BKHP Day hmang, BMP Day hmang dawn, BHSS in zirlai ti tha te chawimawi..

BKHP Day vawi 87-na hman a ni.

May 2, 2025 Zirtawpni kha Baptist Kohhran Hmeichhe Pawl (BKHP) din champha phak vawi 87-na a ni a. Kumin BKHP Day thupui chu “Lawm chunga Lalpa rawngbawl” (Sam 100:2) a ni. MBKHP lam atanga ruahman leh ngenna an siam angin zing kar leh chhun lama hun hmang theite chuan Kohhran leh Khawtlang tana thil tha tihna atan hmangin khawlai tihfai hna te Biak In tihfai hna te an thawk a, zan lam-ah inkhawmin, thupui thlan sa hmangin thuchah ngaihthlak a ni. Inkhawm thawhlawm hi Tualchhung Kohhran harsa zual tanpui nan hman tura ruahman a ni. 

Baptist Kohhran Hmeichhe Pâwl hi Kohhran chhunga Pâwl (Fellowship) din hmasak ber niin, thlarau lam rawngbâwlna-ah pawh kohhran hnuk leh chelh mar tlattu pâwl tangkai tak a ni. Kum 1938 March thlaah Assembly hriatpuina leh kaihhruainain Serkawnah BMS Missionary Pi Zirtiri (EM Chapman) hovin Girls Auxiliary (GA) tiin din a ni a, Hruaitu hmasate chu hêngte hi an ni.

Nl. Thenvungi – President,  Nl. Laltinthangi – Secretary,  Nl. Nûchhûngi – Treasurer 

Girls Auxiliary (GA) hian nula chauh a huam a, chhungkaw tanpui ngaite tanpui chu an tum ber pakhat a ni. Kum 1947-ah Nû Pâwl din a lo ni leh ta a. Chutianga hmeichhe zînga pâwl pahnih lo ding ta chu Assembly hotute chuan fel tawk lova hriain, pâwl pahnihte chu pâwl khatah chhung khawmin, March 20, 1965-ah chuan BKHP din a lo ni ta a. He pâwl hian Baptist Kohhrana hmeichhia zawng zawng, kum 14 chung lam, a duh apiang chu a huap vek a ni. 

Kum 23 chhûng zet chu March ni 20 hi BKHP Day atan hman thin a ni a. Hei hi MBKHP Executive Committee-in ngun taka a ngaihtuah that hnuah, “Mizoram Baptist Kohhran Hmeichhe rawngbawlna awmze neia a din chhuahna chu May 2, 1938 hi a ni e,” tiin, kum 1990 atang chuan ram pûmah BKHP Day chu May ni 2 ah hman a lo ni ta a ni

MBKHP statistics report- 2025-in a tarlan danin, tunah hian BKHP hi Pastor Bial 92 –ah Unit 476 dingin,  member 34857 an awm mek a ni.

= = = = = = = = = = = = = = = = = = = = = = = = = = = = = = = = = = = 

BMP Day vawi 45-na urhsun taka hman a ni dawn.

May 4, 2025 (Pathianni) hi Baptist Mipa Pawl (BMP) din champha phak vawi 45-na a ni a, BMP awmna Unit tinah Headquarters atanga thupui thlan sa “Thlenchin atanga hmasawn” ( Philippi 3:16) tih hmangin hun hman a ni ang. Mizoram BMP hruaitu te pawhin Unit hrang hrang-ah hetiang hian BMP Day hi an hmanpui ang.

President. Rbt. Chawngrolura Chongthu: BCM Buarpui leh Ramhlun Buarpui North Bial ah hun a hmang anga, Executive Committee Member Pu LP. Lallianzuala leh Pu F. Zokhuma te’n an tawiawm ang

Vice President Rbt. R. Liankunga,: Lungsen Pastor Bial, Mahanaim kohhranah hun a hmang anga, Executive Committee Member Rbt. K. Malsawmtluanga leh Pu Pc. Lalngaihsanga te’n Venglai leh BCM Lungsen kohhranah te insem darhin hun an hmang ve thung ang. 

Secretary Rev. H. Lalfakzuala,: Serkawn Pastor Bial, Ramzotlang Serkawn kohhranah hun hmangin, Executive Committee Member, Rbt. Tony Zothankhuma’n a tawiawm ang.

Asst. Secretary Pu C. Lalawmpuia,: Lungchem Pastor Bial-ah, Lungchem kohhranah hun a hmang anga, Executive Committee Member, Rbt. Anthony C. Lalhlimpuia’n a tawiawm ang.

Treasurer Pu Lalnunsanga pachuau,: Tlabung Pastor Bial-ah, Zing lamah Tlabung kohhranah, Zan lamah Zodin kohhranah te hun a hmang ang, Executive Committee Member, Pu C. Zohmingliana leh Pu Pc. Lallawmkima te’n an tawiawm ang.  

Fin.Secretary Pu Vanlalpeka,: Bunghmun Pastor Bial, BCM Bunghmun kohhranah hun a hmang anga, Executive Committee Member Rbt. J.Lalrosanga'n BCM Dinthar kohhranah, a hmang anga,  Rbt. Lalneihkunga'n zan lamah Laisawral kohhranah hun a hmang ve thung ang.  

Sr. Adviser Pu RL. Thianghlima: Chawngte ‘L’ Pastor Bial, Zion Chawngte ‘L’ kohhranah hun a hmang anga, Executive Committee Member Pu R. Laldinliana, Pu R. Lalfakzuala, Pu C. Lalrosanga leh Pu Pc. Ramdinliana te’n  Horeb, New Salem, Shalom Chawngte ‘P’ ah te insem darhin hun an hmang ve thung ang.  

Sr. Adviser Upa Dr. Joseph Lalrindika: Thenzawl Partor Bial, Venghlun kohhranah hun a hmang anga, Executive Committee Member Pu H. Lalrintluanga, Pu ZD. Zahnuna leh Pu F. Lalsawma te’n  Bethlehem  leh Ramlaitui kohhranah te insem darhin hun an hmang ve thung ang.  

Rbt. Zd. Lalnunsanga Executive Committee Member : Lungrang Partor Bial, Lungrang south I- kohhranah hun a hmang anga, Executive Committee Member Pu C. Lalthaliana leh Pu Lalrammawia te’n  an tawiawm ang. 

Baptist Mipa Pâwl (BMP) hi May 4, 1980 khan Thingsai khuaah din tan a ni a. A hmingah ‘Baptist Men’s Fellowship’ tia dah a ni; kum 1983-ah ‘Baptist Mipa Pâwl’ tiin Mizo tawngin dah a ni a. Kum 1988 Assembly-ah BMP chu kohhran hnuaia pawl (fellowship) pakhat ni tura pawmin, kum 2011 Assembly chuan BCM Planning rawtna pawmpuiin, tualchhung kohhran bâkah Pastor Bial huapa inthlunkhawmna neih leh Bial Rorel pawh a lo phalsak leh ta a ni.

5th Planning Commission-in a remtih leh ruahman na chu Kum 2021 Assembly chuan pawm puiin Mizoram Baptist Mipa Pâwl (MBMP) chu Hqrs. Office-ah Full time Secretary neiin kalpui tan a ni ta a,  Mizoram pum huap  MBMP Rorel kumtin leh Inkhawmpui pawh kum hnih danah neih a phal sak a, Mizoram BMP Inkhawmpui leh Rorel hmasa ber chu February 10-12, 2023 khan Hnahthialah neih a ni.

= = = = = = = = = = = = = = = = = = = = = = = = = = = = = = = = = = = 

BHSS in Felicitation Programme an hmang.

Baptist Higher Secondary School chuan  Tucker Hall-ah HSLC result chhuaka  zirlai tithate pualin Felicitation Programme an hmang. 

He hun hi an hman hi nimin khan Upa C. Lalhmingmuana Principal in a kai hruai a, Pathian hnenah in kawltirna a neih hnuin Vice Principal Upa R. Vanlalthiana’n thutawi a sawi. Rebeck C. Laldingngheti Class - X leh Pu Lawmkima Colney te hnen atangin zaimawi tak ngaihthlak a ni bawk. 

Education  Director  Rev. RC Lalthanzama’n thusawina leh thilpek hlanna a nei. hlawhtlinna chang zawng zawngte hnenah lawmthu sawina leh hlawhtlinna chang zo ve talo te pawh theih tawp chhuah chhunzawma hmalam pan zel turin a fuih.

BCM hnuaia School leh College atanga Top Ten alang te hnenah BCM Education Department chuan Laptop a pek thin angin, tun tumah he school a tanga dawng thei H. Remsangliana kan nei hi a lawmawm hle  a ni a ti bawk.

Heng bakah hian Staff welfare atangin thilpek hlanna neih ani a, H. Remsangliana Mizoram puma parukna (6th Position) hauhtu chuan hetiang din hmun a thlen theih nana damna leh hriselna petu Pathian hnenah lawmthu sawiin, a zirna kawnga theih tawp chhuahpuitu zirtirtute leh a nu leh ka pa te vanga he hlawhtlinna chang thei hi a nih thu a sawi a. A bik takin nun awmzia, nundan leh nunphung hre tura theih tawp chhuahpuitu Principal leh Staff te zawng zawng hnenah lawmthu a sawi bawk. Upa C. Lalhmingmuana’n he felicitation programme hi tawngtainain a tin  a  ni

Mizoram Board of School Education, HSLC Exam 2025 result tunhnaia chhuakah BHSS Serkawn atang hian Exam 117 atangin 113 an pass a, H. Remsangliana, Pu H. Lalmuankima fapa, Theiriat hi a pumpuiah parukna (6th Position) a ni. Distinction-ah 15, 1st Division-ah 45, 2nd Division-ah 42, 3rd Division-ah 11 te an pass a ni. BHSS result (pass percentage) hi 96.58% niin, Letter 33 in an hmu a ni.