ZUNZAM MORNING NEWS ( 6.5.2025 )

Mizoram Board of School Education chuan vawiin May ni 6 chhun dar 12:00 khian HSSLC Exam result a tichhuak dawn.

Pawl 12 Result hi MBSE Office Chaltlangah leh heng website – 

(a) www.mbse.edu.in 

(b) www.mbseonline.com–ah te en theih a ni dawn a, 

A mamawh tan result bu lei theihin a awm bawk ang.

===================================================================

Nimin tlai  khan  hmeichhe naupang Lallawmkimi  kum 4 mi Tipa ami chu motor tai vangin a boral zui .

Tipa Express in a tarlan danin Hmeichhe naupang Lallawmkimi kum 4 mi lek hi an In kawt kawngpui chhak lama a u te awmna lama akal tur chu, chhuk zal deuh a, motor 407, MZ-07- 5167, C.Lalzawnkima (37) Lawngtlai Electtric veng nia insawi khalh, chak taka tlan chuan, hmu thut in kawng chhak lama motor aherh kawina lamah motor body hnung lam chuan ahmai ah hemin atlu tawp a,  Damdawiin panpuiin Lawngtlai lama refer ani a, mahse Lawngtlai an pan hmain a boral a ni.

Lallawmkimi hi Pu  H.Mankima te fanu neih chhun, an fa naupang ber niin  kumin a school, KG kal tan chauh a ni a. Motor neitu hi hmeichhe naupang pu te lam hnai ani a. Hmeichhe naupang ruang hi nizan ah tlaivarpui niin vawiin ah vuiliam a ni ang.

He thil thleng avang hian MTP Sub Hqrs Tipa kaihhruaina hnuaiah Tipa 'V' All NGO emergency meeting neih a ni a. Meeting chuan May ni 5, 2025 zan dar 10:00 atangin tiam chin awm lovin Lirthei bungraw phur, Tipa khaw chhungah tlan tlang phal ani lo tih an tarlang a, Rui chunga motor khalh lo tur leh Tipa khaw chhung leh dai bakah National Highway-54 ah te chak taka tlan tlang lo turin an ti bawk.

Rakhain, Myanmar lama sumdawnna, Salachhuah pan tur hian, Tipa kaltlang hian nitin motor te leh lian bungraw phur 70-100 inkar vel a tlan thin

=== = = = = ==============================================

Pu TBC Lalvenchhunga PAC member, chuan ZPM hian opposition bial hrekna emaw rulling bial vulh bikna thinlung pu hauh lovin Budget a hmang tih a sawi.

Nimina ZPM General Headquarter in Party Office ah chhung inkhawm an neihah thu sawiin Pu TBC Lalvenchhunga chuan, “Kalphung thar mipui Sorkarin ama puala Budget a pharh ve hnuah khairual thei ang berin hmasawnna a kalpui a, opposition bial hrekna emaw rulling bial vulh bikna thinlung pu hauh lovin Budget a hmang a ni tih hi mipuiten lo hria se ka duh hle a. Kan ramah rorelna tha leh langtlang Sorkar a awm theih nan Chief Minister Pu Lalduhoma kaihhruai Sorkar chuan thahnemngai taka hma lain, nikum lamah inrenchem kum kan puanga department hrang hrang atangin nuai 100 tel tak meuh kan hum thei a, hengte hi tul dangah daihzai takin kan hmang mek a ni. 

Kum upa mi 24,000 zetin Tar pension an lak thin pawh Rs.1,000 ah tihpun a lo ni ta a, an ni mai bakah rualbanlote leh Hmeithaite pension te pawhin thlakhatah Rs.1,000 chuang vek an lo la thei ta hi mipuite hamthatna tura Sorkar thawhrah a ni. Wildlife Workerte, Health Care hnuaia Nurse te hlawh kan tihpun leh hnathawktute hlawh duhsak taka kan han pek thinte hi inrenchem kan kalpui tang tang vang a ni., a ti.

Adviser to Chief Minister chuan, "Sawhthing chungchangah pawh ZPM hian a lo sawi ang ngeiin kuthnathawktute thar chhuah Sawhthing a theih tawpin a lei a, ram puma Sawhthing Market rate tlahniam leh harsatna hrang hrang hma chhawn chungpawhin theih tawp a chhuah a, a beidawn san ve lo. Intiam zet a ti leh si lo te ai chuan harsana karah pawh theih tawp chhuaha thutiam bawhzuitute hi mipuiten an hria a ni, hunt ha zawk leh ruahmanna fel zawk pawh kan la nei ngei ang. 

ALT Road chungchangah pawh Sorkar chuan CRRI  te ruaiin tha zawk leh tlo zawka siam dan tur an ngaihtuah mek a, vawiin mai ni lo nakin hun thleng Sorkar chuan a thlir a, ZPM Sorkar hian MLA thahnem ngai tak tak nei chhim lam mipuite hi angaihthah hauh lo a, hmalam hun thui zawk leh ruahmanna tha zawk nen ngaihtuahna a seng zawk a ni, a ti bawk.

==========================================

India leh Pakistan inkar boruak sosang zelah sorkar laipui chuan India- ram state engmeawzat chu naktuk may ni 7 hian security mock drill nei  turin a hriattir.

April ni 22 a Pahalgam a, Pakistan puih firfiakte chetna avangin India leh paksitan inkar achhe chho zel a, indo mai thei annih tak avangin Sorkar laipui chuan state engemawzat chu indo thulha awmdan tur security mock drill nei turin ahriattir a, hetianga sorkar laipuiin security mockdrill nei tura ahriattir hi kum 1971 hnua athlen vawi khatna ani a, kum 1971 khan India leh Pakistan indona avangin mock drill hi lo neih ani tawh bawk a ni. 

Mock drill lai hian air raid warning siren te tihrik a, civil mi leh zirlaite pawh anmahni, invenhimna atan, civil defence chungchang zirtir an ni bawk ang. Sorkar laipui chuan state thenkhat te chu an evacuation plan te update a, rehearsal nei turin a ti a, a tlem berah ram chhunga disrtrict 244 ah mock drill hi neih a ni ang,

Vawiin hian sorar laipui chuan Union Home Ministry kaihhruaiin mockdrill chungchang thutkhawm a buatsaih dawn a, state leh union territories te chief secretary te chu video conferencing hmanga tel tura tih an ni bawk.

Pakistan hian Line of Control ah zan 11 lai chu India sipai hmunte arawn kap tawh a, India pawhin na takin a chhang let thin a ni.

India chuan Kahsmir thil tleng hi chhan let ngei a tum a, nimin khan Prime Minister Narendra Modi chuan Defence Secretary Rajesh Kumar Singh a hmu a, darkar chanve aia tam an inkawm a, India in Pakistan achhanlet dan tur an sawi ngei rin a ni. A hma in Prime Minister hian Air Chief Marshal Amar- Preet- Singh bakah chiefs of the Army, Navy leh Air Force hotu dangte alo hmu tawh bawk a ni.

===============================================

Lirnghing vangin Burmaah mi 3839 thi tawh,an  pun zel rin a ni. 

                                                                      - Tahan Post

March ni 28-a Myanmar-a lirnghing vangin mi 3839-in nunna an chan tawh a, thite hi an pun belh zel thu Military council-ten May ni 3 khan an tar lang a ni. Myanmar ram Lirnghing vangin mi 5105-in hliam an tuar a, mi 101-te chin hriat loh an awm thu Military council-te record atanga hriat a ni. 

May ni 3 tuk khan Myanmar Fire Department-te chuan Mandalay khawpuia Sky Villa building chim atangin mipa ruang pakhat leh May ni 2 pawh khan hmeichhe ruang 3 an phawrh chhuah thu an tar lang a ni.

Lirnghing vangin Naypyitaw, Sagaing, Mandalay, Shan State telin region leh State 10-ah April ni 24 thleng khan chenna in 63854 a chhia a, mi 629206-ten hliam an tuar thu Military council-ten an sawi a ni.April ni 24 thleng khan ram chhung leh pawn atangin chhawmdawlna Kyats billion 115.876 chuang, US dollar maktaduai 2.437 chuang, Korea Won maktaduai 5, India rupees mtd 15, Thai bath mtd 2 leh Singapore dollar 3150 an dawng a, siam thatnaah an hman thu Military council-ten an sawi.

Mahse, tualchhunga lirnghing tuarte chhawmdawl leh siam that chunchangah hmuh tur mumal a nih loh thu tualchhung mite hnen atanga hriat a ni.