NEWS LANGSAR ZUAL

Nimin khan Lunglei District Agriculture Office, Lungsen Block Agricultural Technology Management Agency (ATMA) leh Patanjali Company buatsaihin Tlabungah RKVY hnuaia lei hriselna chungchang zir hona, "Awareness on Soil Health and Fertilty" leh oil palm ching mek leh ching thar turte tan training buatsaih a ni a. PM Kisan saturation drive buatsaih a ni bawk.

Lunglei District Agriculture Officer Dr Samuel Lalliansanga hovin Agriculture & Farmers Welfare Department hnuaia thawktute leh Patanjali Company aiawhte chuan hun an hmanpui a. ATMA Lunglei District Deputy Project Director Pu John Laltluangliana chuan endik tura soil sample lak dan te, lei hrisel dan leh lei thrat dan chungchanga hriat tur pawimawh hrang hrang a zirtir a. Patanjali Company Mizoram State Head Pu Timothy Laldailova chuan oil palm chin dan a zirtir bawk.

He hunah hian Tlabung Block huam chhunga kut hna thawktu mi 60 an tel a. Tlabung Block-a oil palm-a hma lakna report ngaihthlak niin, hma lak zui zel dan turte sawi ho a ni bawk.

Lunglei DAO Dr Samuel Laliansanga chuan Tlabung Block chhunga buh hmun leilet (Wet Rice Cultivation – WRC) pawimawhte a tlawh nghal a. Mizoram hmun danga chin ve loh thlasik buh (rabi rice) chinna hmunte tlawhin, hma lak zel dan tur en ho a ni a. Tlabungah vek hian Jute Corporation of India leh Tlabung MPACS te nen thawk hova Jute ching tura hma lak dan tur leh ruahmanna kalpui dan tur te sawi ho a ni bawk.

======

2nd Mizo Battalion NCC chuan April ni 6, 2026 atang khan 2nd Mizoram Armed Police Complex, Luangmual, Lunglei ah NCC cadet-te tan April ni 15, 2026 thleng awh tur, Combined Annual Training Camp (CATC-56) an buatsaih.

CATC-56-ah hian, Junior Division (JD), Junior Wing (JW), Senior Division (SD) leh Senior Wing (SW) cadet 241 tel in, a zatve dawn lai chu hmeichhia anni a. Camp Commandant, Colonel Sagar K. Mohanty chuan cadet-te fuihna thu sawiin camp hi ahawng a. 23 Assam Rifles Officiating Commanding Officer, Lt Col. Sahibjit- Singh chuan cadet-te hma ah sipai (Armed Force)-a luh dan kawng hrang hrang asawi a. NCC cadet lo ni tawh thin, Lunglei DIPRO Pu C. Lalhruaitluanga chuan media pawimawhna leh media hman dan tha bakah, internet kaltlanga pawi khawihna (cyber crime) laka himna chungchang azirtir bawk.

CATC-56 hi May thla a Lungleia buatsaih tur, NCC Grand- Fest & Para-sailing- Camp atana inpuahchahna atan hman nghal ani a. Camp buatsaih chhung, ni sawm chhung hian NCC cadet-te chuan sipai lam (drill), silai leh ralthuam chelek, ram lem (map) en dan, ramhnuaia chet tlat dan, infiam leh taksa sawizawi, hruaitu tha ni tura thil pawimawh leh, khua leh tuite mawhphurhna hrang hrang an zir dawn a. Mithiam sawm bik te'n thupui hrang hrang – POCSO Act, kangmei laka himna leh chhiatna thlen thulh a chet lak dan, vaihlo leh ruihhlo that lohzia leh thupui pawimawh tak tak hmangin cadet-te an zirtir thin bakah, hnam ziarang phochhuahna hun te buatsaih ani bawk ang.

=========

Congress thalai chuan Minister Dr. Vanlalthlana- chan Education department hnuai ah dan kalh in, induhsak uchuak takin, cheng nuai sang 5 chuang man, hna inpek a awm niin an sawi a, vawiin chhun khan Congress Bhavan kawt ah Work- Order Copy an hal.

Congress thalaite chu vawiin chhun khan Congress Bhavan kawt ah pungkhawm in, Congress Thalai Hqrs Vice President Tv.R.Lalhmingmawia'n akaihruai a, dan dik lo leh induhsak uchuak taka contract inpek ni-a an sawi, Work Order Copy, Congress Thalai Vice President, Pu Lalsanglura Sailo chuan ahal a ni.

Hemi chungchang thuchhuah an siam ah Congress thalai chuan Education Minister Dr. Vanlalthlana hian Education Dept hnuaia Samagra hnuai ah Tender nilo, Restricted pawh ni pha lo, Departmental works in, a duhsak zawngte leh ZPM worker te hna ape nasa em em niin an sawi a, Samagra- Financial- Rules in, cheng nuai 25 chunglam chu Open Tender a, hna pek tur tih asawi chian em em laiin, Firm pakhat Ti-Li, ZPM hruaitu pawimawh tak, laina hnai hnai tak ta chu, tender chhuahlo, Departmental works pawh nilovin cheng Nuai 59- man, hna ape tawp nia sawiin, Ti-Li Firm leh Samagra- agreement-ah, Education Minister hian, hming a signed ve kuau tih te, eng department-ah mah hian, contractor te, work order emaw, Contractor leh Department te Agreement ah, anmahni, duhsak a, hna petu Minister in, an signed ngai lo an  ti

=======

MNF Thalai Hqrs chuan Project 41 sakna tur, SASCI sum sanction tawh, za zela 34 chu a lapse niin an tarlang.

Projects 41 te, Rs. nuai sing 3, sang 2,800 a, sak zawh turin, SASCI sum sanction ani a. Chu sanction chu Mizoram sorkar pawhin Administrative Approval, a vaiin (Rs nuai sing 3, sang 2,800 chu) ape a, contractor-te pawh ruat tawhin thawk tawhte pawh an awm tih MNYF chuan an tarlang. 

heng projects 41-a, sum sanction 34% chu kumin 31.03.2026 khan a LAPSED ta vek a. He sum Lapse te hi akum leh a, hman/hmuhlet theih turin “spill over” ani lo tih SASCI guidelines 2026-27 ah achiang ta bawk. Sum lapse avang hian projects 41-in, a tuar mek a, chu mai ani lo. GST-a, sum hmuh tur Rs nuai 2007.36  leh Labour cell, Rs nuai 111.52 pawh abo hlen tel hmak ani tiin, ZPM hi VOTE nawn leh chi anni lo an ti

========

Mizo Zirlai Pawl chuan Mizoram-a, Inner Line Permit (ILP) hman dan kalphung chu tun aia khauh zawk leh changkang zawka kalpui anih theih nan hmalak an tum.

MZP rorelna sang ber dawttu Federal Council vawi 60-na chu nimin khan  RANSAM CK RESORT, Thuampui Vengthar-ah neih ani a, hmalakna tur hrang hrang an rel a, Mizoram-a ILP hman dan kalphung ti danglam turin hmalak an rel a, hei bakah hian zirtirtu- indaihlohna rualkhai zawka sem-rual anih theih nana sorkar nawr te, Mizoram State University din turah dik leh felfai taka hna-lak anih theih nana hmalak te, zirna In hrang hrangah Zounun Zemawi inzirtirna kalpui anih theih nan hmalak te an rel a, Mizoram University-in, MZU Sports abuatsaih thin-ah hian tun aia Budget, atam theihna turin, MZP in hma la rawh se tihte, Common University Entrance Test, UG/ PG Exam Center tam zawk Mizoram-a a awm theih nan hmalak ni rawh se tih leh Mizoram College zawng zawngte'n Principal nghet kan neih theih nan atul angin Sawrkar-in hma la rawh se tihte an rel bawk.

Federal Council-ah hian palai 115 an kal a, Vice President Pu Sanghmingthanga chuan Council hi a kaihruai a, House Leader, MZP President Dr. C. Lalremruata chuan thu sawiin, tunhnaiah Mizoram-ah hnamdang (Vai) phalna neiloa lokal an tam thu sawiin Mizo hnam inhungbikna ILP venhim chu mitin mawhphurhna anih thute, tlang hrang hranga MZP hruaitute pawh ILP, hmang tangkai tur leh check ngun lehzual turin asawm.

Rorel zawh hnu hian, Leadership Training neih nghal a ni a, Pu Peter Lalzawmliana, Adviser MZP-GHQ chu Resource Person a ni.

=======

Ni 10 thanga NASA-in Thla hel tura vansang boruak lawng a tirh chhuah Artemis II chuan US eastern time zirtawpni zan dar 8:07, India ram huna tukin dar 5:37 khan lei a rawn thleng leh ta.

Artemis II hi pacific ocean ah rawn tumin recovery team ten an lo la a, Nasa leh Navy recovery team ten an lo chhar vat a, US sipai lawng hmangin an hriselna endik tura hruai an ni. 

Artemis-II ah hian astronauts 4 te - Commander Reid Wiseman, Pilot Victor Glover, Mission Specialists Christina Koch leh Jeremy Hansen te chuangin April ni 1 khan khawvela atanga Kilometre nuai 4, sang 6 leh 778 a hlaah an zin a, Thla thlawh khumin an hel a, an misson zawh fel hnuin Orien Spacecraft hmangin lei tuamtu boruakah speed chak mangkhengin an rawn tum lut a ni.

He mission ah hian astronaut te hian thla thlawh khumin lei atanga thla lang lo lamah an hel a, thla pang hla lam thla leh khawvel thla te an la a, experiments hrang hrang neiin thla leilunga mihring an tum leh dan tur an zir chiangin an thlithlai a ni.

======