News langsar zual te.
Mizo te rilrem zawng a FCRA Amend kan neih thei ngei a beisei awm ti.
BJP Mizoram chuan nimin khan Political Session an nei a, he huna thusawitu Pu K Laldinthara State Spokesperson chuan Central hian mipui duh dan azah em avangin Mizo te rilrem zawng a FCRA Amend kan nei thei ngei tur ah a beisei awm hle a ni a ti.
Pu K Laldinthara chuan, FCRA hi kan duh lo anih chuan chumi hma a kan ngaihpawimawh tel tur ni awm tak chu, Society Registration Act Mizoram in kan hman mek hi a ni a, FCRA Registration tih hma hian Society Registration neih hmasak angai a, Society Registration dan a a inziah angin, Chapter 5 (7) na ah chuan Pawl tih tawp a nih emaw Registration Cancel anih chuan State Sorkar in chu Pawl hmanrua leh bungrua (Assets) te chu Sorkarah an hlan let tur ani tih a ni. Chuvangin FCRA lo ah pawh Society Registration chungchang ah pawh Bungrua hlan let chu dan awmsa alo ni reng tawh a, FCRA dan thar tur ah phei chuan, Retro-spective Effect awmlo, hei hian 2026 hmalam a huam loh tur thu ruahman a ni hi a lawm awm viau zawkin a lang a ni. Chutih rual erawh chuan Central Sorkarin dan zirchiang tu tur an ruat a, Central hian mipui duh dan a zah em avangin Mizo te rilrem zawng a FCRA Amend kan nei thei ngei tur ah pawh a beisei awm hle a ni a ti.
==============
Local Council seat ruak hnawhkhahna atana By Election neih zawh takah rorel lai ZPM in seat 6 an la a, MNF in seat 2, Congress in seat 2 an la bawk. VC By- election ah ZPM in seat 2, INC in seat 1 an la bawk.
Rorellai ZPM Party chuan Selesih, Durtlang, Dawrpui Vengthar, Bungkawn, Salem veng, Lunglei Zotlang ah te seat an la a. MNF in Aizawl Zotlang leh Luangmual ah te seat an la a, Independent in Republic ah seat an la bawk.
Village Council ah ZPM in seat 2 la in Indian national Congress (INC) in seat khat an la a, ZPM lakna te chu Bunghmun, Lunglei Dist leh East Lungdar Serchhip District te ani a, INC seat lakna chu Bilkhawthhlir South, Kolasib District te ani.
============
MZP ten Governor an kawm.
Ningni tlai tlai dar 4:00 khan, MZP hruaitute chuan Lok Bhavan-ah Mizoram Governor General (Dr) Vijay Kumar Singh (Retd.) an hmu a, Mizoramin a, Civil Engineering(CE) seat 5 leh Electrical & Electronics Engineering(EE) seat 2 quata kan neih chungchanga buaina leh thil pawimawh dang thlen in an sawipui.
MZP chuan, CE seats 5 leh, EE seat 2 Mizoramin a, Central pool- quata aneih meka Admission tih theihloh avanga buaina ah, Union Education Minister Shri Pralhad- Joshi- hnenah ziaka an thlen tawh thu an sawi a. Governor chuan, Mizoramin CE & EE a, quata neihna college, Matrusi- Engeneering College a Admission an tih theihloh chungchangah, Union Education Minister pawh arang lama alo biak tur thu sawiin zirlaite chu thlaphang lo turin achah a ni.
Mizo zirlaite tana India ram chhunga National Integration tour neih theih ngeina tura hmalak anih tur thu leh Tour neihna tura duhna hmun te ziaka thlen turin MZP hruaitute ahrilh a. Heng bakah hian Governor chuan, Zirna In hrang hrangah Drugs Awareness & Prevention campaign neihna tura MZP in athlen chu lawmawm ati hle a, Narcotics Crime Bureau (NCB) Director, a sawipui tur thu a sawi bawk.
Hei bakah hian Mizoram zirna kaihhnawih thil chi hrang hrang an sawiho bakah, hun remchang hmasa berah inkawm leh nise an ti.
==================
Congress President Pu Lal Thanzara chuan rorel lai ZPM chhungkua ah, intei tetna a thleng mek a, Chief Minister Office-ah CM Adviser te aiin, Pension rawih nawn leh pakhat, a thu zawk avangin an pheikhai a rual thei lo niin asawi.
He thu hi nimin a Congress party-in Bhavan-a Political Session an hman ah a sawi a, MPCC president Pu Lal Thanzara chuan ZPM chhungkaw buai dan leh an inlungrual loh dan te asawi a, ZPM chhungah hian, in ten tawnna ni lovin, in teitetna an zingah athleng mek niin alang, ati a. ZPM chu sorkarna fawng an chelhna ah an term an hman zawh hram an duhsak pui hle tih sawiin, an term azawh hma hian Sawhthing man an bat te pe zo phawt se, Bana kaih scheme te chu thalai tam takin chhawr phawtse an duh a, chumi atan chu inpumkhat hram se aduhpui tih a sawi.
Congress President chuan India- ram pumah Congress kaihhruai opposition a lian mek a, kum 2029 Lok Sabha inthlan ah chuan, India- ramah Congress kaihhruai sorkar adin ngei a rinawm hle tih leh Pu Rahul Gandhi-a chu, Prime Minister ngei tura rinkai ber anih thu a sawi a, Mizoram thatna duh a, siamtha turin mithiam te, NGO a inhmang, mi- tha tak tak te, thalai fel leh duhawm tak tak te chu Congress party-ah lut tura asawm thu asawi bakah, Mizoram siam tha a sorkarna fawng chelh leh turin an party chu an inbuatsaih mek tih asawi bawk.
Friday Political Session hi Pu R. Lalrinawma, Ex-MLA, GS, MPCC chuan akaihruai a. Pu Lalthankhuma, Secy, MPCC bakah Pu Lalroenga, President, ADCC leh Pu Lalremruata Renthlei, Media Chairman chuan report an pe a ni.
=============
Chief Minister Pu Lalduhoma'n Mizo hnam pawi, nasa takin asawi a, ngaihdam dil ngei rawh se, Dr.Vanlaltanpuia Ex-MLA, General Secretary GHQ chuan ati.
Nimin a Mizo Hnam Run chhung inkhawmah thu sawiin Dr.Vanlaltanpuia chuan kan CM Pu Duhoma'n Law College zirlaite hmaa athusawi, Mizoram Accord tih chu atak takah chuan Memorandum of Understanding ani a, MNF leh Union Ministry of Home Affairs-te signed niin, Mizoram aiawh atling phak lo, party- pakhat leh Ministry of Home Affairs te inkar thuthlung chauh ani atih leh, ILP tawpna chu Central sorkar kutah a awm a, aduh chuan atitawp thei tia a sawi khan, Legal (Dan leh Hrai) leh political debate acho chhuah nasat thu leh Mizo hnam pawi nasa taka asawi thu a sawi.
"Pu Duhoma chuan Article 371/G pawh rinhlelhawm ah chhuahin, kan inremna ngaih hlut em em chu nep takah achhuah bawk hi apawi takzet a, hnam movement avanga tuar nasa, mimal leh chhungkaw tan alungchhiat thlak hle a, MNF chuan kan ngai thu tak hle. Mizo hnam movement kha Mizo zawng zawng ta ani a, aman kan pek pawh asang hle a. Kan hnam martar-te khan vawiin atan, an naktuk an hlan a, Mizo mipui ngenna avanga inremna dawhkan kil chauh kan ni.
Independence chu, ni rih lo mah ila; Memorandum of settlement kha kan political Genesis anih avangin kan ngaihlu a. Chumi in aken tel, India Constitution a ziahluh thar, Article 371(G) chu, a ngheh lohna, zeldin thubawl leh, mipui ti-ralkhel zawnga kan CM ber atawng kha hruaitu ropui tawng dan tur ani lo a, inremna ti hlawhtlingtu India- sorkar tan pawh, rilru natna tham atling a, kan CM hian ngaihdam dil ngei rawh se," ati.
Inkhawm hi Pu F.Aithanga NCC, GHQ chuan kaihruai in, Pu Francis Lalrammuana, Secretary, GHQ chuan hunserh a hmang.
==========
Nimin tlai khan Prof. Lalnilawma chuan Tlangnuam PHE Tanky thlanga leimin chu a hmunah a en a, thuneitu te nen hmalak dan tur an sawi ho.
Prof. Lalnilawma hi bialtu MLA Pu Lalchhuanthanga, Corporator Dr. Lalmalsawma Nghaka, PHED E-in-C Pi Zodinthari, EE Pi Lalzuimawii, ADDMA atangin Zonal Officer Pu K. Lalkroschhuanga, leh Assistant Commissioner Pu Hmingmawizuala, Geology & Mining atangin Senior Geologist Pu Benjamin Roluahpuia, , Local Council hruaitute leh khawtlang hruaituten an tawiawm a, PHE hotute nen hian Tanky hman zui dan tur te an sawiho nghal bawk.
===============
LMC hnuaia Ward IV Councillor Pu R. Lalramzauva chuan Venghluna School hrang hrang te tlawhin, Zirtirtute nen inkawmhona an nei a, thawhhona tha neih hlutzia leh Staff te nena lo sawiho tawhna atanga hmalakna tur sawiin hun an hmang a ni.
Gov't Middle School hian Oct Ni 18-a Golden Jubilee an hman tur pualin school bang Cement plastering leh water cooler te an mamawh thu an thlen a, councillor chuan jubille hmaa tihpuitlin tur anih thu a sawi.
Gov't M/S staff te hian a tul anga mahni sum senga an lo thawhkhawm thin dan te sawiin, hna vanga mahni inchan ngamna hmun dangah hetiang thawhhona an la neih zen zen loh thu an sawi a, puih an ngaihnaah tlanchhe lova thawhhona tha nei zel turin an sawm a ni.
Smart class neihna tur IEC Set up an dawn vanga an lawmthu sawiin, a hman dan tur chungchangah erawh harsatna an la neih vangin, a tul anga bawhzui sak tum a ni.
Govt Primary school tlawh bawkin, zirtirtute thahnemngaihna avangin naupang an nei tha hle a,zirna piah lamah co-curricular activities tha taka neihpuiin, puantah,hnangtah leh kut themthiamna chi hrang hrang te zirtir an ni.
Venghlun High School tlawh bawkin, thuamthat a ngaihna lai te thlir ho niin, heng, school bul leimin,school kawt tual diak leh varendah nal lutuk te thuamthat a ngai hle a ni.
Ward Councillor hi Southern Hqr. thalai leh Venghlun Unit ten an tawiawm a ni.
=======================
Lunglei Dist Congress Committee (LDCC) President Pu R.Lalnunthara chuan Thorang A/C chhunga khaw thenkhatte tunkar Ningani leh nimin Zirtawp Ni khan tlawhin Party hruaitute nen an inkawm.
Pu R.Lalnunthara hian Thorang bial chhunga Congress Party Block hmunpui thenkhat Bunghmun, Thenhlum leh Putlungasih te tlawhin Party hruaitute nen an inkawm bakah Block hruaitu thlanna a hmanpui a. Party hruaitute nen an inkawmnaah hian Thorang bial mipuite hian Pu Zodintluanga kha a lo tha ber mai mirethei te ban phak leh tlukluh ngamna a ni an ti thar leh tawh niin a lang a ti a, Opposition hun rei tak ni tawh chunga Party hruaitu rinawm tak tak hmel hmuh tur lo awm chuan phurna nasa tak a pe tih a sawi.
Kan rama thil tha rotling zaa sawmkua vel chu Congress Party kutchhuak a ni tih mipui ten an hre thar mek a, kan tlem leh tam lam ai chuan rinawm taka kan beihna hian inthlan lo awm turah sawrkar thei mai turin min hlangkai dawn a ni tiin Sawrkar turin thil kan tih tak tak a ngaihtuahna tak tak kan sen angai tawh a ni a ti. LDCC President hi LDCC G.S leh hruaitu thenkhat ten tawiawmin Block inthlan an kaihruai nghal a ni.
==============
Russia in, double-tap drone hmangin Ukraine a, Kryvyi- Rih khawpui, Shopping Centre abei a, mi 15 an thi a, tam tak an hliam.
Russia in Ukraine shopping centre an beihna ah hian mi 15 an thih bakah mi 130 vel in hliam an tuar a, hliam zinga 23 chu naupang an ni a, building chim karah mi engemawzat an la awm rin a ni.
Russia hian nipro-petrovsk bial chhung, Kryvyi Rih shopping centre hi vawi hnih abei a, shopping centre abeih alh hluah hluah lai leh chhanchhuaktu pawl ten chhanchhuah tuma an beih laiin drone dangin a fuh leh a. nipro-petrovsk bial hotu, Oleksandr- Hanzha chuan thi zat hi 15 an chian tawh thu sawiin heng zinga 2 hi damdawiin thlenpui hnua thi an nih thu asawi a, Mi 130 in hliam an tuar a, hliam zinga 29 te chu an dinhmun a tha lo hle a, chuvangin thi zat hi la pung chho leh thei a ni tih a sawi.
Chhanchhuaktu pawlte an indaih lo hle a, bial dang 4 atangin chhanchhuaktu pawlin chhanchhuah hna an pui bawk a, Ukraine President Volodymyr Zelensky chuan chhun laia russia- beihna chu, a runthlakin a tenawm tak zet a ni tih a sawi a, He beihna hi vawi hnih athleng a, a vawi hnihna ah chuan ahmun ah chhanchhuak tura kal emergency worker te an kap leh a ni, a ti.
Tunlai hian Russia leh Ukraine te hi an inbei ngawrh hle a, Russia hian Missile leh drone hmangin abei a, Ukraine pawhin drone hmangin Russia- hmun ril zawka refinery leh ware- house te abei bawk a. Ukraine hian missile laka lo invenna tur atlakchham avangin tunlai hian Russia- kutah an thi nasa hle a ni.
==================
Comments
Post a Comment