MZP Hqrs.Lunglei chuan Mizo Zirlai Ti Tha Chawimawina hun hmang

Nimin chawhma dar 11:00 a.m khan MZP Hqrs.Lunglei chuan Mizo Zirlai Ti Tha Chawimawina hun Convention Centre, Lunglei-ah a hmang a,  Pu Lalfakzuala Treasurer MZP Hqrs.:Lunglei in kaihruaiin Pi K. Lalrintluangi DEO Lunglei chu khuallian a ni.

Khuallian Pi K. Lalrintluangi DEO Lunglei in thusawiin MZP te’n chawimawina an buatsaih chu lawmawm a tih thu leh chawimawina dawng thei zirlai naupangte leh an nu leh pate lawmthu a hrilh a. Zirlai naupangte chu lehkha an zir chhante in zawt nawn thin turin a chah a, zirlai zir tur an ni tih in hre chiang turin a chah bawk a ni. Chhawr tlak a an zirlaite zir tur leh an thiamna hmanga khawvel hmachhawn ngam tura chahin thatchhiat avanga tunlai thiamna hrang hrang Artificial Intelligence(AI) ang chi te chu hmang uchuak lo turin a chah bawk.

MZP Hqrs. Lunglei President Pu Johan Hmangaihzuala Ralte chuan thu sawiin Zirlai naupangte chu an zirna leh an thil tihna kawng hrang hrangah taima tak leh malsawm tlak a thawk turin a chah a, sorkar hna in min daih tawhloh avangin thawh hreh neilo tur leh hna hniam a awmlo ani tih hre turin zirlai naupangte chu a chah a. Ai a upa zah thiam tur leh ruihhlo laka fihlim turin a ngen nghal bawk a ni.

Pu K. Beihmotaosa Addl. SP Lunglei pawhin thu sawiin social media leh AI chu Police in an buaipui nasat zia thu a sawi a, zirlai naupangte chu lehkhabu a rintlak zia leh social media hmang tam lo turin a chah .

Dr. C. Lalremruata Vice President MZP General Hqrs. Aizawl pawhin  thu sawiin HSLC result hnuhnung berah Myanmar atanga raltlan top-10 a a lang thei anih chuan zirlai naupang mahni in lum atanga nuamsa taka zirte chuan an theih ve thu a hrilh.

Mizo zirlai ti tha chawimawi ah hian Lunglei Town area huam chhunga HSLC leh HSSLC-a distinction passed te, MPSC hnuaia combined competitive exam a hlawhtlinna chang tharte leh MZP Hqrs. Lunglei hruaitu hlui zirna kawnga hlawhtlinna changte chawimawina hi hlan an ni a. An ni bakah hian Govt’ Leitlangpui HSS ‘Arts Stream’ te chawimawina hlan an ni a, DENGRO Award HSLC Top-10 a lang hnenah hlan a ni a. DENGRO Award hi Lunglei Town area huam chhung school atanga HSLC top-10 a lang zinga ti tha ber hnenah hlan thin a ni.