ZUNZAM MORNING NEWS ( 26.6.25 )

E-Office hman vangin File kal a chakin a awm reina Dawhkan hmuh theih vek tawh dawn.

ICT Minister Dr Vanlalthlana chuan a Pisa-ah Chanchinbu mite a kawm naah lehkha hmanga file system kalpui mek thlakna tur E-Office kalpui tan a nih chungchang te leh Sorkar Dept Website kan hman mek te tha zawka siam hna thawh mek a nih chungchang a sawifiah a ni, Minister Dr Vanlalthlana chuan lehkha hmanga file system kalpui mek thlakna tur E-Office kalpui tan a nih thu a sawi. Nimin a a pisaa chanchinbu mite a kawm naah he thu hi sawiin Minister chuan e office kalpui bakah hian sorkar dept website te tha zawka siam hna thawh mek a ni a ti a. 

Mizorama eOffice kalpuina atan hian Dept of Personnel and Administrative Reforms (DP&AR) chu nodal dept a nih thu leh implementing department chu Dept of Information & Communication Technology a nih thu a sawi a. Tuna eOffice atana software hman chu NIC siam a nih thu leh deployment leh hosting chu RailTel lam tih a nih thu a sawi a ni. Minister chuan eOffice chu kumin April ni 18 khan ‘Go-Live’ niin hman tan a lo ni tawh tih a sawi a. A tirah Secretariat-a Dept thlan bik 4, DP&AR (GGT), ICT, School Edn leh PWD-ten an hman hnuah tunah chuan, Secretariat-a Dept zawng zawng, dept 41 bakah Chief Minister Office (CMO)-ah te hman a nih tawh thu a sawi.

Health care Scheme kalpui dan fuh lo - MPCC

Mizoram Pradesh Congress Committee (MPCC) Treasurer Dr Lalmalsawma Nghaka chuan Mizoram Universal Health Care Scheme (MUHCS) chu zawm tura private hospital te nawrh luihin an awm ni a lang mek chu thil nihphung tur a ni lo a ti.

Vawiina Aizawl Press Club-a chanchinbumite a kawmnaah he thu hi sawiin MPCC Treasurer chuan MUHCS chungchanga Private Hospital neitute thuchhuah leh TV vela an kawmna atanga sawrkar in a duh ang barhluih tuma hma a la ni awma lang chu an ngaih thutak thu a sawi a. Private hospital te nen sawihoa inrem tur a nih laia sorkarin a duh anga engkim a kalpui hnuah zawm tura a ti chu Private hospital te tan pawm theih chi niin a langlo a ti.

MPCC Treasurer chuan MUHCS-a tun thlenga mi 5000 vel chauh an la inziaklut chuan mipui rinhlelhna a la len zia a ti lang a ti a, Sorkar damdawiin lian ZMC leh Civil Hospital-ah khum chan a har avangin emergency tak taka inzai ngai te, nau vei ten Private Hospital an pan loh theih loh hun a awm avangin harsatna a thleng chho mek a ni a ti a, heng thil lo thlen chhan chu sawrkar ruahmanna fel loh vang leh kalphung hriat loh vang a ni a ti.

Hei hi kalphung thar anih chuan mipui in an tuar nasa dawn a, an hriselna phei chuan a tuar hle dawn a ni a ti a. Scheme mumal lo taka kalpui a tum chu ZPM  sawrkar chuan ngaihtuah tha leh se, Private Hospital te nen inremna neihpui thuai se, hlawhtling takin kal se tih chu an party duhdan a ni a ti.

Aizawlah Gas Home Delivery ti tha lo veng 9 vel an la awm 

AMC huamchhungah eirawng bawlna gas latute an chenna in a dah (home deliver) tura tihna la kalpui tha thei lo veng 9 vel chauh an awm tawh a. State Consumer Disputes Redressal Commission (SCD RC) Mizoram chuan home delivery hi zaah za kalpui turin a hriattir nawn. SCDRC Mizoram-in AMC huamchhungah leh district hqrs tinah gas home delivery ti vek tawh tura gas distributor-te a hriattir (order) tawh hnu ah la kalpui that lohna a awm nia hria in Mizoram Consumer Union Gen. Hqrs. chu Commission-ah hian a zualko leh a.

 Thawhleh ni khan hearing neih niin, AMC huamchhunga distributor awm zawng zawng – 12 aiawh an kal a, MCU hruaitute an tel bawk. MCU hian gas home delivery ti tura hma a lak naah kum 2015 khan SCDRC-ah hian a lo zual ko tawh a, rei tak chhung a inchiah hnu ah 2023 Oct khan Consumer Court hian judgement order tichhuakin AMC huamchhungah leh district headquarters tinah home delivery ti vek turin distributor-te hi a hriattir a ni.

“Hemi hnu, kumin March – April atang khan home delivery ti tura hma lak zui ni mah se, distributor tam zawk chuan an bawhzui tha lem lo nia hriat a ni. MCU chuan Commission-ah hma lak that a nih loh thu hi a thlen leh ta a ni. distributor zingah hma la tha awm mahse, a tam zawkin court thupek an zawm tha lo nia hria in an zualko leh a; Commission hian home delivery kalpui vek turin a ti a, distributor tin chu an perfomance thehlut tura a tih bakah MCU pawh pe ve turin a ti tih a sawi. AMC huam chhung ah chuan home delivery hi an ti deuh vek tawh a, veng 9/10 velah chauh la kalpui that lohna a  awm.

MLA in hnuchham Naupang 20 Admission tihsak 

Nimin khan Lalchhuanthanga, Aizawl South II bialtu MLA leh ZPM treasurer chuan a bial chhunga Salvation Army enkawl mek Mualpuia Muanna Ina naupang enkawl mekte tan, Mualpui 3rd Battalion MAP English Medium School-ah zirlai 20 tan admission a tihsak. Aizawl South II MLA, ZPM General Hqrs Treasurer ni bawk chuan thu sawiin, Muanna In naupangte chu MLA a nih tirh atanga a thlahthlam loh thu leh, an mamawh thil hrang hrang a theih ang tawk tawka a lo puih thin tawh dan te sawiin, tun dinhmuna pui thei tura Pathianin a hruai zelnaah lawmthu a sawi a, a tul ang anga puih zel a inhuam reng thu a sawi bawk

Seling daiah Silaimu thahnem tak man 

Niminpiah khan 191 Bn. BSF leh CID (SB), Aizawl tangkawp chuan Seling daiah silaimu thahnem tak an man. BSF leh CID (SB) tangkawp hian an thudawn bawhzuiin joint operation an nei a, bolero pick-up MZ/04 - 1935 atangin silaimu (7.62 mm) 3008, Rs. 16,54,000 ma hua chhut an man. Motor hi Lalawithanga (48), Zuangtui, Aizawl nia insawi khalh a ni. Bawngkawn Police Station-ah Arms Act hmangin thubuai ziahluh a ni a. He thila inhnam-hnawih dangte chu an  chhui zui dawn a ni.

Kum 10 tang turin hrem 

Heroin gram 512 (hawng 42) kawl vanga September 23, 2023- a man, Jalal Hussain Barbhyia (26), Kaptanpur Part-3, Silchar chu Kolasib Fast Track Court chuan thiam loh a chantir a, a hremna hi nimin khan Kolasib Fast Track Court judge R Vanlalena’n a ti chhuak a, kum 10 chhung jail-a tâng tur leh Rs 1,00,000 chawi turin a hrem a ni. A pawisa chawi tur hi a pe tla thei lo a nih chuan a tan belh leh ang.

Ni 12 indo hnuah Israel leh Iran inkahhai.

US President Pu Trump-a chuan Israel leh Iran inkara inkahhai kalpui tura inremna chu ‘a taka hman tan’ a ni tih a sawi a. American hruaitu hian inkahhai kalpui tan a ni hi Iran-in Israeli ram chhunga missile a kah luh hnu lawk ni mah se Middle East-a ram hnih inhal takte hi bawhchhe miah lo turin a vau lawk nghal bawk  hemi hma hian US hruaitu hian ni 12 chhung indona chu inkahhai pum hlum hmanga tih tawp a nih thu leh darkar 24 awh tur hi Thawhlehni zing dar 04:00 (India-a zing dar 09:30) atanga hman tan turin a ni tih a sawi a. 

Iran-in a zawm hmasa ang a, Israel-in darkar 12 hnuah a zawm zui ve ang. Iranian sorkar chanchinbu pawhin Israel-a thawh nga na a missile an kah hnuah inkahhai hi a taka hman tan a nih thu a puang a, an beihna hnu hnung berah hian Israel chhim lama mi 7 vel an thi niin a sawi bawk. Iran-a sorkar hnuai ni chiah lo, SNN news agency pawhin Tehran hian inkahhai puan hma lawkin missile eng emaw zatin a kap tih a tar lang ve bawk.

Missile-a beihna an tawh hnuhnung a tawp rualin Israel-a sipaite pawhin mipuite chu an inhumhimna leh a chhehvel an chhuahsan theih thu an puang bawk. Thil dinhmun inher mekah Home Front Command chuan ram pumah hmun him chin chhehvela awm tura tihna chu a hlip ta, tiin sipai hian thu a chhuah. Trump-a hian Tehran-in Qatar-a American sipai hmun a beih hnu lawkah Israel leh Iran inkara inkahhai hi a puang a. Kartawpa US-in Iranian nuclear hmun a kahna chhan letna chu Republican hruaitu hian chhanna nep tak a nih thu a sawi bawk. 

White House thuneitu chuan news agency Reuters hnenah Trumpa’n Israeli Prime Minister Benjamin Netanyahu biain inkahhai puan hi a rawtpui niin a sawi a. Israel hian Iran-in a beih loh chhung chu beih loh a pawm niin a sawi.