Nimin khan Govt Aizawl College chuan an college kum 50 tlin lawmna, Foundation Day an College Campus, Mualpui-ah an hmanga, CM Pu Lalduhawma khuallian a ni. Pu Duha chuan duhsakna hlanin, Campus thar in nei a, hmasawn zel turin mamawh tam tak in la nei tih kan hria a.
Sorkar chuan kan tih theih apiang kan ti zel dawn tiin, Zirna sang zawk atana sorkar hmachhawpte sawiin CM chuan, Mizoram State University din tumin hma kan la a. Kum 2036 hma a lo neih fel hman kan tum a. Administrative Building hi Luangmuala sak kan tum.
A bul lo tantu tur thawktu pawh kan la thuaiin a rinawm. Mizoram Engineering College, Lunglei Pukpuia mi saw a taka function-tir kan tum a. Kum 2026 Academic Year atanga zirna tan tumin thawktu thar mi 63 kan la dawn a ni. A hmunhma thawm that nan tun hnai khan Rs. 2541.19 lakh kan sanction bawk. India ramah hian zirna in tha bik, khawvel huapa mithiam ber ber chherchhuak thin ‘Institute of National Importance’ tia koh kan nei a.
Heng zinga Mizoramin kan neih ve NIT Mizoram Campus hi Lengpuiah kum 2009 khan sak tan a ni a. Forest Clearance nei lova sak a nih avangin kum 2017-ah hna zawng zawng tihtawp a ni a. Rs 20 crore chuang chawi tura tih kan ni zui a. Mizoram tana NIT hlutzia kan hriat avangin kan sorkar veleh kan umzui nghal a.
Central lamah kan lei chawi tur hi ngaihdam kan dil a, crore 10 chuang min ngaidam a. A bak kan pek turte chu kan pe vat a, Campus sak hna hi chhunzawm theih a ni leh dawn ta a ni. Mizoram Polytechnic, Lunglei pawh saw, a ram neitute phalna la lova sak a lo ni a. He harsatna pawh hi chinfel kan duh a, hma kan la mek a ti.
Govt. Aizawl college hi kum 1975 ah khan mi tlawmngaiten an din a, kum 1989 ah sorkarin a la zui ta a. NEHU hnuaia college langsar tak a ni zui ta a ni. Tunah hian BA, BCom leh MA Edn zirna awmin Mizoram sorkar college zinga zirlai ngah ber an ni a, zirlai 1944 an awm mek a ni.
Comments
Post a Comment