CSS Employees 2400 ten Mass Casual Leave an la.

All Mizoram CSS Employees Co-ordination committee (AMCECC) Sub HQRS. Lunglei ten Sorkara laka an lungawilohna lantirin MAss Casual Leave laiin Lunglei Tennis Court hluiah an fuan khawm.

An lungawiloh chhan an tarlan zingah: 

1. Mizoram CSS Employees Regularisation Scheme 2024 hmanga tun hnaia Health Worker an lakte hi dan lova lak an ni a, Sorkar hian dik lo taka an nghehna tura dan sawi danglam(relax) a nih avangin sut leh ngei rawh se.

2. DP&AR Secretary hnenah kan thehluh presentation, anmahniin thehlut tura min tih, hun rei tawh taka kan thehluh tawh min tihbosak hi âwm lo kan ti hle a. A hma thei ang berin All CSS ten he Regularisation Scheme 2024 Gazette awm tawh, a taka kan hman theihna tur hi ngaihtuah vat rawh se.

3. Kan CM zahawm takin dan lova lak min ti fo leh Health Minister zahawm takin  Article 14 leh 16-na dan kalha lak min ti fo hi kan rilru a ti na hle a. Dan lova latute chhui chhuak a hremna pe turin kan phut tlat a ni.

4. State dang Manipur etc. ten Constitution hrulah CSS te an dah ngheh theih laia Mizoram Sorkarin a ti ve thei tlat lo hi, a chhan leh vang chiang taka tarlan ni rawh se. Kan hlawhte pawh a hun takah min pe ve thin tawh rawh se.

5. Dan lova lak min titute hian kan pangchanna leh nawrhna leh sorkar laka kan thil kar ve changin dan hmangin no work no pay hmangtein min hrem leh min control an tum fo mai hi na kan ti a. Kan hamthatna tur kan hman ve theih loh dan ngawt an zawng hi Constitution zah lohna leh discrimination dik tak a ni kan ti bawk.

6. Sorkar lakah thu lawmawm ziak leh thu delhkilh felfai tak a awm loh chuan Mass Casual Leave ni 3 hi kan la tlang anga, awmzia a neih loh chuan a aia nasain kal zel dan tur an rel leh ang.

Vawiina Lunglei Tennis Court hluia Mass Casual Leave la kal khawm te hi  260 chuang an ni a, khawpui pawnah thawktu tam tak an lo kal ve thei lo tih an sawi a, Lunglei District chhunga CSS hnuaiah thawktu hi mi 2400  vel awm anga ngaih an ni a, an zingah hian sorkar dept-a hna pawimawh tak tak thawk niin a then te hi chu Health Dept-a Superviser, Nurse,  High School Headmaster, Pharmacist,   Psychologist  leh Higher leh High School Teacher tamtak an tel a ni. Hei vang hian Sorkar office hna tamtak bakah Hospital leh  zirna school engmaw zatin a sukuk phah ngei nia hriat a ni.