Hnahthial District Consultative Committee, District Level Review Committee leh District Level Security Committee thutkhawmna neih a ni

 October to December 2024 quarter atan Hnahthial District Consultative Committee, District Level Review Committee leh District Level Security Committee thutkhawmna neih a ni

Lunglei  28th February, 2025: Hnahthial District Deputy Commissioner, Pi Rita Lalnunmawii Pachuau kaihhruaiin vawiin khan DC Meeting Hall No-I ah District Consultative Committee (DCC), District Level Review Committee(DLRC) leh District Level Security Committee(DLSC) review meeting neih a ni a. Pu R. Lalmalsawma, Lead District Manager, Lead Bank Office, Lunglei chuan October - December 2024 quarter chhunga DCC,DLRC & DLSC thlirlet tur te chu chhawp chhuakin hmalak dan tur te rel zui a ni a. Potential Linked Credit Plan, 2025-2026 chu Bawrhsap chuan a tlangzarh nghal a ni.

Thutkhawmnaah hian October - December quarter leh July-September quarter chhunga bank hrang hrang - SBI, MRB leh MCAB hmalakna leh an dinhmunte khaikhinna neih niin Oct-Dec quarter chhunga target hlen chin te thlir hona neih a ni bawk a.

PMSBY leh PMJJBY atana saturation campaign zawh fel tawh niin PMJJBY atana enrollment target 182 chu khum niin 16.11.2024 thleng khan enrollment ti 335 an awm a. Target hi 84.07% in khum a ni. PMSBY ah hian enrollment target 207 niin 16.11.2024 thleng khan enrollment ti 283 awmin target hi 36.71% in khum a ni bawk.

Loan rul tha lo, Non-Performing Assets hi September,2024 quarter nen khaikhin chuan Non Priority Sector tih lohvah chuan a tlahniam vek a. 2% hi pawilo chin a ngaih niin MSME tih lovah chuan 2% aiin a hniam vek a ni. Financial Literacy Camps hi SBI Hnahthial, MRB Pangzawl, MRB S Vanlaiphai leh MCAB Hnahthial te chuan vawi thum (3) theuh nei hmanin MRB Hnahthial chuan tun Oct-Dec quarter chhung khan vawi kua (9) an nei hman a. A belhkhawmin FLC ah hian mi 739 an kal a ni.

SBI, MRB leh MCAB Cash Deposit Ratio chu chawh rualin 64.74 a ni a. September quarter nen khaikhin chuan 1.94 in a pung a ni. Non Priority Sector atana credit disbursement chu cheng nuai 1324.25 niin quarter hmasa nen tehkhin chuan cheng nuai 588.62 in a pung a. Target atanga chhut in 39.67% hlen chhuah a ni tawh a ni. PMEGP, PMMY leh PMJDY hnuaia hmalakna te pawh a pung (increase) lam vek a ni a. PMEGP hnuaia loan pek chhuahte chu an lo pun theih nan Village Council lamah pawh zirtirna pek that a tul thu Bawrhsap chuan a sawi a ni.

A tlangpui thuin September Quarter nen khaikhin December quarter chhung khan hmasawnna hmuh a nih thu Pu R. Lalmalsawma, Lead District Manager, Lead Bank Office chuan a tarlang a. Hei hi lamawm a tih thu sawiin tan la zel turin bank thawktute chu a fuih a ni.

Potential Linked Credit Plan(PLP) 2025-26 tlangzarh tak hi district hrang hrang tana credit potential assessment siamna a ni a. Kum 2025-26 chhung hian Hnahthial District tan Sector hrang hrang thlirin Total Priority Sector hi cheng nuai 5002.97 (Rs.5002.97 lakhs) ni turin PLP Projection chuan a pe a ni.

Thutkhawmnaah hian Addl DC, SDPO, DAH&Vety Officer, DHO, DIPRO, DFDO leh AGM NABARD bakah Hnahthial District chhunga SBI, MRB leh MCAB branch manager te an tel a ni.

National Day ah hian Science Centre Zohnuai, Lunglei tlawhtu an awm lo

 Lunglei 28/2/2025: National Science Day chu rampumah hman ni mahse Lungleiah chuan a hranpa in hman a ni lo. Science Centre, Lunglei Zohnuai a Curator Pu Mawia chuan a sawi danin vawiin National Day ah hian Science Centre tlawhtu an awm lo tih a sawi a, hetihrual hian kumtluan a hman tur a tih anih vangin sikul tan leh hunah chuan program engemaw tak chu hman a ni ang a ti. 

Tun dinhmunah sikul naupang sing 2 vel chuan an tlawh tawh tih sawiin a tlawh man hi siam a ni a, luh man sikul naupang tan  Rs 10 niin planetarium tlawh nan Rs 30 mi pakhatah lak a ni a ti. Mipui vantlang tlawh duh te luhman ah Rs 20 zel la in planetarium tlawh tur ah Rs 50 zel lak a ni bawk a ti.Thawhtanni leh Sunday khar zel a ni a, Christmas leh Good friday khar bawkin abak zawng chu kumtluanin holiday ah pawh hawn a nih thu a sawi . Staff hi a nghet in pakhat Curator chiah a la awm a,a nghet lo mi 4 awm bawkin tunah hian a nghet lakna tur AA a chhuak tawh tih a sawi

Kan elpui awmchhun chu ZPM chauh a ni leh tawh - Zoramthanga, MNF President

Lunglei  27.2 2025 : MNF President Zoramthanga chuan February ni 25-27 chhung hian Champhai, Samthang leh Khawzawl khua te a tlawh a. Heng huna a thusawinaah hian an elpui awmchhun chu ZPM chauh a nih tawh thu a sawi.

MNF President chuan, "Tunhmaa MNF-in kan ngam loh lian ber chu Mizo Union an ni a. Mahse, an ral vek tawh. A hnua kan ngam loh thin chu PC Party a ni leh a, tunah chuan an ral leh tawh. Congress pawh er tham an awm tawh lo, anni hi Central (Delhi)-a innghat an ni a, khulam an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni leh tawh," a ti.

Zoramthanga chuan, "Kum 2023 inthlanpuiah engati nge MNF kan tlak? Engati nge ZPM an chak viau kan ti a. Hei hi, Pathianin tum a neih vang a ni tih hi kan pawm a ngai a. Chu chu kan intawng thlamuanna emaw, kan inhnemna tawngkam a ni lo. ZPM hi Pathianin Sawrkar tir a duh chhan hi kan ngaihtuah zawk tur a ni. ZPM chu Tiau vut chunga In sa, Chirhdiak chunga In sa ang lek an nihna zawng zawng kan hrechiang tur a ni," a ti.

MNF President chuan, "Kalphung thar an ti a, Mahse, kum khat chhung lek an sawrkarah pawh thil mak leh mipui beidawnna, sawrkara la thleng ngai lo leh tih ngai loh a thleng tam em em!. Heng zawng zawng hi chung lamin ZPM nihphung dik tak mipuite hriatchian tir min tumna hmanrua a ni. Engkim zir lawk leh hrechiang sa, 'research base'-in kan kal dawn, an ti a. Sawhthing lei dan atang ringawt pawhin, an hotupa ber a mangang nghal a, inkhualtelem sawrkar an nih dan zawng zawng kan hmu fiah chho zel a, îtawm bera insawi kha a letling thawk an nih zia kan hmuchiang zel dawn a ni," a ti.

"Village Council leh Local Council inthlanah reng reng, Congress sawrkar leh MNF sawrkar kan chak vung vanglai chuan VC/LC kan la fai deuh vek zel a. ZPM ah chuan an phur ber laiin thla 6 zetin inthlan an sawn hma a, chuti chung pawhin ruling laia che chhe ber sawrkar an ni, a ti. Kal ngaihna an hriat loh luatah Zu zawrh nge, BJP zawm tur..? tih hi an bûk vel mai mai a ni ber tawh a. Heng hian MNF lo chu he ram tana ding chang leh tur a awm lohzia a entir a ni. Pathianin a chanchintha hril a, puang chhuak tur leh he rama rorel leh tur hian MNF hi a hun takah min la chhuak leh dawn a ni," Zoramthanga chuan a ti bawk. - Source :  Zalen

MNF President in an party Worker te a WARNING

 Lunglei 27.2.25 : Vawiin khan MNF Sub. Hqrs te chuan Lunglei  khawpui  chhunga Assembly Contituency 4 te  chu  an party tan  bial ruak a ni an ti.

"Pu Vanlalhmuaka President MNF Sub Hqrs Lunglei chuan Lunglei khawpui chhung AC pali Lunglei North, South East leh West AC bial te chu bial ruak a nih thu a puang nawn a. Block, Group Unit leh mimal ang pawhin candidate tur lo sawm tu tan mah a thian loh thu a sawi a. .A hunah kan hotuten candidate tur chu an la ruat mai ang.  Tute pawh lo ding se, bial him, MNF in MLA kan neih ngei ngei theih theih kan vaiin theih tawp chhuah a tanlak a tul zia a sawi. "  

Vawiin 27.2.2025 chawhnu 12:30  khan Lunglei West AC MNF South Block Office Bearer meeting Venglai Hall-ah neih a ni a. He hunah hian Pu Vanlalhmuaka President MNF Sub Hqrs Lunglei chuan, sawm a nih angin  thu a sawi a. Pu Hmuaka chuan MNF hi ZPM a chhiat avangin a tha ngawt lova, hruaitute atangin kan insiam that a ngai a. Hruaitute chuan member memberte aiin kan in pekna a sang zawk tur a ni a, Kan thawh lehna tur chuan Nationalism (Zozia), 'kei kei ti lo a, nang zawk' tih nun, midang tana inchhit ralna nun hi a ni. Chuvangin kan rilru tal hi a hausak a ngai a. Unit inthlan tur chungchangah Khua/Veng tam tak bih chian ngai a awm zui dawn a.. Unit 2 pakhata dah, emaw unit 1 pahniha dah te, In thlan that loh zawk rinna unit te kan neih hlawm a rinawm a, heng ho hi Block hruaitu te nen uluk takin thlir ho a ni ang. Hei hi information anga ngaih nghal tur a ni, a ti bawk.

MIZORAM STATE AYUSH SOCIETY LEH LUNGLEI DISTRICT FOOTBALL ASSOCIATION TEN THAWHHONA THUTHLUNG AN ZIAK

Dated Lunglei : the 27 February 2025: National AYUSH Mission Health Programme Sports Medicine hnuaiah, Mizoram State AYUSH Society leh Lunglei District Football Association (LDFA)-te chuan Vawiin chhun dar 12:00 khan Pi Lalrinpuii, Health Minister kaihhruainain, Health Minister Office, MINECO, Khatla-ah thawhhona thuthlung an ziak.

Thawhhona thuthlung hi Mizoram State Ayush Society aiawhin Pi Sangchhin Chinzah, Chairman, Executive Body, Mizoram State, AYUSH Society leh LDFA aiawhin Pu PC Lalramnghaka, President, Lunglei District Football Association-te chuan an ziak a. National AYUSH Mission, Mizoram hotute leh Lunglei District Football Association hotute chuan an tawiawm bawk a ni.

He thawhhona hnuaiah hian Mizoram State Ayush Society chuan Lunglei District Football Association hnuaia players te hnenah Stress Reduction atan exercise chi hrang hrangte chu mithiamte nen zirtirna an pe thin anga, tournament a awmin Medical Support an pein, AYUSH damdawi hmangin a theih chin chinah a thlawnin an enkawl thin dawn a ni.

Mizoram State AYUSH Society hian Sports Medicine Programme hnuaiah Sports discipline  hrang hrang hlawhtling takin an lo thawhhopui tawh thin a, Chung zinga langsar zualte chu, – Aizawl Football Club, Mizoram Badminton Association leh  Mizoram Basketball Association te an ni.

 

Lungleiah One Nation One Helpline Rally buatsaih a ni.

 Lunglei, 2025 Ramtuk thla ni 27: Vawiin khan Lungleiah India ram puma harsatna tawk, ṭanpui mamawhte'n ṭanpuina dila a thlawna an biak pawh theih tur helpline number pathum - 112, 181 leh 1098 te mipuite hriata puanzarna atana kawng zawh, "One Nation One Helpline Rally" buatsaih a ni a, Sr CMO office kawt aṭanga Lunglei Police Station thleng thuziak kengin kawng zawh a ni.

Lunglei District Additional Deputy Commissioner Pi Rochuangkimi Khenglawt chuan kawng zawh turte hi a vai liam a. Ṭanpuina mamawhte tana helpline number pathum chu Lunglei khawpui chhungah mipuiin an hmelhriat a, an hman ṭangkai theih nan kawng zawh chu buatsaih a nih thu sawiin, naupang, hmeichhia leh mi tu pawh harsatna tawkte tan helpline number chu eng tik lai pawha biak pawh theih reng a nih thu a sawi a. Mipuite chu harsatna tawk, ṭanpui ngai an hmuhin, anmahniin an ṭanpui thei lo a nih pawhin helpline kal tlanga a ṭanpui theitute hnena thlen chu ṭanpuina kawng khat tho a ni tih hre tur leh helpline chu hman ṭangkai zel tum turin a chah a ni.

Kawng zawh puala inkhawm tawi buatsaih hi Lunglei District Hub for Empowerment of Women (DHEW)-a Account Assistant Pu R. Lalsanglura'n a kaihruai a. Kawng zawh tawpa a kharna hun buatsaihah Lunglei District Additional Superintendent of Police Pu K. Beihmotaosa chuan rikrum thila harsatna tawkte tana biak pawh theih tur emergency response support system (ERSS) helpline no. 112 chungchang a sawi fiah a. 112 hi India sawrkar Home Ministry hma laknain kum 2022 aṭanga kalpui ṭan a nih thu sawiin, police, fire, medical, disaster leh rikrum thil hrang hranga harsatna tawkte tan hman theih a nih thu a sawi a. 112-a harsatna thlente chu Aizawla State Data Centre-ah lut phawtin, chuta ṭang chuan district data centre-ah thawn chhawn leh ṭhin a nih thu sawiin, hemi pual hian call dawnna leh hnu chhui zuina tur Lungleiah tablet 3 leh Bunghmun, Lungsen leh Tlabungah te tablet 1 ṭheuh dah a nih thu a sawi a. 112 hmangin Lunglei District-ah case pakhat a awm tawh tih tar langin, 112 hmet hman lote tan smartphone-ah a power button rang taka vawi 3 hmehin 112 a in-dial nghal thei bawk tih a sawi a. Play Store aṭangin "112 India" mobile app download tur a awm bawk tih sawiin, himna atan mahni phone-ah "112 India" app hi kawl vek turin mipuite a chah a ni.

In chhung khur leh khawlaia naupang harsatna tawk, ṭanpui ngaite tana biak pawh tur, child helpline 1098 chungchang chu Lunglei District Child Protection Unit-a Child Helpline Unit Counsellor Pu Robin Lalramnuama'n a sawi fiah a. Child helpline 1098 chu kum 2023 aṭangin Mizoramah hman ṭan a nih thu sawiin, naupang kum 18 hnuai lam ṭanpui leh ven him ngaite tan eng tik lai pawhin, balance nei lo pawhin a biak pawh theih tih a sawi a. Child helpline kal tlang hian case 224 dawn tawh a ni tih a sawi.

Hmeichhia hleilenna leh harsatna tawkte tana biak pawh tur, women helpline 181 chungchang chu Lunglei One Stop Centre-a Centre Administrator Pi Laldanmawii'n a sawi fiah a. Women helpline 181 hi kum 2016 aṭangin Mizoramah hman ṭan a nih thu sawiin, hmeichhe harsatna tawk leh hleilenna tuarte'n emaw, an ai awhin emaw helpline hi biak pawh theih niin, a betu nihna chu thupsak tlat a nih thu a sawi a. Hmeichhia harsatna tawkte ṭanpui an nih theih nan ṭanpuitu an awm thu hi inbengvar a, infinchhuah ṭhin a pawimawh tih sawiin, Serkawna Baptist Higher Secondary School bula One Stop Centre chu hmeichhe harsatna tawk, a mamawhtute tan pan theih reng a nih thu a sawi bawk.

One Nation One Helpline Rally hi hmeichhe naupangte chawi kanna tura hma lakna, Beti Bachao Beti Padhao (BBBP) scheme-in kum 10 a tlin puala buatsaih niin, kawng zawhah hian Women & Child Development hnuaia DPO, DCPO, DHEW leh OSC-a thawktute, police-te, official dangte leh Electric Veng Local PYD member-te an tel a. Lunglei DHEW District Mission Coordinator Pi K. Lalrinawmi'n lawm thu sawiin hun a khar a ni.

Lunglei District-ah 3rd Quarter 2024-25 chhungin bank-te'n Credit/Deposit Ratio zaah 71.69 an nei.

 Lunglei 27.2.25 : Lunglei District a Bank te hnathawh thlirletnaa tarlan anih danin Lunglei District-ah 3rd Quarter 2024-25 chhungin bank-te'n Credit/Deposit Ratio zaah 71.69 an nei. 

Lunglei District Consultative Committee (DCC), District Level Review Committee (DLRC) leh District Level Security Committee (DLSC), Addl Deputy Commissioner Pi Rochuangkimi Khenglawt hova thutkhawma tarlan anih danin Lunglei District-ah 3rd Quarter 2024-25 chhungin bank-te'n Credit/Deposit Ratio 71.69% an nei tih tarlan a ni a. 

Lunglei District chhunga bank-te'n loan an pek chhuah dan tur Annual Credit Plan (ACP) ruahman atangin bank-te hian Priority Sector hnuaiah 60% leh Non-Priority Sector hnuaiah 110.25% loan an pe chhuak tawh a. Self Help Group 43 hnenah cheng nuai 85.5 loan pek chhuah niin, KCC hnuaiah crop loan cheng nuai 2,016.37, Animal Husbandary loan cheng nuai 1,295.85 leh Fishery loan cheng nuai 4.67 pek chhuah a nih bakah, mi 47 hnenah PMEGP loan cheng nuai 181.15 pek chhuah a ni bawk a. Bank hrang hrangte'n Financial Literacy Campaign vawi 33 an neih thu tarlan a ni bawk.

Pu V. Malsawmtluanga Lunglei High Powered Committee (HPC) Vice Chairman in YMA Futsal hmawr a bawkpui

Lunglei 27.2.25 : Nimin chawhnu khan Lungleia C. Thuamluaia Mualah Lunglei Sub-Headquarters Young Mizo Association (YMA) buatsaih HPC Inter-Branch YMA Futsal Tournament 2025 hmawr bawk niin, Lunglei High Powered Committee (HPC) Vice Chairman Pu V. Malsawmtluanga'n a hmanpui.

Lunglei HPC Vice Chairman Pu V. Malsawmtluanga chuan Lunglei District thalaite'n infiamna leh kawng hrang hranga hma an sawn theih nan HPC kal tlangin theih tawpa hma lak tum a nih thu sawiin, infiamna, zirna, zai leh rimawi lama intihsiakna leh inelna hrang hrang sponsor tawh leh sponsor tura hmachhawp eng emaw zat a awm mek thu a sawi a. Sponsorship kal tlangin Lunglei District mipui leh thalaiteah thran harhna a thlen an beisei thu a sawi.

HPC Inter-Branch YMA Futsal Tournament 2025 hmawr bawkna hun hi Lunglei Sub-Headquarters YMA Sports Committee Vice Chairman Pu J. Lalmuankima'n kaihruaiin, Sports Committee Secretary Pu PS Lalngaihzuala'n report a pe a. Sub-Headquarters YMA Secretary Pu Zothanzuala Hnamte pawhin thu sawiin, Sports Committee Chairman Pu Francis Lalnuntluanga Ralte chuan lawm thu sawiin hun a khar a ni.

He tournament-ah hian Lunglei HPC chu main sponsor niin, Lunglei DRDO office hnuaia Watershed Yatra Campaign chu co-sponsor an ni a. Lunglei Sub-Headquarters YMA hnuaia YMA branch 20 atrangin mipa  team 28 leh hranghlui (veteran) team 12 an chhuak a. February ni 24, 2025 atang khan C. Thuamluaia Mualah khelh tran niin, a vaiin match 38 khelh a ni.

Mipa final-ah Chanmari Branch chuan Serkawn Branch hnehin an champion a. Veteran final-ah Electric Veng Branch chuan Bazarveng Branch hnehin an champion thung a. Mipa champion team hian trophy leh pawisa fai Rs 20,000/- dawngin, runner-up hian trophy leh Rs 15,000/- an dawng a. Veteran-ah champion-in trophy leh Rs 15,000/- dawngin, runner-up-in trophy leh Rs 10,000/- an dawng thung a ni.

Men's Fair Play Award chu Farm Veng Branch-in dawngin, Veteran Fair Play Award chu Electric Veng Branch-in an dawng a. Fair Play Award hian trophy leh pawisa fai Rs 3,000/- a keng tel a. Hei bakah hian mimal lawmman - best player, top scorer leh best goalkeeper lawmman te siam a ni bawk.

 

Luangmual - Vaisam inkar kawng tha tawk lo YMA Sub Hqrs Lunglei hruaituten an en.

 Lunglei 27.2.25 : Luangmual - Vaisam inkar kawng PMGSY kal tlanga thawh mek, hnathawh tha tawk lo ni a lang video tunhnaia darh chu enfiah turin nimin khan YMA Sub Hqrs Lunglei hruaitute an kal.

YMA hruaitute rual hian Pu SR. Lalramthanga Sr. EE Lunglei Road Division I, Pi Catherine Lalrindiki SDO Lunglei Road Division II, Pu R. Lalrindika JE Road Division II leh kawng siam hnathawktu VRS. Construction Pvt. Ltd. te an kal bawk a ni.

Kalkawnga hnathawh tha tawk lo ni a lang te an en hnuah kawngpui laih leh tunhnaia video thlalak darh chungchangte Vaisam ah sawiho a ni a. He sawihona hun hi Pu K. Lalfakzuala President YMA Sub Hqrs Lunglei chuan a kaihruai a. Inkawmhona ah hian Vaisam VC, Vaisam Branch YMA, Chithar VC, Chithar Branch YMA leh Vaisam Group YMA te an tel a ni.

Vaisam leh Chithar aiawh atang hian zawhna engemaw zat an zawt a. An zawhna te hi VRS Construction leh PWD ten an chhang a ni. Zawhna hrang hrangte inhrilhfiah a nih hnuah hetiang hian ruahmanna siam a ni.

PMGSY chu March ni 31, 2025 a titawp vek tur a National Rural Infrastructure Development Agency (NRIDA) under MoRD, GoI in a tih avangin, Luangmual - Vaisam kawng hnathawh mek pawh hi hun tiam chhunga thawk zo tura inbuatsaih a ni a. Chutiang anih avang chuan kawng siam hna thawktu, VRS Construction te hian hun tiam chhunga tha taka zo turin thawk se an ti a. Kawng siam hnathawh chu uluk zawkin PWD lamte pawhin vilpui se. Tuna hnathawh tha tawklo ni a lang, mipuiten an lo tih khawh te chu hnathawh zawh a nih hnuah Contractor in siam tha leh sela. A siam thatna tur chu security deposit atang ni lovin contractor-in a ma pawisa in siam se an ti. Hnathawh tha tawk lo ni a lang, mipuiten an khawh bak chu hmundangah leh eng hunah pawh lo tihkhawh belh tawh lo se an ti bawk.

YMA hruaitute chuan kawngpui tha a awm theih nan contractor te chu theih tawp chhuah turin an ngen a. Contractor-te an hnathawhna a harsatna an tawhin YMA te chu tanpuina hna thawk tura an inhuam thu an sawi a ni.

YMA Sub Hqrs Lunglei atang hian Pu K. Lalfakzuala President, Pu K. Vanlalhruaia Treasurer, Pu K. Lalhmingliana Fin. Secy. leh Vig.& Monitoring Committee te an kal a ni.

Chief Minister Pu Lalduhoma leh Dr. Vinod Kumar Paul, Member, NITI Aayog ten meeting an nei.

 

Lunglei 27.2.25 : Nimin tlai khan Aijal Club-ah Chief Minister Pu Lalduhoma leh Dr. Vinod Kumar Paul, Member, NITI Aayog ten meeting an nei a. Mizoram sawrkar Council of Ministers, official pawimawh leh NITI Aayog officials pawimawh te an tel.

Chief Minister chuan, Dr. VK Paul in min rawn tlawh hi vannei kan inti a, India ram tana hna a thawh tawh ropui tak tak leh sawrkar laipuia a tangkaizia hmutu ka ni a. Vawiina min rawn tlawh hian rah tha tak a chhuah ngei pawh ka ring a ni, a ti. Mizoram sawrkarin Handholding Scheme a kalpui dan leh healthcare lama a hmachhawp te a tarlang bawk.

Dr. VK Paul chuan, NITI Aayog chuan ram hmasawnna nghet nei tur leh Viksit Bharat 2047 tihlawhtling turin, ngaihtuahna thar (new idea) ngaihlu zel chungin hma kan la a. Hmachhawp fel tak leh tum fel tak neiin ke kan pen mek. Kan zaa thlen kan duh hmasawnna tluantling (sustainable development) hi neih ngei kan tum tlat a ni, a ti. Mizoram chu kum hnih chhung India rama Infant Mortality Rate hniam ber a ni tawh a, hei hi thil lawmawm leh hmasawnna chhinchhiahtlak a ni tiin, rawtna leh ngenna an thlen te chu a theih ang anga a lo bawhzui tur thu a tarlang.

NITI Aayog official ten kawng hrang hranga an hmalakna a sawifiah a. State Support Missions an kalpui dan te, digital transformation lama hmalakna te, Aspirational district kalpui dan te, Data Analytical Unit an kalpui dan te, Atal Innovation Mission an kalpui dan te, he mi lama state leh UT te an thawhpuina State Innovation Missions chungchang te, Skills & Women Empowerment lama an hmalakna te, Health & Nutrition lama an hmalakna te leh thil dang te an sawifiah a. Mizorama hma lak dan tur rawtna an neih te pawh an tarlang.

Meeting kaihruaitu Pu Khilli Ram Meena, Chief Secretary, Mizoram chuan Dr. VK. Paul leh NITI Aayog official pawimawh, Mizoram rawn tlawhtute chungah lawmthu a sawi a. Meeting thiltum tlangpui a sawi fiah bawk.

Pu Lalmalsawma Pachuau, Secretary, Planning & Programme Implementation chuan Sustainable development leh Viksit Bharat 2047 thlentir tuma Mizoram sawrkar hmalakna hrang hrang sawifiahna a nei ve bawk. Chu mi hnuah kal khawmten sawihona hun an nei zui a ni.

Vawiin ningani hian Mizoram University-ah India hmarchhaka NITI Aayog-in Women Empowerment Programme (WEP) hma an lakna bul an tan ang a. Workshop an buatsaih ang.

Meeting hi Pi Sangchhin Chinzah, Secretary, Health & Family Welfare chuan lawmthu sawiin a khar a ni.

 Sorkar lai Party ZPM chuan thuchhuah siamin, sorkarin thlai thar lei a kalpui mek laiin, kuthnathawktu thenkhatten rinawm lohna an lantir nghal tih tarlangin, 'Pawi kan ti hle,' an ti.

Kalphung thar mipui sorkarin kuthnathawktute bana kaih (Hand holding) policy a taka a kalpui mek laiin, February 20, 2025-a sorkarin sawhthing a lei, khaw pahnih atanga thawn chhuahte chu a chhe hle tih hmuhchhuah a nih thu tarlangin ZPM chuan, 'Sawhthing  la tu Reliance Company, Mizoram Sorkarin a thawhpuite pawhin sawhthing hi rawn thawn chhunzawm tawh rih lo turin thutlukna an siam hial hi a hnam anga mualphonaah kan ngai, pawi kan ti,' tiin, kuthnathawktute chu inenfiah thuai turin an chah.

ZPM chuan Mizoram Agricultural Marketing Board hruaituten sawhthing lei leh hralh chung changah 'Mizote chu hnam dangin sumdawnpui tlaka min ngaih theih nan kan rinawm tur a ni a, kan sawhthing hralh turte pawh a fai tha tur a ni' tiin vawi tam tak mipui zirtirna thu an lo au chhuahpui tawh tih tarlangin, 'Khaw thenkhata kuthnathawktuten zawm duh lo a, sawhthing faitha lo leh hralh chhuah tlak loh an thawn chhuak lui hian sorkar hmalak leh zelna turah pawh harsatna a thlen mek a, kuthnathawktu rinawm tak takte tan pawh harsana lian tak an thlen mek a ni,' an ti.

Sorkar Flagship Programme hlawhtlin leh hlawhchham kawngah kuthnathawktuten mawh an phur lian hle a nih  inhria a, tun hnuah hetiang thil hi a thlen nawn tawh loh nan kuthnthawktute chu rilru dik tak pu tura ngenin ZPM chuan, bana kaih thlak lohte thlai thar sorkarin a lei chhunzawm sak theih loh khua an lo awm a nih pawhin hma an lak pui thei dawn lo tih an tarlang.

CHANMARI PASTOR BIAL IN BCM ASSEMBLY A LO DAWL TAWH DAN REPORT TAWI.

CHANMARI PASTOR BIAL IN BCM ASSEMBLY LO DAWL TAWH   DAN REPORT TAWI

1. BCM Assembly vawi 129 na hi hriat lawkna awm lovin Bialin kan dawl thut dawn kha a ni a, a Huphurhawm hle mai a, mahse thil thar a ni lo va, Pathian zarah tluang takin kan dawl thei turah ngai ila

2. BCM Chanmari ah hian BCM Assembly hi vawi 9 nghah a ni tawh a, (1963, 1967,1971, 1978, 1986, 1990, 1998, 2006, 2017) A hnuhnung ber 2017 ami kha BCM in Bial thlen a tih tan hun 2016-a BCM Hnahthial Bazar in an thlen hnuah Bial hming pu-a kan dawl hmasak ber a ni. 2021 ah BCM Ramthar ah nghah a ni a, Covid lai a ni a, Rorel Palai 400-500 vel chauh an ni a, Kan Bial atang pawhin 12 chauh an palai nghe nghe a ni.

3. BCM Assembly hi tun hnu ah Bial dawl kan ti hmingpu na-in Bial huap angin a chet theih tak tak loh a, kan nghahna kohhran kutah engkim a dah loh theih loh a, kan hmalak dan lah a hriatpui kilhkelh theih tak tak loh.

4. Kan hriat theuh angin tun tum Assembly hi tlai hnuhnawh deuh a pek kan ni a, hun a Nchep in engkim hnawhsarum deuh a chet angai lo thei lova, phuailuai deuh pawh a tam ang tih arintheih. Kan inhriatthiam tlan angai ani ber mai e.

5. Kum 2017 ah khan Central Committee hnuaiah department 8 kan nei a, Kan Budget pumpui kha Rs 26,85,420/- a ni a, Rs 23,75,019/- hmang ralin Balance Rs 3,10,401/-kan nei a ni. Kumin 2025 ah hian department 9 neiin Budget Rs 49,59,500/- a ni a,

Rbt C.Lalruatpuia,

Secretary

Chanmari PAstor Bial Media Committee,Lunglei

BCM Assembly 2025 inbuatsaihna a kal tluang

Lunglei 26/2/2025: Vawiin chawhnu dar 2:00 khan BCM Chanmari Bial hruaitu te chuan  March ni 5-9, 2025 chhunga BCM rorelna sangber, BCM Assembly vawi 129-na an thlen tur chungchangah thuthar lakhawmtute Chanmari BCM Committee Room-ah an kawm.

Upa Lalrinliana Colbert,  Chairman Media Committee, Chanmari Pastor Bial chuan kaihruaiin he Assembly atan hian Budget-ah Rs Nuai 49, sing 5, sang 9 leh 500 an siam thu leh hei hi an tlin tih a sawi. A tirah Zobawk Ebenezer Kohhran a nghah tur a tih anih hnuah Theiriat leh Zobawk inkar kawngpui chu a chhiat em avang leh  NHIDCL te hnathawh lai anih avangin nikum mai khan Chanmari Bial-ah nghat in Chanmari Kohhranah nghah a ni ta a ti. Hnawhsarum deuh taka Chanmari biala nghah anih avang hian thil phuailuai deuh a lo awm anih pawhin Kohhran mipui te hrethiam turin an ngen nghal.

BCM Assembly dawl nan hian Sorkar pur lovin Kohhran in pawisa an thawhkhawm atang in leh BCM Hqtrs. atangin Rs Nuai 10 an dawng tih an sawi. Palai 1683 vel an beisei rualin thlenin ngaihtuahsak ngai 990 vel an awm thu sawiin hlawhtling taka Assembly thlen anih theih nan Central Committee dinin a hnuaiah Department hrang hrang 9 din a ni a, palai te hi an hriselna dinhmun vil reng a ngaih dawn avangin Medical lamah Doctor 11, Nurse 12 leh Lab. Technician te  pawh tualchhung kohhran mi an duty dawn a, ambulance inchhawp rengin zunthlum, BP sang leh Oxygen level check pawh a tih theih reng dawn a,NCD chungchang ziahna pamphlet sem tur a awm bawk ang.

Palai te tan tui bottle sem a ni dawn lova, tui thianghlim in tur water cooler chhawp a ni ang a, hei hi a duh chuan mahni bottle ken in an dawh chhawng thei dawn a, a tlem thei ang ber plastic lam chi hman an tum a ni.Refreshment bikah hian Rs nuai 19, sing 6 sang 5 dah a ni. Assembly chhung hian zing tin Bible study neih thin a ni dawn a, Assembly chhim tur hian Mizorama Kohhran hrang hrang aiawh te pawh an tel dawn a ni.

Assembly Thupui : “Pathian nung kohhran (I Timothea 3:15” tih niin ruat bik ten thuchah an sawi thin ang a, Pathianni chawhma Inkhawmah Pastor nemngheh an ni ang. Assembly chhung zawng hian BCM Hqtrs Serkawn Office a hnahthawh pangngai chu Chanmari Biakin Complex-ah hian sawn a ni dawn a, temporary-a an awmna tur pawh siamfel a ni tawh.

Pu Papuia MLA in Futsal Ground sak thar a hawng.

Lunglei 26.2.25 :  Lunglei Ramthar Venga Futsal Ground sak thar chu nimin khan Lunglei South bialtu MLA Pu Lalramliana Papuia'n a hawng.

Lunglei South bialtu MLA Pu Lalramliana Papuia chuan Lunglei Ramthar Vengah Mizorama international standard futsal ground hmasa ber hman theiha hawn a ni ta chu lawmawm a tih thu sawiin, a bul lo tantu leh hma latu sawrkar hmasa leh hruaitu hmasate chungah lawm thu a sawi a. A chhawrtu tur chu Ramthar Veng mai bakah Lunglei mipuite leh thalaite an ni tiin, sawrkarin mipuite tana hmasawnna hna a thawhah mipuite'n lawm thu an sawina leh sawrkar an rulh let theihna tha ber chu sawrkar ruahman anga tangkai taka hman a ni, a ti.

Lunglei Ramthar Venga Futsal Ground siamna tur atan hian India sawrkar Ministry of Minority Affairs hnuaia PMJVK Scheme 2020-2021 kal tlangin cheng nuai 319.78 dawn a ni a. Central share hi 90% niin, state share hi 10% a ni a. Hna thawk tur hian tender chhuah a nih hnuah M/s Creative Minds, Chanmari West, Aizawl chu thlan niin, work order amount hi cheng nuai 290.97 a ni a. Hna hi July ni 18, 2022 khan tran niin, October ni 7, 2024 khan zawh fel a ni.

Futsal Ground hi semi-indoor niin, RCC structure leh steel structure hmanga sak a ni a. Eng hun pawha hman theih turin a chung neia siam niin, Zanah pawh khelh theih turin stadium light eng tha tak dah tel nghal a ni bawk.

Inkhelhna tur chin (playing area) chhuat (flooring) hi RCC-a siam niin, plaster hnuah self leveling compound hmanga level lak leh vek a ni a. Hemi chungah hian Vinyl Sports Flooring phah niin, flooring zau zawng hi a dung metre 45 leh a vang metre 25.50 a ni a. Playing area line marking hi metre 40 leh metre 20 biala zau niin, hei hi futsal khelhna tura World Futsal Association-in a pawm ang a ni a. RCC Gallery a dung metre 23 leh a vang metre 4-a zau sak tel niin, gallery-ah hian mi 100 vel leng thei tura ngaih a ni a. Inkhel turte thawmhnaw inthlakna (player changing room) metre 11.60 leh metre 4 biala zau ruahman ni bawkin, team pahnih awm theihna turin hmun hniha then a ni a, inthiarna (toilet) dah tel ve ve a ni bawk.

MNYF in “Mizoram Sawrkarin MPSC a thuam chak tawk lo" an tih chu ZPM Thalai chuan thu belhchian dawllo ah a ngai.

 Lunglei 26.2.25 : MNF Thalaiin “Mizoram Sawrkarin MPSC a thuam chak tawk lo" tia PR an chhuah chu ZPM Thalai chuan thu belhchian dawllo ah a ngai.

ZPM Thalai Hqrs hruaitute  chuan ni Feb ni 18 khan Mizoram Public Service Commission (MPSC) Office tlawhin ZPM Sawrkarin MPSC a thuam chak dan hrang hrangte a hmunah hmuhpuiin, MPSC lama thawktute pawh an lawm hle tih an tarlang a. 

Kum khat chhung lekin MSSSB thiah a nih avangin MPSC-ah A/S-1 (redesignation),  JH Controller – 1, Asst. Controller-1, Assistant -2 UDC-4, LDC-3, Group-D  7  te dah belh an ni a. Infrastructure atan minor works-ah funds pek a ni. Grand Barrack cum Canteen sakna tur atan Sawrkarin hma a laksak mek a, SASCI hnuaiah Rs. vbc 10 chuangin hmalakna kalpui mek a ni. 

State Sawrkar atangin Scheme for Implementing of Persons with Disabilities Act (SIPDA) hmangin Disable (pianphunga rualbanlo) te tan toilet siamna tur fund buaipui mek a ni tih an tarlang.

Hnahthial District Hockey Association buatsaihin Workshop on Umpiring Clinic neih a ni.

 Lunglei 26.2.25 : Hockey dan leh dun inzirtirna - 'Workshop on Umpiring Clinic' chu Hnahthial District Hockey Association buatsaihin nimin khan Hnahthial MJA Press Club-ah  Bawrhsap Pi Rita Lalnunmawii Pachuau chuan hawngin Pi Lalrampari, Aizawl District Hockey Association President chuan zirtirna a pe a ni.

Bawrhsap chuan Hnahthial District chu Mizoram puma champion thei tur khawpin Hockey lamah thiamna an nei tha tih an lantir tawh thu sawiin an tih tak tak chuan theihna an neih that zia a lan chian thu a sawi a. Players tha tak tak chher chhuah tur pawh thahnem tak in thukru an awm a rin thu sawiin chumi thiamna hai chhuah chu thil pawimawh tak a ni a ti.

He Umpiring Clinic a zirtirna petu, Resource Person, Pi Lalrampari chuan he huna training dawng turte chu zirtirna uluk taka ngaithla tura a duh thu sawiin Hnahthial tan mai ni lo, Mizoram pumpui tan Umpire an nih thu a sawi a. Tan bik nei lovin an rorelna ah dikna kengkawh tlat tura a duh thu a sawi a ni.

Training hi February ni 26 atanga February ni 28 thleng zing dar 6-ah neih thin a ni dawn a. SAI, Thenzawla trial nei turte tan Free training HDHA chuan an neihpui thei dawn bawk a ni.

He hun hi Pu Lalremsanga, Hnahthial District Hockey Association Secretary chuan kaihruaiin Hnahthial District Hockey Association President, Pu Laldingluaia Sailo bakah MJA members te he hunah hian an tel a ni.

Pu MSTA-an HPC Chhimthlang Badminton Kûtpui hawnna Lungsenah a nei

Lunglei 26.2.25 : Lunglei High Powered Committee Vice Chairman Pu V Malsawmtluanga, MLA-in hriselna leh infiamna chu thil kalkawp a nih avangin Mizoram Sorkar-in infiamna chawikan kawngah theihtawp a chhuah chho dawn tih nimin khan a sawi.

Lunglei thlang lama khaw hrang hrang - Tlabung, Lungsen, Chawngte leh Bunghmun-a badminton khel thinte puala inelna buatsaih - HPC Chhimthlang Badminton Kûtpui hawnna hun, Lungsena buatsaih a hmanpuinaah khuallian Pu V Malsawmtluanga chuan Lunglei HPC chu Lunglei khawpui chhung chauh ni lo, Lunglei district chhunga khaw hrang hrangte pawhin an chhawr tlan vek tur a nih thu, a sawi.

Tun hi Chhimthlang Badminton Kûtpui huaihawt a nih tum thumna niin, Kûtpui hawnna hunah hian HPC vice chairman hi Lungsen BDO Pu Lalhruailiana Zote bakah, Lungsena officer leh khawtlang hruaituten an tawiawm a ni.

Pu Zorinsanga Hmar LMC Executive Member-in 16th Finance Commission Chairman hmaichhanah a hmu.

Lunglei 25/2/25: 16 Finance Commission Chairman

Pu Arvin Panagarya Aizawla lo kal chu LMC Executive Member Pu Zorinsanga Hmar leh Pu Lalrinawma MCS,Secy LMC ten LMC mamawh hmaichhanah an thlen. Pu Zorinsanga Hmar chuan Lunglei mamawh NH 302 in Lunglei a kal kan lohna tur chu an thlen bulpui ber pakhat a nih thu leh  sum indaihlohna pawh an hlen lian ber a ni a ti. Pu Zorina chuan kawrpuichhuah sumdawnna a tlang hunah NH 302 hian Lunglei a hel chuan sumdawnna lamah rep char kan ni thei dawn a, chuvangin bussiness hub lian deuh hmun 2/3 ah din dan tur te an thlen tih a sawi a,    Drainage system tha zawk siam dan tur te, Property tax lak dan tur leh Solid waste managment centre dang din belh dan tur te an thlen tih a sawi.Garbage truck tam zawk LMC in a mamawh thu leh rain water hervesting siam na tur te an thlen bawk.

Lunglei khawpui bawlhhlawh sawngbawlna hmun tur Pukpui ami chu LMC Chairman Pu Lalzuithanga leh MJA ten an tlawh.

Lunglei 25/2/25: Lunglei khawpui chhung bawlhhlawh paih leh sawngbawlna hmun tur,Pukpui to Lunglei ATL road thlang a mi chu vawiin khan LMC Chairman Pu Lalzuithanga,Pu K.Lalrinawma Vice Chairman,Pu Dony Lalruatsanga CEO LMC leh Pu Lalrinawma  MCS, DUDO & LMC Secy   leh MJA ten an tlawh.

    Solid Waste Management Centre Pukpui tih niin Estimated amount nuai 698 a ni a,  civil works bikah Rs nuai 385 vel a ni a, a thawktu hming hi LHM Infra Aizawl a ni.

    Resource centre hi 29.5m niin a vang lam hi 17 m a ni. Sak zawh a nih hun a hman dan tur chungchang Pu Lalrinawma MCS ,DUDO leh Secy LMC ni bawk chuan chhawng hnih tur niin a hnuai zawk hi wet waste niin a chung zawk dry waste atana tih a ni a ti. Tawih thei lo te chu khawl hmanga chansawm vek hnuah bag ah khawl a pack a ni ang a, belt hmangin a dahna turah te dah a ni ang a, thil dang siam nan a hman leh theih dawn a ni a ti. Bottle ruak leh plastic lam chi chu chansawm vek theih tur a ngaih a ni. Bawlhhlawh hi mei a hal kan phalloh a ni ang a, tih ral theih loh chu land  field ah dah thlak zel a ni ang a, hei hi chu tam lutuk lo tur a ngaih a ni a  ti. 

    Bawlhhlawh sawngbawlna Pukpui ami hi kum 2 chhung a peihfel tur a tih a ni. Hetihlai hian Saizaikawn thlang a Bawlhhlawh sawngbawlna chu peihfel vek tawh niin LMC kutah erawh hlan a la ni lo.

PHE tui pump-na pipe Pukpuiah a puak keh

  Pukpui Centenary lungphun thlangah pumping main pipe vawiin dar 1:30 vel khan a keh hlauh mai  a, PHE lam ten siam ṭha turin hma an la nghal a. Tui pump a khaihlak phah dâwn niin an sawi a, hei vang hian tuisemah pawh mipuite hriatthiamna PHED chuan an ngen   nghal a ni .

Mahlima MLA in District Jail, Sazaikawn ami tlawhin, SASCI sum hmanga District Jail sak dan tur ruahmanna te a hmunah a enfiah

 Lunglei 25/2/2025: Vawiin chawhma dar 11:00 khan, Pu T. Lalhlimpuia MLA Lunglei West chuan, District Jail, Sazaikawn ami tlawhin, SASCI sum hmanga District Jail sak dan tur ruahmanna te a hmunah a enfiah

a, District Jail-in a mamawh nghal thil hrang hrang te ngaihthlak sakin, a theih anga an mamawh te pek nghal a tum thu a sawi . Mizoram Home Guard Civil defence, District Jail-a duty te barrack chhe tawh tak te pawh a hmuna kalin, a sak that dan tur te a enpui bawk.Pu Mahlima chuan, Estimate ang leh mamawh phuhru tur ang thlap a, hna tha taka thawh hi ZPM sawrkarin, kan duh ber chu a ni a. Kan hna hi a tha tur a ni, hna tha chiah kan beisei a ni, a ti. 

Tun dinhmunah, District Jail Lunglei-ah hian mi tang hmeichhia 15 leh mipa 105 an awm mek a. Guiding Staff, Mipa 18 leh hmeichhia - 9 an awm mek bawk.

Amah tawiawmtu LMC Ward No. 5 Councillor Pi Zonunmawii'pawhin District Jail-a duty te mamawh em em sintex pawh an mamawh ang zat  pek annih tur thu a hrilh a, Sazaikawn-a Forest Check gate leh BCM Biak in,  inkar kawng foothpath pawh tha zawka  ward fund atang siam anih tur thu khawtlang hruaitu te an hrilh a ni.

Mizoram mamawh te Pawl hrang hrangin 16th Finance Commission Member-te hmaah an thlen.

 

Nimin khan Aijal Club-ah Mizoram aiawhin Mizoram Chamber of Commerce and Industries, Autonomous District Council, political party hrang hrangte leh tlawmngai pawlte chuan 16th Finance Commission Chairman Dr. Arvind Panagariya leh Finance Commission Member-te hmaah Mizoram mamawhte an thlen.

Meeting-ah hian Mizorama Autonomous District Council pathum CADC, MADC leh LADC-te chuan anmahni huam chhung theuha sum leh paia an dinhmun leh an harsatnate Commission hmaah hian an thlen a. Mizorama political party hrang hrang Zoram People’s Movement, Mizo National Front, Mizoram Pradesh Congress Committee, Aam Aadmi Party leh Bharatya Janata Party-te chuan tawngkam leh ziakin Mizoram mamawhte Commission hmaah hian an thlen bawk a. Local Body hrang hrang - Aizawl Municipal Corporation, Lunglei Municipal Council, Aizawl City Local Council Association leh All Mizoram VC Association-te pawhin an dinhmun theuhte Commission hmaah hian sawifiahin, tlawmngai pawl hrang hrang aiawhin MHIP leh CYMA ten hun an hmang bawk a ni.

16th Finance Commission pualin nizan khan Aijal Club ah vek cultural show leh zanriah buatsaih sak an ni a. Vawiin hian Zoram Medical College leh Falkawn a hmun dangte an tlawh dawn a ni.

Luangmual leh Vaisam inkar kawng siam hna thawh mek chungchang MLA te nen an sawiho.

Lunglei South bialtu MLA Pu Lalramliana Papuia leh Lunglei West bialtu MLA Pu T. Lalhlimpuia te kaihhruaina hnuaiah nimin khan Pradhan Mantri Gram Sadak Yojana (PMGSY) kal tlanga Luangmual leh Vaisam inkar kawng siam hna thawh mek chungchang sawiho .

He thutkhawm PWD Lunglei Circle Superintending Engineer (SE) office chamber-a neihah hian Lungleia Public Works Department (PWD) hotute, hna thawktu VRS Construction te, Lunglei Sub-Headquarters YMA hruaitute leh SYMA hnuaia Vigilance & Monitoring (V&M) Committee hruaitute an tel a. Tun hnaia he lai kawng siam chungchanga Vaisam Branch YMA thu chhuah leh thuthang awm hrang hrang chungchanga thil awm dan sawi ho a ni a. Lunglei South bialtu MLA Pu Lalramliana Papuia chuan bialtu MLA a nih anga he lai kawng siam hna hi a vei thu leh a en thlithlai reng thu sawiin, duhthusam lo lai a awm pawhin ral atanga intawng mai lovin bialtu MLA hnenah thlen ni se, tha taka sawi hova hma lak zui a inhuam thu a sawi a. Department leh contractor-te chu uluk leh fimkhur taka hma la zui tura chahin, khawtlang hotute leh mipuite nen pawh inpawh tlang taka thil sawi ho va, hna tha a awm theih nana thawk ho zel turin a chah a ni.

Lunglei West bialtu MLA Pu T. Lalhlimpuia pawhin tlang taka thil sawi hona atangin inhriat thiamna leh thawh hona tha a awm thin tih sawiin, department leh contractor-te chu mipuite thahnem ngaihna rilru hre thiam a, lung lohva la mai lo tur leh tha taka hna thawh zawh a nih theih nan theih tawp chhuah zel turin a chah a ni.

Luangmual atanga Vaisam inkar PMGSY kawng sial mek hi kilometre 28-a thui a ni a. A hna hi composite work, kawng laih atanga a luan (flexible pavement) thleng thawh tur niin, kawng siamna tur sum agreement zat hi cheng nuai 4,518.74 a ni a. March 2025-a thawh zawh tura ruahman niin hna hi 97.13% thawh tawh a ni a. Defect liability period hi kum 5 niin, kawng siam hna an thawh zawh vek hnuah pawh kum 5 chhung chu contractor-te'n a chhiat thulhah mawh an la phurin, an thawm that zel a la tul dawn a ni.

ZPM GS (contractor) in "Thawk rawh u, chawl suh u, ka thu a ni," a ti - by MNF Vigilance Dept. Sub.Hqrs.Lunglei

 
Lunglei 24.2.25: Vawiin chawhnu Dar 1:00 khan MNF Vigilance Dept. Sub.Hqrs.Lunglei te chuan  an Party Office-ah Lungleia thuthar lakhawmtute kawmin Mamte khua Lunglei Dist.-a RMSA Secondary School  sak lai meka an lungawi lohna an tar lang a hetiangin : 

REPORT OF SPOT VERIFICATION FOR RMSA SECONDARY SCHOO MAMTE, LUNGLEI DISTRICT

 1. RMSA Secondary Scool, Mamte building sak mek hi L shape-a sak a ni a; 80 (L) X
44 (W) ft with 6 ft verahdah a ni. Mizo pa chhiara chhawng hnih a ni.
2. Estimate amount hi 142,35,807.86 lakhs + 10,67,685.59 lakhs for electrification,
a vaiin 153,03,493.45 a ni.
3. Nikum March thla vela sak tan kha a ni.
4. A sa tur hian Allied Consultancy, Aizawl hnuaia C. Rosangliani (Sangteii) of ZPM
GS leh Secretary to President kutah dah a ni.
5. Sangteii hian a thianpa nia an sawi, Charlie-a chu hna a viltir a. Charlie-a hian chhawng chung zawk shuttering thleng a khawih hman a; mahse inti thiam lovin
Charlie-a hi a inhnuk dawk a, an hna thawh te, buk sak te sawi thiatin bungrua pawh a la let a ni. Chu chu Sangteii hian police-ah FIR a theh lut a, Dt 17.2.25
(Monday)-ah Police-te'n a hmunah investigation an nei nghe nghe a; an thu kal
zel erawh kan hre zui ta lo.
 
6. Rod hi a ban leh beam-ah te S-6 hman tur a nih laiin, S-6 hi hmang lova a aia te leh chak lo zawk an hman avangin All NGO-te pawhin a hmunah kalin an lo en tawh bawk. An hmanraw hman leh hna thawh that loh avangin stayed order pawh pek a ni a; mahse, contractor hian thu neitu order hi ngai pawimawh lovin, "Thawk rawh u, chawl suh u, ka thu a ni," tiin a chhunzawmtir zel a ni.

7. A bang atana brick tha lo an hman avangin All NGO-te'n Dt. 7.2.25-ah a hmunah
kalin brick tha lo an hman te chu an finfiah bawk a ni. Tichuan, All NGO-te chuan Dt. 11.2.2025-ah contractor hi lehkha an lo pe tawh a, hetah hian YMA, MHIP, MUP, MSU leh ZPM Party unit hruaitute ngei pawhin hming an sign a ni. Mahse, hei pawh hian ngaih pawimawh a hlawh lo hle.
Heta brick tha lo an hman hi Saizawh E-a siam a ni a, a siamtute pawhin
hralh tlaka an ngaih loh kha man tlawm zawkin brick 15000 zet an lei a, chumi brick tha lo hmang chuan bang hi rem chhunzawm zel a ni. An brick tha lo hliah
khuh nan hian contractor hian hlawhfa a hma aia tam lain an brick rem hi plaster hna, hmanhmawh taka thawhtir an ni tih a hmun ngeiah kan han finfiah a ni.
 
Hemi chungchangh hian, 'Zirna ngai pawimawh sawrkar hian, zirna kan tih hian
zirna hmun school building hi a ngaih pawimawh zingah a tel lo em ni?' tih hi kan
zawt a ni. MNF Ministry-in an khuaa school building ropuì tak leh chhenfakawm tak a lo
ruahmansak, kum tam tak lo awm leh turah pawh an neih phak pawha an rin loh,
Secondary School building man to zet mai an nei tur hi Mamte khawtlang chu an lawm em em a; chutih lain hna tha bik thawk tura insawi ZPM Lalnuin hetia a sawp ta mai hi MNF Sub-Headquarters, Lunglei chuan pawi kan ti hie a; nakin lawka kohhran, khawtlang, ram hruaitu tur chher chhuahna tur PUM, an ran in sak mai mai leh, vanduai mangkhawng atana an chhuah mai tur hi kan phal lo va, siam that theih a nih lai hian siam that ni ngei se, hmanraw tha lo an hman te pawh thiat a, hmanraw tha rin tlak, rotling ngei tura thlak vek turin kan ngen tak meuh a ni. Tin, hemi kawngah hian min thawhpui a, a tul anga min en zuipui turin nangni Press mite leh Zirlai Pawl- MZP, MSU-te pawh kan sawm a ni.   tiin an thuchhuah chuan a tarlang a ni.

Video : Hnathawhna a an bricks hman.

Hnathawhna a bricks chhunkhawm.

Congress Party ten an party mi Local Council Member tlingte lawmpuina hun an buatsaih.

 OFFICE OF THE MEDIA DEPARTMENT, LUNGLEI DIST CONGRESS COMMITTEE.

PRESS RELEASE NO 10 OF 24.02.2025.

Lunglei.24th.Feb.2025: Lunglei Dist Congress Committee chuan vawiin khan LMC area a Local Council inthlan neihzawh taka
Congress Party atanga Local Council Member tlingte lawmpuina hun an buatsaih.

   LDCC buatsaih Local Council Member tling tharte lawmpuina inkhawm hi Pu Eric.R.Zomuanpuia LDCC Treasurer chuan kaihruaiin Upa M.Thansiama BCM Electric vengin hunserh a hmang a ni.

    Local Council Member tharte puala hun hmanna inkhawm a thusawitu Pu R.Lalnunthara LDCC, President chuan Congress Party chu Opposition kum 6 lai ni tawhin MLA inthlan hnuhnung ber leh LMC inthlanah te kan che thalo em em a, chutihlai karah rorel lai ZPM chuan mipui hnena an thutiam te tihhlawhtlin mumal an neih theihloh avangin mipuiten an hnawl tak tak hmain Village Council leh Local Council inthlan buatsaih vat an duh a keini Congress Party te chu la in tiam lo hle mahila Pathian a hmasa bera kan dah tlat avangin hlawhtlinna duhawm tak hmuin vawiinah hetiang hun kan suangtuah phakloh kan hmang thei ta a ni a ti. 

Pu Mathara chuan Party chhiat ber lai pawh a V.C leh L.C inthlana Congress Party aiawha Candidate zawng zawngte chungah thinlung takin lawmthu kan sawi a ni tiin, ZPM in sawrkar thil tih theihna leh hmanraw hrang hrang hmanga an beih laia Lunglei.khawpui veng lian tak takah hnehna kan chang te thingtlang hmun tam takah hnehna kan chang hi keimahni tih a nilo a Pathian hnathawh a ni a ti a, Congress Party atanga Local Council leh Village Council a member thlan tharte pawh Pathian tan leh Party tan an rinawm tur a ni a, thlantlin nih tak avanga mahni hamthatna um a Party uire san te chu an tluang ngailo ang a ti. 

LDCC President chuan an Party atanga L.C member tharte chu Lalpa kan lamah atang em tih ngaihtuah aiin Lalpa lamah ka tang em tih ngaihtuah reng chunga khawtlang rawngbawl hna thawk turin a chah bawk. Kum 2018 ah Congress Party chu MNF ten mipui hnena thil tha tin reng hmanga an inzawrhna hmangin hneh takin min paih thla a, MNF an han sawrkara mipuite hnena an intiam ang an tih leh siloh avangin mipui ten ZPM hmangin hneh takin an paih thla veleh a tunah hian ZPM hian mipuite hnena an intiam ang chu an tihhlawhtlin lo mek zel avangin 2028 inthlan lo awm turah chuan mipuiten Congress bawk an ti leh dawn tiin, Mizoram hmasawnna thil tha leh rotling Bairabi Rail Station te, Tuirial Hydel Project te, tuna Zoram Medical College kan tih te bakah Lengpui Airport leh thil tam tak chu Congress Party in a intiam ang ngeia a tihhlawhtlin mipuiten kan chhawr em em a ni a ti a, 

Heng Congress in kan ram tana rohlu kan hnutchhiah te chu vawiina kan sawrkar hian min tih ral sak ngawt an tum ta mai a hetianga kan ram tan chhenfakawm rotling tam tak Congress in a hnutchhiah te hi tih riral an nihloh a tih hmasawn zel a nih theih nan Congress Party a sawrkar leh angai a, Lunglei khawpui in By Pass Road kan neih nan te hmasawnna tam zawk kan neih belh nan te Congress Party kan sawrkar tir a tul a, Congress Party a Sawrkar chuan NLUP changtlung zawk hmangin mirethei zawkte kan khaih chhuak leh dawn Pu R.Lalnunthara chuan a ti a ni.

  He hunah hian Pu Joseph.R.Lalremngheta LDCC, Vice President pawhin thu sawiin, khawtlang rorelna kawngah dikna leh huaisenna nena hmalak angai a, hmeithei leh miretheite ngaihpawimawh a tul tih L.C Member thlan tharte chuan hria se a duh thu a sawi a, tlawmngai pawlte nen khawtlang tan thawhho thiam a tul thu leh khawtlang thatna turah chuan mite huat pawh ngama hmalak a pawimawh tih kan hriat reng a pawimawh a, kan hnathawhna kawngah rilru tak tak pe a, khawtlang leh Party tan theihtawp chhuah zel turin Local Council Member tharte chu a chah a ni.

   LMC area a Local Council inthlan neihzawh takah Congress Party hian Member 43 neiin Veng 6 ah sawrkarna an siam a, veng 2 ah Party dang nen thawk dunin sawrkarna an siam bawk a. Vawiin hun hmannaah hian MPCC President Pu Lal Thanzara'n Congress Party atanga Local Council Member tharte a lawmpuina Certificate hlan an ni.

                            Issued by Media Department. LDCC