YMA DAY THUCHAH

 YMA DAY THUCHAH

K. Lalfakzuala President

YMA Sub Hqrs. Lunglei.

(The 15th June 2026)

Vawiin, YMA Day vawi 91-naah hian ka YMA member - pui zawng zawngte chibai ka bûk a che u. 

Kan hriat angin, kum 1935, June ni 15 khân Zo-Sâp Missionary te chuan YMA hi an lo din a. Mizoram leh hnam tana pâwl ropui leh tangkai, a din tirh aṭanga vawiin thleng hian a la ni zêl a nih hi. Vawiin, YMA Day vawi 91-naah hian YMA min din saktute hnênah lawmthû ka sawi thar leh a ni.

YMA Day hi YMA member-te kan intuai-thar lehna Ni lo ni sela. YMA thuvawn, Tanpui ngaite tanpui tih hi kan thinlungah lo thar leh rawh se.

Kan awmna hmuna tanpui ngaite dinhmun hmu phâk turin YMA te i awm reng thin ang u.

Tanpui ngaite In kan sak sakte, thlawhma lama khai chhuah ngai kan khaichhuakte, damlo leh lusûnte tana tanpuina hnâ kan thawhte leh khuarel chhiatna leh vanduaina thlenna hmun a YMA kan chêtna zawng zawngte hi a hlutna man chhût chhuah sên a ni lo; A hun zêl a chutiang ṭanpuina hnâ thawktu zawng zawngte chungah chuan, lawmthu ka sawi a ni.

Kan hma lam hunah hian enge lo thleng dawn kan hre lo va. Fûrpui avanga harsatna hrang hrangte, khawvel Politics in lumlet avanga harsatna kan tawh phâk thil leh thildangte pawh hmachhawn thei reng kan ni a. Chutiang ang hun chu a lo thleng palh hlauh anih pawhin, kan thuvawn; Tanpui ngaite tanpui, tih hre rengin kan puanven sawi chhîng ila; Ṭanpui ngaite thâwm hre phâk tur leh an kut pharte chelh hman turin, kan zâlna khumte chu lo nuam deuh zâwk tawh pawh ni sela, Zawlbûk a ṭhalaite inring renga an mû thin ang khan, YMA member-te chu Zawlbûk mutin i mû ang u.

Retheihna leh pachhiatna avanga chhuan - chham leh mei alh en, kan Branch ah an lo awm reng em? Mutbu lum sin tur neilo te hi an lo awm reng em? tih te hi  YMA te thinlunga zawhna riak reng thin a nih kha. YMA avang hian kan khawtlângte, kan ram te hi lo nuam zel sela; YMA Day hi kan intihchak thar lehna Ni, lo ni rawh se.

Vawiin YMA Day thupui hi, YMA Kumpuan 'Ruihhlo Do,' a ni a. YMA member mai bâkah, ka khua-leh-tui-pui zawng zawngte, ruihhlo do tur hian ka sâwm che u a ni.

Ruihhlo hian, kan thenawm ringlo mite lakah, he Kristian ram hi minti thangtlâwm  mai ang tih a hlauhawm a. Kan Rinna leh Kristianna sawichhiatna leh kan Rin Pathian hi rinlohna remchâng a siam sak ang tih a hlauhawm a ni tih i hre reng ang u.

Thalai tam tak ruihhlovin a hneh a, ramtuileilovin a siam a, an nunna hial a lâk sak a. Chhungkua kan ṭap a, khawtlâng a nghîng a, kohhran thlengin kan tuar a nih hi.

Ruihhlo zuarte'n lo hre rawh se; Ruihhlo zawrh hi dân bawhchhiatna a ni mai lo va, mi chhungkaw tihchhiatna a ni a; Sum leh paiah hlâwkna in hmû a ni mai thei. In ruihhlo zawrhin Chhungkua leh khawtlânga chhiatna a thlen erawh a râpthlâk  a, a lawmawm loh a ni. Chuvang chuan, in thiltih hian Mizo hnam hmêlma ah a siam che u a ni tih lo inhria ang che u. Khawngaihtaka ruihhlo zawrh hi lo sim turin, he YMA Day ah hian ka ngên che u a ni.

YMA Day hlim takin hmang ila; Pathianin Mizoram malsawm se, YMA lo vul zual zel rawh se.

                                                    Ka lawm e.