'

Chakma Baptist Church (CBC) Assembly neih mek a ni

Lunglei 1.3.25: Chakma Baptist Churhch (CBC ) Assembly vawi 12-na chu CBC Sedailui P Biak In-ah neih mek a ni a, Ningani zan atang khan tanin nimin leh vawiinah Assembly rorel neih a ni a, mikhual 350 chuang niin zan lamah Pathian biak inkhawm neih thin a ni a, Zaipawl hi Pastor bial 5 atangin an tel a, naktuk Pathianni zing hian hian Pastor ordination neih tur a ni a, Pastor 3 ordain tur an ni anga, Rev Dr C.Lalruatthanga Executive Secretary in a ordain dawn a ni.

He CBC Assembly hi BCM atangin Rev Lalremsiama Ralte Director Mission Dept. leh Upa C.Vanlalmuana BCM Kikawn te bakah Bru Baptist Church atangin hruaitu 2 in an telpui bawk a ni. Chakma Baptist Church hnuaiah hian Kohhran member 6325, Chhungkua 1396, Kohhran Upa 108, leh Rawngbawltu 323, Pastor leh Probationary Pastor 13 an awm meka, 2024-ah ringthar 408 neiin Missionary 117 in an thut chilh mek a ni.

Vartian atangin Mizo tlangval 11 ten hna an thawk

Lunglei 1/3/2025: LR Industry Near Congress Bhawan Lungleiah hian zing vartian atanga zan dar 6:00 vel thleng in Mizo tlangval kum 18-45 inkar mi 11 vel ten rim takin hna an thawk thin a,a hlawh tam pawl chuan thlakhatah Rs 40,000 te an hlawh.

LR Industry hi steel and Aluminium hmang a hnathawhna niin a neitu pa Pu Zautea of Bazar veng Lunglei chuan kum 2018 a Steel fabication hi tan a nih thu sawiin tun dinhmunah chuan Lunglei khawpui chhung ami te insakna tur, tukverh leh Frame chi hrang hrang thawh tur an nei reng tih sawiin khaw pawn lamah pawh hnathawh tur Order chu awm bawk thin mahse an thawk hman meuh lo tih a sawi. Mizo tlangval a tam thei ang ber ten Welding hi thiam se a duh tih sawiin mi engemawzat a chherchhuah ve tawh thu leh a hnen atang indang a, mahni a dawr hawng leh mi hnuaia welder tha tak tak te pawh an lo awm ve tawh tih a sawi a,mi tumruh leh taima tan chuan Welding hi thil harsa lo tak tur a ni a ti. Power supply khaihlak changin Power back-up hmangin Aluminium hmanga hnathawh a khaihlak lutuk lo tih a sawi a, Welding lamah erawh an khaihlak thin tih a sawi.

Bethel Centre a an enkawl naupang/rawlthar mi 4 chu tunah hian anmahni chhungkaw member ang chiah a la lut in hnathawh naah hian an chhawr a, mi pakhat lang in a rawn kal thin tih a sawi bawk. In a a awmpui mi 4 te hian an duh phawt chuan nupui an neih thleng in a in atangin enkawl a duh tih a sawi a, anni pawhin Aluminium, Iron leh steel hmanga hnathawh chu an thiam tawh khawp a ni a ti. Zautea chuan a tha thei ang ber a hnathawh chu an innghah na a ni tih sawiin thil siam tawh return/siam that ngai an la neilo tih a sawi.PMEGP Loan hmanga hmala a nih thusawiin a ruahman leh zelna te a hlawhtlin chuan Mizo thalai te a thlawn a Welding zirtir a tum tih a sawi a, hnamdang kan tluk lohna bik a awm lovang a ti

Hnahthial District-ah Watershed Yatra Campaign, Van Activity kalpui

Dated Lunglei, the 1st March, 2025: Hnahthial District-ah PMKSY 2.0 hnuaia Watershed Yatra Campaign chu Pu HD Lalpekmawia, Project Director, DRDO ho in Khawhri khuaah neih a ni a. Project Director chuan central sawrkarin watershed yatra campaign a ngaih pawimawh thu sawiin, tuihna venhim te, leilung luangral tur ven te leh awmze nei zawka ruahtui khawl pawimawhzia te sawiin he campaign hi mipui kalkhawm ten an hlawkpui theuh a beisei thu a sawi a ni.

Department of Land Resources (DoLR), Govt. of India bultumin ram pu

mah Van Activity campaign chu kalpui mek niin February ni 21 atangin Mizoramah pawh kalpui tan a ni a. District zawng zawngah campaign hi March ni 13 thleng hian kalpui zel tur a ni. PMKSY 2.0, Hnahthial district hian S.Chawngtui, Tarpho leh Khawhri te huam in project area a hnathawk tha mi pathumte hnenah chawimawina ‘Watershed Margdarshaks’ hlan bawk an ni. Campaign pual hian video thlir ho na, thingphun, wall painting, Quiz competition, cultural show leh tuihna venhimna kawnga thutiam sawihona neih a ni.

Watershed Yatra campaign hi National level ah February ni 5, 2025 khan Union Minister of Agriculture & Farmers’ Welfare, Shri Shivraj Singh Chauhan chuan a hawng a. Hnahthial District ah pawh bialtu MLA Pu Jeje Lalpekhlua’n watershed yatra campaign hawnna hi a lo nei tawh bawk a ni.

UPC LUNGLEI DISTRICT INKHAWMPUI VAWI 60-NA ROREL INKHAWM TLUANG TAKA NEIH A NI

Lunglei 1.3.25: Headquarters Biak In Chanmari a neih mek UPC Lunglei District inkhawmpui vawi 60-na chu Vawiin March ni 1 Inrinni hian Conference Hall-ah rorel inkhawm neih a ni a, he hun hi District Superintendent Rev.C.Lalrintluanga chuan a kaihruai a, General Missions Director Rev.C.Vanlalena chuan telpuiin thu a sawi a, kum 2024-a District Conference palai boral mi 2 sunna neih a ni.

An rorel langsar zingah Maicham (Pulpit) chungah hian Banner tara a thu pawh inang tlang neih ve tha tih a ni a, a thu erawh District Board ngaihtuah tura dah a ni. General-a thlen turin thu pawimawh tak tak pass a ni a, nakkum 2026 District Conference-na tur atan Headquarters, Chanmari tha tih a ni.

UPC Lunglei District hnuaiah hian kohhran Member 19369 awm mekin Bial 21 hnuaiah Local 116 a awm a, chhungkua hi 4286 an awm. Nikum 2024 chhung khan Kohhran ding thar 2 awmin Nau hlan thar 287 leh Tui Baptisma chang thar 402 neih a ni a, dan khatna a innei tuak 27 awmin Kohhran upa hi 408, Senior Upa 61, Rawngbawltu 567, Ordain Minister 35, General Licence Holder 41, Local Licence Holder 47, Bible Women 13 an awm mek a ni.

UPC Lunglei District hian nikum 2024 chhung khan Bial thar (Zobawk Bial) hawngin Pastor Quarters hmun tur a lei a, CBC Building sakna turin Rs.512235 General-ah a thehlut a, a vawi khatna atan Pentecostal Men Department (PMD) te Meet a buatsaih sak bawk. Biak In sak tanpuina Local 10 hnenah Rs.2850000 a pe chhuak a, Athibung Biak In sak tanpuina Rs.600000 a pek tawh chu Rs.70000 pek belh lehin, Lawngtlai West District Headquarters Building sak tanpui nan Rs.400000 a pe chhuak bawk.

awiin rorel inkhawmah hian rorel palai mi 230 chuang an kal khawm a ni.

____________

*_PennetLunglei 27/2025_*

Pu C.Lalthanmawia IPS, DIG(NR) leh midang pension-a chhuak thlahna hun hman a ni.

Lunglei 1.3.25 : Nimin chawnudar 2:00 khan Pu C.Lalthanmawia IPS, DIG(NR) leh Pu hari Bahadur Thapa, Driver Special Grade Superanuation pension-a chhuak te thlahna hun hman a ni.

He Pension thlahna Arya Mess, PHQ-a neih hi Inspector F.Vanlalrema Inspector-in a kaihruai a, Inspector T. Lalparliani'n hunserh ahmang. Welfare leh Branch hrang hrang aiawhten thilpek an hlan a, PHQ Staff welfare aiawh, Pu K.Lalremsanga leh AIGP(Hqrs) aiawh ten thlahna thuchah an sawi a, pension thlah tak Pu C.Lalthanmawia leh Pu hari Bahadurt Thapa ten thu an sawi bawk.

Pu C.Lalthanmawia hi kum 1984 ah Police S.I ah inziaktlingin azawm a. 1987 ah hna sang zawk exam duh vangin voluntary-in a bang a, 1988 khan MPS ah inziaktlingin 1989 January ni 27 ah a zawm a, a service chhungin hmunghliauna nei lovin hmun hrang hrangah nihna pawimawh tak tak chelhin a awm a,

May ni 2, 2022-ah IPS-ah hlankai a ni a, IPS a nih hnu hian AIG leh DIG hnate a chelh a, hnathawh that chawimawina hrang hrang India President Police Medal for Meritorious Service( 2012); President Police Medal for Distinguished Service (2020); Mizoram DGP Commendation Disc and Certificate a dawng a, Second Prize Winner, All India Police Officers Essay Writing Competition (1993) a ni bawk

Lungleiah Chapchar Kut 2025 Organising Committee an ṭhu khawm

Lunglei, 2025 Vau thla ni 1: Nimiin khan Lunglei District Chapchar Kut 2025 Organising Committee chu an Chairman, Additional Deputy Commissioner Pi Rochuangkimi Khenglawt hovin Lunglei DC Conference Hall-ah a ṭum hnih nan an ṭhu khawm a. Chapchar Kut atana ruahmanna leh inbuatsaihna hrang hrang thlir hovin, hlung tak leh hlawhtling taka Chapchar Kut hman a nih theih nana thil pawimawh hrang hrang an sawi ho.

He ṭhut khawmah hian ṭhut khawm hmasaka ruahmanna siam tawh sa bawhzui a nih dan thlir ho niin, ruahmanna siam thar ngai leh siam rem ngaite sawi ho a ni bawk a. Hun hman dan tur chipchiar duan lawk chu thlir ho niin, siam rem ngaite siam rem a nih bakah, a ṭul anga la siam rem leh theih tura dah a ni a. Mawhphurhna hrang hrang neitute aṭangin report ngaihthlak niin, hlung tak leh hlawhtling taka Chapchar Kut hman a nih theih nana thil pawimawh hrang hrangte sawi ho a ni.

Kumin Chapchar Kut hi "Zo nun ze mawi - Hawihhawmna" tih thupui hmangin March ni 7, 2025 (Zirtawpni) hian chawhma dar 10:30 aṭangin Lungleia C. Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Kut Nu atan Health & Family Welfare Minister Pi Lalrinpuii beisei a ni a. Chapchar Kut ni hian hnam lam chi hrang hrang thlir tur leh zaithiamte zai ngaihthlak tur a awm dawn bakah, hnam ziarang tar lang leh chawi lar thei tur item dang chi hrang hrang ruahman a ni bawk a. Mizoram Journalists' Association (MJA) Lunglei District huaihawtin Mizo thuam inbela Kut hmannaa kal nulate aṭangin Chapchar Kut Miss thlan leh tum niin, Lunglei Photographers' Association (LPA) huaihawtin Mizo thuam inbela Kut hmannaa kal naupangte aṭangin Kut Hraite thlan leh tum a ni bawk a. Kut hmannaa kalte mamawh leh duh zawng lei theihna tur dawr (stall) hrang hrang hawn tum a ni bawk.

Lunglei District Chapchar Kut 2025 Organising Committee chuan Chapchar Kut chu mipui kut, hlimna kut a nih ang ngeia kim tak leh hlim tlang tak leh inrem tlang taka hman chu organising committee duh dan leh Chapchar Kut thil tum a nih angin boruak ṭha tak hnuaia Chapchar Kut hman a nih theih nan sawrkar department, pawl, mimal leh District mipui zawng zawng thawhpuina leh ṭawiawmna an ngen a. Lungleia Chapchar Kut hman turah hian hnam ziarang tar lang thei tur zawnga inthuam a, hlim taka Kut ṭheuh turin Lunglei District mipuite an sawm a ni.

Lungleiah District Social Justice Assembly an ṭhu khawm.

Lunglei,1.3.25: Nimin khan Lunglei District Social Justice Assembly chu Additional Deputy Commissioner Pu James Miahlung kaihhruaiin Lunglei DC Conference Hall-ah an ṭhu khawm a. Lunglei District chhunga Ministry of Social Justice & Empowerment (MoSJE) scheme hnuaia hma lakna kalpui dan an thlir ho.

He hunah hian Mizoram sawrkar hnuaia Social Audit Unit (SAU) team aṭangin India sawrkar MoSJE hnuaia ṭanpuina dawngtu Lungleia centre/home pahnih - ruihhlo ngaite enkawlna leh chhawmdawlna hmun, Integrated Rehabilitation Centre for Addicts (IRCA), Women Anti-Drug Association (WADA) Centre, Lunglei leh kum lama upate enkawlna hmun, Senior Citizen Home, Thutak Nunpuitu Team (TNT) Theiriat te an endikna report ngaihthlak a ni a. He'ng centre/home pahnih kalpui dana ṭha leh fakawm an tih lai te, duhthusam tawk lo lai leh hmasawnna tur hrang hrangte sawi ho niin, sawrkar laipuiin a beisei ang tak leh ṭha taka kalpui zel a nih theih nana thil pawimawh leh ṭul hrang hrangte sawi ho a ni.

He ṭhut khawmah hian sawrkar official-te, home leh centre ai awhte leh tlawmngai pawl hrang hrang ai awhte an tel a. IRCA WADA Centre leh Senior Citizen Home TNT Theiriat te'n harsatna an tawh hrang hrang tar lan zingah MoSJE aṭanga an pawisa hmuh ṭhin kum 2021 hnu lama an hmuh zui theih tak rih loh avanga harsatna an tawh thu tar lan tel a ni.

Chairman Pu James Miahlung chuan social audit chu thil tihsual zawn chhuah tumna aiin hmasawnna leh kalphung dik leh ṭha zawk a awm zel theih nana ruahman zawk a nih thu tar langin, centre/home enkawltute chu SAU lamin rawtna an neihte leh District Social Justice Assembly-a sawi honate chu hlawkpui leh hmasawnpui tum ngei turin a chah a ni.