Naupang hnathawk a chhawr luih an awm leh awm loh dapchhuah hna thawk

Naupang hnathawk a chhawr luih an awm leh awm loh dapchhuah hna thawk

Vawiin khan Pan -India Rescue and Rehabilitation Campaign 3.0 Naupang hnathawk a chhawr luih an awm leh awm loh dapchhuahna Lunglei Municipal Area ah neih a ni. He Pan India Rescue and Rehabilitation Campaign hi National Commission for Protection of Child Right (NCPCR) in 22 July 2025 khan ram pum huap a hman turin a lo hawng tawh a, he campaign hian naupang tih duhdah na tuar te, chhawr luihna leh rukbo tuartute chhanchhuah a, chhawmdawl na pek a tum a ni. 

Vawiin a campaign hi District Task Force on Child Labour thukhawm Lunglei  Bawrhsap hova 3rd July 2025 neiin bawhzui tura ruahmanna a lo siam angin District Child Protection Unit, Lunglei WCD a thawktu te chuan hmun hnihah inthenin naupang hnathawk a chhawr luih leh venhim ngai an awm leh awm loh Lunglei khawchhung mai bakah Bualte thlengin Thingpui dawr te, Workshop leh hnathawhna hmun hrang hrangah te kal chilhin hun an hmang.

Mizo ten TB vei leh vei loh test kan hreh thin chu a pawi thin - Dist. TB Officer

Mizo ten TB vei leh vei loh test kan hreh thin chu  a pawi thin - Dist. TB Officer

Lunglei 31st July, 2025 : Vawiinah Lunglei District TB Officer Dr Lalhmachhuana chuan a office-ah MJA Lunglei memberte a kawm a, kuminah Lunglei District a TB vei hmuhchhuah thar chu 87 an ni a, a vei lai leh MDR TB te nen TB vei mi 99 an awm mek a, heng zinga 63 te chu Lunglei Municipal Area chhunga mite an ni, a ti.

Dr Hmachhuana chuan, May 20, 2025 atangin TB Mukt Bharat Abhiyan chu Lunglei District-ah kalpui tanin, khawpui chhunga Home awm hote leh Veng hrang hrangah hmalak a ni tawh a, thingtlang lamah pawh khaw 10 chuangah beihpui thlak a ni tawh, a ti a, khawpui aiin thingtlangah an ngai pawimawh  a,  Majority Mizo aiin minority hovin an ngai pawimawh zawk a ti.

Kum 2023 atangin tehfung hrang hrang hmangin TB Free Village thlan tan a ni a, kum 2023-ah 18 an awm a, nikumah 22 awmin, kuminah 13 puan thar belh leh a ni, a ti.

TB vei damlo ten chaw tha an dawn theihna tura Food Basket donation an dawn theihna tura hmalakpui Nikshay Mitra a awm a, TB damlo pakhat tan thla tin Rs. 700/-  a reilo berah thlaruk chhung tanpui tur a ni. Lunglei District kan la hniam hle a, tunah hian donor paruk chauh an awm a, hengte hian mi 23 an support a ti. 

TB Umbo tura sorkarin beihpui an thlak mekah, inhrilh hriatna hmanrua chi hrang hrang hman a ni chung pawhin, khawpui chhunga mipuiin an la ngai pawimawh tawk lova a hriat thu Dr. Hmachhuana chuan sawiin Mizo te hian TB vei nih leh nihloh test ringawt pawh kan hreh thin a, hei hi a pawi thei thin khawp mai a ti a. Media mite chu theihtawp chhuah pui turin a sawm. Dr Hmachhuana hi a staff ten an telpui bawk a ni.

Hnaruak : District Legal Services Authority Office, District Court. Lunglei

 

 

"Tunah hian, oil phur motor 46-in load la tharin Mizoram an rawn lut leh tawh

"Tunah hian, oil phur motor 46-in load la tharin Mizoram an rawn lut leh tawh

Lunglei July 31, 2025: Home Minister Pu K Sapdanga'n thuialhthei chungchangah thu lawmawm lam vawiin July ni 31 hian a tarlang:

"Tunah hian, oil phur motor 46-in load la tharin Mizoram an rawn lut leh tawh a, diesel litre 3,6,6000, petrol litre 2,73,000 an rawn phur mek a, gas bur 8004 phur an rawn inzui mek bawk. Load lak loh tuma thuchhuahte khan sorkar ngenna pawmin an thu an sut leh a, Khamrang chhehvela kawng siam that hna thawh dan a hmuna hmututen innawrh khum chiah an ngai lo niin a lang. ZDU, Truck Driver Assn leh Tanker Driver Assn ten nawrh tumte an thlawp lo a, a lawmawm e." tiin a tarlang

USA ZORAM THAR ZOFATE LAIRELNA DIN A NI

 

USA ZORAM THAR ZOFATE LAIRELNA DIN A NI

USA a zin mêk Zoram Thar hruaitu Pu Zaichhâwna Hlâwndo leh Nl. Lalruatfeli Hlâwndo te chuan USA a Zofâte inpumkhatna atân hma an la zêl a. USA State hrang hrang Michigan, Georgia, Iowa, Wisconsin, Illinois, Indiana, Iowa, New York leh Colorado te fang kualin Kohhran 20 velah Pathian thusawi leh zâia rawngbâwlna an nei. USA a Zo hnahthlâk Zofâte - Mizo, Chin, Lai, Mara, Zomi, Falam, Hakha leh Zotung Kohhran ten an lo dawngsawng ṭha hle a. Biak In-a rawngbawlna mai bakah Kohhran bial inkhawmpui, Nuho leh Ṭhalâi inkhawmpuiah te rawngbawlna an nei bawk.

USA a khawtlang leh Kohhran hruaitu pawimawhte sâwmin Zoram Thar chungchang zirhona leh sawifiahna hun (Zoram Thar Vision Sharing) pawh an nei bawk. USA a Zofate pawhin Zoram Thar hmalakna an lo thlawp ṭha a. USA Zofâte zingah chibing indaidanna te ṭhiat a, Zofate insuihkhawm nâna hmalak chu duhin a pawimawh an ti. Inpumkhatna a taka a lo thlen zêl theihnana Zofate zawng zawng huapzo pawl Zoram Thar (NGO) Zofate Lairelna Inpui thawhpui tura lo din ve pawh chu ṭha an ti a, July 24, 2025 zan dar 8 ah hruaitu turte ruatin, USA Zoram Thar Zofate Lairelna chu an din ta a ni. Puipa tur leh Lairel member turin heng mite hi an ruat.

Hruaitu: Pu Lal Edena; Hruaitu Chhangdawl: Pu Van Ceu Uk; Ziaktute: Pu H. Biakliana, Nl. Ruth Lalramengi; Sumvawngtu: Pi Zohnemsangi; Sum Ziaktu: Tv. Richard Zosangliana

Thurawn petute :

Rev. Dr. Hre Mang (Indiana), Rev. Paul Albik Ceu (Michigan), Rev. Jacob Rodawla (Maryland), Rev. Thawng Lian (Indiana), Rev. Vanlaldinga (Indiana), Rev. Vanlalringa (Iowa), Rev. Sawma Buongpui (Texas), Rev. Philip Hreng Ling (Indiana), Rev. Thangzauva (Indiana), Pu Zosanga (Indiana)

Lairelna Memberte :

Pu Bawikhar Tlangmang (IN), Pu Z. Erick Nollo (IN), Pu Christian Zama (IA), Pu Laltlankima (IA), Pi Lalrozami (IN), Pi Lalrammuani (MI), Pu T. Thansangzuala (IL), Pu Vanlalhruaia (IL), Rev. Laldinpuia (NC), Rev. Ronald Charles Nunuk (WI), Pi Sarah Zo (IN), Pi. Lalhmingliani (IN), Pi Zingtei Sui (IN), Pu Zirliana (MI), Pu Lalnunsiama (IA), Pu Campingthanga Pachuau (IA), Pu Rualkhuma (IA), Pu K. Lalthlamuana (IA).

Zoram Thar Zofate Lairelna Inpui hruatute hian USA a Sawrkar mi leh mi pawimawh tak tak: Mr. Mike Naig, Iowa State Agriculture Secretary (Minister), Rabbi Jonathan Cahn, Beth Israel, Dr. Sasa leh Mr Jefferson Shreve, Member of the U.S. House of Representatives from Indiana’s 6th district te biakpawhna an nei a. Zofate, thlahtu bul thuhmun vek te chu, India, Myanmar leh Bangladesh ah awmin, harsatna an tawh dan te, inpumkhatna tura hma lak mek a nih dante an titi pui.

Zoram Thar hruaitute hi USA ah an la cham deuh dawn a, Maryland, North Carolina, Indiana leh Michigan state ah te thusawi leh zaia rawngbawlna te an neih zawh ah August 28, 2025 ah Mizoram lo hawn an tum.

ZUNZAM MORNING NEWS ( 31.7.2025 )

Pu Lalfamkima, Dy.Speaker, Pu TBC Lalvenchhunga, Arviser to CM leh Pu Clement Lalhmingthanga, MLA, te chuan Kawnpui to Sairang Road kawng siam mek,  Sairang atanga Kawnpui thleng kalin an enfiah.

ZPM Legislature Party-in a lo rel tawh angin Sairang leh Kawnpui inkara National Highway siamthat hna chu ZPM MLA-ten endik hna an kalpui chhunzawm zel a. Helai kawng siam mek mumal zawka kalpui a nih theih nan Police duty-te dah niin CE leh SE Highway, PWD leh official dang-te pawhin a hmunah riah chilhin siamthat hna an thawk mek a ni. Mizoram bungrua mamawh phur hrang hrang nitin motor tam tak chhuah a ni tawh a, a kar lakah kawng siam nan motor dan a ngaih thin thu MLA te chuan an sawi a ni.

Mizoram chhung leh pawn lam atangin PWD leh NHIDCL te chuan boulder leh khawl lian zawkte kawng siam nan hian lak mek zel a nih thu an sawi a, tun dinhmuna pawimawh ber chu motor kal theiha kawng siam zung zung a nih thu te, chutiang tur chuan sorkar-in chak taka hma a lak mek thu kawng endiktu MLA te chuan sawiin; NHIDCL te nen pawh an inbiak reng thute leh thawhhona pawh a that thu an sawi bawk.

==============

MNF in Car man to a tih chin sawi turin CM an phut

MNF party chuan cheng nuai 30 vel lai man car hi mi satliah car ang, hmeichhe khalh tawk leh naupang football khel tur hruaina tawk angah CM Lalduhoma hian a lo ngai a nih chuan car man to a tih chu cheng engzat man chin nge tih sawifiah ngei an phut. 

Nimina Aizawl press club a thuthar thehdarh tute an kawm naah MNF publicity board member Lalremruata Chhangte chuan he thu hi sawiin, Chief Minister Lalduhoma chuan inthlan campaign laia tum engemawzat mipui hmaa a thutiam leh ZPM sorkar lakluh ni ngeiah pawh chanchinbumite hmaa a thusawi bawhchhiain, ni 17.6.2025 khan car man to tak, Rs. 29,79,000 man, Toyota Innova Hycross a lei thar tih a sawi a, a thutiam chiang taka a bawhchhiat avanga mipui lam atanga sawiselna leh ngaihdam dil a hneka ZPM party thupuangtu hmanga a insawifiah dan hi Zoram mipuite engahmah a ngaih lohna leh hmuhsitna nasa tak a nih thu a sawi bawk.

 Lalremruata Chhangte chuan, Mizoram sawrkar dan dinglai, GAD office m e m o r a n d u m No.F.15016/13/2020 -GAD dt. 28th June, 2016 ang chaun chief minister tan hian cheng nuai 15 man aia sang lei phal a ni lo tih sawi bawkin, sorkar dan dinglaiah sawrkar motor lei thar reng reng a var (white) emaw, off white emaw a ni tur a ni, tih a nih laiin, chief minister car lei thar chu a dum a ni leh hlauh bawk niin a sawi. Sawrkar motor reng reng mimal hminga register loin, sorkar hnathawkte designation anga register thin a nih laiin, tuna chief minister car lei thar chu mimal hminga register a nih leh zel avangin he car thar lei dan hrim hrim pawh hi a ngaihthatthlak loh, a ti bawk.

Mizoram BJP President in kawngchhiat avanga harsatna thleng thlen 

BJP Mizoram State President Dr. K. Beichhua, MLA chuan niminpiah tlai khan Union Minister for Road Transport and Highways Pu Nitin Gadkari chu a chenna inah lenchilhin, Mizoramin inkalpawh na kawngpui pawimawh tak a harsatna kan tawh mekte a thlen a, Mizoram chakkhai lakna pawimawh tak kawngpui chhiat avanga harsatnate chu lo enzuisak a, a tul anga chak zawk a hmalaksak turin a ngen nghal bawk. 

Dr. K. Beichhua, BJP Mizoram State President chuan Union Minister Pu Nitin Gadkari hnenah Tripura atanga, Mizoram khawthlang lam, Mamit District atanga Lunglei Dist leh Lawngtlai Dist paltlanga, Zochachhuah thlengin National Highway kal tir rawtna a siam chu tih hlawhtlinsak tura a ngenna ziakin a thehlut nghal bawk a, Pu Nitin Gadkari chuan a lo zirchian sak tur thu a lo hrilh bawk. Dr. K. Beichhua chuan khan Union Health Minister leh BJP National President ni bawk Pu JP Nadda chu hmuh leh bawk.

MPCC Treasurer in Sairanga Bamboo Technology Park a tlawh - 

Nimin khan Dr Lalmalsawma Nghaka chuan Sairanga Bamboo Technology Park, Sairang ami chu a tlawh a, helai hmun an kalpui dan te a enfiah.Dr Mala chuan, Kan hriat theuh angin kan sorkar hian May ni 14 khan Sairangah Bamboo Technology Park cheng nuaih 252. 826 man a hawng a. He project ah hian mau atanga meihawl siam an tum bakah mau sawngbawl (seasoned) a kum 50 thleng a dahthat theiha siam an tum a ni. 

Sorkar Press Release a an ziah dan chuan he project hian nitin meihawl ton 3 a siamchhuak thei dawn a, kum khatah ton 9000 vel siamchhuah an tum a, mau pawh nitin pum 670 vel a mamawh anga chhut a ni. Chu chu ZPM research base a ni em ka hre lova, DPR pawh kan nei lo, mahse sawrkar PR ah a inziah dan a ni. Research base a kal tura intiam ten he plant hi an hawn rualin an kalpui zawm thei lo nghal hi thil mak tak a ni.

Dan zâwm loa damdawi hralh an tam; 

Kuminah licence cancel 2, suspend Health dept-a Food and Drugs Administration (FDA) chuan kumin 2025-ah damdawi zuar licence pahnih titawp (cancel) tawhin, pahnih an titawp lailâwk (suspend) tawh a, insawifiah turin damdawi dawr 12 an hriattir tawh bawk. Drug licence nei zingah dan zâwm loa damdawi hralh an tam a, dan loa damdawi ruih theih hralhah khuh damdawi a tam ber.

Khawthlangtuipui a nu zel 

Tlabung-a PHE Dept hotute chuan Khawthlangtuipui chu chhan hrang hrang avangin a kum tela a nut belh zela a lan thu leh hmanrua nena an tehnaah pawh nikum aiin kumin-a a nut zawk thu an sawi a, kum liam ta ah khan Khawthlangtuipui chu a nut lai berin a tehna Nephelometric Turbidity Unit (NTU) 680 a kaichhoh laiin, kumin ah chuan NTU 792 a kaichhoh hial thu an sawi a. Fur intan atanga tunn thlengin tui fim danin ngai a awh hleih theih loh avangin Tui pump kawngah harsatna an tawh thu an sawi bawk.

Naktuk atangin Oil phur tlan dawn lo 

Northeast Petroleum Mazdoor Union chuan Mizoram panna kawng a chhiat nasat avang leh tuialhthei phurh luh nana a him tawk loh avangin August ni 1 atangin tlan tawh lo ni se tih an rel. Northeast Petroleum Mazdoor Union General Secretary Ramen Das in IOC Chief General Manager hnena lehkha a thawn atanga tarlan danin Mizoram Oil Tanker Driver Association te chuan July ni 19- a Mizoram kawng a chhiat nasat avanga nawrh an huaihawt hnuah pawh Mizoram kawng chuan ziaawm lam a pan theihloh avangin tlan tawhloh ni se an ti a, Mizoram kawngin ziaawm lam a pan hma chu August ni 1 atangin tlan tawhloh ni se an ti bawk.

MOTDA TEN ZAWM VE DAWN LO. OIL A VAN A RINAWM LOH!

Mizoram chak lakna kawngpui. NH. 06/306 chu Oil Tanker-te tlan ngamna tura Mizoram Sorkar-in siam ṭhat a tiam chunga chetsual hlauhawm khawpa kawng chhia a la awm avangin North East Petroleum Mazdoor chuan August ni 1 aṭangin tiam chin awm lovin Mizoramah tlan loh an tum a. Hei hi Mizoram Oil Tanker Drivers' Association chuan an zawm dawn lo tih an sawi ve thung.

Vawiin Lok Adalatah Cheng Vaibelchhe riat chuang hu sawirempui a ni.

Dt 30.07.2025 hian District Legal Services Authority, Lunglei buatsaihin Lok Adalat hi District Court Building, Lunglei-ah hman a ni a. Lunglei District chhunga thubuai 49 ngaihtuah a ni.

Vawin Lok Adalat-a thubuai ngaihtuah tur hian Bench pakhat a thut niin, he Bench hi Pi.Lalthansiami Hnamte Civil Judge, Senior Division - II leh Secretary, DLSA ni bawkin a kaihruaia. Thubuai   49 atang hian 19 sawirempui niin, tihfel a ni. Lok Adalat-a thubuai ngaihtuahah hian leiba inṭhinna a tam ber thin a, vawiinah chuan rosum insem tur sawirempui tamtham tak a awm a   ₹ 82,269,526/- (Cheng Vaibelchhe riat Maktaduai hnih Nuai hnih Sing ruk Sang kua Zanga Sawmhnih Paruk ) lai vawinah hian chinfel a ni.

 Hei hi nikum chhung zawng leh kumin a tana Lok Adalat thut a, a pawisa anga rem zat  tam ber ṭum a ni. Lok Adalat-ah hian thubuai neitute duhdan angin inremna ziahpui ṭhin a ni a. Sum sen ngai loin, thubuai hi chinfel sak ṭhin a ni.

Hnahthial District-ah Storytelling Competition buatsaih

Hnahthial District-ah Storytelling Competition buatsaih

Dated Lunglei, the 30th July, 2025: Tourism Department leh DC office tangkawpin a an buatsaih, Mizoram hmun pawimawh chanchin thawnthu insawisiakna - Storytelling Competition - "Narrating Mizoram : Tales of Our Land" chu vawiin khan Hnahthial DC Conference Hall-ah buatsaih a ni a. He intihsiaknaah hian mi sawm leh pakhat (11) in ziaka thehlutin inelnaah hi mi sawm (10) an tel a ni.

Addl DC, Pu Zothanmawia Khiangte chuan he thawnthu insawisiakna buatsaih a nih chhan sawifiahin Tourism chawikanna tur a nih beiseina nen Tourism Department hmalaknain District tinah buatsaih a nih thu a tarlang a. Hnahthial District chhunga zin veivakten an tlawh chak theihna tur atana tuina nei zirlai leh hmeichhiate an tel a hmuh hian Hnahthial chuan tourism lamah hma hun eng tak an nei ni a a hriat thu a sawi bawk a ni.

Intihsiaknaah hian judging criteria point li awmin mark 25 theuh puttir an ni a. Chung tehfungte chu:-

i) Mipuite hneh thei turin thu an sawi chhuak thiam em (Creativity)
ii) An thuziak kha a dikin a rintlak em (Authenticity)
iii) A sawitu in nal takin thu a sawi em (Language fluency)
iv) Miin an ngaihsan a an tlawh chhan tur, a hlutna a rawn phawrh chhuak em ( Cultural Representation)

Storytelling Competition-a telte leh an topic thlante chu:-

1. C.Rodingliana - Lalnu Ropuiliani Thlan
2. Lalduhthlana - Khawhthlasang
3. H. Lalrinsangi - Leite
4. C.Lalsangpuia - Phunhnawma Lungpui
5. Laltlankimi - Darzo Tlang
6. Linda Zothanmawii - Lalnu Ropuiliani Thlan
7. VL Zuidika - Khawhthlasang
8. Dr. K.Lalzuimawia - Darzo Tlang
9. Vanlalhruaitluangi - Kawrlungtuk
10. Joseph Vanlalhriatpuia - Lalnu Ropuiliani Thlan

Pakhatna lawmman hi Darzo tlang chanchin sawitu, Dr K.Lalzuimawia'n a la a. Pahnihna lawmman hi Leite chanchin sawitu, H.Lalrinsangi chuan lain pathumna lawmman hi Linda Zothanmawii, Lalnu Ropuiliani Thlan chanchin sawituin a la a ni.

Pakhat hian Citation leh Rs.10,000 dawngin pahnihna hian Citation leh Rs. 7000 a dawng a. Pathumna hian Citation leh Rs.5000 dawngin tel zawng zawng hian Citation an dawng vek bawk a ni.

He thawnthu insawisiak a pakhatna hi Mizoram pum huap intihsiaknaah Hnahthial District aiawhin a chhuak ang.

Lunglei khawpuiin Swachh Survekshan Award 2024—2025-a lawmman a dawn lawm a ni.

 Lunglei khawpuiin Swachh Survekshan Award 2024—2025-a lawmman a dawn lawm a ni.

Lunglei, 2025 Vawkhniahzawn thla ni 30: Lunglei khawpui (Lunglei Municipal Council)-in India ram puma khawpui fai inelna, Swachh Survekshan Award 2024—2025-a 'Promising Swachh Shehar of Mizoram Award' a dawn chu vawiin khan Lunglei Convention Centre-a Convention Hall-ah lawm a ni a. Lunglei khawpui faina atana thawh hlawk leh thawk ṭha pawl leh mimalte hnenah chawimawina hlan a ni.

He huna khuallian, LMC Chairman Pu Lalzuithanga chuan Lunglei khawpuiin faina lama ram pum huap lawmman a dawng chu ropui leh lawmawm a tih thu sawiin, tun hmaa Lungleiin lawmman a lo dawn tawh ṭhina hma latu leh tun ṭuma theih tawpa LMC thlawptu UD&PA Department-a thawkte chungah lawm thu a sawi a. Swachh Survekshan-in a tum chu faina kawnga mi tin tha thawhtir a nih avangin tute emaw thawktu bik awm anga ngai lo leh tute pawl emaw thawh tur bika dah lova khua leh tui zawng zawngte ṭan ho chu a hlawhtlinna a nih thu a sawi a. 

LMC-in sum hman tur a ngah lo chunga lawmman dawng thei khawpa hma an lak theih chhan chu councillor leh official-te bakah, local council, tlawmngai pawl leh zirna in leh pawl hrang hrangte nena thawh hona ṭhat vang a ni tih sawiin, lawmman dawn chu khawpui fai ni zui zel tura beiseina leh chona a ni tih hria a, theih tawp chhuah chhunzawm zel turin Lunglei mipuite a sawm a ni.

Khawpui fai lawmna inkhawm hi LMC Chief Executive Officer Pu Donny Lalruatsanga chuan a kaihruai a. LMC Vice Chairman Pu K. Lalrinawma chuan report pein, Lunglei khawpui chuan LMC a nih hnuah UD&PA hma lakna hnuaiah nikum lamah faina lawmman a lo dawn tawh thu leh tun ṭuma lawmman a dawn hi LMC puala hma lakna kalpui a nih hnua a hmasa ber a nih thu a sawi a. Award dawng thei tura faina kawnga hma lakna chu a bul tumtu LMC ni mah se, Lunglei mipuite ṭan rualna azara hlawh chhuah liau liau a ni, a ti.

He hunah hian Executive Councillor Pi Lalhruaitluangi Sailo kaihhruaiin faina kawnga thawk ṭha pawl leh mimal — LMC hnuaia sanitation worker-te, Clean Lunglei leh Project Save Tlawng te, Local Council leh YMA branch hnuaia faina kawnga thawktu mi 37 leh mimala faina kawnga thawh hlawk mi 37 te hnenah chawimawina thuziak leh pawisa fai hlan a ni.

LMC Executive Councillor Pu Zorinsanga Hmar chuan inlawmna thu sawiin, PCI Administrative Secretary Rev. H. Lalhmingmawia'n hunserh a hmang a. Lunglei District Urban Development Officer (DUDO) Pi Lalhruaitluangi pawhin thu sawiin, Swachh Survekshan Award dawng tura sawrkar laipuiin thil phut chi hrang hrang a neih dan te, online portal-ah kum tluana hma lakna theh luh a ṭul thu leh chu chu endiktute'n a dik reng em tih an lo enfiah leh ṭhin thu te, kum tluana ṭan mar reng a ngaih thu te a sawi.

He hunah hian LMC-a thawktute bakah, local council leh pawl hrang hrang ai awhte leh college zirlaite an tel a. Ward No. 2 Councillor Pi Lalmuanpuii Renthlei leh Local Council Association President Pu PC Lalramnghaka te pawhin thu sawiin, Lunglei South Branch BSI Choir leh mimal zaithiam te an zai bawk.

Health Worker lak tura thuchhuah awm laiin Health Workers Association (NHM) (CSS) ten post 50% an hauh thu an sawi

Health Worker lak tura   thuchhuah awm laiin Health Workers Association (NHM) (CSS) ten  post  50% an hauh thu an sawi

30th July, 2025 : Health & Family Welfare Department hnuaia Health Worker post 100 (one hundred) direct recruitment-a hnawhkhah phalna DP&AR leh Finance Deptt-in a pek angin, Health & Family Welfare Department chuan Advertisement No. 4 of 2025 ti chhuakin ni 24.8.2025 thleng dilna  thehluh theih a ni vide No.A.12011/1/2025-DHS/MPW dt 22.07.2025.

Hetihlai hian Mizoram Contract Health Workers Association (NHM) (Centrally Sponsored Scheme) ten chung post zinga 50 (fifty) chu an tana reserve ngiatin Chief Minister Office kawtah vawiin ni 30.07.2025 (Wednesday) hian Press Release ti chhuakin sitting demonstration an nei a.

Mizoram Contract Health Workers Association (NHM) thil phut chungchanga thil awmdan hetiang hi a ni:

1. Health Worker Recruitment Rules, 2011 (as amended 2024) in a sawi angin Health Worker post ruak hi 100% direct recruitment-a hnawh khah tur a ni a, chuvangin, Health Worker lakna tur hi open advertisement kal tlangin direct recruitment chauhva kalpui tur a ni. A dil thei/qualify apiang examination leh personal interview-a ti thate lak mai tur a ni.

2. The Mizoram Direct Recruitment (Conduct of Examination) Guidelines, 2018, DP&AR Notification No.A.12026/1/2017-P&AR(GSW) dt. 09.02.2018 in a sawi angin sawrkar hna eng pawh direct recruitment-a hnawhkhah tur reng reng chu Written Examination leh Personal Interview kal tlanga tih tur a ni.

3. Mizoram Contract Health Workers Association (NHM) te tan hian The Government of Mizoram Regularization of Centrally Sponsored Scheme (CSS) Employees Scheme, 2024 a awm a. Chumi dan hmang chuan a tling (eligible) te chu regularize theih an ni.

4. Sawrkar hna lak chungchangah a bika induhsakna neih hi India Constitution Article 14 & 16 kalh a nih avangin tute emaw induhsak bik hi a rem chang lova, India Constitution provision bawhchhiatna a ni.

Hetiang a nih avangin Mizoram Contract Health Workers Association (NHM) te tana reservation pek hi a remchang lo a ni.

Ṭhalai Kristian Pawl (ṬKP) din champhaphak vawi 74-na hman a ni.

Vawiin July 30, 2025 (Nilaini) hi Ṭhalai Kristian Pawl (ṬKP) din champhaphak vawi 74-na a ni . Kumin ṬKP Day thupui chu “Danglam lo ringtu” (Jeremia 17:7-8) tih a ni.

ṬKP Day hi kum tinin member te’n urhsun takin an hmang ţhin a. Vawiin pawh hian Unit tam zawk chuan zing karah Social Service tiin vantlang hmun leh Biak In leh a chhehvel te an tifai a. Zan lamah MṬKP atanga programme duansa angin Unit tinah ṬKP Day lawmna Inkhawm urhsun takin an nei ang. MTKP hnuaiah hian Bial 92 leh Unit 447 an awm meka, member hi 50364 awmin mipa 30562, hmeichhia 1980

2 an awm mek a ni.

Sorkar fimkhur turin CYMA in a ngen

Sorkar fimkhur turin CYMA in a ngen 

Central YMA EC thukhawmin, tunhnaia Assam-a dan lova Bangladesh atanga awm, hnawh chhuahte chu Mizorama an lo luh loh nan sorkar chu ruahmanna siam thuai a, ILP pek chhuah kawngah fimkhur lehzual turin an ngen. State dang atanga dan lo a lo lut te ven kawngah ramri a awm SubHeadquarters, Group leh Branch YMA te pawh a tul anga hma la turin an inhriattir . 

PC Party pawhin thuchhuah siamin, Assam in an ram a dan lo a awm, Bangladesh atanga lut te hnawt chhuak turin hma a lak mek avangin Meghalaya, Nagaland leh Manipur state sorkar te chuan Assam atanga hnawhchhuah te an state-a an luh lohna tura inbuatsaihna an kalpui bakah an rama dan lova awm te laka hmalak dan tur an ngaihtuah mek an ti a. 

Mizoram sorkar leh mipui pawh inralrin a, hma lak ve thuai a ngai an ti. Mizoramah hian Bangladesh atanga dan lova lo lut an tam hle tih sawiin PC Party chuan, PC Party kaihhruai sorkarin Bangladesh atanga dan lova rawn lut a hnawhchhuah hnuah khan sawi thama sorkar hmalakna a awm tawh lo an ti. Tunah hian Assamah dan lova awm mi nuai 29 aia tam an awm nia ngaih a ni a. Heng ho hi an hnawtchhuak a nih a, Mizote an rawn chim chuan buaina a thleng thei an ti

Man neia ennawm, inkhel leh hlimhlawpna lam buatsaihtute tan phalna lak a ngai ti

Lunglei Zone Deputy Commissioner of State Tax Pu Lalrothanga chuan July ni 24, 2025 khan man neia ennawm, inkhel leh hlimhlawpna lam buatsaihtute hnen atanga chhiah (tax) lak chungchangah hriattirna a chhuah a. 

The Mizoram Goods and Services Tax Act, 2017-in a sawi angin, heng – mela, concert, sports tournament, movie (film) chhuah, trade fair/expo, etc. reng reng man nei/ticket siama buatsaih reng reng chu Supply of Services hnuaiah chhiah (tax) lak theihna a nih thu leh Lunglei District chhunga mimal leh pawl (NGO) heti ang buatsaih tur chuan Deputy Commissioner of State Tax, Lunglei hnenah hriattir hmasak tur a ni a ti. Danin a phalsak ang ni lova heti ang hi buatsaih an awm chuan dan hmanga hrem theih an ni a ti.

CM Car man a to lo Car satliah a ni a ti

CM Car man a to lo Car satliah a ni a ti 

ZPM thupuangtu Pu K. Laltluangkima'n Private Hospital ten MUHCS an zawm zung zung lo chu sorkar damdawi in ten nasa takin hma a sawn phah a, hei hi sorkar hmasa ho zawng zawng tih theih loh a ni a ti. He thu hi nimina Aizawl Press Club a thuthar thehdarhtute an kawmnaah sawiin ZPM sorkarin kum 1 leh a chanve chhung chauhvin MUHCS bul a tan thei chu hlawhtlinna nasa tak a ni a ti a. Private Hospital ten MUHCS an zawm zung zung lo chu sorkar damdawi in ten nasa takin hma a sawn phah a, Health Minister leh a Dept ten rei lo te chhungin thawktu sang leh thawktu hniam deuh mi 450 an lak belh a ni a ti . 

ZMC&H-ah Cabin khum 30 dah belh in Medicine ward-ah khum 26 dah belh a ni a, Gynea ward-ah khum 10 dah belhin, ICU-ah khum 13 dah belh a ni a. Lunglei leh Siaha Civil Hospitalah te ICU khum 5 ve ve dah belh a ni a ti. Sorkar hmasa in Lungleiah RTPCR khawl an bun theih loh laiin, ZPM chuan hmanni lawkah Aizawl Civil Hospital ah MRI khawl an han bun a ti. ZPM Spokesperson chuan MLA Dr. K.Beichhua-a'n ABPMJAY rinchhanin Mizoram Universal HealthCare Scheme (MUHCS) laimu siam a ni ti-a a sawi chu a dik lo tih sawiin, MUHCS chu ABPMJAY peng pakhat a tih theih a, MUHCS in a huam zau zawk a ti. 

MUHCS chuan Mizoram khua leh tui dik tak zawng zawng a huam vek a, hetihlai hian ABPMJAY chuan kum 2011 kum mila mirethei an thlan te leh RSBY 2018 leh NFSA (ration card eng leh pawl nei) chhungkuate te chauh a huam a. An vaiin chhungkua nuai 2, sing 1, sang 9 an ni a, a bak inziah luh theih a ni tawh lo. ABPMJAY inziak lut, Golden card neitute chuan khatih lai khan private empanelled firm, Aizawlah Damdawi In 2 chauh an nei a, pakhat zawk chu mit lam enna a ni.MUHCS hnuaiah chuan Damdawi in tam tak an inziak lut tawh a, an la pung zel dawn a, MUHCS chu a zau zawk a, a tha zawk a, MUHCS chu a laimu zawk niin, ABPMJAY chu a zar peng chauh a ni a ti. 

ZPM Spokesperson chuan CM Pu Lalduhoma'n inthlan hma in car ma toah a thu dawn lo tih lo sawi tawh mah se, CM hlui car, kum 15 vela upa tawh siamthat reng ngai a chhawm avangin car thar Toyota leisak a ni a, CM level atan chuan a to lo va, car satliah a ni. Mizoram chu international ram depa awm a nih avangin Mizoram CM chuan venhimna sang tak, Z+ category security a nei a. A tul a tih chuan bullet proof car pawh hmang thei a, Inthlan dawna "Car man tovah a chuang lovang" a tih hun lai nen khan thil a danglam nasat tawh avangin car man tlawm ber lo la hisappui tlat chu thil intu lo tak niin a sawi. 

Tunhnaia MNF in Fisheries Dept pawisa nuaih 100 awmna sorkar an zawh chungchang pawh chhangletin , nuai 100 ni-a an sawi chu nuai 1000 zawk a ni a, kumin April ni 25 khan sanction an hmu a, budget allocation dil thuai a ni a. May ni 27 khan Expenditure sanction dil leh a ni a. Reserve Bank of India in him takin tunah an kawl mek a, a hun taka sanction order tichhuah mai tur a ni a, a lo chhuah hun atan a dawngtu tur, beneficiary pawh thlan fel tawh a ni a, an account-ah thunsak zung zung tur a ni a ti.Sawhthing dah tawih tiha eptuten an sawi chhangin sawhthing hralh tlak leh hralh tlak loh thliarna lama tha lo zual an paih te a ni a, thlai thar chu sawngbawl a ngai thin a, loneituten a chhia leh a tha an dah pawlh chuan, lo thenfai a ngai thin a ti.

Armwrestler chawimawina Programme vawiinah nei dawn

Armwrestler chawimawina Programme

ORGANISED BY PROGRAMME COMMITTEE LDCC 

A Hun : Dt 30th July 2025 @ 11:00Am, 

A Hmun : Lunglei Press Club 

Chairman : Pu Thanghmingliana Renthlei 

Hunserh : Pi K. Vanlalruati(Nupuii) 

Introduction : Chairman 

Chawimawi tur te hming leh an chanchin tawi chhiarchhuah: 

Nl.H.Lalthanzauvi & Nl Lalthlamuanpuii 

Thusawi :Pu R Lalnunthara(5 Mins) 

Citation hlan :Conducted by Chairman 

Thusawi II :Pu K Lalrinpuia,President Arm Wrestling Assn, Lunglei (5 Mins) 

Thusawi III :Awardee(No limit) 

Thusawi IV :LDSC Representative(5 Mins) 

Tawpna & Tlangkawmna : Pu Eric R Zomuanpuia(5Mins) A