ZUNZAM MORNING NEWS ( 5.4.2025 )

LMC CEO aṭanga Lunglei khawpui chhunga hoarding tar chungchanga hriattirna

Lunglei, 2025 Ṭau thla ni 5: Lunglei Municipal Council (LMC) Chief Executive Officer (CEO) Pu Donny Lalruatsanga chuan March ni 27, 2025 khan Lunglei khawpui chhunga hoarding tar chungchangah a hnuaia mi ang hian hriattirna a chhuah.

"Lunglei Municipal Council Area huam chhungah The Lunglei Municipal Council (Display of Advertisements & Hoardings) Regulations, 2024 rule 31-in thuneihna min pek angin leh Board of Councillors (BoC) Meeting Dt. 21.03.2025-in a lo rel angin kum 2025 aṭangin Lunglei khawpui kawngpui dung (main road) Pukpui - Hrangchalkawn - Zobawk North & South bikah hoarding (structure permanent) tender hmanga kalpui tawh tur a nih avangin Department/Pawl/Kohhran/mimal, etc. te'n kan thil tarte 30th April, 2025 chhungin insenghawi tura ngen kan ni a, tender mumal taka kalpui a nih hnu-ah erawh chuan LMC-in a ṭul angin hma lakna a kalpui tawh dawn a ni tih kan inhriattir e. Hmun dang erawh chu regulation-in thuneihna min pek angin a dil leh mamawhtute apiangah pek theih a ni ang."

Horticulture Director-in Lunglei District Mausen khuaa balhla aṭanga la duang siam chhuahna hmun dinna tur a hmunah a en

Lunglei, 2025 Ṭau thla ni 5: Nimin khan Horticulture Department Director Pu CH Lalmuanpuia chuan tun hnaia Horticulture Department-in Chief Minister's Innovation Challenge lawmman pakhatna an dawnna, balhla aṭanga la duang siam chhuahna (banana fibre extraction project) dinna tur hmun atana hual, Lunglei District Mausen khuaa mi chu a hmunah tlawhin a en.He project hnuaia balhla kung aṭanga la duang siam chhuahna leh chuta ṭanga thil siam chhuahna Production Unit dinna tur hmun atana hual lawk chu Mausen khawtlang hruaitute'n lo kawhhmuhin, Bazar tlang leh Mausen YMA ram chhungah Unit One leh Unit Two-ah ṭhenin bun ni se tiin lungrual taka pawm tlan a ni a. He lai hmun hi Mausen khawtlangin hnatlanga vat faiin an lo buatsaih lawk tawh a, vantlang tana hnawk lo leh hmun tlawh nuam taka chei bawl tum a ni.

Horticulture Director hi Horticulture Department aṭangin Lunglei DHO Pu B. Lalzarzova, Hnahthial DHO Pu Lalṭhakima leh Horticulture Department officer leh staff-te bakah, Mausen khawtlang hruaitute, Mausen khaw chhunga tlawmngai pawl hrang hrang hruaitute leh balhla chingtu (Mausen Banana Growers Association) te'n an ṭawiawm a. Hrangkuala Hall, Mausenah vantlang huapin he project thil tum leh kalphung inhrilhfiahna buatsaih a ni bawk.

Horticulture Director Pu CH Lalmuanpuia chuan he project hi Horticulture hnuaia ramin a mamawh thil chher chhuahna project a nih angin a duang chhuaktu Horticulture Department chuan a hmunhma buatsaih bakah, project-in a mamawh zualpui infrastructure chi hrang hrang - Processing Unit, Packing House, Godown siam leh a chhawrtu turte tana thiam zirtirna training buatsaih te a hma thei ang bera bul ṭan an tum tih a sawi.

Balhla chu "District khat, thar chhuah chi khat" (One District One Product) hnuaia Lunglei District ODOP thei a nih angin, Banana Fibre Extraction Project hian hemi kawngah hian hma sawnna a thlen ngei beisei a ni a. He project hi a hlawhtling thei a nih chuan a khaw neitu Mausen khua bakah, Lunglei District chhung leh pawn, Mizoram hmun hrang hranga balhla chingtute tan hamṭhatna zau zawk a la thlen ngei beisei a ni bawk.

Lunglei mipuite'n sa hrisel chauh an ei theih

nan LMC CEO-in LMC huam chhunga zawm

 

tur thupek a chhuah

Lunglei, 2025 Ṭau thla ni 5: Lunglei District ṭhenawm mai, Lawngtlai District-ah vawk thi an awm nual avang leh he'ng vawk thite hi ASF vanga thi ngei an ni tih Disease Investigation Laboratory, Aizawl leh Animal Health Centre/NERDDL Guwahati te'n an nem ngheh avangin Lunglei mipuite'n sa hrisel chauh an ei theih nan Lunglei Municipal Council (LMC) Chief Executive Officer (CEO) Pu Donny Lalruatsanga chuan vawiin khan The Mizoram Municipalities Act, 2007 (as amended in 2015) leh Lunglei Municipal Council Licensing Regulations, 2024 Section 19 (Restriction of sale of diseased animal or unwholesome articles intended for human consumption) tlawh chhanin Lunglei Municipal Council huam chhunga zawm turin a hnuaia mi ang hian thupek a chhuah.

"1. LMC huam chhungah ram dang/State dang/District dang aṭangin vawk, vawksa leh vawksa aṭanga siam ei tur chi reng reng lak luh khap tlat a ni.

"2. Vawk damlo reng reng talh leh hralh khap tlat a ni a, vawk vulh lai damlo an lo awm chuan a rang thei ang bera dah hran nghal tur a ni.

"3. Vawk vulh lai damlo an awmin a rang thei ang berin District Veterinary Hospital emaw, mahni Veng Veterinary Field Assistant (VFA)/LC te hriattir vat tur a ni.

"4. Vawk thi leh suat tur neite'n AH&Vety Department-ah in-report zel tur a ni. Vawk thi leh suat tur reng reng disinfectant (chinai/bleaching) nen thuk taka phum tur a ni a, bawlhhlawh paihna hmunah leh luikawr leh rampalaileng remchangah vawk thi paih loh tur.

"5. Vawk talh turte'n RAgT test an ti ngei ngei tur a ni a, RAgT test negative result leh Soundness Certificate (Vawk hrisel ngei a ni tihchianna) AH&Vety Dept mi thiamte hnen aṭanga neite chauh vawk talh phal a ni.

"He thupek hian he thupek chhuah aṭanga ni 60 (sawm ruk) chhung a huam ang a, thupek zawm lote chu The Lunglei Municipal Council Licensing Regulations, 2024 section hmanga hrem theih an ni ang."

Chief Minister Pu Lalduhoma chuan Muanna Khawpui (peace city), mipui nuaih sawm vel chenna tur Thenzawl leh a chhehvela dinna tur ka dil chu hmuh theih a rinawm chho zel a ni, a ti.

Nimina Tuirihiau Run, Buangpuia Vantawng Group YMA inkhawmpui vawi 26-na a hmanpuinaah he thu hi sawiin Pu Lalduhoma chuan Muanna Khawpui (peace city), mipui nuaih sawm vel chenna tur Thenzawl leh a chhehvela dinna tur Prime Minister Pu Modi hnena ka dil hi kan hmuh theih a rinawm chho zel a. 16th Finance Commission ah pawh ka lo sawi a. 

Tunah hian Ministry of Housing and Urban Affairs (MoHUA) chuan master plan siamna tur cheng vaibelchhe sawm min rawn phalsak a, hun erawh a la duh deuh ang, a ti a. A bial tana hma a lakna thenkhatte pawh tarlangin; Thenzawl damdawiinah Ultrasound leh Serchhip damdawiinah Dialysis khawl dah thar a nih tur thute, Thenzawla PWD Division dah thar tura sawrkarin hma a lak thu leh Vantawng khawhthlaa Rope Way siam thuai an tum thu a tarlang bawk.

Nimin vantlang inkhawm chawhma hun hi Pu Chawngsangliana, Vice President, VTG YMA in a kaihruai a, branch YMA ten zaipawl intihsiak an nei a. Chawhnu lamah he huna khualzahawm Pu B. Lalchhanzovan thu a sawi thung a ni.

MNF President Pu Zoramthanga'n Saiip puan sin hnulawka zuzawrh leh vut vut mai chu thil inhmehlo tawp khawp a nih thu a sawi a, Zu zawrh chu Pathian duhloh a nih avangin an party chuan an do zel dawn tih a sawi.

He thu hi nimina Aizawl Districta MNF VC leh LC thlan tharte chawimawina hun a hmannaah a sawi a, Pu Zorama chuan sorkarin zu zawrh a tumnaah  alcoholic content bithliah a ni silo a, khuahkhirh anih dan leh phalrai anih dan turah a huamzau dawn hle tih sawiin, Congress sorkar hunlaia zu zawrh aiin a zalen zawk dawn tihte, Zu leh zu zawrh sawimawitu party chuan tunah hian MLA pakhat chiah an nei tawk tawh a, mi tamtakin mual an liam zo tawh tihte a sawi a, zu chu mi tam takin an thih phahna, nupa inthenna leh hmeithai leh fahrah tamtak siamtu a nih thute a sawi rualin Pathian duhloh leh Bible kalh anih avangin zu leh zuzawrh chu theihtawp chhuahin an party chuan an do zel dawn tih a sawi.

MNF President chuan VC leh LC thlan tharte thinlung taka a lawmpui thu leh a chhuan thu a sawi a, Nun uluk a, mipui leh party unit te nen tha taka thawkho turin a chah a, MNF ten an thuthlung an vawn tlat na chu Pathianin an felnaah a ruat a, party tamtak an thamral hnuah MNF chu  party ruhrel lianber an la ni ta reng tih a sawi bawk a ni.

He hun hi MNF Treasurer Pu Lalruatkima'n a kaihruai a,  Pu L.T. Kima Fanai, Gen. Secy. MNF Gen. Hqrs. hnen atangin report ngaihthlak a ni a, Aizawl City Local Council Association President Pu C. Lalbiaknunga'n thu a sawi bawk a, MNF VC/LC thlan tharte leh VC/LC term 7 tling tawhte chawimawina hun hman a ni.

Congress President Pu Lal Thanzara'n Mizoram sorkarin Healthcare Scheme thar a duanah mipui leh sorkar hnathawk atangin pawisa tam tak lak sak tumna a awm tih a sawi.

Nimina Congress Bhavan Golden Hall-a Political Session hun an hmannaah he thu hi a sawi a, Health Minister hlui Pu Thanzara chuan Healthcare chu a chhawr tangkaitu tur mirethei tak tak zawkte hian an chhawr tangkai thei angem tih chu ngaihtuah tham tak a nih thu a sawi a, Pathian leh mipuite zarah an party in sorkarna an siam leh hunah mipuite tlin tawk Health Care an kalpui dawn tih a sawi.

Congress President chuan kuthnathawktu tam tak sawhthing thar la lei loha a awm thu sawiin, Finance changtu Chief Minister in a sawi financial year chhunga sum hman ban vaibelchhe 1,090 chu Sawhthing leh hmunphiah lei nana hmang ngei tura sorkar an phut thu a sawi a. Lai Autonomous District Council inthlanpui awm tur chungchang sawi bawkin, Candidate turte buaipui tur Search Committee pawh an indin chho mek tih a sawi rualin an party hotute chu Candidate tur atan Kohhran a mi tangkai, khawtlang a mi hming tha, mi rinawn, zu  leh  hlemhletna lak a fihlim, Pathian tih mi sawm chhuak tura a ngen thu a sawi bawk. 

He Political Session hi Higher Education Cell Chairman Pu Albert Lalthlamuana'n a kaihruai a, party hruaitu hrang hrangin report an pe bawk a ni.

ZPM General Headquarters, Media & Publicity Department chuan Vairengte leh Kawnpui inkar, National Highway 06 kawng siam mek chu nimin khan an tlawh a, hna thawktute chu thahnemngai tak leh tha taka kawng siam that hna thawk zel turin an ngen. 

He kawng hi  NHIDCL enkawl a ni a, mipui mamawhna a sang em avangte, NHIDCL hnuaia contractor thenkhatte an thawh that loh avanga an hna tihtawp sak ngaite an awm avangin Mizoram Sorkarin mawhphurhna lain a thawmthathna an thawk thin a ni. 

ZPM Media hruaitute chuan Chief Minister Pu Lalduhawma leh PWD Minister ten Mizoram mamawh lakluhna kawngpui hi an ngai pawimawh hletih sawiin  NHIDCL hotute leh Ministry of Road Transport and Highway ah te thlenin tunah hian hma lak mek a ni a. Balaji Company ten hna an thawk mek a. Vairengte atanga Bilkhawthlir inkar 28 KM chu thawm that mek a ni a, Bilkhawthlir atanga Kolasib inkar 25 km pawh tender chhuah tawh niin Kolasib leh Kawnpui inkar 23 KM chu NHIDCL hnuaiah Balaji Company ten an thawk mek a, Kawnpui leh Khamrang inkar 15 Km  bakah Buichali atang Sairang inkar 11.2 Km pawh tender chhuah tawh niin a ni a. NHIDCL ten fur ruahtui tlak hmaa  hnathawh zawh hman beisei tih an tarlang.

Vawiina National Highway-06 kawng siam tlawhnaah hian ZPM General Headquarter a Media & Publicity Department General Secretary Pu TBC Lalthanmawia leh a thawhpui mi panga te hi ZPM block hruaituten an tawiawm ani.

Kulikawn YMA chuan an veng chhunga First Cry dawr chu titawp turin dawn neitute an ngen.

Kulikawn Branch YMA in First Cry dawr neitute hnenah lehkhaan pekah ruihhlo tam tham tak mannaah Henry Lalbiakzinga a tel ve chu pawi an tih thu leh a barakhaih tak zet thu an tarlang a. Kulikawn Branch YMA Executive Committee chuan uluk taka a ngaihtuah hnuah Kulikawn veng chhunga awm first Cry dawr hi veng chhunga a awm zui zel loh hi Kulikawn veng tan leh an chhungkaw tana tha zawka an hriat thu tarlangin an dawr tihtawp turin an ngenuin an hriattir tih an tarlang a ni.

Lungleia Zirlai pawl pahnih MZP leh MSU te chuan  ATL Road siam thatna tur sum pawhpen dah let leh turin sorkar an ngen.

Nimin khan thuchhuah siamin MZP Hqrs Lunglei chuan ATL Road siam thatna tur sum cheng vbc 90.69 pawhpen a ni chu pawi a tiin  Pukpui leh Mausen inkar kilometre 14 chauh siam that tum a ni chu chhim mipuite zahlohnaah an ngai tih an sawi a, ennawn leh tur leh ATL Road siam thatna tur atana sum awm zawng zawng dahlet leh tur leh April thla ral hma ngeia hna tan turin an ngen a ni.

MSU Regional Hqrs Lunglei pawhin ATL Road siamtute an hna a chhiat lutuk avanga a terminate atanga sum a hmuh let cheng vbc 90.69 chu Assembly hnuaia Estimate Committee-in ATL Road siam nan hman ni rawh se tih a ni a. ATL road Mausen - Pukpui Km-14 siam nan cheng vbc 45.89 leh Aizawl khawchhung kawng siam nan cheng vbc 44.80 a thrensawm a ni hi an hrethiam lo tih sawiin a hmanna tur taka hmang turin Mizoram sorkar an ngen tih an tarlang bawk.

Aizawl to Lengpui road via Sihhmui kawnga Tlawng Lei (Bridge) khar hun tarlang.

He lei  dawh that hna thawh mek chu Tlawng lui chunga a awmna turah dawh kai tura peih fel a ni tawh a. Hna thawh hun chhung hian road block a ngaih dawn avangin leh hnathawktu ten tluang tak leh ngawrh taka an thawh theih nan leh Sr. Executive Enginner, PWD. National Highway Division-I, Aizawl in a dil angin Aizawl SP chuan thupek a chhuah a.

Ni 06.04.2025 (Pathianni) tlai dar 4:00 PM atanga ni 08.04.2025 (Thawhlehni) tlai dar 5:00 PM chhung hian Sihhmui leh Lengte peng inkar kawngpui hi khar tur a ni a, lirthei eng chi mah tlan phal a nilo. Lengpui Airport leh Mamit lam kal tur leh heng hmun atanga Aizawl kal tur lirthei te'chu Buichali lamah kal tur a ni ang.  He thupek bawhchhia chu u/s 179 Motor Vehicles Act, 1988 hmanga hrem theih an ni ang.