngaihtuah te, tui lianin phai leilet a tihbuai ṭhin venna tur te, kut hna thawktute thar chhuah deh ralna tur ngaihtuah te chu project hnuaia hma lakna atan ngaih pawimawh ni se, tih a ni.

Project Design Team 2 te hian project design siamna atan Lunglei District dinhmun, harsatna leh mamawhte zir chiang turin vawiin leh naktuk khian khaw hrang hrang an tlawh kual dawn a. He'ng khaw hrang hrang an tlawhnaah hian kut hna thawktute leh society-te leh khawtlang hruaitute nen inkawmin, hma lak dan tur an sawi ho ang a. Lunglei District-a hun an hman zawhah Hnahthial District an tlawh leh ang.

Lungleiah ram dang mite hnena ID card pek chhuah a nih loh nana hma lak dan tur sawi ho a ni

Lunglei, 2025 Ṭau thla ni 2: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah India khua leh tuite hnena pek ṭhin nihna tihchianna (identity card) hrang hrang ang chi chu ram dang mi, a bikin ṭhenawm ram Myanmar leh Bangladesh aṭanga chhan hrang hrang avanga lo lutte hnena pek chhuah a nih loh nana hma lak dan tur sawi ho a ni.

He hunah hian DC office-a officer-te bakah, card/certificate hrang hrang - Voter ID Card, Aadhaar Card, Birth Certificate, Ration Card, etc. pe chhuaktu office hrang hrang ai awhte, Lunglei District VC/LC Association leh Lunglei Sub-Headquarters YMA ai awhte an tel a. Bawrhsap Pi Navneet Mann chuan ram dang aṭanga raltlan emaw, dan ang emaw, dan ang lo emawa lo lutte'n India khua leh tuite hnena pek ṭhin ID card hrang hrang neih an tum ṭhin a, chu chuan khua leh tuite chanvo leh hamthatna hmuh tur a tikiamin, a chhuhsak ṭhin tih sawiin, hemi veng tur hian khua leh tui ni lote hnena ID card pek chhuah a nih loh nan fimkhur a ṭul a ni, a ti.

He hunah hian ram dang mite hnena ID card hrang hrang pek chhuah palh venna tura fimkhurna tur leh hma lak dan tur rawtna hrang hrang bakah, harsatna awm ṭhinte tar lan leh sawi ho a ni a. Certificate leh ID card dilna atana finfiahna (proof) leh hriatpuina pek chhuah chungchangah te, certificate/ID card lem hmang an lo awm pawha hmu chhuak vat thei tura endikna kawngah te mahni zawn ṭheuhvah fimkhur leh ṭan lak lehzual ni se, tih a ni a. Ram dang mite'n lirthei, ram, in leh bungraw dang an lei theih nana khua leh tuite zinga mahni hming leh nihna lo hawhtir a awm loh nan mipuite pawh fimkhur lehzual a ṭul thu te, hemi kawngah hian khua leh tui zawng zawngte ṭan ho a ṭul thu te tar lan a ni bawk.

He hunah hian Lunglei District-a raltlan awmte fel taka chhinchhiah a nih thu leh DC office aṭangin temporary ID siamsak ṭhin an nih thu tar lan a ni a. Lunglei DC office-in an chhinchhiah danin, tun dinhmun (April 2025)-ah Lunglei District chhungah Myanmar mi raltlan 1,971 leh Bangladesh mi raltlan 63 an awm mek a ni.

Larsap General (Dr) Vijay Kumar Singh, PVSM, AVSM, YSM (Retd) in Lawngtlai District a tlawh

Lunglei, the 2nd April, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan lehlangin Lawngtlai District a tlawh. Larsap hian Lawngtlai District chhunga MLA, ADC hotute, Sawrkar hnathawk, VC leh NGO hruaitute meeting a neihpui bakah school 14 te hman tur smart board a hlan a, Diltlang South khuaa kangmei tuarte hnenah tanpuina a hlan bawk.

Larsap hi Lawngtlai District Helipad-ah District Bawrhsap Pu Cheemala Siva Gopal Reddy, SP Pu R. Lokeshwaran leh official dangte'n an lo hmuak a. DC Office tualah Adviser to CM Dr. Lorrain Lalpekliana Chinzah, MLA; Pu Rasik Mohan Chakma, MLA; Pu V. Zirsanga, CEM, LADC leh official dangte'n lo dawngsawngin guard of honour pek a ni.

Larsap General (Dr) Vijay Kumar Singh chuan Mizoram District zinga theihna nasa tak nei Lawngtlai District tlawhna hun tha a nei chu lawmawm a tih thu a sawi a. Numaligarh Refinery Limited (NRL) in Lawngtlai District chhunga zirna tihhmasawn nana CSR kaltlanga school 14 te smart board a pe chu lawmawm tiin, smart classroom nei tura ITI Ltd. leh implementing partner Living Thoughts organisation-te hmalakna fakawm a tih thu a sawi a. Smart board hmang hian zokhaw lama zirlaite'n hmun dang ang thoin thiam thil zirna remchang an nei dawn a, zirna bulthum primary leh elementary education-te kan ngaipawimawh a tul a ni, a ti bawk.

Larsap chuan Lawngtlai District chhunga khaw 13, power supply pek la ni lote'n an neih thuai theih nana hmalak a tul thu sawiin, sawrkar department, VC leh NGO te chu khawtlanga dawmkan ngaite ngaihvena puih tum turin a chah a. Ramri bulhnaia awmte zalen taka inkalpawhna Free Movement Regime (FMR) chu tunhma atanga lo neih tawh a nih thu sawiin, tunhnaiah thenawm ram buai avangin khua leh tuite him zawk nan leh dan lova ramri kana thil tih a awm loh nan inkaihhruaina thar siam a ni a, hei hian harsatna siam a tum lova, khua leh tuite tana tha tura ruahman zawk a ni, a ti a. Ramri kaltlanga ruihhlo tawlhruk a hluar chu veiawm a tih thu sawiin, Mizoram chu ram ralmuang leh nuam a nih zel theih nana tanrual a tul a ni, a ti a. Sawrkar laipui scheme pawimawh hrang hrangte tarlangin, mipuite'n an chhawr tangkai theih nana tanlak a tul thu a sawi bawk.

DC Conference Hall-a Sawrkar Department hotute, VC, NGO, zirtirtute leh zirlaite nena meeting neihah hian District Bawrhsap Pu Cheemala Siva Gopal Reddy chuan Lawngtlai District administration, security dinhmun, project tlangpui, mamawh leh theihna neihte PowerPoint Presentation hmangin a sawifiah a. Pu James Miahlung, Addl. DC in lawmthu sawiin hun hman a khar a ni.

Hemi hnu hian Larsap chuan Diltlang South khuaa kangmei tuarte DC office Chamber-ah kawmin a tawrhpui takzet thu a hrilh a, PMAY hamthatna hmanga in an din leh ngei theih nana hma la turin District Bawrhsap a chah nghal a. Governor's Discretionary Grant kaltlangin kangmeiin a tih chhiat in neitu chhungkaw 9 te hnenah tanpuina sumfai Rs 1,00,000/- leh inluahtu chhungkaw 8 te hnenah Rs 5,000/- theuh a hlan a. Kangmei tuar chhungkuate'n Governor hnenah hian lawmthu an sawi a ni.

Hemi hnu hian Larsap chuan DC Bungalow, Chawnhu-ah Lawngtlai District chhunga MLA leh Autonomous District Council pahnih, Lai Autonomous District Council (LADC) leh Chakma Autonomous District Council (CADC) a CEM leh EM te a kawm bawk.

Lungleiah LMC hnuaia Municipal Sanitation Committee an ṭhu khawm

Lunglei, 2025 Ṭau thla ni 2: Vawiin chawhnu khan Lunglei Municipal Council (LMC) hnuaia Municipal Sanitation Committee chu an Chairman, LMC Vice Chairman Pu K. Lalrinawma kaihhruaiin BoC Hall, Convention Centre, Lungleiah an ṭhu khawm.

Municipal Sanitation Committee Chairman Pu K. Lalrinawma chuan member kal khawmte lawmna thu sawiin, LMC huam chhunga faina kawnga hma lakna kal chho mekah hmasawnna duhawm zawk a awm zel theih nan member-te chu ngaihtuahna seng turin a sawm a. Faina kawnga LMC hnuaia ward hrang hrangte inelna, LMC Award 2024-2025 chu April ni 1, 2025 khan sem a nih thu leh Ward No. 2 (Serkawn leh Zohnuai) chu ward fai bera thlan an nih thu a sawi.

LMC Chief Executive Officer Pu Donny Lalruatsanga chuan thu ngaihtuah tura chhawp chhuahte a sawi fiah a. Committee chuan Lunglei chu bawlhhlawh thlahdah awm lohna khawpui (garbage free city) a nih theih nan hma lak ṭha tiin, a ṭul anga ruahmanna siama bawhzui ni se, a ti a. He hma lakna atan hian LMC Award dawngtu ward palite chu garbage free local council pilot project kalpui nan rawt a ni a. Khawpui faina leh mawina atana retaining wall/step ang chite rawng thuhmun hmanga chei (uniform colour coding) ṭha tih niin, LMC rawng - a pawl leh a vara chei dan ngaihtuah ni se, tih a ni a. LMC huam chhunga faina chungchang inzirtirna tlangaupui a, vawrh lar turin faina palai (cleanliness ambassador) turte ruat niin, khawpui chhung hmun remchang leh langsar laiah te faina inzirtirna thuziak (signage) tar ni se, tih a ni a. Mizoram sawrkara LMC Solid Waste Management Regulations theh luh tawh chu a hma thei ang bera pawmpuina hmuh a nih theih nan bawhzui ni se, tih a ni bawk.