Niminah Mizoram chhimlamah chhiatna thleng a tam.
SK Truck leh Scooty insuah Scooty khalhtu a boral .
Nimin khan Kawlchaw East leh Siaha inkar Amobyu bula SK Truck leh Scooty insuah Scooty khalhtu a boral a, scooty a chuangin hliam na tak a tuar bawk.
NImin chawhma dar 11:30 leh chhun dar 12:00 inkar vel khan Kawlchaw East atanga Siaha lam pan SK Truck MZ03A 1843 leh Kawlchaw lam pan Scooty MZ03A 1290 te chu Amobyu (Zero point) bulah an insu a, Scooty khalhtu L. Beihmolai H/o K. Chhanzapawngia, Kawlchaw East chu a hmunah a thi a, scooty a chuang Tv. Lalfakchhunga (25) Amobyu kua pawhin hliam na tak a tuar a, Siaha District Hospital ICU ah enkawl mek a ni.
Thu laknain a tarlan danin SK Truck hian Scooty hi a sutna atanga hnawlin a scooty leh a khalhtu hi kawng chhakah a nawr bet a, a hmunah scooty khalhtu hi a thi nghal a, chetsualna thlen atanga darkar khat velah police te thlengin motor hi pawt sawnin ruang hi an la chhuak a ni. Truck khalhtu hi Kawlchaw East Police ten an la nghal a, chetsualna hmuna awmte chuan driver hi a rui a nih an ring a ni.
======
Tawipui South khua Israel VL Ramropuia Ralte kum 40, S/o. J.Lalsawmliani chu an kawmthlangah tlain a lum hlum.
Nimin khan Tawipui South ah YMA Day hmang tura an inbuatsaih leh an insawm kual velnaah Israel VK Ramropuia Ralte, mahnia khawsa chu an han sawm dawn a, a kawmthlang lam bang a kua a, an ringhlel an han en chuan a thlang metre 100 velah a lum thla tih a lang a, an hmunah hian a la boral lo a. Lak chhuah vat niin damdawiin panpui a nih hnuah vawiin chawhma dar 11:00 khan a boral a, A ruang hi posrtmortem turin Lawngtlai damdawiin panpui a ni a, nizanah tlaivarpuiin vawinah vui a ni ang.
Thudawn danin Israela hi tlangval fel tak a ni a, Village Water Committee in tui sema an hman thin a ni a, YMA ah pawh mi tangkai tak a ni.
======
Kohhran hnatlang thawhnaah Tv Lalrinpuia Punte (30) S/o. Vanlalauva Punte, Tlabung chu lirthei chetsualnaah a thi.
Kar kalta June 9-14.2026 inkar khan BCM Tlabungah Bethel Ministry ten Crusade hlawhtling tak an nei a, heta hman tur hian BCM kohhran dang leh YMA atangin thuthleng leh bungbel te an hawh a, niminah an hmanraw hawhte pe leh a tul ang tiin kohhran hnatlang an nei a, BCM Immamuel thuthleng pe turin Tv Lalrinpuia Punte leh a thiante 5 vel chuan pickup in an kal a, kawng a chhoh bakah motor dang lo awm nen an hnung tawlh leh chu a ding zo lo a, a hnung tawlh chu mimal compound hungna in a lo dang hram a, thuthlengte chu a tawlh thla a, motor a chuangte pawh chu an zuang thla hlawm a, Lalrinpuia hi thutleng velin a delh a, damdawiin thlenpui a nih hnuin a boral a, nizan khan tlaivarpui ani a, vawiin chhun dar 12:00 ah vui a ni ang. Hliam tuar Jerry Lalruatpuia chu nizan khan Lunglei lam panpui a ni a, midang hliam tenau tuar an awm bawk.
Tv. Lalrinpuia Punte pianpui unau pathum (3) a nei a, a naupang ber dawttu a ni. Unit TKP-ah Executive Committee member niin YMA lamah pawh mi tangkai tak a ni bawk.
Tun tuma an Kohhrana Saltang Chhuahna Crusade-ah khan ṭhahnem ngai leh phûr taka usher rawngbawlna hlentu niin Pathian nena an inzawmna tinghet lehzualtu-ah ngaihzawm theih turin a tir atanga a tawp thlenga thil dang thlauhthlaa crusade hlawhtlinna tura nasa taka inpe a ni an ti a ni.
===========================
Mizoram aiawh tur Rajya Sabha MP thlanna neih turah dam lohna avangin mahni inlama vote thlak dil awm mahse Election Commission of India in a phal sak lo a, MLA te'n an awmna party ni lo party dang candidate an vote thei a, Cross-voting phal a nih thu Election department hotuten an sawi.
Mizoram Election Department hotute chuan June ni 18, 2026-a Rajya Sabha MP thlanna neih tur atan an inbuatsaih chho zel tihte, tunah hian vote thlakna tur hmanrua Mizoram rawn pan pui mek a awm thute an sawi a. Election neih turah hian mahni chenna ina vote thlak dil an awm thu an sawi bawk a, ruling MLA zingah dam lohna avanga home voting dil an awm a, Election Commission of India ah dilna kan thlen sak a, mahse an lo rem ti lo, an ti.
Tun tum Rajya Sabha Election neih tura Mizoram chhunga inhnialna awm mek Cross-Voting chungchang zawhna chhang bawkin Election Department hotute chuan Cross Voting chu phal a ni a, Anti-Defection Law in a phuar ve lo tih an sawi a, hemi chungchangah hian Supreme Court ruling a awm tih sawiin, Rajya Sabha member tur thlang thei MLA te hian an duh zawng an vote thei tih an sawi bakah inthlanna hi 'open ballot'-a kalpui tur a nih thute an sawi bawk.
Rajya Sabha Election neih turah hian thu inchuh lian tak awm chu cross voting chungchang a ni a, Leader of Opposition Pu Lalchhandama Ralte chuan Cross Voting chu phal a nih thu leh MNF Candidate chu rorel lai MLA ten vote an pek nan hma an lak thute a lo sawi tawh a, hetihlai hian rorellai MP candidate erawhin Candidate nei party MLA ten party dang candidate vote pek chu danin a phal lo niin a sawi ve thung a; hetihlai hian inthlan buaipui Election department hotute erawh Cross Voting hi a theih thu an sawi ve thung a ni.
Tarlan tawh thin angin, June ni 18,2026 ah khian India ram state 10-a Rajya Sabha MP seat ruak 24 hnawh khah turin inthlanna neih a ni dawn a, seat khat nei Mizoramah pawh inthlanna hi neih a ni dawn a, candidate pahnih ZPM candidate Pu K Laltluangkima leh MNF party candidate Pi Zothansangi Hmar te an awm a ni.
Mizoram Legislative Assembly member hi mi 40 awmin, MLA 27 te chu rorel lai ZPM MLA te an ni a, MNF party in MLA 10 an nei a, BJP in pahnih leh Congress party in MLA pakhat an nei a ni.
======
SERTLANGPUI BRANCH YMA TE'N YMA DAY HLAWHTLING TAKIN AN HMANG.
Khuallian Pu K. Vanlalhruaia chuan kalkhawmte chibai bukna leh lawmthu sawina a nei hmasa a. "Zo-Sap missionary-te'n mitin huapzo, pawl ropui tak YMA min din sak a, vawiin thleng a mei mit lova nghet taka YMA ala ding hi Pathian malsawmna liau liau a ni ati a. Hruaitu hmasa-te thawhrimna zarah vawiin thleng thei kan ni" tiin hruaitu hmasa-te hnenah zahna chibai a buk a ni.
YMA Sertlangpui Branch ten YMA Day denchhena Civil Hospital, Lunglei hnena thisen unit 34 lai a thlawna an pek te, hmeithai in an sak thatsak te, chhawmdawl ngaite hnena tanpuina an peknaah lawmthu a sawi a. "An chetdan hi Mizo Kristian YMA tih atan thil mawi tak leh entawntlak tak a ni tiin chhuanawm a tih thu a sawi a. YMA thuvawn 'YMA chu tanpui ngai te tanpuitu' tih hi vawng nung zel turin a chah a. Zo-nun zemawi 'tlawmngaihna' leh 'aia upa zahthiamna' te pawh nasa lehzuala chhawm nung zel turin uar takin kalkhawmte a fuih bawk a ni.
Kumpuan thupuiah YMA in "Ruihhlo Do" kan hman mek chungchang sawiin, "Ruihhlo avang hian kan ram a dam lo. Khawtlang leh chhungkua bakah kohhran thlengin a rum mek a ni. YMA te hian tha thlah lovin nasa lehzuala kan do a ngai takzet" a ti.
"Kan rama ruihhlo tam ber rawn luhna hi khawchhak lama kan Zohnahthlak unau mi tlemte te kaltlang niin a hriat a, ruihhlo hi kan do tak tak dawn chuan Indo-Myanmar border fencing hi hmanhmawh taka tihhlawhtlin a tul hlein ka hria. 'Ram in ri a nei a, hnam in ri a nei ve lo' kan tih thin kha. Dan ang thlapin ramri hi hung vat se a duhawm takzet ani. Ramri hung avang hian kan inunau na a hlat phah dawn lo. Dan hnuaiah zalen takin kan intlawhpawh thei reng ang" a ti bawk.
Nitin deuh thaw chanchintharah ruihhlo man thu hriat tur a awm zel chu pawi a tih thu sawiin, "Heng chanchin te hi chhiar liam puat mai lovin YMA, MHIP, MUP, Village Council leh Kohhran te thleng hian kan ngaihven a, nasa taka hetiang ruihhlo zuartute hi kan dem a, kan tihmualpho ngam a hun tawh takzet a ni. Pawl hrang hrang ten tlangaupui se tih a duh thu a sawi a.
Ruihhlo do kawnga fimkhur a ngaih thu sawiin, "Hruaitute kut chu ruihhlo zuartute laka atangin a fai hmasak phawt a ngai tiin a sawi a. Engemaw thamna lak atanga kan fihlim ngam loh chuan kan do hlawhtling thei ngai dawn lo" a ti. Tanrualna, huaisenna leh rinawmna te nen theihtawp chhuaha kan ram leh hnam hmelma lian ber ruihhlo do turin kalkhawmte chu uar takin a sawm a ni.
Pu K. Vanlalhruaia hi SEC member Pu LH. Lalmama leh Pu Lalrinmawia Punte Ramthar Branch te, zaithiam Lalrinmawii (Mawimawii) leh a pa, Pukpui Branch te'n an tawiawm a.
YMA Day lawmna hi nilengin an hmang a. Indoor leh outdoor games hrang hrang hmangin section inelna an buatsaih a. Zan thlengin programme an la hmang chhunzawm dawn a ni.
==============
Thawhtanni khan khan California Mohave Thlalera US Air Force base atanga a thlawh chhuah hnu lawkah B-52 bomber a chesual tih, official ten an sawi.
California-a US B-52 bomber chesuala chuang mi 8 te chu an thi vek nia hriat a ni a, a hmun atanga thlalak lakah chuan thlawhna chu nasa taka kangin a tichhe vek niin lang a ni, tiin Edwards Air Force Base chuan a sawi.Chetsualna hmun hi US sipai hmunpui pawimawh tak, Los Angeles hmar lam mel 60 (km 95) vela hla a ni. Thlawhna hi siam leh rual lohvin a kang chhe hneh hle a ni.
"Air Force B-52 Stratofortress, mi 8 phur, test mission pangngai nei chu vawiin hian thlawh chhuah hnu lawkah zing dar 11:20 (GMT 18:00) velah a chesual. A lan danah chuan chetsualna hi dam chhuah theih chi a ni lo," tiin Edwards Air Force Base thuchhuah chuan a tarlang.
Emergency team te an thleng nghal a, chetsual hnu hian Thlawhna tumhmun chu khar a ni a, thlawhna lo lut tur zawng zawng hmun dangah divert an ni, tiin base chuan social media-ah a tarlang.
Thlawhna chetsual chhan hi tarlan ala ni lo a, investigation neih nghal niin a chhuina hian ni 30 chhung a awh mai thei a ni.
B-52 bomber hi kum 1954 ah hman tan a ni a, a tirah tak chuan Soviet Union nena indonaa hman tura duan a ni a, Cold War tawp hnuah pawh tihchangtlun hret hreta hman chhunzawm zel a ni a. Ralthuam bomb leh cruise missiles tam tak a keng thei a, a thla thui zawnga hmawr leh hmawr hi ft 185 niin a sei zawng hi 159 ft a ni. He thlawhna hi a tlangpuiin mi 5 - aircraft commander, a pilot, a radar navigator, a navigator leh electronic warfare officer ten an enkawl thin a, ft sing nga a sangah a thlawk thei a, Mel 8,800 a thui thlawk theiin nuclear cruise missile 32 telin ralthuam pound 70,000 vel keng thei a ni, vansang boruakah a tui thun theih a ni. US chuan B-52 bomber hi Vietnam, Gulf, Iraq, Afghanistah leh tun hnaiah Iran indonaah te a hmang a ni.
=================
Donald Trump chuan lawng kawng pawimawh Strait of Hormuz chu a pumpuia hawn thuai ani ang, a ti.
US President Donald Trump chuan Strait of Hormuz chu tlemte in hawn a ni tan tawh a, Iran leh IS ten inremna an neih tawh angin zirtawpni atangin a pumpuia hawn anih tur thu a sawi.
G7 Summit France a neihah French President Emmanuel Macron nena an inbiaknaahhe thu hi sawiin Strait of Hormuz hawng tur hian puih teh chiam kan ngai lo ang, a ti a. A hma hian London leh paris te hian Joint Naval Mission neih an rawt a, Trump chuan hei hi chhangin Strait chu a then a zar hawn tan a ni tawh a, bomb kam te sut mek a ni a, zirtawpi ah chuan a pumpuia hawn a ni tawh ang, tiin US chuan puihna a mamawh loh tur thu a sawi a. Iran indona a an tum buklpui ber chu Iran in nuclear ralthuam a nei tur ani lo tih a ni a, inremna an nei thei chu lawmawm a tih thu a sawi.
===========
Nizan World Cup inkhel result
Ivory Coast 1 - 0 Ecuador
Spain 0 - 0 Kabo Verde
Saudi Arabia 1 - 1 Uruguay
Sweden 5 - 1 Tunisia
Belgium 1-1 Egypt
He thu buatsaih lai hian Iran leh new Zeland inkhel mekin New Zealand in goal 1 an khung tawh a ni.
==========
Comments
Post a Comment