ZUNZAM EVENING NEWS (4.4.2025)

Tui harsatna in namen lovin Lunglei khawpui ah zuallam a pan mek zel a, hetihlai hian Sorkar lam atangin PHE in an sem bak chu mipui chhawmdawlna turin ruahmanna siam a la awm lo.

LungIei 4.4.25: PHE Deptt Lunglei hotu te chuan vawiin khan SE PHE Er Zohmingliana Office chamber-ah thuthar lakhawmtu te kawmin SE chuan Dt 29/4/2023 khan Lunglei khawpui tuilakna hi a lo kang  tawh a, khami tum khan tui pump thinna thlang lawk ami chu tui pump naah pump lutin chuta tang chuan mipui pek an ni a, reiloteah ruah a rawn sur a kan ziaawm leh thei a, kum 2024, 28th April-ah khan a kang leh a, hemi tumah pawh hian kan mangan hnu lawkah ruah a rawn sur leh a, kan ziaawm leh hram a ni a ti. Kumin a tui kang erawh kumdang aiin a nasa a, ruah a sur mai loh chuan a manganthlak khawp ang tiin a sawi.

Tui dahkhawlna hrim hrim chu hmun hrang hrangah an nei tha tawk tih PHE SE chuan sawiin Power supply a tha in Tui pump na khawl an nei tha  tawk a, a pump tur ber Tui a awm miau loh avangin tihngaihna a awm ta rihlo a ni a ti . Tunah hian Tlawng luiah Concrete Gravity Dam siam mek a ni tih sawiin a hnathawktu Contractor chuan zawh hun tur a tihah a zawh hman loh avangin thla 6 dang atan pawhsei sak a ni a, pangngai taka hna hi zawh anih chuan nakum lamah chuan tun ang em em a harsatna hi a thlen a rinawm tawh lo niin a sawi.Lunglei khawpui tui harsatna ber pakhat, a kaikuang chu he Gravity Dam, khuah zawh hun tur a ngaih Aug. ni 31, 2024 a zawh hman loh kha a ni thei niin Media te chuan an ngai tih an sawi ve bawk.

He hunah hian Er Mawitea EE LWSM chuan Lunglei khawpui chhungah tuikhur 90 a awm mek tih sawiin a thianghlim em tih enfiah zel a ni a, a tam zawk chu thianghlimlo anih vangin Laboratory-ah test mek a ni tih sawiin tuikhur tui ei leh in  rawngbawl nan a ring te chuan chhuangso hram se a duh tih a sawi.

Dr ZR. Thasangzuala EE Rural Div. pawhin tui a harsat avang hian tui lakna hnar, Tlawng lei chhak lamah chuan tumah insu lo turin ngenna a siam a, ram kan tih chereu nasat avanga tui hna hi kangchat a nih ve bawk avangin mamawh kan tih tlem a ngai a ni a ti.

Tun a tui pump-na, Lunglei Greater Water Supply Scheme Phase-I hi kum 1995 a khatih lai a CM Pu Lal Thanhawla hawn kha niin “Highest Single Stage Pumping System in India” tih a ni a,  mipui 66,000  chawm thei tur a ngaih a ni.Tunah erawh a let fe mipui an awm tawh a, Tui Connection hi 16,012 a awm mek a, consumer te hnenah tui sem chhuak vek tur hian thla khat vel hun a ngai a ni. Zawhna chhangin Lunglei khawpui tui sem kual chhuah hi thlakhat a ngai tih sawiin tunah hian connection pakhatah littre 1300 chu an pek tam theih ber a nih thu an sawi.

Tui harsatna avang hian tui in tur mineral water Dawr atanga lei pawh an tam tawh hle a, tui lei mai harsa takzet tawh a ni. 

Sawhthing chingtute hi patling an ni a, an ṭap lo a ni mai, an lung erawh a chhia a ni...  -  Dr.Lallianchhunga

Lunglei 4.4.2025: Nimin, April 3, 2025 hian Dr. Lallianchhunga, MPCC Spokesperson leh Gen.Secy ni bawk chuan Saitual tlangdunga khaw hrang hrang, Ruallung, Mualpheng, Tawizo, Maite leh Lenchim te tlawhin, heng khua a sawhthing hralh dan a hmunah a en a, Sawhthing chingtute nen inkawmna hun an nei nghal a ni.

Sawhthing chingtute dinhmun chungchang sawiin Dr. Lallianchhunga, MPCC Spokesperson chuan, ‘Sawhthing chingtute harsatna tawh mek hi dawhkan nalh tak leh ṭhutna nuam taka ṭhu ZPM sorkar hotu ten an hriat chian loh zia a takin kan hmu zel a. Sawhthing lei dan turah ZPM ten Research Based a zir chianna an neih lohzia a takin kan hmu bawk a ni. Sawhthing chingtute hi patling an ni a, an ṭap lo a ni mai, an lung erawh a chhia a ni. ZPM sorkar hotu leh Chief Minister ten thu thlum tak tak sawi reng mahse, kuthnathawktute harsatna an sut kian sak loh chuan awmzia a awm lo. APRIL FOOL hi ZPM sorkar hnuaiah kan hmang reng ang tih hlauhawm tak a ni’ a ti.

ZPM sorkarin sorkar kum thar, Financial Year a cheng vbch 900 chuang an luh pui anga ZPM in thuchhuah an siam chungchang sawi langin Dr. Lallianchhunga, MPCC Spokesperson chuan, ‘Cheng vbch 900 chuang sorkar kum hlui atanga sorkar kum tharah luhpui anga an insawi hi a dik takzet a nih chuan sawhthing, hmunphiah leh an thlai thlan bik te hi ZPM sorkar hian chhuanlam dang siam loin, an intiam ang ngeiin leisak vek turin Congress party chuan kan phut tlat a ni. Sum enkawl thiam tehna hi Press Release hmanga insawi ropuiah a innghat lo va, mipuiten kan chhawr leh chhawr lohah zawk a chiang mai dawn a ni’ a ti bawk.

Saitlual tlangdunga khaw hrang hrang a tlawhnaah hian Dr. Lallianchhunga hi Pu John A.Lalnghakzuala (MPCC Secy), Pu Lalnunthanga (MPCC EM), Pu Ngurzidinga (MPCC EM), Pu R.Vanlalvena, Pu Jerry Vanchhawng (ADCC GS) leh Ṭawi East Block Congress Committee (TEBCC) hruaituten an tawiawm a ni tih an thuchhuahah Zoremnghaki MPCC Dept. chuan hming ziakin a tarlang a ni.

Nimin khan Hnahthial District Bawrhsap, Pi K.Vanlalruati  hovin bypass road an endik

Hnahthial by-pass road siam mek chu District Bawrhsap, Pi K.Vanlalruati  hovin Addl SP, DIPRO leh JE(PWD) te bakah Mathiyan Construction Pvt Ltd, ABCI, NHIDCL, YMA leh MJA aiawh te hovin a endik a, Mathiyan Construction Pvt Ltd te chuan an intiam ang ngeiin tun April thla ral hma hian by-pass road chu an zawh fel hman tur thu an sawi.

Mathiyan Construction Pvt Ltd aiawh, Tej Bahadur Tomar, Construction Manager chuan Aizawl kawng atanga kal a, Hnahthial by-pass road luh tawntirh kawng chhak chu breast wall a dawl a nih tur thu leh a sak hna chu ni 15 hnuah an tan tur thu a sawi a. Chumi hma chuan breast wall bul by-pass kawng chu peih fel vek a nih tur thu a sawi bawk.

By-pass kawng atanga Denglung pen luhna kawng chu duhthu a sam lo ni a thudawn a nih avangin Bawrhsap ho chuan endik nghal ani a.By-pass kawng chhaka NH-54 kawng tla bal, dawl that hna thawh mek chu endik bawk niin RCC Retaining wall siam hna bik chu zawh fel a ni tawh thu tarlan a ni.Bawrhsap chuan kawng tla bal lai chu zauh a, Retaining wall pawh kawngpui an thlenga dawl chhoh ni thei se a duh thu a sawi .

Tun dinhmunah hian by-pass road black top  loh hi belhkhawmin metre za sarih (700m) vel a la awm thu tarlan a ni a. A bak zawng hi chu black top vek tawh niin layer tawpna (Bituminous Concrete) phah chauh an hmabak tawh a ni. By-pass road thui zawng hian 7km a tling lo hret a ni.

Kawngpui siam mek hi a chawh rualin metre sarih (7m) a zau a ni a. Tej Bahadur Tomar, Construction Manager chuan an hna thawh chakloh chhan ber pakhat chu kawngpui siamna hmanrua (raw materials) duhthusama tam a awm loh vang a nih thu a sawi a. Kawngpui siamna tur rora hi Haulawng road atanga an lak deuh vek a nih thu a tarlang bawk. Tun dinhmunah chuan hnathawktu (workers) 70 vel an awm thu a tarlang a ni.

NHIDCL hnuaiah Mathiyan ho hian by-pass road hnathawh hi changin NH-54 hi ABCI lamin an chang thung a. By-pass kawng hi siam zawh a nih hnuah Mathiyan Construction Pvt Ltd chuan kum li (4years) chhung an enkawl ang.

Lunglei Police te chuan March 2025 chhung khan pawi khawihna hrang hrangah thubuai 24 ziaklutin thubuai kaihhnawihah hian mihring 32 an man.

Hei bakah hian Lunglei Traffic Police te chuan March 2025  chhung vek hian lirthei khalhtu dan bawhchhia te hnen atanga sum an chawi tir zat chu Cheng Nuai 1, Sing 9, Sang 1, 700 a ni a, dan bawhchhia sum an chawi tirte  hi HMV 7 atangin Cheng Sang 4, 500, LMV - 26 atangin Cheng Sing 2, Three Wheeler - 9 atangin Cheng Sang 8, 700 leh Two Whèeler - 109 atangin Cheng Nuai 1, Sing 5, Sang 8, 500  chawi tir an ni a, dan bawhchhia te hi a tam ber chu Document fello leh License neilo a lirthei khalhte an nih bakah lirthei dah phallohna hmuna dahte an ni. Lunglei Police te hian March chhung vek hian Rakzu Litre 260, tualchhung hralhna rate a Cheng Sing 1, Sang 3, ma hu Heroin No 4 Gram 269.85 tualchhung hralhna anga Cheng Nuai Nuai 8, Sang 9, 500 hu an man bawk a ni.

Synod in Diltlang South khua a kangmei tuar te tanpuina sum a hlan

Nimin khân Diltlang South (Lawngtlai Dist) khuaa kângmei avânga in leh lo chân chhûngkaw 9 leh mi in luah, bungraw chân chhûngkaw 9 hnênah Synod relief sum Rs. 1,50,000/- sem a ni. Hêng zînga chhungkaw 12 te chu BCM Kohhran an ni a, chhûngkaw 4 te chu LIKBK, chhûngkaw 1 chu MPC leh chhûngkaw 1 chu UPC (NEI) an ni. 

Kângmei hi ni 25 March 2025 zâna chhuak kha a ni a, Relief committee office ah Rs. 3,000/- pêk a lo ni tawh bawk .

Nimin  Chawhnu Dar 2:00 khan Multipurpose Building, Baptist Centre, Falkland hawnna leh Pathian hnenah hlanna neih a ni.

He hun hi Upa Dr. Lallianzuala Hnamte, Vice Chairman ADCA in a kaihruai a, Report tlangpui Upa Dr. J. Lalchhanhima Asst. Secretary ADCA in a pe. Aizawl Area Baptist Choir te’n zaia rawngbawlna neiin, Rev. R. Lalrintluanga Executive Secretary, Aizawlin hawnna leh Pathian hnenah hlanna a nei.

Fellowship hun hman chhunzawmin,  Rev. C. Lalhungliana Chairman, ADCA-in a kaihruai a, Thusawi tawi Rev. R. Lalrintluanga Executive Secretary, Aizawl Area in a nei a, a duh apiang tan thusawina hun hawn  a ni bawk. Rev. Dr. C. Vanlaldika Principal, AICS in malsawmna in a khar a  ni.

EMPOWERING ASPIRANTS : MIZORAM POLICE CONSTABLE RECRUITMENT COACHING CLASS 2025 INAUGURATION PROGRAMME HMAN A NI.

Vawiin chhun11:00  khan Gov't Hnahthial College,  Auditorium-ah Education & Youth Affairs Committee,YMA Sub Hqtrs Hnahthial buatsaihin Mizoram Police Constable lakna tur atana inbuatsaihna Coaching class hawnna hun hman a ni. He Coaching Class hawnna programme-ah hian  Mizoram Police Constable diltu ṭhalai engngemaw zat kalin Education &  Youth Affairs Chairman Dr. K.Lalzuimawia'n kaihruaiin Pu.C.Lalhmingmuana  Secretary-in report ngaihnawm tak a pein  Pu.H.Hmingthanzuala President YMA Sub Hqtrs Hnahthial-in thusawina hun a nei bawk. 

He programme-ah hian Chief Guest atan Pu.Lalsiamthanga Principal Hnahthial College niin  he Coaching Class hawnna hun neiin fuihna thu ṭha tak sawiin, YMA Sub Hqtrs Zaipawlten kalkhawmte zaiin an awi bawk. Tin, he coaching class neih tur hi D&M study ,Hnahthial leh Eleos Study Centre, Aizawl te nen thawk hovin Coaching class hi vawiin dt.4.April,2035 aṭangin Pi.F.Zonunpari Building, Peniel veng-ah neih ṭan tur a ni.

He Mizoram Police Constable recruitment Coaching Class programme hi  Mizoram  Youth Commission (MYC)-ten an sponsor a ni. 

Education  & Youth Affairs Committee,YMA Sub Hqtrs Hnahthial-ten  hetiang programme ṭha tak an buatsaih hi YMA Sub Hqtrs Hnahthial- chuan lawmthu a sawi a ni.

ONLINE-A TUI BILL PEK CHUNGCHANGA NGENNA

PHED online billing software chu ni 1 April 2025 atang khan update tura buaipui mek a ni a, he thil buaipui chhung hian ni.5.4.2025 (Inrinni) thleng a awh dawna rin a ni. Meter reader ten ni 3.4.2025 atangin reading an la thei dawn a, online-atui bill pek erawh chu ni 6.4.2025 (Pathianni) atangin tih theih tan tura beisei a ni a, amaherawh chu software update hi fuh lo thei a nih avangin online-a bill pek hun pawh a tlai deuh thei tho.

Hemi chungchangah hian online-a tui bill pe thinten min lo hriatthiam

kan ngen tak meuh a. Online-a tui bill la pe ngai lote pawhin pek hi a him a, a tha hle bawk a ni. Online-a tui bill pek hi meter reader ten reading an lak hnua an upload chauhin pek theih a ni tih mipuiten i hre bawk ang u tiin E.E PHED LWSM Division,Lunglei chuan thuchhuah a siam ani.

ICT Minister Dr. Vanlalthlana’n sorkar thar a pian hnuah aikal chhawr tih tawp leh pisa kai hun chhung en thlithlai a ni a ti a, 

Hemi atana hmanraw tha ber chu tunlai thiamna hman tangkai ani tih a sawi. New Delhi-a Central Institute of Educational Technology (CIET) a tlawhna-a National Council of Educational Research and Training (NCERT) hotute nen an inkawm naah he thu hi sawiin Minister chuan Mizoram sorkarin Kai app chu pisa kai hun thlithlai nan tangkai takin a hmang a ti a, Vidya Samiksha Kendra nen zirtirtute hman bik tura thlunzawm tum mek ani tih sawiin Mizoram hmasawn ngaihna tur ni a an hriatte chu a hnena thlen hreh lo turin a chah a; School Edn Dept hnuaia thawktute nen theih tawp chhuaha bawhzui zel an inhuam thu a hrilh a ni. 

He hunah hian NCERT-in zirna hmanrua pangngai piah lama zirtirna an kalpui dante, DIKSHA portal kal tlanga digital edn content siama dah chhuah a nih dan bakah zirlai leh zirtir tute tana tunlai thiam na hmanga zirtirna hman tangkai a nih dante sawiho a ni a, ram pum huapa Vidya Samiksha Kendra (VSK) kalpui a nih dan leh Mizorama hman a nih dante sawi ho a ni bawk a. VSK hi tunlai thiam na hmanga school zirtirtute leh school dinhmun en thli thlaina niin, data hmanga thutluk na siamna tur leh zirna chung changa sawrkar tha tih chakna tur leh langtlang sorkar siamna tura hmanraw pawimawh tak a ni.

Mizoram-a Eng chhit man chawhrual Rs. 7.82 

Mizoram Electricity Regulatory Commssion (MZERC) chuan sorkar kumthar April 2025 atanga Eng chhit/hman man chu chawhrualin Unit khat Rs. 7.82 ni turin a bithliah a. Eng chhit man hi tihsan a nih loh avangin sawrkarin subsidy a tum tur chu cheng vbc. 180.80 a ni dawn.P&E Dept-in sorkar kum 2025-26 chhunga Consumer te Eng pek nan Unit khat zelah Rs.11.28 mamawh tura an insawi laiin Commission-in ARR a bituk sak atanga chhutin an mamawh hi Unit khat zelah Rs.10.97 a ni a, Rs.10.97 hi subsidy tel lova chawhruala Unit khat zel man tur Full Cost Tariff (FCT) niin sorkar-in subsidy a pek loh chuan FCT hi hman tur a ni a. 

Sawrkar-in subsidy a pek tur cheng vbc. 180.80 hi advance-in thla tin cheng vbc. 15.06 a pe tur a ni a, a pek loh chuan FCT hmangin bill siam tur a ni a, sawrkarin subsidy a pek hunah bill-ah siamrem leh tur a ni. Sawrkar-in subsidy a pek sak chuan tlawm zawkin mipui hnenah chawhrualin unit khat man Rs.7.82 vel zelin an pe thei dawn a. Sorkarin consumer te subsidy a pek sak tur hi a pumpuia chawhrualin unit khatah Rs.3.15 vel zel ang a ni.

MIZO NATIONAL FRONT : SUB-HQRS, LUNGLEI.

PRESS RELEASE NO 22 OF 2024-25."ZPM hi Ram mipuiin an zia an hre chho mek a, mipui rorelna an hma chhawn dawn a. Lo sawisel chiam chiam hi a tul ber rih lo e"  - K.Vanlalauva Ex Minister 

"ZPM sawrkar hian eng kawngah pawh sawrkar hmasate fak hi an hreh ngawih ngawih a. Eng thil pawh hawng se, sawrkar hmasate thawh leh hmalakna a ni vek chungin an tha hi a na em em a ni. Chutihrual chuan, Session neih zawh tak atang phei kha chuan an worker te hi an zak ngawih ngawih a. An mahni party chhungah an inkhel mek a. Mipuiin ram rorelna an kalpui dan an enin an zia an hre chho mek a. Mipui kutthlakna hi an la tuar ve dawn a. mipui kutthlakna an la hmachhawn ve dawn a. 

Keini lam hian lo sawisel chiam chiam hi a la hun lutuk lo. Keimahni hi ZPM tlukchhiat hun nghak reng tur kan ni lo. Pathian leh kan ram tan rorelna chelh leh turin Party chhungah inbuatsaihna I kalpui ila, kan lo tihdik tawk lohnaah insiam tha in ram mipuite beisei sawrkar nghelnghet leh innghahna tlak siam turin I inbuatsaih ang u" Ex Minister Pu K.Vanlalauva Core Committee Member MNF General Hqrs Aizawl, chuan a ti.

Vawiin 4.4.2025 chawhma dar 11:00    khan Mizo Hnam Run Lunglei chhung inkhawmah Pu.K.Vanlalauva chuan political session ah thusawiin,  MNF General Hqrs Aizawl elected OB te inlungrual zia, MNF tan chuan tun a hruaitu nimekte aia tha leh rintlak an awm loh zia sawilangin member ten mahni hruaitute fak leh chawimawi hi mi puitling zia a ni tih hre reng ila. MNF te hi Hnam thuthlung kengtu ni si hian kan buai hma em em a. State kan nih hnu kum 38 chhung hian ram rorelna inthlanah vawi 5 zet kan tlak tawh hnu hian engngatinge kan tlak harh theih loh thin na chhan te hi rilru-ah a awm fo mai. 

Pu Rama Ar chuk a tui lo a, sawiseltute hi MNF pawnlam a mi an ni. Keini lah chuan kan awi hma em em a. Kan Hnam Run zawng zawng hi Pu Rama kutchhuak a ni. Hemi kawngah hian Pu Rama hmai tibal phahtu pawh hi a awm ngei ang, a ni lah a insawifiah duh mang si lo. Pu Rama party hmangaihna ang hi nei phak kan tam lem lo mai thei tihte pawh hi I chhut ve thin ang u, a ti bawk.

Vawiin a Hnam Run chhung inkhawm  inkhawm hi Pu Lalfanzauva General Secretary in a kaihruai a, Pu. Lalroliana General Secretary  in hunserh a hmang. 

'Pathian leh kan ram tan'

Sd/- H. Lalrintluanga

General Secretary,

Infomation & Publicity Department.

Memo No. MNF/SHQ(L)/Info/2024-25/6/22. Dt. 4.4.2025

Chief Minister Pu Lalduhoman nikum April Ni 1 a sorkar in pawisa a neih chu cheng  vbc 520 niin kumin April ni 1 ah chuan cheng vbc 1093 a lo ni ta a ni a ti. 

He thu hi nimina Aizawl Vanapa Hall ah sawiin Chief Minister Pu Lalduhoma chuan ZPM sorkar chuan tan a lak thu leh an inren nasat zia thu a sawi a. Dept zawng zawng pawhin theihtawp an chhuah thu leh sorkar hnathawkho hlawh pawh a hun taka an inpek theih thin thu te a sawi a ni. April Ni 1 hnuah dept tinin  bill an thehluh theih chauh thin avangin April thlaah erawh thla dang angin hlawh pek a rang thei lo a. Tunah pawisa a awm a, Dept inpeih hmasa apiang hlawh an inpek hmasak tur thu sawiin inpeih har deuh chu an pe tlai deuh dawn a ni a ti.