"MZU Southern Campus kha Congress sawrkar khan min tuipui ṭha tawk lo niin a lang. - Dr K Pachhunga Ex MLA

"MZU Southern Campus kha Congress sawrkar khan min tuipui ṭha tawk lo niin a lang a, tuna State University hi ZPM sawrkar hian chhim lamah dah a tum lo hrim hrim a ni."   -Dr. K. Pachhunga Ex-MLA

Vawiin Ni 25.8.25 (Mon) hian MNF Party chhung inkhawm chu Mizo hnam run, Lungleiah hman a ni a, he huna political session huna thusawitu Dr. K. Pachhunga (Ex MLA) chuan chhim lama University chungchang a sawi. 

Dr. K. Pachhunga chuan,"Kawlchaw West-a YMA Sub-Hqrs Lunglei rorelnaah MZU Southern Campus hi agenda-ah telhin pass a ni a, khatih laia YMA President leh Secretary kha a hnuah politics a an luh zui avangin duh angin hma a lak ṭhat zui hleih theih loh a, kum 2008 khan MZP Lungleia adviser ka nih laiin, MZP Lunglei hmalakna in India  President  hnenah dilna kan thehlut a, khatih laia Governor kha a copy pawh kan va pe a, khatih hunlai a MZP Hqrs Lunglei President Pu Lalbiakchhunga Ralte leh Pu. K. Lalrinawma (Tuna LMC Vice chairman nita) te nen hian kan va hmu nghe nghe a ni. 

Chumi hnuah Lunglei YMA hmalaknain Co-ordination committee din a ni a, chairman-ah ka awm a. Khatih laia MZU committee sang khan ngun takin a ngaihtuah a, study team dinin member paruk awmna an siam a, chumite chu Lungleiah vawi hnih an lo kal a, committee in kan lo dawngsawng a, a hmun tur pawh Pukpui VC ten ram min pek an remti a ni. Kha kha thui tak hmalak a nih laiin, khatih laia congress sawrkar khan duhthusamin min tuipui lo ni berin a lang a ni," ati. 

Dr.K.Pachhunga chuan, "kum 2018 a MNF a sawrkar khan CM Pu Zoramthanga leh Higher & Technical minister Dr. Thangtea hoin kan bei nasa a, a hmun tur pawh revenue deptt. -ah land lease tihfel hman a ni a. Theihtawp chhuaha beih a nih hnuah central sawrkar lam pawhin min remtihpui hnuah covid hrilengin min tibuai zui ta ni. India sawrkarin higher education kalphung  thlakin, 'state tinin State university neih vek tur"  a ti a. 

MNF sawrkar khan committee a siam hman chauh a, ZPM sawrkar a lo piang ta a ni. Tuna sawrkar hian chhim lam hawi duh miah loin, Aizawlah dah a tum nghal a, 'Lungleia dah ngei tura zirlai pawl te an ngen viau laiin, chhuanlam hrang hrang siamin Lunglei chu dahna tlak rih lohah min chhuah ta a ni ber, " a ti bawk. 

He hun party chhung inkhawm hi C. Lalremmuana Secretary MNF Sub Hqrs Lungleiin kaihruaiin, H. Lalawmpuia'n hunserh a hmang a ni.