ZUNZAM EVENING NEWS ( 31.3.2025 )

 

Tui pumpna khawl tha leh hmanraw tha engang pawhin awm awm mah se tui hna ber a that loh chuan awmzia a awm loh thu E-in-C in a sawi.

Lunglei 31.3.2025 : Public Health Engineering (PHE) department Engineer-in-Chief Pu H. Duhkima chuan Jal Jeevan Mission hnuaiah Mizorama thingtlang khua zawng zawng tui connection pek ni tawh mah se khaw thenkhat tuia harsatna nei an awm leh tawh thu a sawi a.

Thuthar lakhawmtute hnenaah sawiin  Pu H. Duhkima chuan tui in tur pek kawnga sorkar laipui hmalakna pawimawh Jal Jeeven Mission hnuaiah thingtlang khaw 728-ah tui connection pek vek an nih tawh thu a sawi a. Hetah hian khaw sipera ngaih zawng zawng pawh an ni chuan khua anga chhiarin an telh vek thu a sawi a. Jal Jeevan Mission programme hnuaiah tui connection pechhuak vek tawh a an inngaih laiin a mission tawp hnu kum 1 em pawh la ni loah khaw 66 in tui hna tlem avangin tui laknaah harsatna an tawk leh tawh a ti.

PHE Engineer in Chief Pu H. Duhkima chuan khawpui lamah pawh an chhinchhiah danin Mizorama khawpui 28-ah khawpui 17, a zatve aia tam daih chu an dawn tur ang la dawng lo, tui khawpkham lo an la nih thu a sawi a. Khawpui bakah thingtlang hmun tam takah chuan an khua aia sanga an kham khawp tui lakna tur tui hna a awm tawh loh avangin ruam atanga pump a ni tlangpui tawh niin a sawi a. Khawpui lianah phei chuan pump-ah a innghat ber tih sawiin eng ang pawhin khawl tha leh hmanraw tha awm mah se tui hna ber a that loh chuan awmzia a awm loh thu a sawi a ni.

Pu H. Duhkima chuan ramngaw tih chereu avangin Mizorama tui hnain a tuar nasa a, tui khamkhawp hmu thei lo khua an tam phah hle a ni a ti a. Ruahtui dawhthleng tha tak chu ram ngaw a nih thu sawiin ram ngaw tha tak siam a pawimawh thu a sawi a, fur laia inchunga tui luanliam tir mai mai, tui dah khawl ngaipawimawh lo an tam tih a sawi a. Thal a lo thlenin sorkar an dem leh mai thin a ti a. Nunna atana pawimawh tak tui dahkhawl na tur tuizem lei tul ti lo an tam chu pawi a tih thu a sawi a. Tui dahkhawl uar zel turin mipuite a sawm a ni.

 

Lengpui khaw lum zawng kha Degree Celsius 36.5 ni tih sawi.

Tunlai hian khua a lum chho leh mek a, nimin khan Lengpui chuan March thla chhung bika a lum ber dawt tum a tawng.

India Meteorological Department (IMD) in a tarlan dan chuan, nimina Lengpui khaw lum zawng kha Degree Celsius 36.5 a ni a. March thla bika Lengpui khua a lum ber tum chu kum 2022 March ni 3 kha niin, khami tum khan Degree Celsius 36.6 a ni a, tun tuma mi nen hian a inhnaih hle.

 

Sawrkar laipui chuan Manipur, Nangaland leh Arunachal Pradesh hmun engemaw zatah thla ruk chhung atan Armed Forces (Special Powers) Act (AFSPA) a pawtsei.

 

Nagaland-ah chuan district 8 huam chhungah leh police station 21 huam chhungah AFSPA hi pawhsei a ni a. Hei hi April ni 1 atanga intan tur a ni. Ministry of Home Affairs (MHA) thuchhuahin a sawi danin Dimapur, Iuland, Chumoukedima, Mon leh Kiphire-te chu ram buai (disturbed area)-ah puan a ni.

 AFSPA hi Arunachal Pradesh-a Tirap, Changlang leh Longding district bakah police station 3 huam chhungah pawhsei a ni a. Manipur-ah chuan district 5 leh police station 13 huamchhung tih lovah chuan AFSPA hi pawhsei vek a ni a. Chung zingah chuan Imphal, Wangoi, Bishnupur leh Kakching police station-te a tel a ni. Armed Forces (Special Powers) Act (AFSPA) hi India Parliament dan siam, ram buaina hmuna mipui nunphung thunun tura Sawrkar laipuiin a sipaite tha chakna hman a tulna hmuna hman thin a ni.

 

Nigerian boxer Olanrewaju chu Ghana fight-a an inhnek laiin a thi thut. ( Video en tur a awm )

National leh West African light-heavyweight champion hlui, Segun ‘Success’ Olanrewaju chu Inrinni khan Ghana-a boxing match an khelh ṭumin Vanduai thlak tak in a thi.

Olanrewaju hian Bukom Boxing Arena-a Ghana Professional Boxing League-a Fight Night 15-a Ghanaian boxer Jon Mbanugu a hmachhawn laiin a hriatna a hloh thut a, aboral zui ta a ni.Punch Online chuan chhiatna a thlen hma hian, Olanrewaju hian point hrang hrangah hmahruaitu zawk a nih thu a sawi.

Boxing community chu he thihna hian ati lungngaiin hle a ni.Nigerian boxing-a mi zahawm tak Olanrewaju hian a hmain National leh West African light-heavyweight title a la a, ahneh ho hi Boxer lar tak tak te an ni an.Nigeria leh West Africa ram puma infiamna lama a thawhhlawkzia chu mi tam takin ansawi a, an ui zia leh pawi an tih zia an au chhuah pui hlawm a ni. 

https://youtu.be/LVH6G-s6j0Y?si=MHj6wMpvqsza74Pn

Kuhva rah man 

Assam Rifles sipaite chuan March 29, Inrinni khan Champhai Tlangsam leh Zote péngṭhuam bul ramhnuaiah Myanmar lam aṭanga dan loa kuhva rah lak luh ip 321 an hmu chhuak a; Champhaia Customs Preventive Force hnenah an hlan.

 

YMA-in ruihhlo man 

Central YMA hnuaia ruihhlo dotu, Central Anti Drug Squad (CADS) chuan March 22-28, 2025 chhung khan ruihhlo - heroin, damdawi leh zu eng emaw zat an man a, chumi kaihhnawihah chuan mi 44 an man. Central YMA General Secretary tarlan danin, CADS-in chawlhkar khat chhunga mi 44 an man zinga pahnih chu home-ah dah an ni a; mi 24 chu counselling neihpui an ni bawk.

ZUNZAM MORNING NEWS ( 31.3.2025 )

Central YMA chuan 'Fimkhur Thla'-ah a puang

Lunglei 31.3.2025 : Central YMA chuan Furpui lo thlen hmaa khuarel chhiattawh laka lo inralrinna atan April thla hi 'Fimkhur Thla'-ah puangin, Sub-Hqrs., Group leh Branch YMA te hnenah puanzara bawhzui tur hriattirna a chhuah a.

Mahni veng leh khaw hrang hrangah YMA chuan mahni huamchhuangah inhmun leh lei lai ten Furpui lo thlen hmaa lei laih te nghet taka lungrem/Concrete a tih ngheh hman ni se, thral chhungin mitinin tuidawn leh tui paihna mumal taka siam a, tui chhe paihna te kawrpuiah tha taka luan luh tir a, furpui lo thlen hmain a tul anga mahni chenna in lo thuam thrat lawk nise a ti a.

Khaw tin leh veng tinin mahni huam chhunga lui leh kawr-te hnawhtu a awm leh awm loh leh a him tawk em tih en fel vek ni se tiin a him tawk lova hriatte chu then fai ngei ni se, a tul dan azirin YMA hnatlang pawh koha tih thrat vek ni bawk se a ti a. Mahni huam chhunga thing leh thingzar ro tlak leh tluk hlauhawm te Forest Dept. hriattir emaw, kih fai ni se an ti a. Kham/Kawngko sanga lung tla leh leimin mai thei a awm leh awm loh en fela, hlauhawm a awm chuan hma lak nghal ni se CYMA chuan a ti bawk. 

Sub Hqrs, Group leh Branch te chu Lei tlahniam hlun leh min thinna hmun te chhiatna nasa zawk thleng thei turte uluk taka en fel a, a tul anga invenna siam turin a ti a, thlanmual a him em tih uluk taka en fel a, a tul anga thlan chung pawh tui lut theilo tura Cement a zut phui vek turin a ngen a. Branch YMA te 'Fimkhurna Thla' an hman dan Central YMA-a thehluh nise a ti bawk.

Lunglei Super Market Building sak hna kalpui mek chu  70% thawh zawh tawh a ni

Cheng Vaibelchhe 14.3 senna tur Lunglei Super Market Building sak hna kalpui mek chu hnathawh tur 70% thawh zawh tawh niin a hmunhmain a zawh tawk loh vangin hnathawh a muan phah.

North East Council sum hmanga sak mek Lunglei Super Market Building sak hna hi EXCEL Consultancy Services ten thawkin PWD Building- Division Lunglei chuan an hnathawh hi an vil thung a. Hna hi kum 2023 April thla tir atang khan thawh tan niin tun dinhmunah hnathawh tur za zela 70 thawk tawh ang an nih thu PWD hotute leh Contractor lam hian an sawi a. Ruahman lawk ang chuan kumin September thla ah hna hi thawh zawh hman tura ruahman niin hnathawktute chuan hun tiam chhung hian zawh hman an beisei thu an sawi. 

Lunglei Super Market Building hi Zopa- chhiar a chhawng li tur niin a len zawng hi Square Metre 6045 a ni. Building chhungah hian dawr 334 a awm dawn bakah, Quarters 2, Market Office 2 leh Police Beat Post 2 a awm ang a, Toilet 32 a awm dawn bawk a, lirthei Two Wheeler 87 leh Four Wheeler 20 dahna siam ani ang a, Godown 8 a awm bawk ang. A building chhawng tin ah rualbanlo Wheel Chair hman ngaite tana kalna tur Ramp siam vek a ni a, Tui Litres Sing 5 dahna tur Tanky siam ani bawk. PWD Building Division lam hian Contractor hnenah Cheng Nuai 560 an pek tawh thu leh tunah hian a dang dil belh leh mek anih thu an sawi. 

Tun dinhmunah Building Structure zawh tawh a ni bakah Basement- 1 leh 2 bang pin zawh tawh a ni a, a tira ruahman lawk anga a hmun in a zawh loh avanga ruahmanna siamthat leh thin anih avangin hnathawh a sawt loh phah niin an sawi bawk.

Hetih lai hian Building thar sak mek bula Bazar Building, Sa leh chawhmeh zuar eng emaw zatin an luah mek bulhnaia tuichhe luang reng chu helai hmuna thil zuar leh bazar a kalte chuan an ngaimawh thu leh thuneituten arang lamin enfiah se an duh thu kan palai an hrilh a ni.

Vawk pul hri (African Swine Fever)  avangin kuminah vawk 509 a thi leh tawh.

Nimin Pathianni khan ASF vangin vawk 6 an thi a, kumina ASF hri a rawn awm thar leh hnuah vawk 509 an thi tawh a, nimina vawk pakhat suat nen hri darh zel tur ven nan vawk 94 suat a ni tawh.

Vawk pul hri hi Mamit leh Lawngtlai Dist ah a leng leh mek a, heng district-a vawk thi te sample hi Aizawla test anih hnuah ASF an positive a, a nemngheh nan Guwahati-a a endikna hmunpuiah thawn a ni a, result ah ASF a ni tih finfiah a ni.

Nimina vawk thite hi Zawlnuamah 5, Lawngtlaiah 1 a ni a, vawk tihhlum hi Lawngtlai vengpui ami a ni. Tunah hian ASF hian Mizoram district pahnihah khua/ veng 13 a chenchilh mek nia hriat a ni.

Khawzawl Dinthar Branch YMA KUMPUAN Committee hmalakna in an huam chhunga Hnam dang/Ramdang mi awm te enfiah hnatlang neih a ni a. Hnam dang Vai awm te chu an ILP te check sakin uluk taka enfiah an ni.

Ramdang mi awm, a bik takin Myanmar buai avanga rawn Raltlan te pawh enfiahin an hming te chhinchhiah vek an ni a. Buaina leh harsatna Siam zawnga thawm hriat tur a awm chuan, Khawzawl Dinthar Vengchhungah an awm a rem loh tur thu an hrilh nghal bawk. Pem lehkha nei lova In luah a rem loh thu sawiin In neitute pawh pem lehkha neilo chu tumah In luah tirlo turin an ngen a ni. Ram leh hnam humhalh beih pui thlak tur hian nasa zawka Kawng hrang hranga hma chak zawka an lak zel tur  thu an hruaitu ten an sawi a. An veng huamchhungah hian Vai - 5, Raltlan - 15, Burma mi -5 an awm mek a ni.

Myanmar leh thailand a lirnghing avanga thi zat chu 1700 vel an tling tawh.

Myanmar leh Thailand a lirnghing avanga thi zat chu 1700 vel an tling chho tawh a, hetihlai hian building chim chhung atanga nungdama chhan chhuah pawh an la awm zel a, nimin khan Sagaing biala school building chim hnuai atangin eng emawzat dama chhanchhuah an ni a, mitthi ruang pawh lak chhuah ani tih Myanmar Fire Service chuan an sawi.

Inrinni zan khan Myanmar khawpui Nay Pyi Taw ah pitar pakhat chu hospital chim hnuaia darkar 36 a tan hnuin chhanchhuah a ni.Mandalay a apartment block chim hnuaiah mi 29 te chu chhanchhuah an ni tih fire service te chan an sawi.

Thailand lamah Bangkok a in sang sak mek chim avanga thi zat chu 18 an tling tawh a, he in sang chim hian mi tam tak a chim hnan a, tunah hian an chin hriat loh mi 76 an awm mek a ni. Thailand Deputy Prime Minister Anutin Charnvirakul chuan nimin khan chhanchhuaktu pawlte chuan he inchhawng sang chim hnuaiah hian nungdam an la awm tih an hria a, mahse fimkhur taka chet a ngai tawh tih a sawi. Bangkok Tower chim a chhanchhuahna hna thawh hi khawvel ram danga chhanchhuaktu pawlte pawhin an pui a ni.

Tarlan tawh  angin zirtawpni kalta a Myanmar lirnghing hi an khawpui ber dawttu Mandalay khawpui bul lawk atanga intan a ni a, minute 12 hnuah magnitude 6.4 a na in a sawi leh a, aftershock hi a thleng zeuh zeuh a, nimin Pathianni pawh khan Mandalay hmar thlang lamah magnitude 5.1 a nain a nghing leh a ni.

Myanmar lirnghng avang hian ram eng emaw zatin chhanchhuaktu pawl leh tanpuina an thawn lut a, china chuan chhanchhuaktu pawk 82 a tir a, Hongkong chuan mi 51 a tir a, India chuan chhan chhuaktu pawl bakah emnergency supply phur thlawhna a tir a, Malaysia chuan tanpuitu pawl mi 50 a tir tih a sawi a, Philipines, Vietnam, Indonesia, Ireland, South Korea, Russia, New Zealand leh US te pawhin chhanchhuaktu pawl an tir bawk. UK Foreign secretary David Lammy chuan lirnghing tuarte tanpuina pound maktaduai 10 pek a tum a ni.

Hetianga lirnghing avanga chhiat an tawh lai mek hian Myanmar sipai sorkar chuan Sangaing bial Chaung-U a democracy ngiattu sipai sorkar laka helte chu thlawhna hmangin a la bei a, a la bomb ulh ulh tho a ni.

Civil sorkar paihthlak tak aiawh National Unity Goverment chuan mahni invenna tih chauh loh chu lirnghingin a khawih huam chhungah chawlhkar hnih chhung an sipaite operation an chawl dawn niin an sawi.

Hmaituam chunga mi kutthlak rawn tu te man kim tawh .

Kulikawn Vengthlang Branch YMA  te chuan thuchhuah siamin Central YMA hmalakna in an Branch member hmaituam chunga kutthlaktute heng a hnuaia mite:

1. Robert R Lalduhsaka Kum 21 s/o R. Lalzidinga, Mission vengthlang

2. ⁠Lalremsiama Kawlni kum 21 s/o Lalnunsanga, Mission veng

3. ⁠Lalrinmawia kum 20 s/o Lalthuliana, Bethlehem Vengthlang

4. ⁠Vanlalpekhlua kum 21 s/o P. Laikunga, Tlangnuam Vengthar

5. ⁠Emanuel Lalliansanga c/o G. Thanga, Tlangnuam, Aizawl

inrinni khan  Kulikawn Police ten an man kim ta a. Heng misualte man kim an nih theih nan a, CYMA OB te leh CEC mai bakah Branch hrang hrangin min ṭawiawm na leh an Branch thlavang in hauhna ah Kulikawn Vengthlang Branch YMA chuan lawmthu an sawi tak meuh meuh e tih an tarlang a ni.

Hnahthial DC in South Vanlaiphai leh Darzo a tlawh.

Lunglei 29.3.2025 : Vawin khan Hnahthial District Bawrhsap Pi. K. Vanlalruati chuan South Vanlaiphai leh Darzo tlawhin khawtlang hruaitute a kawm

Dist. Bawrhsap Pi. K. Vanlalruati chuan South Vanlaiphai VC te chu Hnahthial DC Office chu inthlahrung lova, tlangnel taka dawr thin turin a sawm a, VC te pawhin khawtlang tana an hmalakna leh an thawhdan te an lo hrilh a. A hun hmasa lama an khawtlang alo tlawh chu lawmawm an tih thu an lo hrilh bawk.

Darzo ah hian Sawhthing dahkhawmna (Secondary Collection Centre) a tlawh bawk a, zing lamah Sawhthing hi an lo phur chhuak tawh a, tun dinhmunah Darzo Secondary Collection Centrea ah hian Sawhthing a awm tawh lova, phurh chhuah vek a ni tawh a ni.  He Secondary Collection Centre ah hian Darzo bakah South Vanlaiphai, Muallianpui, Lungpuitlang leh Kawnpui atanga Sawhthing hralh tur nei ten an dahkhawm thin a ni.

ZUNZAM KOHHRAN NEWS ( 29.3.2025 )

 

Rev. Dr H. Lalthlamuana, Executive Secretary Lawngtlai

Area-in Diltlang khua kâng-mei tuarte a hmunah a tlawh.

February 27, 2025 (Ningani) khân Rev. Dr H. Lalthlamuana, Executive Secretary Lawngtlai Area chuan Diltlang khua kâng-mei tuarte a hmunah kal chilhin an chhiat tawh dân a hmuhpui.

Kangmei tuar te’n  an tawrhna sut kianpui a, theih ang ang a hmâ lâk dân tûrte  sawipuina a neih hnuah Executive Secretary, Lawngtlai Office aṭangin hnatlâng thingpui inna tur chêng sangnga (₹5,000/-) leh BCM Charity fund aṭangin chhiat tâwkte ṭanpui nân pawisa fai chêng nuai hnih (₹2,00,000/-) hlânna leh Kangmei tuar te tan thlamuanna dîlin a ṭawngṭai sak na a nei.

Rev. Dr H. Lalthlamuana hi Upa T. Vanlaldika, Senior Assistant, Pu Fc. Lalhualhima, Production Assistant leh K. Lalchamliana, driver, ES Office te’n an ṭawiawm a ni.

Diltlang khua hian February 26, 2025 (Nilaini) zân lâi dâr 12:00 - 1:00Am bâwr vèl khân chhiat hi tâwkin, kâng-mei nasa tak a chhuak a, chênna in 7 kâng ralin bungrua engmah chuh hman lohin a kangral a ni. Chhiat tâwk chhungkua te hi chhungkaw 10 an ni a, Diltlang khawtlang leh Kohhran te’n an chên lailâwkna tûr a remchang ang angin an ruahmanna an siam sak nghàl a ni.

MBKHP Executive Committee Meeting neih  a ni.

March 26, 2026 ( Nilaini)  Chawhma dar 11; 30 khan Sap Upa leh Pu Buanga Hall BCM Headquarters Office, Serkawn ah meeting neih a ni.

Meeting hi Pi HK Lallianzauvi’n a kai hruai a, Pathian hnenah in kawltir na a neih zawhin meeting tan a ni. MBKHP Secretary Lalhmingmawii Chongthu hnen atangin report tlangpui ngaih tlak a ni. Secretary report in a tarlan danin :

2025 MBKHP rorel BCM Biak In Central church a neih chu tluang tak a zawh a nih thu te.

MTKP Inkhawmpui leh MBMP Rorel-ah MBKHP aiawh in palai intirh thu leh

Nl. Lalhmingmawii Chongthu MBKHP Secretary term a tawp avangin Kum 2025-2028  chung atan MBKHP Secretary thar  Nl. Lalrammawii Thangluah (M.th) hnenah April 4, 2025 ah charge a hlan ang.

Thurel tlangpuite:

Kum 2025 MBKHP rorelin MBKHP Executive Committee kuta a dah April 5-6, 2025  hian NEICCWA Inter Unit Visit Programme hmang turin Evangelical Church Of Maraland an tlawh dan tur ngaihtuah a  ni.

NEICCWA 15^th  Binnial Assembly May 23-25, 2025 chhungin Shalom Bible Seminar, Nagaland a neih turah palai intirh a, Palai tur ten Cultural Item pawh ti ve tur a rel a ni bawk.

MIZORAM SYNOD HNUAI FAMILY GUIDANCE  & COUNCELLING CENTER (MSSU) & SYNFO BUATSAIH NPSS MAL ZAI INTIHSIAK RESULT

March 28, 2025  khan MSSU leh Synfo tangkawpin an buatsaih NPSS Mal Zai Intihsiak final hi Tuikual Presbyterian Kohhran Hall-ah neih a ni a, Lalthatluangi Fanai, Sacrament Department, Tanhril Kohhran chu pakhatna a ni.

Final-ah hian mi 10 an intihsiak a, an hla duh ber pakhat an sa a, hla rem nan hian music track an hmang a ni. Intihsiak zawhah result puan leh lawmman sem chhunzawm a ni a, lawmman pakhatnain Rs. 70,000/-, pahnihnain Rs. 50,000/- leh pathumnain Rs. 30,000/- an dawng a, Top 10 a tlingten Rs. 5,000/- an dawng. Top 10-a tlingte hian pawisa fai bakah memento an dawng theuh bawk.

Lawmman dawngtute chu :
Pakhatna - Lalthatluangi Fanai, Sacrament Department, Tanhril Kohhran
Pahnihna - K. Lalfakzuali, Senior Department, Republic Veng Kohhran
Pathumna - K. Lalruatfela, Intermediate Department, Tlungvel Field Veng Kohhran

Final-ah hian Pi Lalpianthangi Hrahsel, Co-ordinator, MSSU-in hunserh a hmang a. Rev. Dr. LH Rawsea'n Top 3 lawmman a sem a, Top 10 lawmman te hi Pu Lalniliana, Co-ordinator Synfo, Upa Lalruatsaka, Synfo leh Tv. Kevin Lalhriatpuia, MSSU ten an sem a ni. Pu Lalhmunzauva Tlau, MSSU Asst. Coordinator-in lawmthu a sawi a, Nl. J. Lalruatsangi, Praise On 2024 pahnihna leh Tv. Samuel Lalmuanchhana, Praise On 2024 pathumnate an zai bawk.

FG&CC BUATSAIH ‘CHHUNGKAW KEHCHHIA ZIR CHIANNA’ SEMINAR

March 22, 2025 (Inrinni) chawhma dar 10:30 khan Pi Zaii Hall, Synod Conference Centre-ah FG&CC buatsaihin ‘Chhungkaw kehchhia zir chianna’ Seminar neih a ni a, Seminar-ah hian bial 20 atangin kohhran aiawh 277 an kal thei a ni.

Seminar hi hun hniha then a ni a. Chawhma hun hi Rev. Dr. L.H. Rawsea, FG&CC committee member-in a kaihruai a, Rev. Lalthangpuia Fanai, FG&CC Director-in kalkhawmte inlawmna neiin report a pe a. Rev. Dr. Rosiamliana Tochhawng, Executive Secretary-in Keynote Address a sawi. Resource person Upa Lalnunsiama Khalthang-in, ‘Chhungkaw kehchhia zir chianna’ paper a buatsaih chu a present a ni. Chawhnu hun hi Rev. Lalbiakchhunga Pachuau, FG&CC committee member-in a kaihruai a, sawi hona hun hman a ni.

Seminar hi kum 2023 Synod Inkhawmpuiin a lo rel tawh, ‘Chhungkaw Kehchhia kan pun zel loh nana hma lak rawtna’ bawhzuina a ni a. Hmalak dan tur ruangam duangin research base-a kalpui a ni a, hemi zir chianna atan hian Questionnaire pawh thuang thuma kalpui a ni bawk.

BCM Biak In Maranatha Church Chandmary, Lawngtlai 

hawn a ni.

March 26, 2025 Chawhnu Dar 1;00 khan BCM Biak In Maranatha Church, Lawngtlai chu hawn a ni. Chairman Elect in a kai hruai a, lawm thusawi  tawngtaina a neih zawhin, General Secretary, Rev. Dr. R. Lalbiakliana’n a hawnna leh Pathian hnenah hlanna a neih zawhin Biakin thar hawnna inkhawm neih nghal a ni.

Biak In thar hawnna Inkhawm hi Upa H. Lawmkima, Chairman in a kai hruai a, Upa A. Hmingthanzuala leh Upa H. Rochhunga te’n Bible chhiarna an neih zawhah, Greetings  Rev. Dr. H. Lalthlamuana Executive secretary Lawngtlai Area hnen atangin ngaihthlak ani. Biak In thar a thlawna Design saktu Lunglei West Bialtu MLA Upa T. Lalhlimpuia hnen atangin thusawi tawi ngaihthlak a ni.

Tualchhung Kohhran Secretary Upa K. Lalthangzawna hnen atangin Biak In sak dan leh Kohhran din hmun tlangpui report ngaihthlak a ni. Report in atarlan danin Biak In sak nan hian Tha 1000 leh Rs. Nuai 200 vel hman a ni.

Biak In Thar hawnna Inkhawmah hian Lawngtlai South Pastor Bial, Lawngtlai Area Baptist Choir  leh, Combine Choir ( TKP, BKHP, BMP) te bakah Jenifer Lalruatkimi  te’n  Pathian fakna hla sa-in rawngbawlna an nei a, Biak In hawngtu, Rev. Dr. R. Lalbiakliana General Secretary hnen atangin Pathian thuchah ngaihthlak a ni a, Tlai  lamah biakin thar lawmna ruai theh nghal a ni.

Vawiin khan S.A, Territorial Headquarters –a  Editorial and Literary Department buatsaih seminar Booth Mansion Conference Hall, Tuikual South ah neih a ni. 

Seminar hi India Eastern Territory chhunga Corps chanchinbu enkawltute leh Territorial Headquarters leh Divisional Headquarters a weekly newsletter enkawltute tana buatsaih a ni a. Major K.Lalrinpuia, IET Editor in kaihhruaiin Lieut.Colonel Lalliankunga Secretary for Programme chuan Pathian hnena hun hlanna leh inlawmna thu a sawi a. Resource person Pu Malsawmpuia Ralte, Corps Literature Secretary leh Tv.Andrew Lalchhandama ten zirtirna an pe a,  an hnen atang hian ‘Newsletter kalphung’  tih leh ‘Media hmanga rawngbawlna’ tih te ngaihthlak a zir ho a ni.

Huntawp hi Lieut.Colonel Prakash Chandra Pradhan, Chief Secretary chuan hmangin, literature pawimawhna leh Pathian ram chanchin tha hrilna kawnga hmanraw pawimawh tak a nih dan te tarlangin Pathian hnena tawngtaina leh malsawmnain a tin a ni.

AICS Zirlai ten 2nd Semester Exam an nei mek.

Tunkar thawhtan March 24, 2025 atang khan AICS Zirlai te chuan 2024-2025 Session, second semester exam an nei tan. April 11, 2025-ah zovin, session tawpin a chhunzawm ang a. Session thar hi June, 2025-ah tan leh a ni ang.

Tunah dinhmun ah AICS ah stream hrang hrang MTh, M.Div, BD, Church Music leh Missionary Training ah te Zirlai 147 an awm mek a ni.

Bialtu Pastor tharte lawmna inkhawm neih a ni dawn.

April 7 atanga 11, 2025 inkar hian  Pastor Posting & tranfer a che tur zawng zawngte’n an awmna hmunah awm vek tawh tur a ni a, April 13, 2025 Pathianni-ah Bialtu Pastor tharte lawmna inkhawm Bial tinah neih tur a ruahman a ni.

F. Zoramthara’n Missionary Furlough hun a hmang mek

Missionary F. Zoramthara Arunachal East a thawk mek chuan  March 29 atanga 6 April, 2025 inkar hian Haulawng Pastor Bial-ah hun ahmang anga, April 21 atanga 27 April, 2025 chhung hian Paithar Pastor Bialah, May 3 atanga 11 May, 2025 chhung hian Zotlang,Aizawlah hun a hmang leh ang.

 He a deputation chhung hian ‘Padu Biak In sak tanpuina tur appeal’ a nei dawn a, kohhran ho te’n mahni remchan dan anga lo tanpui theuh turin kan insawm a ni.  

 

 

Ramthim Rawngbawlna Chanchin 

Bengal Field

March 15-16, 2025 (Inrinni leh Pathianni) khan BCNB Mahila Sangati inkhawmpui neih a ni a, Speaker atan Rev. H. Lalengmawia Field director chu hman a ni. Intihsiakna hrang hrang neih niin, hetah hian kohhran member 250 vel an kal khawm a, hun hlawk thlak tak an hmang.

March 23, 2025 khan BCNB Pana-ah ringthar baptistma chang 4 an awm a. March 29 &30, 2025 hian children meet BCNB Bethel-ah neih ani dawn.

Arunachal Far East Field March 24, 2025 (Thawhtan) khan Mission Centre Poakom-ah Rev. Dr. R. Lalthanmawia AGS mission leh Rev. PC. Lalnunzira Regional Director te chuan NOCTE  Baptist Church Association te’n BCM thawhpuia min sawmna survey an nei. He mi hnu hian Wancho Baptist Church Association, Longding a awm an tlawh nghal a ni.

March 26, 2025 nilaini khan AGS Mission Rev. Dr. R. Lalthanmawia Chuan Field Bolero thar Pathian hnenah hlanna a nei.

Assam Field

March 20^th, 2025 (Ningani) khan Dubri Area NABC New line-ah Free Medical camp neih a ni a. Kokrajhar Medical College atangin Doctor pathum leh Nurse pahnih te in volunteer in, He Free Medical Camp-ah hian mi 149 an in entir a  ni.

March 21-22, 2025 Zirtawp leh Inrinni khan RBC Assembly Debitola ah neih a ni. Hetah hian hruaitu, President, General Secretary, Executive Secretary thar thlanna neih a ni.

March 22^nd, 2025 Inrinni khan AGS Mission Rev. Dr. R. Lalthanmawia chuan Patkijuli a thawktute pualin Retreat a nei a, thawktute’n nuam an tiin hlawk thlak an ti hle.

March 26^th, 2025 Nilaini khan Field Committee Debitola-ah neih a ni a, 2025 chhunga hmalakna tur hrang hrang an rel.

ARUNACHAL FAR EAST

March 17 & 18, 2025 khan Indian Mission Association buatsaih Engage India Seminar Guwahati ah Field Director Rev. ZD. Lalrozuala chuan a telpui. North East India a hnam la tlawhchhuah lohte zinga hmalak anih theih nan he seminar buatsaih a ni. 

March 20, 2025 khan DLNBCA hnuaia Roing leh Dambuk Pastorate Circle nuhote tan Leadership Training, Baptist Church Jia ah buatsaih a ni a, Resource Person atan FP Lalthathanga, Missionary leh Norbu Lama, DLNBCA Sr. Adviser te an hmang.

TRIPURA FIELD

March 21^st, 2025 (Zirtawp) ni khan Baptist Primary School 22 aṭang a, Inter Class V exam result tih chhuah niin Top ten ah mi 14 langin pass percentage hi 67.77 a ni a. Exam zawng zawng 218 ah mi 150 an pass a ni.

Republic Vengthlang Pastor Bial BMP ten Dailonga-ah Work camp an nei mek a. Member 22 kalin Biak In sak leh ṭhutphah siam, pulpit siam hna an thawk a ni.

March 23^rd, 2025 (Pathianni) khan Field Director, Rev. Zadingliana Pachuau in ST John Baptist Biak In sak mek tlawhin, Kohhrante nen inkawmna hun hlimawm tak hmang a, ST Biak in hi sak zawh anih thuai theih nana hmalak dan turte an sawi ho bawk.

 AP East

1.Dt 24 & 25 March khan Baptist Thurin zirhona Field Office ah neih a nia. Resource person atan Rev.Dr.C.Vanlalhruaia Asst professor Serampore College chu hman a ni.

2.Dt 26th March khan Field Committee Meeting neih a ni a, rawngbawl a tur hmachhawp pawimawh tak takte rel a ni

JHARKHAND FIELD INKHAWMPUI LIAN (HELMEL SABHA) 2025 HLAWHTLING TAKA NEIH A NI

March 21^st  – 23^rd,  2025  khan Jharkhand Field Inkhawmpui lian vawi 18-na BCJ Kolabagan hmunah neih a ni a. Speaker atan Field Director Rev. J. Lalpiantluanga hmangin ‘I dinthar leh ang u’ (Nehemia 2:17) tih hmangin thuchah ngaih thlak a ni. Nl. F. Lalremruati Serchhip BCM Moria in zaia rawngbawlna neiin he khawmpuiah hian hun a hman pui a ni.

Jharkhand Field hi Bial (Circle) 5 ah inthen in (kum thar April aṭang chuan Bial 6 an ni tawh ang. Inkhawmpui palai te hi riaklut vekin, palaite hi naupang atanga puitling tlengin an vaiin mi 700 an ni. Inkhawmpui kal zawng zawngte tan a huhova ei leh in buatsaih a ni a, Bawng 3 talh a ni.

Jharkhand Field-ah hian Inkhawmpui lian vawi eng emaw zat neih tawh niin, Pandal sak hi kum dangah chuan vai (ringlo mite) kuta dahin, cheng nuai chuang sengin an sak tir ṭhin a. Kuminah  chuan an mahni ngeiin vawi tam tak hnatlangin Pandal hi an sa a, Nuam an tiin a hlim hle.

Inkhawmpuiah  hian zing ṭawngṭai leh Bible Study hun te hmang thar in, kal an ṭha in, zawngchhang thlak an ti hle. Bible Study hun hi Pu HC. Ramnghakmawia leh Nl. R. Lalnunpuii ten an kaihruai thin a ni.

Inkhawmpui rorel hi an la neih ngai loh thil a, Kumin ah  a vawi khat nan Inkhawmpui rorel Rorel nuam tak leh tluangin an nei thei bawk. Rorelah hian Baptist Church of Jharkhand (BCJ) hruaitu tur thlan thar a ni a. Field Committee kaihruaina hnuaiah kohhran inrelbawlna felfai taka kalpui tum a ni.

Baptist Church of Jharkhand (BCJ) Inkaihruaina Bu (Constitution) duan a. Hmala turin Pu Hc Ramnghakmawia ruat niin, Field Director in thlitfimna neih  hnuah inkhawmpuiah hian tlangzarh a ni. Bung 13 awmin, Santhal tawnga lehlin vek tur a ni.

An rawngbawlna peng pakhat Baptist Tailoring Training Centre (Puanṭhui lam) zirlai zir zo mi 5 te thlahna hun he khawmpui ah hian hman a ni a. An vai hian Thuziak (Citation) leh Puanṭhui khawl (rah buk) pek vek an ni.Tun tum inkhawmpuiah hian Baptisma chang thar Mi 19 lai an awm bawk.

Sipai Agniveer a tang duh tan remchang siam dawn

Sipai Agniveer a tang duh tan remchang siam dawn

Lunglei 29/3/24: Assam Rifles te chuan Army Agniveer an lak turah tualchhung thalai,sipai tang duh te tan pre recruitment training an buatsai dawn. Lunglawn Assam Rifles camp,AXIS Bank ATM bulah  online a dilna application an hawng mek a, Mipa nupui la nei lo, kum 17½ to 21 inkar tan dil theih a ni ang a, 10th April 2025 ral hmain a tih theih ang.Exam hi June 2025 vel a neih tur a ruahman a ni . Thalai a duh apiang, abik takin Lunglei dist chhung ami te chu ngaihven turin an sawm.

ZUNZAM MORNING NEWS ( 29.3.2025)

Lunglei 29.3.2025 : MPSC Mizoram Civil Services (combined competitive) 2024 mains written exam result a tichhuak.

He Examination atana dilna thehluttu zawng zawngte tan Preliminary Examination chu Ni 27.07.2024 khan Aizawl khawpui chhung Centre hrang hrangah leh District Headquarters zawng zawngah buatsaih a ni. Kuminah hian Applicant 5,854 awmin, Preliminary Examinations paltlang a, Main Examination hmachhawn thei chin hi an vaiin mi 346 an ni a, chung zinga mi 344 te chu un-reserved candidate niin, Reserved Candidate (PwBD) mi 2 an awm a ni.

Preliminary Examination paltlang mi 346 atangin mi 319 ten ni 22-25 October, 2024 chhung khan MPSC Examination Hall-ah leh Govt. Higher Secondary School, Lungleiah Main Examination hi an nei a.  Nimin khan Main Examination Results tihchhuah a ni a, MPSC Guidelines hman mek angin Personal Interview (PI) nei thei tur hian mi 68  an tling a ni.

Post hrang hrang awm dan chu : MCS 15,MPS- 8; MF&AS- 8; MIS- 3 Avaiin 33+1= 34 a ni.

PDF link lo dah a ni e.

Written Result of MCS (Combined Competitive) Main Examination-2024.pdf

Mizoram BJP ten Amit Shah HM in Pu Lalduhawma CM hnenah Lengpui Airport chungchang thurawn a pe an ti

Pu Vanlalhmuaka chuan , "BJP sorkar Pu Modi-a kaihhruai hian Mizo mipuiten harsatna  kan tawh hrang hrang heng Tripura Bru repatriation chungchanga kum 23 deuh thaw kan lo buaina, eng sorkar mahin an chin fel theih loh chu kan Union Home Minister Pu Amit Shah-in 2019 khan min chin fel sak a. Kum 1987 atanga Aizawl khawpui aṭanga Assam Rifles Zokhawsanga sawn chhuak tura Mizo mipuiten kan lo beisei tawh chu kan Union Home Minister Pu Amit Shah vekin 1st April, 2023 ah Zokhawsang AR headquarters chu rawn hawngin, 15th March, 2025 khan Assam Rifles-in a an luah ram chu Mizoram sorkar kutah hlanna neiin, Pu Amit Shah-in min chin fel sak leh ta. 

Lengpui Airport Airforce hnena hlan tura hmalakna awm nia a hriat avanga mipui buaina pawh Pu Amit Shah hian kan CM Pu Lalduhawma thurawn lo pe in, Lengpui Airport chu Civil Airport-a buatsaih tur leh AAI kuta hlan tura buatsaih turin  thu rawn a lo pe leh ta a ni. 

Hetiang khawpa Pu Amit Shah-in Mizoram leh Mizo mipuite kan buaina min chinfel sak hi BJP Mizoram chuan Pu Amit Shah, Union Home Minister zahawm tak chungah lawmthu kan sawi a ni," a ti.  Tv Lalramdinfela, State IT Convener-in inkhawm a kaihruai a, Inkhawm ah hian Pu Vanupa Zathang, IPS (Retd), State Vice President leh Pu VL Awia, State Secretary te'n thusawina hun an nei bawk.

Mizoram Education Reforms Committee (MERC) thutkhawm vawi 10-na chu nimin khan Chairman Dr. Vanlalthlana, School Education leh Higher & Technical Education Minister kaihhruaiin Directorate of Higher & Technical Education Conference Hall-ah an thukhawm.

Meeting-ah hian Private School Recognition Rules chungchangte, Mizoram Education Transfer & Posting Rules chungchangte, State Level Public Consultation chungchangte leh Education Reforms Campaign chungchangte sawi ho a ni a. Heng bakah hian MERC hnena lehkha lut 13 te sawi ho ani bawk.MERC meeting vawi 10-na hi Sawrkar kum kallai mek 2024-25 chhunga thutkhawm hnuhnung ber tur a ni .

Myanmar leh Thailand ram te lirnghuing na takin a sawi avangin mi 144 an thi tih chian ani tawh.

Puan tawh angin he lirnghing hi magnitude 7.7 a na niin a hnuah vawi nga na tak takin a nghing nawn bawk a. Myanmar leh Thailand ramah chhiatna nasa tak a thleng a ni. Lirnghing hi ram thenawm China leh india ah te pawh hriat a ni.

Myanmarah hian an khawpui Naypyidaw a hospital te, an rama monastery lian zinga mi Ma Soe Yane monastery te, Mandalay University te leh building engemawzat, a bikin building hlui lam te a chhe nasa a,  kawngpui khi chat te, lei (bridge) chhia te a awm a, Irrawady lui chunga lei pawh chim zingah hian a tel a, Myanmar a chhiatna hrang hrangah hian mi 144  an thi a, 730 chuangin hliam an tuar bawk a, thi leh hliam zat hi in chim velin a delh an tam avangin la pung zel thei a ni.

Thailand ah chhiatna a tam hle a, chhanchhuaktu pawlte chuan mi 117 chin hriatlohin an awm tih an sawi a,  Bangkok a inchhawng sang, chhawng 30 tur la sak zawh loh chu a chim a, hnathawk 84 te a chim hnan a, engzat nge thi hriat ani rih lo.

Myanmar sipai sorkar hruaitu Gen. Min Aung Hlaing chuan thi leh hliam zat hi la pung chho zel thei a ni tih sawiin ramdangte chu tanpuina thawh turin a ngen a ni.

MSU ten Law & Order tibuai thei Social Media te chhuichiang leh khuahkhirh turin Cyber Crime Police Station-ah dilna a thlen. ( An thu thlen dan ngai ngaiin )

MIZO STUDENTS' UNION 

General Headquarters: Aizawl 0389-7966360 No.D.101/MSU-GHQ/2024-2026/29

To,The Officer in Charge 

Cyber Crime Police Station

Mizoram, Aizawl.

Subject:Law and order tibuai thei Social Media te chhui chiang leh khuakhirh tura ngenna

Dated Aizawl, the 28th March, 2025

Ka Pu,

Social media hrang hrang YouTube, WhatsApp Channel, Telegram leh Instagram-ah te Mizorama cheng hnam peng hrang hrangte inkarah inhuatna chi tuh thei dawt leh thubelhchian dawl lo thehdarh a ni fo thin niin kan lo hria a. Hei hian Mizoramah law and order pawh a la nghawng hial mai ang tih te pawh a hlauhawmin kan hria a ni. 

A chhan chu Mizoramah hian Zohnahthlak chi hrang hrang kan chengho a, chutih laiin kan hriat theuh angin kan thenawm Myanmar leh Manipur-ah Zohnahthlak leh Zohnahthlak pawh an intawng nasa hle a ni. Chuvangin social media hian thubelhchian dawl lo, tu hnam peng emaw tan hriat nuam lo tak an thehdarh fo chuan a chhan letna a lo chhuak dawn a, chumi chuan tharum thawhna khawi khawiah emaw a rawn tichhuak thei leh zel dawn a ni. A bikin hengte hi thlirtu leh follower ngah leh kan sawi tak Zohnahthlak hnam peng hrang hrang te kara thu sensitive post tam, enzui ngai zual nia kan hriatte chu a ni:

You Tube Channel: Zofa Journal

You Tube Channel: Alpha Mizo Production

You Tube Channel: Ben Vanchhawng

Facebook: ALL CHIN ZOFA TE 

(https://www.facebook.com/Parmawirim)

Telegram: Zofa Journal (https://t.me/-6L1xcB9LJ_EINDFI)

Instagram: Zofa Journal (https://www.instagram.com/zofajournal?igsh=Ym9idGdyanZ3Mzkw)

Heng lo pawh hi Mizorama communal tension siam a, law and order chungchanga harsatna siam thei nia langte chu min chhuisak vek turin kan ngen a che.

I Rintlak,

Sd/- (ZODINSANGA)

General Secretary Mizo Students' Union General Headquarters

Ph: +91 84140 96458