NEWS LANGSAR ZUAL LAWRKHAWM
Two wheeler Silencer JCB hmangin an sawh per.
Lunglei District Superintendent of Police (SP) Pu J. Lalmuankima hma laknaa Traffic Police te'n Lunglei khawpui chhunga two wheeler (lirthei ke hnih nei) silencer/exhaust (meikhu chhuahna) 80 decibel pel leh ri ring tura siam danglam an man khawm chu nimin khan dan ang thlapin Chief Judicial Magistrate, Lunglei District, Lunglei hriatpuinain Lunglei Pukpui Ṭawngṭaina Hmunah tihchhiat a ni.
Tlabung Sub-Divisional Police Officer (SDPO) Pu Alex Hmingthanmawia kaihhruaina hnuaiah silencer man khawm sate hi tihchhiat a ni a. Tun thleng hian Lunglei Traffic Police te'n two wheeler silencer/exhaust ri bengchheng an man khawm hi dan ang thlapin ṭum li tihchhiat a ni tawh.Lunglei SP Pu J. Lalmuankima chuan ṭhalai ṭhenkhatin an two wheeler-ah danin a phal baka silencer/exhaust ri bengchheng an hman ṭhin avangin zan reiah mipui an timuhil thei lo va, mihring hriselna thlengin a nghawng theih thu a sawi a. Traffic Police te'n chak zawka hma an lak chhunzawm zel tur thu a sawi.
Tun ṭuma two wheeler silencer/exhaust tihchhiatte hi a vaiin kilogram 45-a rit a ni a. Kilogram 1-ah ₹10 hisapin thirchhia anga hralh niin, a hralhna aṭang hian ₹450 hmuh chhuah a ni a. A hralhna sum hi sawrkar revenue-ah chhun luh tur a ni.
============
Nimin ni 16 June, 2026 khan ZPM Southern Hrqs Lunglei Co-Ordination Committee chuan chhim lam tana thil pawimawh zual bik thu pawimawh tak tak te an rel.
1. Lunglei Bypass road hun rei tak buaipui lo ni tawh chu chak zawka a hlawhtlin theihna turin Chief Minister hnenah thlen nise tih a ni.
2. Shopping Mall : Lunglei in Shopping Mall mamawhna a lo san ve tak avangin shopping mall hi neih a nih theih nan sorkar hotute hnenah thlen nise tih a ni.
3. District Court hmun hma chin fel theih loha awm reng thin a hlawhtlinna tura sorkarin hma a lak mekna chu a tha hle in hriat a ni a, District court pawh a hma theih ang berah a awm theih nan hmalak nise tih te a ni.
Meeting hi Pu Lalduhawma, President ZPM Southern Headquarters, Lunglei in a kaihruia a ni.
Meeting ah hian Committee member te:
1. Pu Lalduhawma, President ZPM Southern Headquarters, Lunglei
2. Pu V. Malsawmtluanga, MLA Lunglei North A/C ( HPC Vice-Chairman)
3. Pu Lalramliana Papuia, MLA Lunglei South A/C ( Treasurer ZPM Southern Hrqs.)
4. Pu T. Lalhlimpuia MLA Lunglei West A/C
5. Pu C. Fakzuala, Vice President ZPM Southern Hrqs.
6. Pu F. Thandanga, Vice President ZPM Southern Hrqs.
7. Pu Lalzuithanga, Chairman LMC
8. Pu K. Lalrinawma, Vice-Chairman LMC ( Secretary ZPM Southern Hrqs.)
9. Pu Zorinsanga Hmar, Executive Councillor LMC
10. Pi Lalhruaitluangi Sailo, Executive Councillor LMC te an tel a ni.
================
Pu Mapuia Chongthu, Lunglei hnenah Janjatiya Garima Utsav Award, "Tribal Unsung Heroes Award" hlan a ni.
Mizoram sawrkara Art & Culture (A&C) Department hnuaia Tribal Research Institute huaihawta Award hlanna hun buatsaih hi Lunglei District Art & Culture Office-a Senior Research Officer Pu Lalmuanpuia chuan kaihruaiin, Award awmzia leh Pu Mapuia Chongthu hnena Award hlan chhan a sawi fiah a. Award hi Ministry of Tribal Affairs ai awhin Pu Mapuia Chongthu kutah a hlan nghal bawk.
He Award hi India sawrkar Ministry of Tribal Affairs buatsaih Janjatiya Garima Utsav (Tribal Pride Festival) 2026 puala hlan a ni a. He Kut hun chhung hian ram chhung hmun hrang hrangah programme hrang hrang buatsaih niin, hnam tlem zawkte zinga mahni hnam leh ram tana hna thawk ṭhate chawimawi an ni.
Pu Mapuia Chongthu pawh hi lemchan (film) siam lama a hna thawh ropui tak avangin he chawimawina hi hlan a ni a. He Award hian Trophy/Memento leh pawisa fai ₹10,000/- a keng tel.
========
'Project Thai-chhawn-i-nu' tia hming vuah Hmeichhe naupang hmakhua ngaihtuahna, Mizoram puma kalpui tur chu Social Welfare Minister Pi Lalrinpuii'n nimin khan a hawng a, hmeichhe naupangte chu Bank Account hawn sak an ni dawn.
Hawnna inkhawm Booth Mansion Conference Hall, Salvation Army, Territorial Headquarter, Aizawl-a neih ah Minister Pi Lalrinpuii chuan thu sawiin, fanute chu ram leh hnam innghahna annih thute, an hmakhua chu Mizoram hmakhua anih avangin chumi ngaihtuah chu, Nu leh Pate mawhphurhna pawimawh ber pakhat anih thu asawi a, Nu leh pa, pi leh pu bakah naupiang thar nei zawng zawng chu, kum 10 la tling lo hmeichhe naupangte tan, SSY account hawnsak theuh tura chah in, chumi kawngah chuan Kohhran, Tlawmngaipawl, Anganwadi Worker, ASHA, Zirtirtute leh Postal Department-a thawkte chu tanrualpui ah Minister chuan asawm nghal bawk.
He project hi BBBP flagship hnuaiah Mizoram Postal Division leh Women & Child Development Department tangkawp hmalakna ani a, Mizoram District 11 chhunga RD Block 27, ICDS huamchhung khaw hrang hrangah te kalpui tura ruahman ani a. Project hnuaiah hian hmeichhe naupangte chu Post Office leh State Bank of India kaltlangin account hawnsak theih anni ang a.
Anganwadi Worker leh Postal Department a thawkte chuan, khaw tin ah awareness leh account hawn runpui hi an nei dawn a. Ruahman ang chuan Thla 10 chhungin kum 10 hnuai lam, hmeichhe naupang 4,050 ziah luh hman tum ani. Tunah hian Mizoram-ah hmeichhe naupang 18,560-in, SSY account hi an nei tawh a, kum 10 hnuailam projected population, nuai 1 leh sing 5 chuang atanga chhut chuan, tan lak ala ngai hle
Project tlangzarh inkhawm hi Pi Lalzarmawii, Commissioner & Secretary, SW, WC&D chuan akaihruai a. KI. Singh, Superintendent of Post, Mizoram Division-in, Project Thai-chhawn-i-nu chungchang asawizau ani.
===========
Tlabung Turmeric Farmer Producer Company Ltd., Zodin, Tlabung te chuan an aieng tharchhuah cheng nuai 26.6 man hu an hralh.
Nimin khan Department of Agriculture & Farmers’ Welfare in Mission Organic Mizoram kaltlanga hma a lakna - Mission Organic Value Chain Development for North Eastern Region (MOVCD-NER) hnuaia Mizorama Farmer Producer Company din - Tlabung Turmeric Farmer Producer Company Ltd., Zodin, Tlabung te chuan an aieng tharchhuah cheng nuai 26.6 man hu an hralh a. Dr. KC Lalmalsawmzauva, Adviser To Chief Minister chuan Ch. Saprawnga Truck Terminal, Rangvamual, Aizawl aṭangin a vailiam.
He programme-ah hian Pu KC Lalmalsawmzauva chuan thusawiin Organic Aieng ro, Mission Organic Mizoram (MOM) te hmalakna chu lawmawm a ti a. Sawrkarin thlai thlan bik market an buaipuina kawnga thil pawimawh ber pakhat chu Chemical tel lo - Organic a nih thu sawiin, Mizoram chu Organic State a siam tumin hma lak mek a nih thu a sawi.
Khuallian chuan Khawvel changkang zelah mihringte kan duhtuiin, eitura damdawi leh chemical telh chu a hnawng chho zel a. India sawrkar pawhin hei hi ngaipawimawhin, chemical tel lo National Mission on Natural Farming atan cheng vaibelchhe 750/- lai buget-ah a dah thu sawiin, Mizoram-ah pawh khaw engemaw zatah kalpui turin Agriculture Department ten hma an la mek a ni, a ti.
Khuallian chuan India ram hmun dangte khaikhinin Mizoram chu chemical hman tlemna ram a ni a, hei hi advantage-ah lain state dang te aia market-a Mizoramin hming a chherna tur hun rangkachak a ni tih a sawi a. Tlaichingtute zingah Chemical lo hmang thin an awm a nih pawhin bansan a, Organic farming lama kal turin a sawm a ni.
MOVCDNER Phase IV hnuaia Tlabung Turmeric Farmer Producer Company Ltd., Lunglei District chuan aieng tharchhuah cheng nuai 26.6 man chu Assam lama buyer hnenah an thawnchhuak a. Tlabung FPC hian Dried Turmeric Finger, metric tonne 25 chu kg ah cheng ₹106.4/- zela hralhin, cheng nuai ₹26.6 zet an hmuchhuak a ni. Tlabung Turmeric FPC Ltd. hnuaiah hian organic aieng chingtu intelkhawm member 500 an awm mek.
MOVCD- NER hi State Lead Agency Mission Organic Mizoram, Department of Agriculture & Farmers’ Welfare te hmalakna niin, tun dinhmunah hian Phase III zawhfel tawh a ni a, Phase IV kalpui leh mek niin, tun thleng hian organic FPC 41 ziah luh tawh an ni a, heng FPC 41 hnuaiah hian organic farmer 27,604 ziahluh an lo ni tawh bawk.
He programme hi Pi Vanramthangi, Director, Agriculture & Farmers Welfare Dept. & Mission Director, MOM chuan kaihruaiin, MOM State Coordinator Pi Baby Lalremkimi chuan technical report a pe a. He programme-ah hian Pi R. Lalramhluni, Jt. Director, Agriculture & Farmers Welfare Dept. te, Pu Lalengliana, Jt. Director, Agriculture & Farmers Welfare Dept.te, Pu Lalhmingmuana, Managing Director, MAMB te, Pu Ngurrinsanga Sailo, Jt. Director, Agriculture & Farmers Welfare Dept. te, Pu Dr. David Fangzauva, Dy. Managing Director, MAMB leh MOVCDNER enkawltu MOM aṭangin State Coordinator Pi Baby Lalremkimi bakah MOM Staff te leh MOM hnuaia Tlabung Turmeric FPC Ltd. CEO Barnabas Hembrom leh Service Provider Yahsowati Bio Multi-tech Unit - II te an tel bawk a ni.
============
Mi Ina Awmpui Hnathawktute Ni hmang.
Nimin khan Centre for Development Initiatives, Aizawl te chuan Khawvel puma Awmpui Hnathawktute Ni, International Domestic Workers Day 2026 lawmna hun an hmang a, Aizawl veng hrang hrang atangin Domestic worker te an kalkhawm.
He hunah hian Pi Alex Zorammawii Khiangte, Labour Employment Skill Development & Entrepreneurship Officer, LESDE in Resource Person niin hun a hmanpui.
Pi Amawii chuan Awmpui hnathawktute chu International Domestic Workers Day chibai bukin, anmahni avanga chhungkaw tam tak hi hnathawka chhuak thei an nih avangin an hlu a, vawiin pawh hi an hlutna leh an pawimawhna puanchhuahna ni a ni a, an dikna te, an chanvo te humhimna turin sawrkar pawhin tunah hian theihtawp a chhuah mek tih a sawi a ni.
He hunah hian Sister Ruth Zonunthari, Director FIWDC pawhin hun a hmanpui a, hemi bakah hian zaithiam.hrang hrang, Puia, Rebecca Lallawmsangi & Lil Kiki leh Sawmtea Chhangte ten hun an hmanpui bawk a ni.
==============
Directorate of Economics & Statistics Mizoramin a chhinchhiah danin June ni 12-15, 2026 chhung report lutah Mizoramah naupiang mipa 89 leh hmeichhia 70 an awm a, naupiang zawng zawng hi 159 an ni. Hemi hun chhung hian mitthi mipa 31 leh hmeichhia 11 awmin mitthi zawng zawng hi 42 an ni.
Comments
Post a Comment