NEWS LANGSAR ZUAL LAWRKHAWM
Party pahnih incho tawn, MNF leh ZPM thalaite chuan a huhoin Field hi an en ta lo.
AMC Sports Complex siam dan ah hian sum tih chingpenna a awm niin inpuh mawhna lian tak a awm mek a, hemi thu kal zelah hian party pahnih ZPM leh MNF thalai president ve ve te chuan playground hi en ho turin an insawm tawn a, a en ho hun turah hian duh dan hrang an nei thung a, playground en ho Ni tura an ruat ah party pahnih thalai hruaitute hian ahran ve ve in Playground hi an tlawh ta thung a ni.
MNF Thalai President Pu Robert Romawia Royte, MLA leh thalai hruaitu dangte chuan zimin zing khan AMC Sports Complex, Bawngkawn hi an tlawh a, thuchhuah siama an tarlan danin, MNF thalai hruaitu mi 100 vel chu zing dar 7 khan Sports Complex ah hian an pungkhawm a, ZPM thalaite chu an nghak chhuak zo ta lo niin an tarlang. MNF thalai President Pu Robert-a chuan ZPM Thalai ten he hna hi enho puia an sawm thu leh ahun ruatfel a, anmahni, hriattir leh tura lehkha adawn thu sawiin, helai hmun enho hun atan April ni 13 zing dar 7 a ruat thute, ZPM thalaite pawh ziaka a hrilh thlap thute, chutihrual chuan a beisei loh takin chawhnu dar 2-ah en ho an duh thu an sawi leh tak daih thu a sawi a, ZPM thalaite ngenna angin ahun ruatah chuan helai hmun hi an tlawh ngei a, mahse ZPM thalai mi 3 chauh an tel ve chu mak a tih thu a sawi a. AMC Sports Complex chu AMC hmalakna in, Aizawl a Field tha ber te zinga chhiar tel turin Phullem leh Flood-light siam tum anih thu sawi bawkin, Sports Complex siam hnathawh lai hian a hunlaia AMC Engineer te bakah Bawngkawn LC te, GSA te leh Welfare ten an enpui a, Contractor ten an thawh that avangin dan angin Security Deposit pawh pek chhuah vek anih tawh thu a sawi.
An in cho tawn angin party pahnih thalai hruaitute hian a huho in, Sports Complex hi en ho ta lo mahse ZPM thalai President Pu Jeje Lalpekhlua, MLA leh thalai hruaitu dangte chuan nimin chawhnu khan Brigade Field hi an tlawh ta tho a. Zawhna chhangin Pu Jeje-a chuan helai hmun enho pui tura an sawm, MNF thalai president in, ruahmanna asiam dan chuan, minute 45 chauh, hun hman ho tur ani tih leh hetiang project lian hi hun rei lote chhunga en zawh mai theih anih loh thu leh chawhnu dar 2 atanga enho turin an ngen let thu a sawi a, hei hi an pawm tura an ngaih laiin, April ni 12 zan dar 8:40 velah, zing dar 7-a en ho an duh thu a dawng leh ta chauh a, hetiang hun, zan, tlai lam tawhah chuan, information han in pekna hun anih tawh loh avangin ZPM thalai in hun an ruat zawk, chawhnu dar 2-ah field hi an tlawh ta tih asawi a. Party pahnih thalaite chauhin an en dun hian awmzia a nei vak lo a, Engineer leh sorkar lam mite pawh an tel angai tiin, ZPM thalai in an tlawh lai hi chuan third party atana an sawm te pawh an tel ve thu asawi bakah AMC Sports Complex siam dana thil dik lo awm hi chhui chhuah anih theih nan atawp thlen an tum thu asawi bawk.
Tukina MNF thalaiin AMC Sports Complex an tlawhna ah hian Bawngkawn GSA hruaitu thenkhat, Bawngkawn YMA leh Bawngkawn LC hlui thenkhatte leh Dy Mayor kalchhuak Pu R.Thanglura pawh atel a. ZPM thalaiin chawhnu lama an tlawh leh na ah hian Bawngkawn Local Council member te, ZPM Corporator kal chhuak ta te, Rajya Sabha MP te an tel bawk ani.
=========
Lunglei Municipal inthlan boruak ang mai khan, AMC-ah pawh, seat awm zawng zawng kan lak mai theih arinawm a ni,” ZPM party Adviser Dr. Vanlalthlana Minister chuan a ti.
Nimin thawhtan ni a ZPM Party chhung inkhawm ah thu sawiin Dr. Vanlalthlana chuan “Politics-ah sorkar thlak danglam thei, neutral thil thra- duh, kan nei thin hi, kan vannei a, tunah pawh, awn lam nei lo mipui tam takin Kalphungthar mipui sorkar hmalakna leh hlimthla an hmuh vangin ZPM tan an rawn au chhuak mek a. Neutral-in, aw an neih hian, ram in a thatpui thin a, Kohhran ten thuchhuah an neih phei chuan beng kan dawh a, ramin kalphung dik azawh thin a, Kohhran leh mipuite chungah lawmthu kan sawi. Chuvangin Lunglei Municipal inthlan boruak ang mai khan, AMC-ah pawh seat awm zawng zawng kan lak mai theih arinawm a ni,” a ti.
Dr. Vanlalthlana chuan, MNF hi an Minister-te kha thil tha duh tak tak anni hlawmin ka hre thin a, an party- worker-te hian an ti hmingchhe deuh nge, an mawng an hlim mek a ni. Bawngkawn Brigade Field bakah sorkar hmasa- thil siam, tha tawk lo tak tak mai te rilru ah alo lang a. Solid Waste Management Centre te, halralna khawl, kum thum leh chanve hnua an la Commission thei lo te, MICE school sak, chhe lutuk te, hmeichhe zunin bang pawh nei manglo siam te, fur alo thlenga inchung hul lo lutuk a, an chih te, vei mang si lova, ram vei thar ni awm taka inthlan dawna an in-hawt buk leh hluai mai thin hi amak hle a ni,” a ti bawk.
Party chhung inkhawm hi Pu R.Malsawmtluanga, General Secretary chuan kaihruai in Dr.Vanlalthlana Minister chuan K.Lianhmingthanga, Secretary, MNF General Headquarters bakah, MNF Unit lama hruaitu pawimawh tak tak mi 4-te ZPM-ah alawmlut a ni.
=========
Congress party chuan LZ Juice te'n, buhfai an supply danah thil fello tam tak a awm nia sawiin, Buhfai supply-na challan leh lirthei inmil lo engemawzat a awm tih leh Buhfai phurh nan Bajaj Pulsar Bike te hman ani a, thil mak tam tak, a awm thu an sawi.
Mizoram Pradesh Congress Committee Vigilance- Cell hruaitute chuan nimin khn Aizawl Press Club-ah thuthar lakhawmtute an kawm a, an hotupa Pu R Vanlalvena chuan sorkar in man to taka Buhfai, a supply tir LZ Juice ten buhfai an supply dan an chhui zui thute, Grade A buhfai supply tura tender chhang si a, Common rice zawk an supply ngei tih an finfiah thute, LZ Juice ten Mizoram pawn lam atanga buhfai an phurh luh danah hian Mizoram chanchin a, thil thleng ngailo thil mak tak tak a awm nual tih a sawi.
Pu R Vanlalvena chuan Buhfai supply-na challan leh lirthei inmil lo engemawzat a awm tihte, buhfai supply nan hian auto rickshaw, Car, JCB leh Bike te an hmang thin tih hmuhchhuah ani tih sawiin, LZ Juice te hian January ni 17, 2025-ah Challan No. 238 hmangin he Pulsar bike hmang hian Zuangtui Muanna Godown ah buhfai bag 800 an phur lut nia chhinchhiah anih thute, lirthei te zawk in, buhfai tam tak an phurh luh laiin lirthei lian ten buhfai an phurh luh record te chu a tlem leh em em lawi si a, thil dik lo leh mak tam tak an hmuhchhuah thu a sawi.
MPCC Vigilance Cell hruaitute chuan buhfai supply dan an zirchianna atangin ZPM sorkar hnuaia Supply Minister in, duhsak taka buhfai a supply tir LZ Juice ten phai lam atanga Zuangtui Muanna Godown a Zoram mipuite eitur buhfai an phurh luh danah thil mak leh fello tam tak a awm ngei ani tih, a nemnghet tih a sawi a, Zuangtui Muanna Godown-a buhfai phurhluh dan an enfiahna ah thawktute chuan lirthei lut reng reng uluk taka endik anih thu leh buhfai te pawh buk nawn vek anih thu an sawi si avangin, LZ Juice te hian thuneitu- sang duhsakna an dawng bik anih loh chuan, Godown a buhfai an phurhluh dan chu thawktu ten an lo pawm theih dan, a awm lo tih an sawi bakah ZPM sorkar hnuaia buhfai supply dan diklo tak hi chhuifiah a, thil ti diklotu te hrem an nih ngei theih nan Lokayukta ah complain an thehlut thuai dawn tih an sawi bawk.
=================
AMC inthlan neih tura MNF party Candidate te'n AMC-ah sorkarna an siam chhunzawm anih chuan Aizawl khawpuia cheng mirethei leh harsa zawkte tan inhlawhna tam zawk siam an tum thu an sawi.
MNF party candidate thenkhatin nimin khan Aizawl Press Club-ah thuthar lakhawmtute an kawm a, Ward 15-na a MNF Candidate Pu Hmingthansanga chuan MNF in Aizawl khawpui enkawl an tum dan hrang hrang sawiin, mirethei leh harsa zawkte tan inhlawhna tam zawk siam sak an tum a, an tan vek hian, tui dahkhawlna tur ngaihtuah an tum thu asawi a, kum upa zawkte ngaih pawimawh an tum thute, an hamthatna leh awlsamna tur ngaihtuah anih tur thu te, Vantlang hmun leh zirna in pawimawh zual ah Free Wifi chak zawk 5G dah an tum thu leh chungte chu uluk zawka enkawl an tum thu a sawi.
Pu Hmingthana chuan AMC-ah sorkarna an chang chhunzawm anih chuan Property Tax ennawn an tiam tih sawi bawkin, Property Tax khawnna tur Survey neih thar leh ani ang a, khairual taka Tax hi khawn ani ang a, chawi tur zat dik tak, chawi tura hmalak a ni ang, ati a. Heng bakah hian In sak phalna (Building permission) leh lei laih phalna mumal zawk leh rang zawka pek chhuah anih theih nan hmalak an tum thute, In hlui thiah phalna rang zawka pek chhuah anih theih nan hmalak an tum thu leh Aizawl khawpuia chengte tan Leivung paihna hmun siam belh an tum thu asawi bawk.
Pu Hmingthansanga chuan Aizawl hi Mizoram Khawpui anih chhunzawm zelna turin athlavang hauh a, humtlat chu MNF party in an tum thu asawi a, Aizawl mipui zawng zawngte tan thliarbik nei lova hnathawk turin an inbuatsaih a, hun kal tawh a, mi- famkim tawklohna chhuanlam tum lovin, an hma a tih tur awm thawk chhunzawm nghal turin an inring tih asawi a, AMC chu Central sawrkar atanga Fund hran nei, inrelbawlna hran nei anih angin Sawrkar kal mek in, aduhdan anga kal a, a kaih-kual mai mai theihloh, mipui tana ding AMC din zel an tum thu asawi bawk.
================
BJP Mizoram State President Dr.K.Beichhua MLA chuan, Prime Minister Pu Modi- hnungzui hi a zahthlak loh a, Mizoram mipuite kan inngaihtuah chian angai hle a ni, a ti.
Nimin a BJP Mizoram Political Session, an party office a neih ah thu sawiin Dr.K.Beichhua chuan India- ram Former Prime Minister Pu Atal Bihari Vajpayee-a kha, PM a nih lai khan miretheite hmangaihtu ani a, Scheme tam tak pawh adin a, Tribal Affairs Department pawh an din bawk a, hei mai ni lovin, NE States pariat te enkawlna tur bik atan DoNER kan tih pawh hi, Vajpayee-a- hunlai tho a duan a ni, chuvangin NE-a chengte leh keini Tribal State-te, tunhma a, hnuchhawn state-te chawikan a, India- Ram ropui tak din hi an tum ani," a ti.
State BJP President chuan, "vawiin ah chuan India- Prime Minister Pu Modi-a avangin India chu khawvela Ram pawimawh ber te zinga mi ani ta a, ram hrang hrang te hian India, thawhpui loh an hlau tawh a. Chuvangin PM Modi- hnung zui hi azahthlak loh a, Mizoram mipuite kan inngaihtuah chian angai hle ani, a ti bawk.
Pu K. Laldinthara, Former State Spokesperson in akaihruai a, Pi Zopari, Former State Mahila Morcha President & Former MHIP General Headquarters President-in thu asawi bawk.
========
United States chuan Strait of Hormuz a, naval blockade siam nan, F-35-B Lightning- II Jets, MV-22 Ospreys leh indo lawng 15 chuang a tir.
US chuan Strait of Hormuz a Iran lawngchawlhna a, lawng lut leh chhuakte dan chu nizan khan atan ta a, heta tan hian indolawng 15 chuang atir a, amphibious- assault- ship, USS Tripoli (LHA 7) chu, F-35-B Lightning II, stealth fighters leh MV-22 Ospreys nen, Arabian sea ah operation an nei dawn a. CENTCOM chuan naval blockade hi an tan tawh tih sawiin Iran port nilo, hmun dang atanga lawng lut leh chhuakte erawhchu an dang dawn lo tih a sawi.
Nimin khan US President Donald Trump chuan Iran Indo lawng rual chu tihchhiat deuh vek ani tawh a, iran lawng naval blockade rawn pante chu tihchhiat anni ang tih a sawi.
Trump chuan Iran Navy chu nuai chhiat vek tawh a ni a, lawng 158 chu tuifinriat hnuaiah a awm tawh a, kan la tih chhiat loh chu tlemte, an mahni in, 'fast attack ship' an tihte a ni a, hengte hi chu hlauhawm vak lovah kan ngai a. Heng lawngte hian blockade kan siamna hnaia an lokal chuan, tuipui chunga drugs tawlhtute kan kah pil angin kahpil an ni ang, a ti.
Iran pawh a ngawi mai mai bik lo a, Strait of Hormuz kaltlanga Iran ports a, lawng lut leh chhuakte, US in adan chuan Gulf leh Sea of Oman vela lawng chawlhna te chu engmah ahim dawn lo tih an sawi ve thung a. Strait of Hormuz chu an ta niin an thunun tlat tur thu an la sawi a, Hormuz hi kan hmelma- ram nilo tan chuan kan hawng reng a ni, an ti.
US-Israel leh Iran inepna boruak hian fel lam aiin zual lam apan zel a, he indona hian a kaihhnawih zau tawlh tawlh a ni.
US in Strait of Hormuz kaltlanga Iran port a, lawng lut leh chhuak dan anih tur thu puan anih atangin oil man asang leh nasa a, Lloyd's- List intelligence in, a tarlan danin naval blockade tan anih hnu ah, in kahhai hnu a, kawng kal, tlem azawng chu, an tangkhang niin asawi a. Marine tracker chuan inkahhai tan anih atangin commercial lawng 40 chuang chuan Strait of Hormuz hi an paltlang tih a sawi a, indona chhuah hma kha chuan ni khatah lawng 100 atanga 135 inkar in, nitin an paltlang thin a ni.
===========
Comments
Post a Comment