MUHCS inziah luh hun pawt sei...CONGRESS IN SAWRKAR LAI AN DEM NA HLA, ..
LZ Juice-in buhfai Grade ‘A’ aiah C-Rice an supply - MPCC
ZPM hian an sawrkar tirh phat atanga Mizoram mipuite ei tur buhfai Mizoram sawrkarin a supply tir danah titi a tam nghal hle niin an sawi a. Food, Civil Supplies & Consumer Affairs Department chuan buhfai supply tur a thlan danah thil fel tawk lo awmin, buhfai Grade ‘A’ supply tura tender chhang hniam ber RL Store, Kulikawn, Aizawl chu thlang loin, a aia quintal khat Rs. 149 zela chhang to zawk LZ Juice chu Grade ‘A’ buhfai supply tura thlan a ni an ti.
LZ Juice in buhfai a supply tur zat chungchang RTI hmanga mi pahnihin zawhna an zawh pawh chhanna inang lo pek niin, LZ Juice in kum 2024-2025 chhungin buhfai quintal 1,80,000 supply anga chhanna pek a ni a, zawhna zawttu dang hnenah erawh quintal 2,00,000 supply tir angin chhanna pek a ni thung a, a dik zawk tihchian an phut a ni.
=============
Mizoram History a Corruption lian ber a la ni,
CM Pu Lalduhoma leh Revenue Minister Pu B.Lalchhanzova te hi MANTANG insem naah an tel ve ngei ang tih a ti rinhlelhawm zual hle - Congress
MPCC Spokesperson & Gen.Secy chuan Compensation hmanga Indian Air Force (IAF) te tana Lengpui Airport bul ram lâk a nih dan chung changah Dan bawhchhiat na nasa tak a awm avangin Congress party chuan he thil thleng hi a ngai thutak hle a.
Press Conference leh Press Release hmang tein vawi engemaw zât thudik puangzar turin ZPM sorkar a lo ngen tawh tiin, Mipui pawisa tam tham tak, nuai 11790 chuang in-semtu an awm ngei a ni tih hi Mizoram mipui rin dan a nih avangin Feb 5,2026 khan CBI Aizawl Unit hnenah pawh hemi chungchang hi chhui ngei turin FIR kan thehlut tawh bawk a.
Heti khawpa kil hrang hrang atanga ZPM sorkar kan nawr chung hian ZPM sorkar hotute zingah a hlawkna têl vetu an awm nge, ZPM sorkar chu in-sawifihlim tumin tan ala khawh char char a, Dan bawhchhe chunga Lengpui Airport bul ram IAF te tana an lak theihna tura remtih na petute chu CM, Pu Lalduhoma leh Revenue Minister Pu B. Lalchhanzova te an ni a.
Feb 21, 2025 khan CM Pu Lalduhoma chuan IAF in Lengpui Airport bul ram lei an tum chungchang hi ‘tih tawp lailawk’ (kept in abeyance), a nih thu Assembly Budget Session ah a sawi a. Mahse hemi hnu lawk hian chak takin File an kal tir a. May 15, 2025 ah Preliminary Notification an chhuah chûk chûk a, hemi Ni vek hian Social Impact Assessment (SIA) neih ngai lo (exempt) turin Revenue Minister Pu B.Lalchhanzoa’n phalna a pe nghal bawk a. Secretary, LR & S in fimkhur taka Notesheet a a ziah chu chung tlâk (Override) turin Revenue Minister in July 18, 2025-ah leh Chief Minister in July 21, 2025-ah te khauh (Strong) takin an ziah hnan a.
July 24, 2025 ah Compensation Award an tifel a, a tuk lawk July 25-ah ram leina man chu Pu Rohmingliana kutah Rs. 32,41,94,731 leh Pu Henry Lalremsanga Hlawnmual kutah Rs.117,90,26,341 pek nghal a ni ta a; Aug 26-ah Pu Rohmingliana hnenah Rs. 37,58,05,269 pek leh a ni.
Hetiang khawpa chaka thil kalpui a nih avang hian CM Pu Lalduhoma leh Revenue Minister Pu B.Lalchhanzova te hi MANTANG insem naah an tel ve ngei ang tih a ti rinhlelhawm zual hle a ni, tiin, IAF te tana Lengpui Airport bul ram lak a nih avanga cheng nuai 11790 insemna awm nia sawi hiMizoram history a mipui pawisa eirukna (corruption) lian ber a ni, a ti bawk.
==========
Mipuite ngenna avangin MUHCS Registration May15, 2026 thleng.
Mizoram Universal Healthcare Scheme thawhhnihnaah chhungkaw sing 2 sang 9 chuang an inziak lut tawh a, mipui ngenna avangin MUHCS-a in ziah luh theih hun chhung chu May ni 15 thleng pawhsei a ni dawn a; online hmanga in ziak lut harsatna tawkte puih zel an ni dawn.
Zawhna chhangin Mizoram State Healthcare Society (MSHCS) hotute chuan MUHCS 2.0-ah inziak lut an pun zel thu leh tun thlengin Online hmangin mi sing 2 sang 9 leh 472 (29,472) an in ziah luh tawh thu an sawi a, tunhnaiah inziak lut hi an puang zual a, ni khatah mi sang 1 atanga sang 2 vel in ziak lut thin anga chhut a ni a, hei vang hian Online-a in ziahluhna portal pawh a buai phah a, harsatna a thlen phah tih an sawi a, Online hmanga inziak lut, payment in cut si, portal-ah in thun lut famkim thei si lo an awm thute, hetianga harsatna tawkte hi an pui zel a, an pawisa in cut chu an chan hlen dawn lo a, MUHCS hnuaiah an in thun luh ngei theih nan puih zel an ni a, harsatna neite tana biak theih tur MUHCS Chhawntu lam pawh an biak pawh theih reng a, State Healthcare Society office pawh a pan theih reng tih an sawi.
MUHCS 2.0-a in ziak lut duhte tan kumin February ni 16 atang khan hun hawn tan a ni a, in ziah luh theih hun chu naktuk April ni 15 -ah a tawp dawn ta a. MUHCS-a in ziah luh theih hun hi pawtsei turin Pensioner Association lamin an lo ngen tawh bakah mipui atang pawhin ngenna an dawn tam avangin a hun pawhsei tum a ni a. Zawhna chhangin Health Minister Pi Lalrinpuii chuan, MUHCS 2.0 zawm duh la inziak lut remchang lo an tam thute, hengte avang hian inziah luh hun chu pawh May ni 15 thleng pawh sei an rel thar thu sawiin, AMC election avanga Mode Code of Conduct kalpui mek a nih avangin State Election Commission ah an hmalak tumna chungchangah hian phalna an dil a, SEC pawhin vawiinah phalna an pek tak thu a sawi.
MUHCS hi online hmanga zawm theih a nih laiin mahnia inziak lut thei lote an awm avangin MSHCS-a thawktute chu Aizawl chhung veng hrang hrangah kal kualin Enrollment Drive an nei a, Aizawl chhung hi an tuam chhuak tawh niin thudawn a ni a. Hei bakah hian online-a in ziah luh theih lohna khaw 269-ah Offline-a in ziah luhna kalpui a ni a, Offline hmanga inziak lut zat erawh MSHCS hotute hian an la dawng kim lo thung.
MUHCS 2.0-ah hian cheng sang 2 leh 500, cheng sang 5 leh cheng sing 1 te a inziah luh theih a ni a. Hei hian chhungkaw khat tan cheng Nuai 5 hu thleng man chawi lova inenkawlna a huam a ni.
=========
Mizoram Private Hospital leh State pawn Hospital te inkar Health Minister in a sawi.
Nimin khan Aizawl hmun hrang hrang-ah ZPM Thalai General Hqrs buatsaihin Street Campaign neih leh a ni a. venghrang hrangah-ah an nei a.
He hunah hian Health Minister Lalrinpuii chuan ZPM in sorkarna kan chan atangin theih tawp chhuahin Health lamah hma kan la a. Kan sorkar hi mipuite nat rual a na ve thin kan nih angin, Mizoram Universal Health Care Scheme pawh Mipuite thlamuan na khawp pe thei turin kan siam chhuak ta a ni, a ti a.
Sorkar hnathawk awm lohna chhungkaw tan pawh thlaphan na awm tawh lohna tur Health Care Scheme kan nei tawh a ni, a ti. tun hnaiah party pakhat a an hotu chuan thidik lo a mipuite chaih kawi tumin, 'Mizorama Pvt Hospital-te phailam Hospital nena inremna aia hniama an tih theih thu an hrilh pawhin an phal lo tih thu a sawi a. Thudik hi Mipui ten hria se ka duh a, thudik lo vawrh tute hi mipui ten ngaihdan tawk i nei ang u a ti.
Pvt Hospital-te nen hian tum engemaw zat indawr a ni a. Hospital mal leh pawl NGHAM ang pawn Minister hote, Secy & Commissioner hote, CEO te nen pawh sawiho fo a ni a. Tun hnai chhoah Hospital tinte CEO office ah leng tura sawm an ni a, rate chungchang pawh sawipui an ni a. MUHCS kal phung hi Package system a ni a, Pvt hospital lam hian an rate ang ang atanga 10% a hniamin min offer a, mahse chu chu Package system a nih loh avangin package system turin lo siam tha leh ru kan ti a, hei hi a chhanna kan nghak mek a, phai rate leh Mizoram rate hi kan khaikhin fo a, Pvt Hospital ten lo hrethiam se, anni nen chuan Specialities-ah te, Super Specialitiesah te, kan facilities neihte a inthlau em a, an rate aia hniam tih pawh hi eng ang taka hniam nge tih sawi chian awm lo, a ti bawk.
======
BJP Mizoram State Jt Treasurer, Nari Shakti Adhiniyam Convener Pi Lalremsangi Fanai chuan Women Reservation bill pass a nih hnuah a taka hman thuai a nih theih nana parliament special session koh a ni chu lawmawm an tih thu a sawi.
Nimin chhuna Aizawl Press Club-a thuthar lakhawmtute an kawmnaah Pi Lalremsangi Fanai chuan NDA-BJP kaihhruai hnuaiah kawng hrang hrangin India ramin bung thar a kai a, hun rei tak atanga buaipui hlawh Women Reservation Bill pawh Parliament rorelna sang ber in hnihin lungrual leh hneh taka Lok Sabha leh State Legislative Assembly a hman turin a lo pawm tawh tih sawiin, he bill hi a taka hman thuai a nih theih nan special session koh a ni leh ta chu lawmawm an tih thute a sawi a, Hmeichhia te tana rorelna sanga 33% seat hauh sakna hian India ram chhung hmeichhiate chu State leh National levela rorelna chhunga dinhmun pawimawh lehzual an chelhna a nih bakah Inchhung khur, Social & Community nunphung tinrengah famkimna, New India a thlenna a nih thu a sawi bawk a ni.
Pi Lalremsangi chuan Democracy rorelna bul thut Panchayati Raj (Village Council) leh Municipalities rorelna chhungah Women Seat Reservation felfai taka thliar hrangin India ram pumah kalpui vek a nih tawh thu sawiin, ram rorelnaah hmeichhia sang tel telin tualchhung rorelnaah an tangkai hle, a ti a. State thenkhatah phei chuan 33% duhtawk loin 50% women reservation kalpui te pawh an awm tihte, ram rorelna sang State Legislative Assembly leh Parliament chhunga hmeichhiate dinhmun chawisanna, policy making/ mawhphurhna pek leh dah zahawmna kalpui mek hian India ram ropuina sang lehzual a thlen ngei an rin thu a saiw bawk.
======
Nimin khan Reliance Foundation chuan Formosa Foundation, India kaltlangin Central YMA hnen a Ambulance an hlan chu sem a ni.
Ambulance hi Central YMA chuan Chalfilh Group YMA hnenah an lo hlan tawh a, nimin zing khan Aibawk-ah Chhimphei Group YMA leh Hmuifangtlang Group YMA kutah an hlan leh a ni.
Central YMA hruaitute vek hian nimin chawhnu dar 2:30 khan Convention Center, Lunglei-ah Ambulance hlanna hun hi hmang chhunzawm in Pu K. Lalfakzuala, President, Sub-Headquarters, Lunglei chuan a kaihruai a, Zobawk Group YMA, Pangzawl Group YMA leh Chawngte Group YMA te bakah MTP Sub-Headquarters, Tipa V leh YLA Sub-Headquarters, Sangau te hnenah an hlan tel ve bawk.
He hun kaihruaitu Pu Fakzuala chuan kan NGO pui YLA Sub-Hqrs, Sangau leh MTP Sub-Hqrs, Tipa bakah YMA Group hrang hrang Zobawk, Chawngte, leh Pangzawl Group ten thilpek hlu tak an dawng chu a lawmpui hle tih a sawi. He thilpek hian tlawmngai pawlte tha a tichak dawn a, a tawpah chuan mipui tan malsawmna a nih tur thu a sawi bawk.
Pu Jonathan Lalremruata, Chairman, Formosa Foundation, India chuan thutawi sawiin, Formosa chu Covid-19 hripui len laia din a nih thu leh NGO an ni a, YMA behchhana hma an lak thin thu a tarlang a. "Kan partner company-te nen Mizorama kan luanchhuahnaah hian Mizo mipui mit timim zawnga ke pen kan tum ngai lo," tiin, phut let leh beisei let nei lova CSR (Corporate Social Responsibility) hmanga hma la an nih thu a sawi a. Ram leh hnam tan a tul ang zela luanchhuah zel an tum thu a tarlang bawk.
Central YMA President Pu R. Lalngheta pawhin thu sawiin, tanpui ngaite tanpui nan leh ruihhlo dona kawnga hmanraw tangkai tak tur Reliance Foundation ten Formosa Foundation kaltlanga an rawn pe thin chu lawmawm a tih thu a sawi a. Pu Ngheta chuan YMA laka hmuh dan dik lo nei thinte chhangin, "Mi thenkhatin YMA hi lei theih ang hiala min chhuah thin an awm a, mahse YMA hi lei theih kan ni lo tih kan hriat tlan a tul a ni," a ti a. Formosa Foundation chungchanga chirh theh rawn awm thinte chu an tum an hriatchian thu sawiin, an hmalaknaah YMA chu an bulah a din tlat tur thu a sawi bawk. Mizoram zimtea hnam bil anga inthendarh hi YMA chuan a remti lo tih lantir nan he Ambulance semnaah hian YLA leh MTP-te pawh huang khatah an awm vek tih a sawi.
Pu MS. Ralte, Finance Secretary chuan, Reliance Foundation kaltlang hian ruihhlo dona atana hman tur Mahindra Bolero Campers 9 an lo dawng tawh a. Central Sawrkar pawhin lirthei 9 dang YMA hlan tura hma a lak mek thu a sawi.
Ambulance hlanna hunah hian Formosa Foundation aiawhin Pu Clinton (Legal Adviser) leh NGO hrang hrang aiawhten inhlanna lehkha an ziak fel a. He hunah hian Central YMA CEC Member 5 bakah YMA Sub-Hqrs Lunglei OB-te leh SEC, Lunglei member-te an tel a ni.
==========
Jt.YMA Zobawk chuan April ni 16, 2026 atanga Total Bandh buatsaih an tum chu eng vang mahin thulh an tum lo tih an sawi.
Jt.YMA Zobawk te hian an khaw chhunga National Highway laih chungchangah an ngenna in awmzia a neih loh mai bakah an duh anga hnathawh a nih loh avangin April ni 16.2026 zing dar 6:00 atang tiamchin awm lo Total Bandh buatsaih an tum a, hetianga ruahmanna an siam avanga hian Company lamin hna rawn thawk chhunzawmin khawl te rawn dah belh pawh nise vawi tam tak an lo ngen tawhna chuan awmzia a neih ngai loh avangin Total Bandh hi kaltlang pui an tum tih sawiin, hemi hian awmzia a neilo a nih chuan hmalak zel dan tur ngaihtuah an tum tih an sawi.
Total Bandh hian Medical Duty, Bawnghnute sem, Force lam duty, Official Duty, Zirlai Exam turte, Fire & Emergency Service, Damlohna avanga Damdawi In panturte a huam dawn lova, Zobawk khaw chhunga sumdawnna hmun, Zirna In leh Sawrkar Pisa te chu khar vek tura ngen niin ram lama hnathawk turte pawh tumah chhuak lo turin an ngen a ni.
============
US in Strait of Hormuz Haval Blockade a siam chungin lawng thenkhatin an paltlang tih maritime tracking data ah a lang.
Thawhtanni khan Iran lawngchawlhna atanga chhuak lawng pahnih chuan US in blockade a siam chungin Strait of Hormuz an paltlang tih nimin khan maritime data chuan a tarlang a. Heng lawng pahnih hi Washington aon blockade a siam tan hnua strait of Hormuz paltlang lawng 4 zinga mi an ni.
The Liberia-flagged bulk carrier Christianna chuan Iran port Bandar Imam Khonenei ah vaimim tin 74,000 a dah hnuin he tuipui ringrek a Larak Island a pel tih Kpler data chuan a tarlang a.
Comoros-flagged tanker Elpis chu methanol ton 31,000 phurin Iran port a chhuahsan a ni
US central command chuan he naval blockade hian Iran port leh Iran vaukam a lut leh chhuak lawngte a huam tih an sawi a. Chinese tanker, Rich Starry pawhin Larak Island chhim lam Iran in lawng kal nana a pawmah an kaltlang a, Methanol tone 31,500 phurin Soar, Oman a pan niin a sawi a. He China lawng hian US blockade hi a khauh reng em tih a enchhin niin sawi a ni. Rich Starry leh Elpis te hi US in a hrek zinga mi niin Christianna hi chu a ni lo a ni.
===========
Comments
Post a Comment