Pi Runliani thattu ni ngei a hriat Vanlalmuanchhana kum 21 chu Central Jail ah dah luh a ni.

Vanlalmuanchhana

Kar kalta Thawhlehni chhun pachanga Aizawl Maubawk venga ama chenna ina kum 80 a upa Pi Runliani thattu ni ngei a hriat Vanlalmuanchhana kum 21 chu Central Jail ah dah luh a ni.

Aizawl South SDPO Pu Stephan Lalremthara hnen atanga thu dawn danin Maubawk, Bethel Venga cheng Vanlalmuanchhana hi a hma lama rinhlelh an hren mi 7-te zinga tel lo a ni a. Nimina Pi Runliani pawisa dahna bag hmuhchhuah atanga chhui zui a an man a ni a.

Cheng 2,000 bawr vel a bag-a awm a lak hnu-ah a hman bang chu Police-in an hmu let a. Inrinni tlai thimhlim khan manin a inpuan hnu-ah court-ah hruai-in zan dar 9 hnu lam khan Central Jail-a dahluh a ni a.

Tualthattu ni a rinhlelh Vanlalmuanchhana hi Pi Runliani te chenna in atanga hla lo te a awm a nih thu Police-te chuan an sawi a. Tualthahna hmuna pheikhawk hniak atangin a chappal bun nena hmehbelin an man a, Police hma-ah a inpuang ta niin SDPO chuan a sawi a ni.

Pi Runliani hi a hrawka zai a nih bakah a nghawngah chemte a vihna hnuhma a awm a. Thisen baw nuaih bulah a ruang hi hmuh a ni a. A thih thu hi Mizoram pumah darh nghalin mipui thinrimna a sosang hle a.

MHIP General Headquarters leh a chenna Maubawk khawtlang bakah hetianga hmeichhia-ah pawh kum upa lam laka tharum thawhna demna thawm hi a ring hle a. Police te'n ngawrh taka an chhui hnu-ah a thattu ni ngei a hriat hi an man ta a, a thah ngei thu a inpuang niin Police chuan an sawi a ni.

Maubawk veng local council leh tlawmngai pawl hrang hrangte chuan nimin khan thuchhuah intawm siamin Pi Runliani thattu ni ngei a hriat man a nih chungchangah Police te chungah lawmthu an sawi a. Dan anga na taka hrem an phut bakah an venga awmzui an remtih loh thu an puang bawk a ni.- Source- AIR