ZUNZAM MORNING NEWS (8.4.2025 )

Rajya Sabha MP in Sairang Railway Station a tlawh

Lunglei 8.4.2025 : Rajya Sabha Parliament session tûn thla ni 3-a neih zawh taka tel Rajya Sabha MP Pu K. Vanlalvena chu nimin khân alo haw a, MNF General Headquarters-a Secretary-te'n Lengpui Airport-ah lo hmuak.

Pu Vena lo hmuaktute hian Placard-a thuziak hrang hrang-Tribal MP tia inchhal ngam, Zohnahthlak zawng zawngte thlavang hauh ngam MP K. Vanlalvena; MP huaisen K. Vanlalvena kan chuang a che; Mizo Nationalism zahpui lotu leh Isua zahpui lotu Pu K. Vanlalvena kan chhuang a che tih thuziakte an keng hlawm a ni.

Pu K. Vanlalvena chuan Sairang Railway Station chu a haw kawngah tlawh nghalin, Deputy Chief Engineer Aizawl NF Railway Harjimal meena-a'n a lo dawngsawng a, programme reilote hman a ni.

He hunah hian Pu K. Vanlalvena chuan thu sawiin, "Zoram mipui tena kan hriat tawh ṭhin leh kan nghahhlelh em em helai rail station hi engtikah nge zawh a ni ang tihte kan lo ngaihven em avângin parliament session-ah te pawh ka sawi chhuakin, engtikah nge zawh a ni ang tihte pawh kan lo zawt fo tawh," a ti a, Parliament session-ah helai railway chungchâng hi vawi li lai a lo thlen tawh thu a sawi.

Pu K. Vena chuan, "Bairabi aṭanga Sairang inkâr 51km leh tlêm hi hna zawh thlenga pawisa senso atâna santioned zât chu cheng vbc 8,215 a nih thu sawiin, tûn thlenga hman zawh tawh zat chu cheng vbc 7,714 a ni tawh," a ti a, hemi huang chhûngah hian zawh ngei a beisei thu a sawi bawk. Kurung lei bân sâng ber dawh a nih laia chim khân hnathawktute nunna chân engemaw zat an awm khân kumkhat dawnin hna a tihmuan thu a sawi.

Hortoki thleng tunah rail a kal thei tawh a, hortoki aṭanga Kawnpui thleng pawh siam zawh tawh niin commission theih tawh a ni. Mualkhang thlengin zawhfel a ni tawh bawk. Northeast Frontier Railway Deputy Chief Engineer Harjimal Meena chuan, tun kum july thla ah railway chu peihfel a nih tûr thu a sawi bawk. 

Pu K. Vanlalvena chuan, "Zin veivah nana tlâwm ber rail kawng kan nei thei dawn ta chu lawmawm a tih thu sawiin, tunah hian helai hi rail kawng tâwp ber ni rih mah se, Mizoram dung hrûta Zochachhuah thlenga railway siam hi central sorkar thiltum a ni," tih thu a sawi bawk.

Petrol leh Diesel man Rs 2/- in ti pung dawn

Sawrkar laipui chuan petrol leh diesel-a excise duty a lak chu cheng 2 in a ti sang dawn. Hetihrual tuialhthei company te chuan excise duty ti sang mahse mipuite hnena hralhna retail price erawh tihsan a ni dawn lo an ti a. Union Petroleum and Natural Gas Minister Hardeep Singh Puri chuan tuialhthei chhiah lak tihsan hi consumer ten an tuar lo ang tih a sawi.

Union Finance Ministry chuan tuialhtheia chhiah lak tihpun hi vawiin ni April ni 8  atanga hman tan tur anih thu a sawi. Union Minister chuan LPG cylinder pawh bur khatah cheng 50-a tih san anih tur thu apuang a. Ujjwala hmangtute tan bur khatah cheng 550 niin midang tan bur khatah cheng 853 a ni ang. 

Manipur-ah Ui in mi 749 a seh zingah 3 an thi tawh.

Manipur Churachanpur a Ui a seh avanga in khuahkhirhna nasa taka an kalpui hnu leh Mi 3 ui a seh avanga an thih hnuah hmalak reng ni mahse a enkawlna lam damdawi duh ang an neilo tih Vety mithiam ten an sawi.

Churachanpur a Zoveng ah hian January thla atang khan mi 749 vel Ui in seh tawhin an zinga 3 hi Ui a seh rabies natna avangin an thi  tawh a, Ui seh avang hian private damdawiin tam takah enkawl lai an awm bawk a,hei vang hian helai bial hi 'Containment area' a puan niin Ui leh zawhte leh ran reng reng uluk taka khuahkhirh an ni.

Ui seh te hi uluk taka enkawl ni mahse rabies enkawlna damdawin duhkhawp an neihloh thu Vety Dept officer te chuan an sawi a,nimin chhung ringawt khan In 30 chuang endik niin a mi chengte pawh uluk taka enfiah leh thu zawh an ni bawk a,hmeichhe 1 Ui a seh avanga a thihna Mongken khua ah pawh vaccination kalpui mek a ni a,he ruahmanna hnuaiah hian khaw engemawzat endik niin an ran te pawh Vaccination pek an ni tawh bawk.Hemi chungchangah hian Churachanpur Vety Dept hotu chuan rabies enkawlna duh ang an neih loh avangin harsatna an tawk chho mek tih a sawi a, nimin khan Director of Health services chuan Churachanpur leh Mongken khua te hi a tlawh bawk a,thuneitute nen hmalak zui dan tur an rel ho nghal bawk a ni.

Supply Minister Pu B Lalchhanzova'n vawiin khan Tripura atanga Sihmui inkara Gas Pipeline phum mek hnathawh chu a tlawh .

Minister Pu Chhanzova chuan Luangpawla  pipeline phumna hmunte,  Sihmuia Gas dah khawlna tur Receiving terminal siam mekte a tlawh a, hemi hnu hian Mamit DC Confenrence Hall-ah gas pipeline phum hna thawktu IGGL, TNGCL hotute, Mamit DC leh staff bakah Mamit khawtlang hruaitute nen inkawmhona hun an hmang a. Pu Chhanzova chuan Gaspipeline hnathawh kawnga hmasawnna awm dan chu thlatin thlirho thin tura Mamit DC te nen an rel thu leh hmasawnna hna chu rang taka thawhzawh a beisei thu a sawi a,  hmasawnna thil lo kal thin te chu a ram neitu mizo mipui ten an hriat tur ang angte chiang  taka an hriat chu an chanvo a nih thute, hriat ngei pawh tum thin turin khawtlang hruaitu leh mipuite a fuih bakah an hriat duh apiangte hrilh hria a,zirtir thin turin IGGL, TNGCL leh Mamit DC te a chah bawk.

Inkawmhona hunah hian TNGCL leh IGGL hotute chuan he project chungchang zirtirna leh sawifiahna hun an hmang a, pipeline hi Km 127 a thui phum tur a ni a,  Mamit dist ah km 100, Aizawl ah km 4 leh a bak chu Tripura state chhungah ah a awm ani, he project atana suam ruahman chu cheng vaibelchhe 491 niin, March 2026 a zawh hman tura duan ani a. IGGL lamin gas pipeline  an phum zawh ah Tripura Natural Gas Corporation Limited (TNGCL) in eirawngbawlna natural gas chu in lamah tui connection anga herh hawn theihin an sem dawn  bakah Motor a hmanchi CNG chu station engemaw zat ah pek chhuah turin an ruahman bawk ang.

MNF President Pu Zoramthanga chuan  Central BJP sorkar nena kan inlaichinna kha atha tawk lo hle a, BJP lam chuan ZPM an awn ta a ni, a ti.

Nimin a an party office Mizo Hnam Run-a thu a sawina ah Pu Zoramthanga chuan tunhnaia Union Home Minister Amit Shah nen an inkawm chungchang sawiin Vairengte- issue bakah Central BJP sorkar nena kan inlaichinna kha atha tawk lo hle a, BJP lam chuan lehlam (ZPM) an awn ta a ni, a ti a. Tuna Pu Duhoma- sorkarah hian BJP-ten tel ve an inbeisei dan te, a hnu ah MP inthlan a, ZPM chak kha khatih laia BJP-in Central a sorkar siam tura, MP 272 an mamawh lai tak a ni. Mizoram Lok Sabha MP pakhat chauh pawh apawimawh em em lai ani a. Khati chunga BJP tan an pe thei lo kha, an boruak atha ta lo takzet a, Pu Amit Shah chuan MNF chu sorkar leh ngei se min duhsak a ni, a ti.

MNF President chuan an inkawm chhan Burma- rama remna a awm theihna tura palai hna athawh dan ahrilh tih asawi a. Burma underground intelkhawm >in, federal state siam an duh a, a lehlam ah Burma sipai sorkar pawhin federal sorkar siam an remti ve bawk a. Rangoon, Bangkok a vawi tam, ka kal hnu ah India- sorkar ah ka report a, anni'n Pu Ajit Doval-a nen min tir ta a, kan hlawhtling teuh hle a. India- rama exposure nei tura phur taka ruahmanna siam a, hmalakna kan neih laiin Burma election-ah, Aung San Suu Kyi, a sorkar ta a, hmalakna atawp zui ta a ni, a ti bawk.

'Smart City aiin, Smart MLA kan mamawh zawk' - Pu Rosiamngheta MPCC Secretary, AMC Corporator 

Nimin a Congress party in, Political Session an neih ah thu sawiin Pu Rosiamngheta chuan Smart City aiin Smart MLA kan mamawh zawk a, mimal that falna aiin vantlang that tlanna kan mamawh zawk bawk, ati a, Kan hotu ten thil kan tiam zung zung a, changkang takin thil kan sawi a, atak ram kan thleng zo leh si lo a, kan system hi ennawn angai a, mimal a, hlawkna tur te hi kan um lutuk a, mimal dinhmun that falna aiin kan khawtlang that tlanna, ram hian kan mamawh zawk a ni, a ti.

Congress Bhawan-a Political Session hi Pi Zolawmi, General Secretary, MPCC chuan a kaihruai a ni. 

State BJP President Pu Vanlalhmuaka chuan BJP tum bulpui chu, development a ni a ti.

Nimin khan BJP Mizoram State Office, Mipui Rûn, Upper Republic-ah 'BJP FOUNDATION DAY' vawi 46-na puala hun hman niin, State BJP President Pu Vanlalhmuaka chuan BJP tum bulpui chu, development a ni a ti.

Pu Vanlalhmuaka BJP Mizoram State President chuan thu sawiin, BJP dintu kan mi- hmasa te khan mahni indah hmasa lovin, 'Nation First, Party Second, Self Last' tih hi kan hriatreng angai a, BJP in kan tum bulpui ber chu Pakhatna ah, Development, Pahnihna ah pawh Development, Pathumna ah pawh Development tho anih avangin chung kan thupui ang te chu kan kalsan tur ani lova, kan dinchhan leh awmchhan ah hian kan chiang hle tur a ni a ti.

Mizoram mipui te'n kan BJP chhan dik tak hi nakin lawk ah an la hria ang a, chumi hnu ah chuan development  kan la hmu ve ngei ngei dawn ani, Pu Hmuaka chuan a ti bawk.

He hunah hian hruaitu hrang Pu Van-upa Zathang, State Vice President chuan, 'Pu Lalrinliana Sailo  leh Pu PC Lawmkunga, IAS (Retd) Former Chief Secretary ten thupui hrang hrang hmangin thu an sawi bawk. BJP Foundatuion day tak hi 6th April a ni a, 'Sunday' anih avangin vawiinah hun hman ani.

Phawngpui National Park ram kang chu thelh-mih mai theih ala ni lo.

Phawngpui National Park chu Archhuang lam Lo hal atanga kang tan in, theihtawpin forest department leh tlawmngai pawl ten an thelh hnu ah an thelhmit thaw khat tawh tih ah, kar kalta nilaini tlai atang khan, thingluang lian, mut tawlh in, a hnuai phul hmun ati kang leh a, forest department leh YLA ten theihtawp an chhuah zel a, a mei hi chu, um chi ani lo a, Cheural lam side ah akang zel tur venna mei kawng sial in, nizan pawh khan mi 38 in meikawng an siam a, vawiinah mi 42 an thawk chhuak leh a, Sentetfiang lam atangin, mi 8 vel an thawk bawk a, Thal-tlang lamin an khaw lam an veng bawk a, Pathianni pawh chawl thei lovin kangmei an veng a ni.

Phulhmun, Far Pak akang zo lo a, tuna Phawngpui area ram kang tawh hi hmun 5 athren a, hmun 2 vel anih a rinawm thu ahmuna duty te chuan an sawi a, kangmei hi ngaw ah aluh tawh avangin akang chak tawh lo a, a tlangsang lam ngaw chu ala lut lo a ni.

Lawngtlai leh Aizawl atangin Forest department hotute pawh kangmei chhuahna hmunah hian an kal nia thu dawn a ni.

MiZP Headquarters  Lunglei chuan ATL road siamna tur sum, pawh pen duhloh lantirna April ni 9, 2025 (Nilai ni)-ah Mizofed kawt Venglai-ah neih an tum.

MZP Hqtrs.Lunglei Extended OB Meeting chuan ATL road chungchanga hmalak zel dan tur relin ATL road siamna tur sum pawh pen duhloh lantir nan ni 9th April, 2025 (Nilai ni)-ah Mizofed kawt Venglai-ah lungawilohna lantir nise an ti a, Lunglei mipuite telpui turin an sawm. Hei bakah MCS sawn  an hmun ruak hnawhkhah loh pawh an vei hle tih an sawi. Hetih lai hian hemi ni vek chawhnu dar 2:00 hian  PWD Minister Pu Vanlalhlana chuan Lunglei Press-ah Press Conference hun  hman a tum .

Sri Lanka a, Bandara-naike International Airport (BIA) ah Mizo nu pakhat chu cocaine nuai 657 chuang man hu, man sak a ni.

Media te tarlan danin he hmeichhia kum 29-mi hi Mizoram mi, Chef niin Police Narcotics Bureau (PNB) in an man tih tarlan a ni a, an chhuizuina atangin he hmeichhia hian a passport atangin a hma in Sri Lanka hi vawi thum a lo tlawh tawh a, Chennai atangin nimin zing khan BIA hi athleng a, kum 50 mi, Malebe mi sumdawng chuan, colombo hotel ah lo nghak in a concaine chu a lo la chhawng a, PNB Officer ten intelligence report an dawn atangin cocaine Kg 1 leh gram 644, suitcase mawng a polythene a, pack thuhruk chu an man sak a, Negombo Magistrate- Court ah hruai anni ang. He nu hming hi media te hian an la tarlang lo a ni.