Regional Met Centre, IMD Guwahati chuan ruahsurna chance a tam a ti.

Khawchin thlirlawkna-ten an tarlan angin  nimin lam atangin Mizoram hmun hrang hrangah ruah ala sur reng a, tukin hian a sur tam zual.

Mizoram District hrang hrangah nimin lam atangin ruah a tla deuh renga, nimin lamah chuan tam lutuk ang chuan a sur lo niin a lang a, hmun tam berah chuan nizan atangin a sur tlaivar thung a. Nimin chhun lam aiin nizan lamah ruah atam niin alang a, tukin lamah atam zual a, khawchin thlirlawktute chuan vawiin hian Mizoramah ruahsur tam turin an sawi a. Hmun thenkhatah chuan ruahpui nasa tak, tui lian thut thlen thei asur thei a ni. Tukina district hrang hrang kan hriattheih chinah nizan atangin ruah asur deuh reng hlawm a, mahse sur nasa lutuk chu a nilo hlawm, tukin lam hian Mizoram hmar lam leh khawthlang lamah hian a tam deuh em tih tur a ni.

Ruahsur hian Power pekchhuahna lam pawh a nghawng nasa hle a, Siaha-ah chuan nizan dar 8 vel atangin power supply an nei lova, Mamit lam pawhin tukin atangin power supply an neilo a, he thu buatsaih lai thleng hi chuan ruahsur avanga leimin lian tham leh a kaihhnawih chhiatna lian tham report hriat ala ni lo.

Ruah a sur reng avangin leimin leh chhiatna dang thleng palh thei anih avangin chhiatna laka himna atan vawiin  May ni 30 hi Dist zawng zawngah School chawlh puan nia hriat a ni.

Hetiang boruakah hian leimin leh chhiatna thleng thei anih avangin zin veivakte fimkhur angai hle a, lui leh kawr bul hnaia awm te, leimin mai thei bula awmte tan fimkhur a ngai hle a. Tui luankawr fello vangin chhiatna thleng thei anih avangin fimkhur a tul hle bawk.

Regional Met Centre, IMD Guwahati atanga khawchin thlirlawkna angin vawiin hian  Mamit, Kolasib leh Aizawl District hmun tin (76%–100%)ah ruah sur theihna 50%–75% a awm a. Champhai, Serchhip, Lunglei, Lawngtlai, Siaha, Saitual, Khawzawl leh Hnahthial District hmun hrang hrang (51%–75%)ah ruah sur theihna 50%–75% a awm.