Mualṭhuam North ṭhalai lungawilo leh rilru nâ te nimin tlai khan an pung khawm.
H.Ramdinpuii thattute hriat chhuah anih chungchangah Mualthuam North khawtlangah thil duhawm lo thleng zui a awm lo a, Sub Hrs YMA Lunglei chuan Lunglei Police Special Investigation Team (SIT) te fakawm an tih thu an sawi.
Mualthuam North tleirawl H. Lalramdinpuii thattu te inpuan hnu ah Mualṭhuam North ṭhalai lungawilo leh rilru nâ te, Ramdinpuii te In bul velah nimin tlai khan an pungkhawm a, boruak thalo thleg tur vengin police leh khawtlang hruaitute an awm a, boruak thalo, a awm zui lo nia thu dawn a ni.
Nizan lama puan tawh angin H. Lalramdinpuii, Mualthuam North tualthihna chungchangah hian Lunglei Police chuan Rinhlelh kai thei tur thil awmte chhui chian nan mi hrang hrang an ko a, chung zingah chuan mi pahnih, Denghmingthanga (20) leh Lalneihkima (34), Mualthuam North ve ve te chu vawi tam tak thu zawh fiah turin koh anni tawh a. Police-te chuan an phone hman dan (digital evidence) leh Forensic evidence an kalpui atanga rinhlelhna awmte chu an chik chho zel a, chung finfiahna te leh zawhna chi hrang hrang an hmachhawn hnu ah, nimin khan hemi te pahnih hi Lunglei Police SIT te hma ah an inpuang ta a ni.
H. Lalramdinpuii an thah thu an puan hnu hian Police te chuan nimin chawhnu dar 1 khan dan ang takin Denghmingthanga leh Lalneihkima te chu an man nghal a, Judicial Custody-ah dah nghal an ni bawk.
Police thuchhuah chuan H. Lalramdinpuii thah a nih chungchanga thil thlen dan kimchang leh finfiahna (evidence) hrang hrangte erawh tun dinhmunah dan kenkawhte leh he thubuai chhui zelna tibuai thei tur anih avangin la tarlan theih ani rih lo tih an tarlang.
Mualthuam North atanga thudawn danin, tualthattu nia insawi, a kum naupang zawk Denghmingthanga hi H. Lalramdinpuii nen inlaina hnai tak anni a. Vengkhat a, In inhnaih tak anni a. Pakhat zawk Lalneihkima pawh Ramdinpuii te nen In inhnaih taka cheng anni a, Neihkima hi nupui fanau nei tawh ani. An pahnih hian Ramdinpuii ruang zawnna ah te pawh an thawk chhuak a ni.
H Lalramdinpuii hi August ni 3, 2026 zan dar 8:30 vela a chhuak chu chin hriat lohin a awm zui a, khawtlangin an zawn hnu ah August ni 5 chawhma dar 10 khan Mualthuam North Middle School hnung lamah thia hmuh ani a, a ruang an endikna ah hian, a awma vihna avanga thi ani tih hriat a ni.
YMA Sub Hqrs Lunglei chuan H.Lalramdinpuii tualthihna chungchangah hian thuchhuah siamin Lunglei Police Special Investigation Team (SIT) te chungah lawmthu sawiin hun kalta ah pawh Lunglei Police te misual hnu-chhui kawngah an fakawm thin tak zet tih an tarlang a.
YMA Mualthuam North Branch, YMA Vanva Group hruaitute leh member te hmalakna chhuanawm an tih thu tarlang bawkin, pawi khawihtu chhuina ah police te theihtawpa an thawhpuina pawh ahlu in khawtual boruak hreawm tak hnuaia, khawtlang tana ke an penna ahlu an tih thu an sawi a, he vanduaina thleng a, an tlawmngaihna leh thawhrimna ropui an tih thute, khawtlangin hun harsa tak leh nu-nau thlabar te, thlamuan an ngaih hun ah hruaitu leh member te an inchhi eng hian, YMA mai nilo, Mizo hmel a timawi tiin an chhuang tak zet bawk.
Sub Hqr YMA Lunglei chuan H.Ramdinpuii rawng taka a nunna laksak ani hi an lainat in, tualthattute an dem tak zet tih an tarlang a, Hetianga tualthihna rapthlak tak kan khawtuala athleng ta fo leh hmeichhe awm nem leh chaklo zawkte tana kan khawtlang a ralmuang tawk ta lo nia lang hi apawi kan ti hle tiin pawi khawihtute an phu ang ngei hremna pe ngei se an duh dan anih thu leh hetiang thil hi thleng nawn tawh lo se an duh tak meuh tih an tarlang bawk.
================
ZPM in LC leh VC seat an la hnem ber.
Local Council leh Village Council seat ruak hnawh khah nana by election neih ah rorellai ZPM in seat an la hnem ber.
Mizoram chhunga khua leh veng 12-a Village Council leh Local Council By-Election neih ah Result hriat danin AMC leh LMC hnuaia Local Council inthlan ah ZPM chuan seat 6 an la a, MNF in Local Council 2, an la a. Village Council ah ZPM in VC 2 an la a, INC in 1 an la a, Indepedent (Tangrual pawl) in 1 an la ani.
Hriat theih chin ah Party hrang hrang seat lakna te chu:
1. Selesih ah ZPM;
2. Dawrpui Vengthar ah ZPM;
3. Bungkawn - ZPM;
4. Salem Veng - ZPM;
5. Durtlang - ZPM;
6. Zotlang, Lunglei - ZPM;
7. East Lungdar - ZPM;
8. Bunghmun - ZPM;
9. Bilkhawthlir - Congress;
10. Luangmual - MNF (Ṭangrual);
11. Republic Veng - Independent (Ṭangrual pawl);
12. Zotlang, Aizawl - MNF (Ṭangrual); te a ni.
ZPM party chuan Pu Lalduhoma- kaihhruai 'Kalphung thar' sorkarah kalphung hlui tamtak tha lo thlak ani tawh tih hriain, ZPM party candidate vote-tu zawng zawngte chungah lawmthu an sawi a. Local Council leh Village Council atana thlan thar zawng zawngte khawtlang rawngbawlna kawnga ṭha taka thawk turin duhsakna an hlan tih an tarlang.
==========================
Comments
Post a Comment