ZUNZAM NEWS ( 5.5.2025)

Kikawn TKP te an dincham hmangin an luangchhuak

Lunglei 5.5.2025 : Ṭhalai Kristian Pawl, Kikawn Unit, Lunglei te chuan May 5 2025 hi an  din champha vawi 18-na a ni a. He an dincham pual  hian programme pawimawh tak duan nimahse khawtlangah chhiat an tawh avangin inkhawm programme an hmang thei ta lo va, an project a an lo dah tawh angin Unit Rising Day pual hian tukin   zingkar ah khan Kohhran chhungkua te hnenah inchhungkhur mammawh ei leh in tur lehnthil hrang hrang semin an luang chhuak a ni.

Tun din hmunah TKP member hi 491  an ni a, Mipa 275 awmin Hmeichhia 216 an awm mek a ni.

=======================================================

Union Minister of State for Textile & External Affairs, Pabitra Margherita Mizoram tlawha lo zin chuan, Mizoram tiamin, hmarchhak state te hmasawnna ruhrel din kawnga tih hmasawn nan sum tam tak ruahman a ni a ti.

Vawiina Aizawla thuthar thehdarhtute a kawmna ah, Union Minister of State chuan hmar chhak state te chu leilunga a hausak bakah kutthemthiam lamah pawh theihna sang tak a nei tih a sawi a, hemi kawngah hian Ministry of textile chuan Puantah thin te tihhmasawn na tur hmalakna a duang chho mek tiin, Mizoram pawh hnam ziarang hausak tak a nih bakah Muga Silk tharchhuak tura theihna tam tak nei a ni a, Modi-a sorkar hnuaiah, Mizoram tiamin hmarchhak state te chu tihhmasawn zel an ni a ti bawk.

Minister chuan sorkar laipuiin inkalpawhna tha a ngai pawimawh a, a vawi khatna atan Mizoram chu state chhung hmun dangte nen rel kawng hmanga thlunzawm a ni dawn a ti a, sorkar hmasa nen khaikhinin, tuna sorkar chuan hmasawnna ruhrel din nan Budget pawh a letin tihpun a ni a ti a, hei bakah hian Mizoram khawthlang lama Indo-Bangladesh ramri-a Integrated Check Post leh Kawrpuichhuah khuaa kawngpui siam chu a rang thei ang bera hman theih a nih tur thu a sawi bawk a ni.

==================================================

Dungtlang Police-te'n methamphetamine quintals hnih chuang an man

Dungtlang Police-te chuan nizan (4.5.2025) khan Vanzau khua, Champhai District-ah methamphetamine kgs. 236.33 (tablets tablet 2,00,99,000) zet an man a, cheng vbc. 30.72 chuang man hua chhut a ni.

Police atanga thudawn danin, Dungtlang Police-te hian patrolling an neih laiin Thinghrangkawn leh Vanzau inkarah Bungzung pan mek bolero B/R No. MZ/01 G -7112 chu rinhlelh thil thuah an ti ding a ni. Bolero-ah hian a driver Laltanpuia (30), Champhai Vengthar nia inchhal bakah Vanropuia (27), Champhai Vengthar nia inchhal a chuang tel ve a, police-in Vanzau khua an panpui. Vanzau-ah hian thuhretu (witness) tur mi pahnihte hmuh laiin motor hi dap a ni a, hetah hian methamphetamine kgs. 236.33 zeta rit, tablet 2,00,99,000 hi man a ni.

Laltanpuia leh Vanropuia hi man an ni a, Dungtlang PS C/No. 17/25 dt.04.05.2025 u/s 22(c)/25/29 NDPS Act hmangin thubuai siamsak an ni.

==================================================

Liunglei May 5, 2025: MNF Senior Vice President, Dr. R. Lalthangliana chuan, Mizoram Universal Health Care Scheme chu sorkarin system felfai lo tak leh, mimal damdawi in leh sorkar hnathawkte rawn hmasa loin buarchuar takin a kalpui niin a sawi.

Vawiina MNF party inkhawm, Hnam Runa neihah Health Minister hlui, Dr. R. Lalthangliana chuan, sorkar kal tawhah MNF leh Congress te chuan sorkarna an chan tharin, sorkar hmasa lo kalpui tawh Mizoram Health Care Scheme chu harsa tak chungin an kalpui chhunzawm ve ve niin a sawi a, 

Hetihlai hian ZPM sorkarin Health Care Scheme thar Mizoram Universal Health Care Scheme a kalpui danah, rawn awm ngawih ngawiha ngaih, mimal damdawi in te leh sorkar hnathawk inzawmkhawm pawlte pawh rawn loin, system felfai lo tak leh buarchar takin a kalpui niin a sawi a, ZPM in scheme thar an ruahman chu sorkar laipui AB_PMJAY nen thuhmun reng, a hming chiah inang lo niin a sawi bawk a, kawng hrang hranga thlirhin ZPM health care scheme chu mipui tawrhna tur tam tak a awm nia a lan thu leh a inkaihhruaina ah sorkar chuan mipui hriat tur, thil thup a nei ngei nia a lan thu a sawi a, chu chu Aizawl Civil Hospital leh Zoram Medical College and Hospital-ah Emergency Case leh thih hlauhthawnawm bakah khum awm loh hun atan Emergency Certificate, mimal damdawi in pali-a damloten MR an Bill theihna tur dan a awm a ti a, hei hi sorkar chuan mipuiah a puang duh lo a, sorkar chuan damlo tanpui nge a tum, a tlem thei ang ber Bill tir tih chu a zawhna a ni, a ti bawk.