NEWS LANGSAR ZUAL

Nimin khan YMA Sub headquarters Lunglei chuan YMA Day vawi 91-na pualin Home thenkhat, TNT, Rescue Centre, Bethel Center, Beiseina In ah te tanpuina pawisa fai an hlan.

Thil pek inhlanna hun hi YMA Sub Headquarters Lunglei Office ah hman a ni a, Pu Zothanzuala Hnamte Vice President in a kaihruai. Pu K. Lalfakzuala President YMA Sub Headquarters Lunglei chuan thusawiin, ‘Kum dang YMA Day a kan lo tih thin tawh angin kuminah pawh Home hrang hrangah tanpuina kan hlan thin chu a hlan leh a, YMA Sub Hqrs chuan tanpuina sum hi tam tham tak hlan che u hi kan duh a, kan tlin tawk YMA Day vawi 91-na pualin kan hlan che u a ni a ti. Home hrang hrangte YMA Sub Headquarters Lunglei chuan a hrereng che u a, harsatna in nei anih chuan YMA hruaitu te phungbawmah sawm inthlahrung lo turin ka chah duh che u a ni a ti a, YMA in Kumpuan ‘Ruihhlo Do’ kan hmalaknaah theihtawp chhuah a min tanpui turin ka ngen bawk a che u a ni a ti.

Nimin vek khan YMA Sub Headquarters Lunglei chuan mi tlawmngai Pu Zoramchhana Ramthar Veng Lunglei chu a tlawmngaihna te hriatpuiin thingpui an inpui a, a tlawmngaihna avang hian Thangchhuahpuan leh thuziak an hlan a ni. 

He hun hi Pu Zothanzuala Hnamte Vice President in a kaihruaia a, Pu K Lalfakzuala President YMA Sub Headquarters Lunglei chuan thusawiin, ‘Vawiin a kan hun hman hi YMA Sub Headquarters Lunglei inkaihhruainaah pawh awmlo, tlawmngaihna in a hrinchhuah avanga hun hmang kan ni, Pu Zoramchhana tlawmngaihna hian YMA Member-te ah rahtha chhuah ngei se, a tlawmngaihna hi midang tepawh in kan entawn atan ka duh hle a ni, a ti.

He hun ah hian YMA Ramthar Branch President leh Secretary ten Pu Zoramchhana hi an tawiawm a. Pu Zoramchhana thingpui inpui a nih chhan chu Ni 19.05.2026 (Thawhlehni) a Bike a Siaha atanga Aizawl pan, Hmuifang daia che sual te, tlawmngai taka buaipui a, Kham atanga paw chhuak a, ZMC&H thlenga Sumo Service-a kalpui a, Accident tawktu Bike chhia zawng zawng siamsak a, tlawmngai taka buaipui tu a ni.

===========

Congress Party chuan Rorelna dik leh tha din leh, mipui ten thuneihna leh mawhphurhna tam zawk an neih theihna tur te, kan in hmakhawsuih mek ani, MPCC Senior Vice President Pu Lalnunmawia Chuaungo chuan ati.

Nimin zirtawpni a MPCC Political Session, Congress Bhawan-a neih ah thu sawiin Pu Lalnunmawia Chuaungo chuan  “Keini Congress Party-te hian ZPM sorkar that loh avang ngawtin, mipui te hnen ah, kan kuta sorkarna hlan tura >>ngen tur kanni lo. Congress Party chuan Rorelna dik leh tha din, Education Reforms, Health Sector Reforms, NLUP Changtlung zawk, Administrative- Reforms hrang hrang hnuaiah mipui ten thuneihna leh mawhphurhna tam zawk an neih theihna tur te kan in hmakhawsuih mek a ni, a ti.

India- rama State pakhat kan nih ve na zar, kan zo nasa hle a, hmasawnna hnathawhna tur pawh sum thahnem tak kumtin kan dawng a. Kum 2026-27 atana kan budget estimates Rs vaibelchhe sing 1,7496.91 hi, kum sawm kalta kum 2016-17 a kan budget estimates Rs vaibelchhe 8038.39 aiin, vaibelchhe 9,458 chuang in, a sang zawk a. Kum 2026-27 a kan budget ah hian kan State in, chhiah leh adang atanga kan thawhchhuah ve tur chu Rs vaibelchhe 2759.75 niin kan budget atanga 16% tling lo hret ani. A dang zawng hi chu Central sorkar chhiah tlingkhawm atanga Finance Commission-in kan chan ve tura aruat leh Central sawrkar atanga tanpuina leh Centrally Sponsored Scheme atang te a kan dawn tur te ani. Mipui sum heti zozai kan dawnte hi ahmanna tur hmun ah kan hmang em? tih leh ahman dan tur dik takin kan hmang em? tih hi mipui ten rorelna fawng chelhtu te kan zawt a ni, a ti.

MPCC Political Session hi Pu  K. Lalthanzama, Secretary, MPCC chuan akaihruai a, Er. >Sanghrima Secy. MPCC leh Pu Lalrawngbawla, EM, Sinlung Hills Council ten report an pe.

=========

MNF General Secretary Pu Lalremruata Chhangte chuan, tunhnai kum 1 leh achanve chhunga Mizoram Public Service Commission (MPSC) in, hna-lak abuatsaih ah thil dik tawk lo athleng tam hle tih sawiin thil fello te chhuichhuak a, mawhphurtu- chunga action la turin sorkar an phut tih asawi.

Nimin zirtawp ni  a MNF party in Mizo Hnam Run-a Political Session an neih ah thu sawiin Pu Lalremruata Chhangte chuan, MPSC chhawk zangkhaina tura rintlak, MNF sorkar khan, Group 'B’ (Non- Gazetted) leh ahnuai lam hna-lak leh promotion/ departmental exam hrang hrang buaipui turin, Mizoram Sub-Ordinate Service Selection Board (MSSSB) February ni 28, 2020 khan adin a, MPSC tih tur thahnem tak tiin, a pui nasa hle; MSSSB hna- lak kalphung kha sawisel tur avang a, hna dil thin, Mizo thalaite pawhin an fak a. “ZPM hian an >sorkar tukah Mizo thalai hna- zawng mekte tana din, MSSSB athiah nghal avangin MPSC kutah hna-lak kaihhnawih engkim, a awm leh nghal vek a, MPSC tichangtlung tura Chief Minister Pu Lalduhoma- intiamna ah, engemawchen hmalakna awm mahse; tunlaia MPSC hnalak dan dinhmun thlir in, hmasawnna atam lemlo hle a, February 2, 2026 a, MCS Combined Exam (2025) result chhuak-ah, tling tawh pakhat chu hnawl leh ani a;  May 13, 2026 a Junior Grade (MES) Combined Exam (2025) result tih chhuah ah, Electrical & Electronics Engineering- Wing-ah, MES pasarih lak turah pariat tih tlin niin, pakhat an paih tla leh bawk a, hei hi top officer tura, hna lakna anih avangin, thil diklo lian tham tak ani,” ati.

Thil fel tawk lo langsar tak tak, tunhma a la thleng ngai lo, exam buatsaih ah athleng zut reng a, a chhan hriatchhuah vat ahun tawh a; hrem ngai an awm anih pawhin mawhphurtu- chungah, dan anga action la turin Mizoram sorkar ka phut takzet ani” ati.

============

BJP Mizoram state President Dr K Beichhua chuan Mizoramin Central atanga ram hmasawnna tura sum a dawn chu a bei tham rih hle tih sawiin, Mizoramah hian BJP sorkar a piang lo emaw state sorkarin an thawhpui lo a nih chuan mipuiin an tuar zel dawn tih a sawi.

He thu hi nimin an party office-a Friday Political Session hun an hmannaah a sawi a, Dr K Beichhua chuan ramin hma a sawn nan Mizoramah BJP in sorkarna an siam a tul thute, tun dinhmunah chuan central atanga state in sum a dawn chu a beitham hle a, BJP sorkar piang ta se chuan malsawmna tam tak an dawn tur thu a sawi a, BJP kan thawhpui loh emaw kan Sorkar tir lo a nih chuan a tuartu tur chu mipui an ni, a ti a; chuvangin mitinin an chanvo tur theuh an chana, an hmuh theih nan BJP, Development thupuia neitu leh a taka thawk thin party chu Mizoramah sorkar tir emaw thawhpui a ngaih thu a sawi.

Inkhawm hi BJP State thalai President Pu Robinson Malsawmtluanga Hmar chuan a kaihruai a, State Secretary Pu K. Sanghluna leh party hruaitu dang ten thu an sawi bawk a ni.

=============

Nimin khan PC Party hruaitute Party Office-ah tunhnai politics boruak leh dinhmun hrang hrangte bakah party-in hma a lak tum dan te thlir ho in an thukhawm.

 He hunah hian kan hma lawk a Furpui lo thleng chho mai tur thlir in, PC Party chuan mipui himna ngai pawimawhin Mizoram sawrkar, Municipal thuneitute leh Local/Village Council hruaitute, inbuatsaih lawkna tha tak nei turin an ngen a. Mizoram ah kumtin hmun hrang hrang ah leimin, lei tawlh, lung tla leh a kaihhnawih dang chhiatna hrang hrang kan tawh thin te hi, helam tinzawn dân leh hrai tha tak tak kan neih te a nih ang tura kenkawh a nih tâwk loh thin vang ni ah an ngai a. Abikin khawpui ber leh mihring bitna Aizawl leh a chhehvel huamchhûng enkawltu AMC-in leilung kaihhnawih dân leh hrai a neih te khauh tak a kengkawh tawh turin thuneitute an ngen a. Mipui te'n an bengkhawn theih ngeina tura inhrilhhriatna leh inzirtirna te a tam thei ang ber kalpui turin an sorkar an ngen nghal tih an sawi bawk.

============

Nimin khan Aizawl, Lunglei, Kolasib leh Serchhip ah te Local Council / Village Council seat ruak hnawhkhah nana By Election neih tur atana hman tur Draft Electoral roll te tar chhuah a ni.

Aizawl District huam chhunga Local Councils 7 (pasarih) - Durtlang, Zotlang, Luangmual, Dawrpui Vengthar, Bungkawn, Republic leh Salem Veng-ah te Local Council Seat 1 (pakhat) theuh a ruak a, 

Heng Local Councils seat ruak hnawhkhah nan hian Bye-Election neih tur a ni a, chumi atana draft roll chu nnimin khan Pu Vanlalrova, Addl.DC chuan  a tlangzarh a ni. Local Councils Bye-Election Electoral Rolls Summary Revision, 2026 a electoral roll a lut thei kum tling chin te tehfungah 01.01.2026 hman tur a ni. Local Councils Bye-Election Draft Electoral Rolls atan hian Aizawl Municipal Corporation, 2026 inthlanna neih zawh tak a AMC Electoral Rolls chu hman a ni. Draft Local Council Electoral Rolls-a Elector awmzat chu Durtlangah 3673, Zotlangah 2515, Luangmualah 3710, Dawrpui vengtharah 1699, Bungkawnah 3544, Republic ah 3199, Salen vengah 4168 te an ni.

Lunglei District-ah Zotlang Local Council (LC) leh Bunghmun Village Council (VC) te chu an member boral an awm avangin by-election buatsaih tur a ni a. Chumi atan chuan nimin khan Lunglei DC Conference Hall-ah Deputy District Election Officer, Additional Deputy Commissioner Pi Zoramdini chuan draft electoral roll a tlangzarh.  June 12 aṭanga June 24, 2026 thlengin electoral roll-a thun leh paih an dil thei ang a. Final electoral roll hi July 7, 2026-ah tihchhuah tur a ni.

Nimin chawhma khan DC Conference Hall, Kolasib-ah Bilkhawthlir South Village Council Bye-Election, general seat pakhat inthlanna neih tur atana Draft VC Roll Kolasib Election Officer Pu Chinlianmanga'n a tlangzarh a. Siam that ngai leh endik ngaite tihfel a nih hnu, July ni 7, 2026-ah Final VC Electoral Roll hi tlangzarh tura ruahman a ni. Draft roll ah hian Bilkhawthlir South-ah hian mipa voter 998 leh hmeichhe voter 1049 awmin, an vaiin voter 2047 an awm.

Nimin khan Serchhip District Election Officer Pu Paul L. Khuma chuan DC Meeting Hall-ah E. Lungdar Village Council Draft Roll a tlangzarh. Draft roll ah hian Voters 2321 an awm a ni. January ni 1, 2026 a kum 18 tling tan VC Roll-ah a inziah luh theih dawn a. Sawisel leh siam that ngaite tan ni 12.6.2026 atanga ni 24.6.2026 chhung hun hawn a ni anga.  July ni 7, 2026 ah Final Roll hi tarchhuah a ni ang. East Lungdar Village Council ah hian member pasarih (7) ni turah Paruk (6) an awm mek a ni.

===========

Mizo Upa Pawl (MUP) Chanmari Unit, Lunglei chuan nimin khan MUP Office, YMA Chanmari Hall-ah an kum sawmnga tlin, Golden Jubilee lawmna hun an hmang a. Lunglei Municipal Council (LMC) Vice Chairman Pu K. Lalrinawma chuan Khuallian niin a hmanpui.

Pu K. Lalrinawma chuan MUP Chanmari Unit te'n Golden Jubilee an thleng chu a lawmpui thu a sawi a. MUP chu thil hlu leh thil vang dah khawmna, 'Museum' ang an nih thu leh ṭhalai la naupang zawkte'n an neih ve loh thil hlu tam tak MUP member-te chuan an neih thu sawiin, upate chu zir thiamna hmang ringawta thiam theih loh, tawn hriat finna ngai thil hrang hrang – Mizo ṭawng humhalh leh zirtir chungchangah te, hnam ziarang leh nunphung vawn nun kawngah te, ṭhangtharte'n upa zah dan inzirtir kawngah te leh Mizo tlawmngaihna inzirtir kawngah te an pawimawh thu a sawi a, upate tawn hriat chu chhungkua ah leh khawtlangah ahlu in, vawn nun zel atul thu a sawi.

Khuallian hian Jubilee puala thilpek atan Golden Jubilee lawmnaa kal kum 85 chinte chu sihdet (torch light) ṭha tak pein, MUP Chanmari Unit tan Carrom Board ṭha tak a pe bawk.

MUP Chanmari Unit Golden Jubilee lawmna hun hi Vice President Pu Lalthangluia Sailo chuan kaihruaiin,Chanmari Local Council Chairman Pu C. Ralliana chuan Souvenir tlangzarhin, LC Vice Chairman Pu Raymond Zonunsanga chuan Chanmari Local Council ai awhin Jubilee lawmpuina thuziak leh pawisa fai a hlan bawk.

==============

Isua Krista Kohhran Thalaiten nimin khan thisen pek runpui an nei.

Isua Krista Kohhran  General Headquarters Upper Republic hnuai a mi te chuan a mamawh tu te hman a tan Aizawl Civil Hospital ah Thisen a thlawn in an pe a. Kum dang ah pawh he Thisen Pek Rúnpui  hi an lo kal pui tawh thin a, Nimin khan Aizawl Bial Chhung a Thisen pek an huaihawt a, thisen pe turte hian Blood Bank hmun ah kal chilh in Thisen Unit 30 an pe thei a, Thisen pe tam ber branch hnen ah Lawmman an pe bawk.

==========

US nena indona tihtawpna tura inremna chu ahnai tawh a, Strait of Hormuz hawn lehna pawh, a tel tih Iran Foreign Minister chuan a sawi.

Seyed Abbas- Araghchi chuan state TV hnen ah, inremna ah hian Iran laka US lawng >dan, hlihna pawh atel a, mahse Iran nuclear programme chungchang sawihona chu nakinah tan ani dawn a ti.

US official te chuan inremna thenkhat chu an pawm a, Iran tana sum leh pai hlawkna chu Tehran-in atih tur atih hlawhtlin leh tih hlawhtlin lohah a innghat dawn tih an sawi.

Indona hi February 28 khan US leh Israel-in Iran ram pumah beihpui an thlak atangin a in tan a. Chumi chhan let nan Iran chuan Israel leh Gulf-a US thian ramte abei a, khawvela oil leh liquefied natural gas phurhna kawng pawimawh ber Strait of Hormuz chu akhar nghal bawk.

April thla khan inkahhai an remti tawh chung pawhin, US leh Iran te an inkap tawn zeuh zeuh a. US President Donald Trump chuan Ningani khan Iran laka beihpui thlak leh tura ruahmanna an neih chu a thulh thu asawi a, a chhan chu inbiakna ah palai ten inremna ropui tak an neih theih tawh vang ani a ti - inremna chu rei lo teah ziah ani mai thei tih a sawi bawk. Pakistani Prime Minister Shehbaz Sharif, he inremna buaipuitu pawhin, US leh Iran inkara Memorandum of Understanding (MOU) chu tihfel chauh ahmabak tawh a ti.

=============