LUNGLEI 23.2.25. MANIPUR PANNA TUIVAI LEI CM IN A HAWNG.
Chief Minister Pu Lalduhoma chuan nimin inrinni khan Mizoram leh Manipur inrinaa Tuivai Lei a hawng a, a hmingah inunauna lei, ‘Unity Bridge’ a vuah.
He hunah hian thu sawiin Chief Minister chuan he kawngpui hi Mizoram leh Manipur inkalpawhna kawng pawimawh ber a ni thin a ti a, Inter State Bus te pawh tlantir a ni a, lei hi tuilianin a lak leh mai thin avangin kum 1999 khan meter 6 laiin an tisang a. Hma an lak mek lai hian Seling to Tipaimukh road chu National Highway atana puan a ni a. MoRTH lamin permanent-a dawh tumin hma an la mek tih hre chungin, sum leh pai seng lutuk lo va, Bailey Bridge part hlui te fawm khawm a, hun engemaw chen atana hman theih tur Bailey Bridge dawh an rilruk ta a ni a ti. Hna an thawh tan lai nikum May ni 9 khan amah ngeiin a hmun hi a tlawh thu leh hmanraw thar hmanga dawh zawk turin PWD Engineer te a hrilh thu a sawi a. Chief Minister chuan he lei dawh hna hi hmanhmawhthlak bik leh pawimawh bika an ngaih avangin chak takin an bawhzui a, kum khat pawh a ral hmain an dawh zo va, tun thla ni 2 khan uluk takin an enchhin a, tha tawkah an ngai tih a sawi.
Chief Minister chuan Kawngpui tha pahnih a lo awm dawn ta chu thaw a veng huai tih a sawi a. He lei chhawr phak mipuite a lawmpui thu leh Manipura unau harsatna tuar mekte puala theihtawp chhuaha an dawh a nih avangin Inunauna Lei (Unity Bridge) tiin a hming a vuah thu a sawi a ni.
He lei sei zawng hi meter 200 a ni a, a lawn kaina lei meter 50 nei, a vaia meter 250 a sei, metric ton 30 dawl zo tura dawh a ni a. Tlo leh him taka a awm theih nan metric ton 20 chin chauh zawhtir an phal dawn thung a ni.
No comments:
Post a Comment