YMA leh Kohhran, ... Mizo inneihna leh Supreme Court ...
YMA Sub-Hqrs Lunglei ten Kohhran hruaitute ruihhlo do thu an titi pui.
YMA in kumpuan ah Ruihhlo Do a kalpui mek chungchang ah Kohhran te nena atul anga hmalakna kalpui zel anih theih nan YMA Sub-Hqrs Lunglei Office Bearers te chuan Kohhran hruaitu te tlawhin Ruihhlo Do kawngah inkawmhona neih tura ruahmanna an siam chu an kalpui tan mek.
Nimin khan Baptist Church of Mizoram hruaitu Rev Dr.H.Lalthlamuana- General Secretary, Rev R.Lalrintluanga – AGS (Mission), Rev. Vanlalmuankima – AGS (Service), Rev. RC.Lalthanzama – Director Social Concerned Department leh Rev. Lalzarliana Khiangte – AO te nen BCM Headquartres Office, Serkawn ah inkawm in Ruihhlo Do kalpui mek ah Kohhran in hma a lakna leh YMA in hmachhawp a neih te inpawh tlang taka sawiho niin a tul ang zel a, tan tlan zel nise an ti. BCM hruaitu te chuan YMA in Ruihhlo a Do na atan a tul hun leh remchang ang zelin hmun hma te pawh an hman a remchan tur thu an sawi bawk.
YMA Sub-Hqrs Lunglei hruaitu te hian United Pentecostal Church (NEI) District hruaitu te kawm bawkin, Rev Pu C.Lalrintluanga – District Superintendant, Rev PC.Lalfakawma – District Secretary leh Rev. K.Vanlalhruaia – District Treasurer ten UPC (NEI) Office, Chanmari, Lunglei ah YMA hruaitu te hi anlo dawngsawng a, Ruihhlo DO kawnga hmalak hona awm thei tur hrang hrangte inpawh tlang takin an sawiho a ni.
YMA hruaitu te hian Kohhran hruaitu te nena inkawmna hi neih chhunzawm zel an tum thu sawiin, YMA Sub-Headquarters Lunglei President Pu K.Lalfakzuala chuan ‘Ruihhlo Do’ hi kum liam tawh ah pawh YMA. Kohhran , Sawrkar leh NGO dangte nen theihtawpa an kalpui thin thu sawiin, kan ram leh hnam nasa taka min eichhia a, thalai te nunna nasa taka suat mek tu Ruihhlo hi Kohhran leh Sawrkar mai bakah NGO dangte leh khawtlang hruaitu te nen lungrual taka do zel turin hmalakna pawh an chhunzawm zel dawn tih a sawi a. Kohhran hote hmalakna chuan thla a tih muan thu leh Kohhran te in huamna leh inpekna chu an chakna leh inghahna pawimawh tak pakhat a ni, tih sawiin a tul ang zela inlam tawn a, inko tawn tura ke pen tura an tanho tur thu a sawi bawk.
===============
Supreme Court chuan nimin khan Mizo inneihna leh roluah dan siamthatna (amendments) 2026 lungawilohna avanga Meriam L. Hrangchal in a khinna chu Aizawl Bench, Gauhati High Court-ah kal turin a ti.
Pi Meriam hian The Mizo Marriage and Inheritance of Property (Amendment) Act, 2026 siamthatna te hi India Constitution kalh a ni tiin a khing a. He dan thar hian Mizo hmeichhia, Mizo ni lo mipa nei te chu dik lo takin a thliar hrang a, an fa te dikna leh chanvo pawh a laksak a ni tiin thiah a dil a ni.
He dan thar hian Hnam dan kum 2014-a siam Mizo Marriage and Inheritance of Property Act chu a tichak bawk. He dan siamthatnaah hian kawppui pakhat aia tam neih, Mizo mi leh Mizo mi ni lo inneihna leh hmeichhia ten an neihte chungchang ah thil thar leh danglamna te a siam.
He dan thar hian Hnam dan kum 2014-a siam, Mizo Marriage and Inheritance of Property Act chu a thuam chak a. He dan siamthatna ah hian kawppui pakhat aia tam neih phal lohna te, Mizo mi leh Mizo mi nilo inneihna leh hmeichhia ten an thil neihte chungchangah thil thar leh danglamna te asiam.
Lalsangliani Colney pawhin May ni 8 khan Supreme Court ah hian Mizo Hnam dan thar akhinna hi a thehluh tawh a, Diary No. 28,435/2026 a, register a ni a. Siam that tur neuh neuh, a awm avangin ngaihtuah tura chhawp chhuah a la ni lo.
===============
Gauhati High Court Chuan Pu Robert Romawia Royte leh Pu John Rotluangliana Te'n Skywalk Leh Ropeway Eiruk Thubuai Atanga Paih An Dilna Ngaihtuah Turin Special Court Hnenah Hriattir.
Ni 24, August 2026 (Thawhtanni) khan Gauhati High Court, Aizawl Bench chuan Tourism Minister hlui pahnih, Pu Robert Romawia Royte leh Pu John Rotluangliana te'n, Special Court-a Skywalk leh Ropeway kaihhnawih eiruk thubuai atanga paih an dilna (discharge application) chu ngaihtuah turin Special Court hnenah thu a pe. Pu Robert Romawia Royte leh Pu John Rotluangliana te hian Special Judge order dated 24 June 2026 chu High Court-ah hian khingin, Section 250 Bharatiya Nagarik Suraksha Sanhita (BNSS), 2023 hnuaia charge siam hmaa thubuai atanga paih dilna an thehluh chu ngaihtuahsak an nih loh thu an thlen a.
Special Court-a thubuai kal lai SR (PCA) No. 2 of 2026-ah hian Tourism Minister hlui pahnih te hi criminal conspiracy, criminal breach of trust, cheating, leh Prevention of Corruption Act hnuaiah thubuai siam sak an ni. Special Judge chuan thubuai kal pui zel turin prima facie case a awm ti mahsela, charge mumal tak siam a la ni lova. Tin, Pu Robert Romawia Royte leh Pu Johna Rotluangliana te hian thubuai kalpui zel turin thu tling a awm lo tiin, thubuai atanga paih tura dilna chu an thehlut ta a ni. High Court chuan an discharge application ngaihtuah a nih hmaa, Special Court-in charge siam tura a order a tihchhuah tawh chu ni 6 August 2026 khan a lo stay tawh bawk.
Justice Sanjeev Kumar Sharma chuan Special court-in charge siam chungchanga thutlukna tawp a la siam loh thu leh discharge application ngaihtuah hmasa tur hian daltu engmah a awm loh thu a hmu a. Tichuan, High Court chuan Special Judge chu an discharge application ngaihtuah turin thu a pe ta a ni(www.jclalnunsanga.in)
(He thubuai Robert Romawia Royte vs SOM Crl Pet. No. 23 of 2026 leh John Rotluangliana vs SOM, Crl Pet. 22 of 2026-ah hian thubuai thehluttute aiawh hian Adv B Lalramenga a ding a, sorkar aiawhin Add. Public Prosecutor Vanneihsiami leh Mizoram Lokayukta aiawhin Spl Public Prosecutor C Lalfakzuala a ding)
=============
Ropeway Skywalk thubuai nei te Special Court Chu An case hnawl dilna ngaihtuah Tur In A Ti.
Nimin Dt.24.08.2026 khan John Rotluangliana, Robert Romawia Royte leh Lalrindika Ralte ten Skywalk leh Ropeway chungchanga Special Judge, PC Act, 1988, Aizawl Order ni 24.06.26 ami Case kalpui zel tura tihna paihthla tura High Court-a ngenna an thehluh chu ngaihtuah a ni a. He thilah hian thubuai kal lai atanga chhuah zalen dilna (discharge application) chu ngaihtuah tura Trial Court (Special Court, PC Act) lamin a tih tho avangin hearing hi a case awmdan(on its own merit) atanga nei turin a ti.
Thubuai thehluttute hian Special Judge in Order ni 24.06.2026 a a siam, an case kalpui zel tura a tih chu High Court ah hian an khing a. An ukil te hian thubuai neia te hi an thiam thu sawi ve na hun pe lo a, an case kalpui zel chu a dik lo tiin High Court ah hian an zual ko. An thiam lohna ngaihtuah chian hmasa lo a, an case kalpui zel chu dan kalh a ni an ti. Thubuai theh luttute hian a case kalpui zel thlak a nih loh zia an dilna chu ngaihtuah a nih hma a case kal zel chu a dik lo an ti.
High Court chuan an ukil te remtih tlanna angin Special Judge PC Act chu thubuai nei ten chhuah zalen dilna (discharge application) chu ngaihtuah tura Trial Court (Special Court, PC Act) lamin a tih tho avangin hearing hi a case awmdan (on its own merit) atanga nei turin a ti a ni.
(He case Crl Pet No.22,23,24 of 2026 -a petitioner te tan hian B Lalramenga te, Lalfakawma te an ding a, Lokayukta tan C Lalfakzuala, Special PP leh sawrkar lam tan Vanneihsiami, APP te an ding)
Comments
Post a Comment