PRESS RELEASE NO 20 OF 9.06.2025.
"Ṭhalaite zingah Party ruihchilh ve lo, Party thliar ve lem lo an tam tawh" Biaksiamtluanga General Secretary, LDCC
Dt.9.6.25 : Lunglei District Congress Committee chuan Devotion & Political Session hun hmangin, Pu T. Lalrosanga Secretary, LDCC chuan a kaihruai a. Upa K. Lalzuithanga Vice President Lunglei North Block-I chuan hunserh a hmang bawk.
Political Session a thusawitu Pu Biaksiamtluanga General Secretary, LDCC chuan Congress Party chu zawi zawia insiamṭha mekin, Party pawn lam mite pawhin thurawn an pek chhoh leh mek thu a sawi a. Kum 5 Opposition a an ṭhut chhunga insiamṭhat lam aia mahni lam ṭha intihnain hmun a chan tam zawk avangin kum 2023 ah chiang zawka inenletna hun pek an nih thu sawiin, he hun hi ṭangkai taka kan hman chuan mipuite thinlungah thu kan sawi thar leh thei ang a ti.
Pu Biaksiamtluanga chuan Ṭhalaite zingah Party ruihchilh ve lo, Party thliar ve lem lo an tam tawh thu sawiin, mi ṭha satliah ni lo, belhchian dawl an zawng tawh zawka a hriat thu sawiin, kan hma lawkah inthlan hrang hrang kan hmachhawn leh dawn a, chung hunah chuan mipuite'n vote min pekpui theih tur kan thehchhuah thiam a ngai ang a ti a, Party thli tleh ringawt avanga thlantlin te hian belhchian an dawlzui kher lo thei a ni tiin, mihring rintlak leh rinawm kan thlanchhuah a ngai a ni a ti. A sawi zelnaah, inthlang ram kan nih anga mipui tam zawk rilru put hmang hrethiam tura keimahni lam kan luanhniam a ngai a ni a ti bawk.
Pu Biaksiamtluanga chuan, Party dang ṭhat lohna leh fel lohna kan sawi rual hian, miin kan fel lohna leh ṭhat lohna an sawi hian insiamṭhat nana kan lo hman thiam zel a ngai a ni tiin, kha leh chen Sorkarna fawng kan lo vawn chhung khan thil ṭha tam tak kan ti a, chhuan tham pawh tam tak tih kan nei, mah se, mipuiin min hnawl tlat. Min hnawl hian chhan a nei tih hria ila, kum 2028 MLA inthlan lo awm turah hi chuan Candidate chungchangah pawh mipui sukthlek mil deuha kan kal thiam a ngai a ni, a ti.
Issued by Media Deptt, LDCC.
=======================================
"...ZPM party hi enchhin tura thlan enchhin mek an ni. An thiltih leh an rorel danah mipuiin kum 2028 ah an chungah ro an rel ve dawn..." -Pu Zodintluanga, Adviser, MPCC.
Vawiin ni 9.6.2025 (Thawhtanni) hian MPCC Adviser Pu Zodintluanga chuan Hrangturzo bial chhung Keitum, Khawlailung, North Vanlaiphai leh Cherhlun khuate a tlawh a. Party mite nen hun an hmang. 
File Pic
MPCC Adviser Pu Zodintluanga chuan, Sorkar tuma an au hla berah Mizorama sorkarna lo siam tawh zinga party pahnih Congress leh MNF te chu chhe leilet derah puhin ZPM chuan kalphung thar zuarin Mizoram mipuite chu enchhin turin an ngen a, ZPM sorkar hian kum hnihna an hmang mek a, an thiltih leh an rorel dan hi Mizoram mipuiin an thlir a, an hmu chho mek a. Kan ti ang an tih an tih leh si loh te, kan ti ve lo ang an tih zawng zawng an tih te hi Mizoram mipui hi a hretu an ni a. Heng zawng zawng hmang hian kum 2028 MLA inthlanah mipuite'n an chungah Vote hmangin ro an rel ve thung tawh dawn a ni, a ti.
Pu Zodintluanga chuan, Congress-in kum 10 kan sorkar chhungin Mizoram tana ram leh hnam rotling sulhnu kan ngah hle a, sorkar sawisel bo erawh kan ni lo, sawisel bo hi he khawvelah hian awm pawh a awm thei lo tih hretu vek kan ni tih sawiin, MNF kum 10 sorkarin a lo sawpchhiat vek tawh Tuirial Hydel Project chu kan hotupa Pu Lal Thanhawla chuan thar thawh lehin bul a tan tha leh a ni hawt a, kan sorkar chhunga hawn a ni nghe nghe a, chutiang bawkin Falkawna State Referral Hospital chu kalpui ngaihna hre lovin ar in atan te MNF khan an hmang a, Congress kan sorkar chhungin theihtawp chhuahin tuna kan President Pu Lal Thanzara hova hma lain, doctor zir theihna tur medical college changtlung tak siam a ni a, kan faten kan kawtkaiah ngei Doctor an zir thei a, nunna tam tak chhanchhuahna atan Pathianin hmanruaah a hmang chho ta a ni, a ti.
Pu Zodintluanga chuan, NLUP kan sem ang kan ti a, Mizoram pum kan tuam chhuak a, vawiin ni thlengin rahbi tleu laklawh tawh NLUP hmanga eizawnna ngelnghet nei mi tam tak Mizoram chhungah an awm a ni. Congress sorkar hunlai vekin India hmarchhak state dangte pawhin tihngaihna vak an hriat loh khelmual tha, phul lem phah Aizawl sipai lammualah kan din a, district thenkhatah te pawh kan din zui a ni. Congress hunlai vekin India ram sport programme pawimawh Catch Them Young chu uar leh changtlung taka kalpui a ni a, khatih hunlaia naupang infiamna an kalna tur line-a kan tuaihriamte chu tunah India ramah a ber ber an ni chho fur tawh tih sawiin, Sorkar hnathawkte dikna leh an zahawmna vawnhim sak kawngah Congress sorkar khan theihtawp kan chhuah a, vawiin thlenga sorkar hnathawk, a lian a te te'n min hrilh fo chu 'In hunlai khan kan lo zalenin, thawhpui in lo nuam ber a ni' a ti bawk a ni.
ZPM sorkar beihna emaw, sawiselna emaw sawi ka tum lo, Mizo tawng hmanlar tak kan nei a "Buichhia chu laih lohvin a inpuang" tih a ni, anmahnia an inpuan kher loh pawhin social media lamah nitin zantin ZPM sorkar rorel dan leh chetdan kan hmu a, chu chu puanchhuah dum dum ni lo mahse mi zawng zawngin kan kutzungtangin kan phone ah, mahni inah, hnathawhna hmunah te, thlamah te kan hmetchhuak thei vek tawh a. A taka video te, news te hmu a, chhiartute hian ngaihdan an siam tawh dawn a. Congress Party ah bawk mipuiin beiseina lian tak an nghat chho leh tawh a, Mizoram mipui tana rorelna tha leh hmasawnna thlen turin kan inbuatsaih a ni, a ti bawk.
Pu Zodintluanga hi Pu J. Lalliankima, Executive Member MPCC leh C. Lalrochhara, General Secretary MPYCC te leh bialchhung party hruaituten an tawiawm a ni.
Comments
Post a Comment