BCM Gen.Secy in rualbanlo leh mirethei te a ngaipawimawh.

BCM Gen.Secy in rualbanlo leh mirethei zawk te tan nasa zawk a Kohhran a luanchhuah a hun tawh a ti.

Lunglei 28/6/2025: BCM Gen.Secy Rev. Dr. H. Lalthlamuana chuan India ram pumpuiah Kristian te hian tunlai a boruak min sutu, min chotu kan chhanlet tur thil chi hrang hrang a  awm a, kan ramah hian kristian  te tan  rawngbawl a har  tulh tulh tawh a, Hindu sakhua  han tundin lansarh riau duhna Politician zingah te a lian a, chu chu tlinna hmanruaah an hmang a, sakhuana hmanga Vote zawn te a hluar viau a ni a ti. Sorkar pawh Kristian Sorkar a ni hran bik lova, min hrekna tur ang a thil tih a  tam tawh a,  Income tax law te a khirh hle a, Kohhran te rawngbawlna ah min hung a, min hung zim tulh tulh a,tunhma angin zalen takin chanchin tha a hrilh theih tawh lohva, zalen taka rawngbawlna charity te, Foreign atanga  thilpek  dawn leh pekchhuah hrim hrim pawh a har ta hle a  ni a ti.

He thu hi vawiin khan BCM Electric veng Biakinah Pathianni zing inkhawmah sawiin BCM General Secretary chuan tunhma ai chuan  Kohhran dahsanna pawh a tlahniam ve zel a,  a lang a pau a Kohhran rawn bei ngar ngar ang chi te, timna nei miah lova an hmuhdan sawi te an rawn awm ta. Mahse, hei hi  min chotu, Kohhran te ngaihtuahna ril zawk min pe tu nise a tha in ka hria a, lo huat ngawt zel hi a  tul hran lo a ti.

Kohhran hote hi inenfiah kan ngai takzet tawh tih sawiin  khawvelah hian tangkai takin  miten min hmu em,  Materialism-a intlansiakna nasa lutuk te, ropui chakna te , mit sang lutuk te pawh Kohhranah  hian a awm ve mek a ni. Ruihhlo te hi kan ramah a hluar em em a, chumi dolet chu a tul a ni tih hi Kohhran ten hriat a  tul.  Chubakah chuan NGO tih atana kan zuah tamtak hi Kohhran hian kan hnaah ngai ve tawh ang u a ti. Mirethei tana luanchhuah te, rualbanlo te tana  engemaw tih te, tar chaklo chawmtu nei lo, thi mai tur   inenkawlna neilo, harsa lutuk te, a nawlpuiin an harsatna kan hmuhpui phak  loh kan ramah tamtak an awm. An tan hian Old age Home etc, Kohhran tihtur ni awm tak   kan la tih vak si loh a tam.Social welfare deptt in rualbanlo te tana hma an lakna te hi Kohhran tih atan ka awt, mahse kan ramah Kohhran in kan ti ngai si lo. Ramdang Kohhran chuan heti zawng a hmalakna te hi an uar.

Kohhran hian heti zawng a hma kan lak loh chuan khawvel mite leh Biakin thleng pha lo te hian min ngaisang lovang. Kohhran hi kan tan a phet hle thei a ni. Kohhran hi zahpuiawm lova  zahawm a kan awm theihna turin tanlak a ṭul. Sawma pakhat pek aiin Zo Inspiration a rethei te tana thawhlawm thawh a luangchhuak duh te an awm tawh. Tul lovah Kohhran hian eng ang sum nge kan senral te hi ngaihtuah a ngai a, A ram leh a felna hi zawn a ngai a ni, a ti.