Mizoram ah kawlphetha- hman man bill pekna system chi khat 'UGO Electric Billing System' chu hman tan a ni tawh a, software thar puanzarna hun hi P&E minister Pu F Rodingliana- hovin nimin ah hman a ni.
Power minister Pu F. Rodingliana chuan a vawi khat nan a, Mizoram puma billing- software thuhmun hman a ni ta chu hmasawnna lawmawm tak anih thu asawi a, he system hi, a hma a, bill pekna system, an lo hman thin aiin a tha zawk a, mipuite tan awlsamna a thlen dawn tih a sawi. Power department hmalakna sawi bawkin, Transformer indaih lohna te phuhruk turin a thar leina tur budget-ah dah belh anih thute, tunah pawh a thar 60 lei belh leh tura buaipui mek anih thu te, Mizoram hmun hrang hranga kawlphetha- pekna transmission line pawimawh zualte double- source nei vek turin hmalak chhoh mek anih thute a sawi a. P&E hnuaia thawk kalkhawmte chu mipui tana thawk annih anga inpekna thuk zawk nena inhawng taka mahni- awmhmun theuh ah mipuite tana thawk turin a chah bawk.
Inkhawm a an tarlan danin, UGO Electric Billing- System Software hi Mizoram pumah August Ni 1 atang khan hman tan ani a, he system thar hi Inventive Solution kutchhuak ani a, He billing system hi cloud- base niin mobile, android leh IOS application hmangin Mizoram khawi hmun atang pawhin online hmanga bill pek theih a ni ta a ni. Tun dinhmun ah Mizoram pum ah electric connection nei, nuai 3, sang 1 leh 130 (310130) an awm a, an zinga nuai 2, sang 1 leh 843(201843) ten, August 2025 bill an pe tawh a, bill dawn tawh zawng zawng zat hi cheng vaibelchhe 17.73 (Rs. 17.73) niin, online- payment a bill dawn zat chu, cheng vaibelchhe 9.92 (Rs. 9.92 Crore) anih laiin, Counter a bill dawn zat chu, cheng vaibelchhe Rs. 7.81 (Rs. 7.81 Crore) a ni.
=============
All Mizoram CSS Employees Co-ordination Committee (AMCECC) chuan, Provisional Employee, mi 31 CSS Regularization Scheme 2024 hmanga dah nghehna chu, August ni 29- hma ngeia sut turin sorkar an phut.
All Mizoram CSS Employees Coordination Committee chuan nimin khan emergency meeting an nei a, Office order, august ni 21, 2025 hmang hian Provisional Employee, mi 31 ngawt mai chu CSS Regularization Scheme 2024 hmanga dah ngheh an ni a. CSS Regularization Scheme 2024 hi, CSS Employee tana duan ni siin, vawiin thlenga a scheme neitu CSS hnuaia thawkte dah ngheh an la nih loh laia, Provisional Employees-te hman tir a ni ta ngawt mai hi thil dik niin an hre lo a, an lung a awi lovin, he order hi ni 29.08.2025 hma ngeia sut turin Sorkar an phut a, an beisei anga hmalakna a awmlo anih chuan kal zel dan tur an rel ang tih an tarlang.
CSS hnuaia thawkte an ngheh theihna tura Sorkar hnena an thlen tawh ‘Government of Mizoram Regularization of CSS Employees Scheme, 2024’ an hman theihna tura, harsatna an tawh hrang hrang heng– Copy of advertisement; Copy of Constitution of approved DPC; Copy of DPC Meeting Minutes leh Corresponding substantive post, vawiin thlenga chinfel sak an la nilo leh hmalakna pawh, ala awmlo ni a hria in, arang thei ang bera chinfel sak turin sorkar an phut a ni.
==========
Saikuti Hall enkawlna Lunglei Municipal Council (LMC) kuta dah anih hnua a hmasa ber atan, nimin khan LMC thuneitute chuan Chairman Pu Lalzuithanga hovin Saikuti Hall an tlawh a, a dinhmun leh hmalak dan tur an enfiah.
Saikuti Hall Managing Committee leh LMC inkara inremna leh intiamkamna, 'terms & conditions' thuthlung ningani a ziah fel anih hnuah nimin khan LMC hotute chuan a dinhmun leh a enkawl zui zelna atana thil ṭul turte zir chian pahin Saikuti Hall hi an tlawh a. LMC aṭangin Chairman Pu Lalzuithanga, Vice Chairman Pu K. Lalrinawma, Executive Councillor - Pu Zorinsanga Hmar leh Pi Lalhruaitluangi Sailo, Councillor Pi Lalmuanpuii Renthlei, Secretary Pi Zoramdini leh official dangte an tel a. Saikuti Hall pindan hrang hrangte en kualin, chei ṭhatna atana ṭul leh pawimawh tur hrang hrangte an sawi ho.
LMC Chairman Pu Lalzuithanga chuan an dilna ngai pawimawha sawrkar thuneitute'n Saikuti Hall enkawl hna LMC kuta an dah fel ta chu lawmawm a tih thu sawiin, Saikuti Hall chu Lunglei hmel lanna leh Lunglei ti-Lungleitu pakhat a nih angin a ṭha thei ang bera enkawl an tum thu a sawi a. Saikuti Hall chei ṭhat ngai eng emaw zat a awm tih sawiin, sawrkar inhawnna azarah State Priority Projects (SPP) aṭangin a chei ṭhatna tur sum awm thei dawna a lan thu leh a chei ṭhat kawngah hma lak chhoh a nih tur thu a sawi bawk
=================
MNF General Secretary Er Lalrinawma'n an party in, Mizo hnam din chhuah loh a hlau tih a sawi.
Minister hlui Er Lalrinawma chuan MNF chu pasaltha- tam takin nunna hlu tak an hlanna party anih thu leh hnam thuthlung vuan tlat tur an nih thu a sawi a, zalenna sualna kum 60-na cham kan lawm dawn mek lai hian hnam tan, kan inhlan thar tur a ni, a ti a; Hnam Pa Pu Laldenga leh hnam tana martar-te thinsen ah in baptist thar a, hmalam pan zel turin an party mite a sawm.
Vawiina party- inkhawm hi Mizo National Women Front (MNWF) puala hun hman ani a, 'Naupang leh hmeichhe chunga hleilenna' dona kawnga athawh that avanga Zakapa- Award dawngtu Pi Khawlrinpuii hnenah lawmpuina hlan ani a, MNWF President Pi K. Lalrengpuii chuan award dawngtu Pi Khawlrinpuii hnenah pawisa fai ahlan a ni.
Inkhawm hi Pi K. Lalnunheli, MNWF General Secretary-in akaihruai a ni.
====================
Congress President Pu Lal Thanzara'n Chief Minister-in, Independence Day-a thuchah a sawi ah Prime Minister Pu Narendra Modi-a- thawhpuite kut tichak tura zoram mipuite sawmna thu asawi chhuak ta mai chu vanduaithlak atih thu a sawi.
Nimina Congress Bhavan a Political session leh mithar lawmluhna inkhawm an neih ah thu sawiin Congress President chuan Chief Minister in Independence day lawmna ah thu tam tak a sawi tihte, khatah khan a speech a, ziah lan chiah loh I&PR in thuchhuah an siam ah Ram zalenna humhim tur leh ramin hma a sawn zel theih nan Prime Minister Pu Narendra Modi-a- thawhpuite kut tichak tura zoram mipuite min sawm thu te an tarlang tih a sawi a, a tarlang tute chu sawrkar thupuangtute annih thu leh adik tura an ngaih thu a sawi a, tunhnaiah India- ram chhung hmun hrang hrangah Kristian te chunga hleilenna a thlen mek laia Chief Minister in Modi-a- kut tichak tura Mizo mipui a sawm ta mai chu a vanduaithlak takzet tih a sawi.
Pu Lal Thanzara chuan Pathian zarah kum 2028 ah an sawrkar chuan, NLUP Policy, Pathian lamtang, ‘Heng mi te ber te zinga, pakhat chunga intih hi ka chunga ti inni.’ atih angin NLUP hmangin khawpui leh thingtlang mirethei te dinhmun chawikan an tum thu asawi bawk a ni.
Friday Political Session hi Pu F. Lalhmangaiha, Gen. Secy. MPCC chuan akaihruai a, MPCC President chuan Congress zawm thar mi 26 alawmlut bawk.
==================
Nimin khan Pu Lalramliana Papuia MLA Lunglei South chuan, Tawipui North-I ah, Party dang atang a ZPM zawm thar mi 15 a lawmlut.
Pu Lalramliana Papuia MLA Lunglei South chuan thu sawiin "ZPM Sorkar hi sawi chhe tawk, awm mahse, khawtlang hruaitu leh mi pangngai tak tak ten min la belhchhah chhunzawm zel avangin Party dangte ai chuan ram rawngbawl turin mipui rin hlawh ber a la ni tih alang chiang a ni." ati a, Kumin kum tira VC inthlan hnu, thla reilote ah pawh Lunglei south bial chhungah a tira ZPM Sorkarna nilo, VC 6 ah Sorkarna siam belhin Party dang aṭangin VC Member 13 laiin min lo belhchhah tawh a ni a ti a. Village Council 26 awmah ZPM hian VC 17 a nei tawh a, VC member zawng zawng 62% chu ZPM VC Member anni a. Local council-ah pawh LC 6 awm atangin ZPM hian LC 2 ah ro arel a, LC member zawng zawng aṭanga 50% chu ZPM LC member anni, a ti bawk.
=============
Nimin BJP Mizoram State Office, Mipui Rûn, Upper Republic-ah Friday Political Session hun neih niin, Pu K. Changliana'n inkhawm a kaihruai a, Pu Devesh Kumar, MLC & BJP Mizoram State Prabhari-in BJP zawm thar a lawmlut a, State President Dr. K. Beichhua, MLA-in thu a sawi bawk.
State Prabhari, Pu Devesh Kumar chuan, "mi 23 lai maiin BJP an rawn zawm hi a lawmawm êm êm a, khawvela chhungkaw lian ber BJP Family-ah lawm takin ka lo lawmlut che u a ni," a ti. Sairang relkawng rawn hawng turin Prime Minister Narendra Modi chu September 13-ah Aizawl a rawn kal dawn a, Hmarchhak state-te hmasawnna ngai pawimawhtu a nih zia a lang chiang hle a ni, rel rawn lut tur hi hnam inchimralna tur ni lovin, hma kan sawn zelna atana khaw ṭha leh khaw chhe hnuaiah pawh englai pawha inkalpawhna ṭha kan neih theih rengna atana hmalakna kawng khat a ni," tiin a sawi bawk.
Dr. K. Beichhua, MLA State President pawhin thusawiin, "Mi 23 BJP rawn zawm thar kan neih te hian thutlûkna dik kan siam a ni," a ti a. "Pastor Chhawna inlarnaah chhimlam aṭangin pangpar alo par tur thu a lo sawi lawk tawh, kan hmu a, tunah chuan chhim lam aṭangin pangpar a par chhuak mek a ni tih ka hmu a, MADC-ah BJP, a sawrkar a, LADC-ah BJP kaihhruai a sawrkar mek bawk a ni. CADC ah pawh BJP lian tak leh ṭha takin kan awm mek a, Lunglei khawpuiah pawh BJP rawn zawm tur, a inmung mek a, vawiinah chuan BJP nih pawimawh zia kan hriain, BJP nih kan zak tawh lova, mi ṭhenkhatte'n BJP nih avanga Kristian lo tur emaw tia ngaihna an nei ṭhin a, kan hriat tur pawimawh chu; Isua- min chhandamna hi BJP nih leh nih loh ah a innghat lo a ni tih kan hriat a ngai a ni," a ti bawk.
=========
Tlabung khawtlang hruaitute chuan nimin khan BJP Mizoram State President Dr. K Beichhua chu a pisa-ah kawmin, Lunglei atanga Tlabung panna kawng leh thil pawimawh dang an thlen.
NH 302 Ngaihven Pawl leh Tlabung Village Council aiawhten Mizoram BJP State President hi a pisaah kawmin, an khaw kawng pawhtu NH 302 sial hna thawh a nih danah thil fel lo tam tak a awma an hriat chungchang an sawipui a, National Highway 302 chu mipuiten chakkhai an lakluhna ni ringawt loin, insumdawn tawnna leh venhim hna thawhna atana hman tangkai tur a nih avangin, a nih dan tur anga siam a pawimawh thu an sawi.
Heng bakah hian, Sorkar laipuiin Scheme hrang hrang a duante chuan an khua leh achhehvel athleng pha ngai mang lo nia sawiin, a tul anga Sorkar laipui hotute hnena thlensak turin an ngen a, Dr. K Beichhua chuan Tlabung khawtlang hruaitute thu thlen chu pawimawh a tih thu leh, theih ang anga lo en zui a tum thu, a lo hrilh a ni.
===============
Nursing School Lunglei (NSL) chuan nimin khan 31st batch zirlai tharte lawmna (freshers' social) leh 28th batch zirlai chhuak turte thlahna (farewell) hun an buatsaih.
NSL Auditorium-a hun buatsaihah hian NSL Choir te'n hawnna hla sa in, Tutor Miss Lalthankimi'n hunserh a hmang a. Principal Pi C. Rothangpuii chuan zirlai tharte lawmna thu leh zirlai chhuak turte thlahna thu sawiin, an zirlai leh hna thawhnaah ṭhahnem ngai tak leh rawngbawlna rilru pu-a theih tawp chhuah turin a fuih a. Zai leh lam leh chanvo hrang hrang ngaihthlak leh thlir ho niin, tlai lamah chawhlui kil ho a ni bawk.
Nursing School Lunglei hi kum 1995-a din niin, Indian Nursing Council (INC)-in phalna a pek angin kum tin General Nursing & Midwifery (GNM) zirlai 20 lak ṭhin an ni a. GNM hi kum thum zir niin, tun dinhmunah NSL-ah hian 29th, 30th & 31st batch zirlaite an awm mek a ni.
No comments:
Post a Comment