News langsar te
Mizoramah eirawngbawlna gas leh tuialhthei ala thleng tha tih Food Civil Supplies & Consumer Affairs thuchhuah chuan a tarlang.
LPG (Domestic 14.2Kgs) stock Cylinder 15,100, kawnga rawn thang mek 33,244 nen avaiin bur 48,344 a ni a, hei hi ni 6 daih tura chhut a ni. Commercial (19 Kg chi) stock bur 619, kawnga lo thang mek 336, a vaiin 955, hei hi ni 16 daih tura chhut a ni.
POL lam hi Petrol hi retail outlet a, stock te nen vek 1,262 KL, kawnga rawn thang mek 536 KL nen a vaiin 1,798 KL a ni a, hei hi ni 7 chuang daih tura chhut a ni. Diesel stock 1,383.60 KL leh kawnga rawn thang mek 644.00 KL nen avaiin 2027.60 KL niin hei hian ni 5 chuang daih tura chhut ani bawk.
=============
BCM Vathuampui Kohhran Hall, Sunday School Hall atana hman mek bawk chu nimin zunday zing dar 5:30 vel khan a kang fai vek.
===============
Mizo Academy of Letters (MAL) chuan kum 2025 chhung a Mizo tawnga chhuak lehkhabu tha Book of the Year 2025 Top 10 athlang chhuak.
Book of the Year 2025 Top 10 atang hian lehkhabu tha zual 3 athlang chhuak leh dawn a ni. Kum 2025 chhunga lehkhabu tha Top 10 te chu :
1. April Fool - Zaiva Nu-nuna Renthlei
2. A lai taka mihring - Lalnghakmawia Khiangte
3. Bei nge sei, run dung - B. Lalhriattira
4. Hripui leng karah mittui - Lallawmzuala
5. Kawih->>thruang - Rohmingthanga Ralte
6. Kham leh Suar - Lalrammawia Ngente
7. Khawtlang Darzam - Romuanpuii Zadeng
8. Kohhran chanchin - Pastor Bena
9. Mizo Lal Zakapa - Laltluangliana Khiangte
10. Zo Daifim - T.C. Jonunsanga te a ni.
=========
Bawngkawn Brigade Field-a AMC Sports Complex chu tunlai Mizorama regional party lian pahnih ZPM leh MNF party inbeihna ni mekin vawiin hian party pahnih ten en an tum.
State a rorellai party, AMC sorkara eptu ZPM party chuan Bawngkawn Brigade Field a AMC Sports Complex chu AMC a MNF sorkarin anih tur anga tipuitling lo a puhin cheng vbc 5 chuang hman ralna tur an hmu lo tih an sawi a, MNF Party worker an duhsak zawng 18 hnena Aizawl thalaite infiamna rotling tur an semsawm nia sawiin an dem thu, thuchhuah an lo siam tawh a.
MNF Thalai President Pu Robert Romawia Royte chuan ZPM Thalaiho sawi ang anih loh thu leh ZPM Thalaiin enho an sawmna chu apawm thute, AMC Sports Complex bakah SASCI Part-I 2025-26 tana sum dah lapse dan Delhi a kal a, enho leh SASCI 2025-26, Part-I sum, 34% lapse >in, akhawih buai mek Aizawl chhunga SASCI project 20 te ahmuna kala enho nghal nise ati bawk.
Party pahnih thalaite hian vawiin ni 13.4.2026 a, enho turin an incho a, MNF Thalai lamin zing dar 7 ah enho nise an ti a, ZPM lamin chawhnu dar 2:00 ah enho nise tiin tawiawm turin MJA member te an sawm bawk a, enho hun tura an rawtna hi, a inang ta lo a. He thu buatsaih lai hian an enho thei dawn em hriat ani rih lo.
=========
Inrinni ( 11.4.2026) khan District Legal Services Authority, Lunglei buatsaihin Regular Lok Adalat chu District Court Building, Lunglei-ah hman a ni a. Lunglei District chhunga thubuai 146 ngaihtuah a ni.
Vawin Lok Adalat-a thubuai ngaihtuah tur hian Bench pakhat a siam niin, Bench -I hi Pu Lalramsanga, Chief Judicial Magistrate in kaihruai in, Pu B. Laldinpuia, Advocate leh Pu H. Vanlallawma, Social Worker te an thu a. Thubuai 146 atang hian 38 sawirempui niin, tihfel a ni a. Vawiina thubuai ngaihtuahah hian leiba inṭhinna tam berin, Rs. 8,69,757/- (Cheng Nuaih Riat Singruk Sangkua Za Sarih Sawmnga lehPasarih) lai chinfel a ni.
Tun kum chhung hian Lok Adalat Vawi Li (4) thut tawh niin, avai in thubuai Zathum leh Sawmriat (380) ngaihtuah a ni a, heng atang hian 120 sawirempui ani. Heng thubuai ngaihtuah ah hian leiba inthinna tam ber in Rs. 76,84,079 (Cheng Nuaih Sawmsarih paruk Singriat Sangli leh Sawmsarih pakua) lai chinfel ani.
Lok Adalat-ah hian thubuai neitute duhdan angin inremna ziahpui ṭhin a ni a. Sum sen ngai loin, ukil rawih man ngai lovin thubuai hi chinfel sak ṭhin a ni.
========
Inrinni khan Lunglei District Agriculture Office buatsaihin Tlabung ah Oil Palm hralh chhuah tur vai liamna (flag off) hun hman a ni.
Lunglei District Agriculture Officer Dr Samuel Laliansanga chuan kum 2026-a Tlabung chhehvela oil palm thar hmasak ber hralh chhuah tur chu a vai liam. Oil palm hralh tura thawn chhuah hi Kg 4,175 niin, oil palm chingtu chhungkaw pakaw ta a ni.
Oil palm vai liamnaah hian Tlabunga oil palm chingtute, Agriculture & Farmers Welfare Department-a thawktute leh Partner Company Patanjali Foods Ltd ai awhte an tel a. Tlabung Block huam chhunga oil palm chin leh hralh chhuah chungchanga hma lak zel dan tur leh hmasawnna tur hrang hrang ruahmanna te an sawi ho nghal bawk.
Tlabung Block huam chhungah hian oil palm chingtu chhungkaw 80 vel awmin, ram hectare 150 vela zauvah oil palm hi an ching a. Tlabung, Tipperaghat leh Khojoysuri khua ah te oil palm hi an ching mek a ni.
Agriculture Department chuan kut hna thawktute hnenah oil palm ṭiak (seedling) hi an sem ṭhin a. A chinna senso hrang hrang – a hmun enkawlna, half moon terrace laihna, leilawn leh a sengna harvesting- pole te chu oil palm farmer-te hnenah hian pek ṭhin a ni bawk.
Oil palm hralhna chungchangah Agriculture Department leh Patanjali Foods Ltd Company te chu thawk hovin, Company hian oil palm rah, 'Fresh Fruit Bunch (FFB)' hi an lei ṭhin a. Tun dinhmunah chuan Bukvanneia Godrej Company te Oil Palm Mill-ah an la hralh chhawng rih a. Lawngtlai District-a, Liapha khua ah Patanjali Company hian Oil Palm Mill buatsaih mekin, kumin 2026 hian hawn theih a nih besei a ni.
=============
Lunglei Police te chuan March 2026 chhung khan pawi khawihna hrang hrangah thubuai 8 ziaklut in thubuai kaihhnawihah hian mihring 8 an man.
Hei bakah hian Lunglei Traffic Police te chuan March, 2026 chhung vek hian lirthei khalhtu dan bawhchhia te hnen atanga sum an chawi tir zat chu Cheng Nuai 2, Sing 1, Sang 1, 800 a ni a, dan bawhchhia sum an chawi tirte hi HMV 48 atangin Cheng Sing 9, Sang 3, 600, MMV 30 atangin Cheng Sing 2, Sang 8, 400, LMV - 29 atangin Cheng Sing 5, Sang 9, 100, Three Wheeler - 10 atangin Cheng Sing 1, Sang 4, 700, Two Whèeler 9 atangin Cheng Sing 1, Sang 6 chawi tir an ni a, dan bawhchhia te hi a tam ber chu Document fello leh License neilo a lirthei khalhte an nih bakah lirthei dah phallohna hmuna dahte leh Helmet khum phalloh khumte an ni. Lunglei Police te hian March thla liam ta vek khan Rakzu Litre 890.6 tualchhung hralhna rate a Cheng Nuai 4, Sing 4, Sang 5,300 man hu an man bawk.
Hetihlai hian Excise & Narcotics Department Lungleia thawkte pawhin March 2026 chhung khan MLP Act '19 hnuaiah thubuai 40 ziaklutin mihring 40 an man a. Thubuai an ziahluh kaihhnawihah hian Rakzu Litres 839.7, Sap Zu Umpuitling 9 leh um puitling 24, leh Heroin Gram 42.16 an man a ni.
=========
India rimawi khawvela hmeichhe zaithiam ber zinga mi, Padma Vibhushan chawimawina pawh dawng tawh, Asha Bhosle-i chu, nimin zing khan kum 92 mi niin Mumbai-ah a thi.
Asha Bhosle-i hi Sept ni 8, 1933-ah Sangli, Maharastra ah apiang a, kum 9 anih atangin zai lamah a kal tan a, kum 1943-ah film hla asa tan a, hindi cinema ah, azai nasa em em a, tawng hrang hrang 20 in, hla 12,000 chuang a record tawh a, film hla ,sa tura, sawm hlawh ber a ni
President Droupadi Murmu; Vice President, C. P. Radhakrishnan; Prime Minister Narendra Modi; Defence Minister Rajnath Singh leh Home Minister Amit Shah-te, sorkar mi pawimawh leh milar thahnem takin an ui thu sawiin achhungte hnenah tawrhpuina thu an hlan a ni.
=========
US President Donald Trump chuan Iran nena an inbiakna atlawlh hnu in, Strait of Hormuz dang vek turin thupek asiam.
US palai leh Iran palaite hi Pakistan hmalakna in, Islamabad-ah darkar 21 chhung an inbia a, ram pahnihte an thawk rip hle a. US pawhin nidanga a la tih ngai vak loh inbiak tantirh in, Vice President hial atir a. Iran foreign minister leh parliament speaker hovin mi 71 zet an thawk bawk a, mahse mi tam tak hlauhthawn ang ngeiin inremna nei thei lovin an inthen leh ta a ni.
Trump chuan Pakistan a an inbiakna chu a kaltluang dawn viau a, point dangah te chuan an inrem thei a, mahse Tehran chuan a nuclear programme bansan aduh tlat lo a ni, a ti
Inbiakna a tlawlh takah chuan US President chuan Khawvela lawng sipai (Navy) tha ber chuan, Strait of Hormuz kaltlang, lut leh chhuak adang dawn tih, a social media Thruth ah a post a, Iran atanga US Navy an rawn kap emaw, lawng dang pawisawilo, an kap anih chuan akaptu chu hremhmun ah thawn nghal ani ang, a ti.
US Vice President JD Vance chuan inremna awm lovin Pakistan a chhuahsan a ni.
=======
Iran foreign minister Seyed- Abbas- Araghchi chuan US nena an inbiak laia Israel Prime Minister in, phone hmanga arawn biakna chuan, inbiakna ani lo zawngin aher ta daih niin apuh.
Seyed Abbas- Araghchi chuan US Vice President JD Vance-a'n Islamabad achhuahsan hnu lawkah X ah thu post in inbiakna neih anih laia Israel Prime Minister Benjamin Netanyahu in, JD Vance a rawn biak chuan, inbiakna boruak a tichhe ta vek ani, tiin apuh a. Netanyahu- rawn biakna chuan, US leh Iran inbiakna chu, Israel hamthatna tur lam ngawr ngawr zawngin arawn sawn daih ani, a ti.
Iran chuan inbiakna tha tak neih tumin Paksitan ah hian an kal tih sawiin, an ram interest leh sovereignty erawh chu, humhim zel an intiam tih a sawi bawk.
Iran in Israel Prime Minister Netanyahu- phone call avanga inbiakna ani lo zawnga inher ta anga an puhna hi, US chuan he thu buatsaih lai hi chuan ala chhang lo.
========
Comments
Post a Comment