Lungleiah LMC Board of Councillors an ṭhu khawm./ Chief Minister in Kidney 360 Dialysis Center a hawng.

Lungleiah LMC Board of Councillors an ṭhu khawm

Lunglei, 2025 Ṭomir thla ni 2: Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin BoC Meeting Hall, Convention Centre, Lungleiah an ṭhu khawm.

Vawiina LMC BoC ṭhut khawmah hian Finance changtu Executive Councillor Pu Zorinsanga Hmar chuan kum 2025-2026 atana LMC sum hmuh dan tur leh sum hman dan tur ruahmanna, budget chu pharhin, sawi ho a nih hnuah lungrual taka pawm a ni a. LMC Budget 2025-2026 atan hian cheng nuai 2,463.97 (₹ 24,63,97,208/-) ruahman a ni a. Tax and Non-Tax Revenue aṭangin cheng nuai 2,086.73 (₹ 20,86,73,000/-) leh Capital Receipts-ah cheng nuai 377.24 (₹ 3,77,24,208/-) hmuh beisei a ni.

LMC BoC ṭhu khawm chuan kumin 2025 aṭang hian LMC area-ah Garbage Free City Lunglei Project kalpui tura relin, ward number 1, 2, 9 leh 11 te pilot project atan ruahman a ni a. Kum tin ward dangah kalpui belh zelin, kum 3 chhungin ward 11 tuam chhuah tum a ni a. State sawrkar sum leh Urban Local Body sum aṭanga hma lak dan ngaihtuah ni se, tih a ni. 

State sawrkarin LMC chu property tax 2024 -2025 khawn phalna a pek tawh angin inbuatsaih mek a nih thu tar lan niin, property tax khawn tur chungchang hi mipuiah inhrilhfiahna neih hmasak ni se, property tax khawn chu mipui hnenah a luang let tih mipuiin an hriat chian theih nan talkshow leh thil dang hmangin mipui zirtir ni se, tih a ni a. Property Tax khawn dan tur inkaihhruaina siam rem nghal niin, Ward Committee kal tlangin Ward Development-ah 80%, Local Council kal tlanga hmasawnna hna thawh nan 15% leh LMC-ah 5% kal tura siam rem a ni a. Dan hmasaah chuan Ward Committee-ah 80%, LC-ah 5% leh LMC-ah 15% tih niin, LMC leh LC te chanpual hi thlakthleng a ni.

Nikum chhung khan parking fee aṭangin ₹ 18,31,349/- khawn chhuah a nih thu tar lan niin, LMC BoC ṭhu khawm chuan hei hi a bo a bang awm lova mipui tana hman ni se tiin, Lunglei khawpui chhung traffic marking leh mamawh bakah kawngpui siamna atan hman ni se, an ti a. LMC huam chhunga ui leh vawk khuahkhirhna dan hman lailawk tur chu pawmin, LMC hnuaia co-terminus-a thawkte Medical leh TA bill theihna tur ruahmanna an pawm bawk.

Vawiina LMC Board of Councillors ṭhut khawmah hian elected councillor sawm leh pakhat (11) an tel kim a. LMC Chief Executive Officer Pu Donny Lalruatsanga leh Secretary Pi Zoramdini te'n an telpui bawk a ni.

====================================

Chief Minister in Kidney 360 Dialusis Center a hawng.

Lunglei the 2nd May 2025: Vawiin khan Aizawl Bazar Bungkawn, Pu Khawtinkhuma Buildingah Chief Minister Pu Lalduhoma chuan Kidney 360 Dialysis Centre a hawng.

Chief Minister chuan, IPS ka thawh ve laia kan hmaa lo tling tawh, min kaihruaitu Pu C. Dothanga, IPS te chhungkaw din Kidney 360 Dialysis Centre kan hawng hi lawmawm ka ti a. Chhungkua ang maia lo khawsa ho tawh thin kan nih avangin in sawmna ka hnar ta lo a ni.

Hriselna hi mihring rohlu a ni a, mifing apiangin an ngaipawimawh thin. Mizote pawh kan fing ve tial tial a, kan hriselna kan hlut tial tial dawn. Chuvangin health facility changtlung zawk kan mamawhna a sang zel a, sawrkar pawhin theihtawp kan chhuah a. Kan ICU te chu hnathawk theiin kan siam deuh vek tawh a, thawktu pawh kan la thar nasa a ni. Mahse sawrkar hmunhmain min daih seng lo va, Private clinic leh private hospital lam te thawhpuina kan mamawh a. Anni an lo inthuam tha ve zel hi a lawmawm hle. Vawiina kan hawn pawh hi mipuite mamawh em em a ni. Mizoram Universal Healthcare Scheme empanelled centre a nih bakah private tan pawh a tih man a lo tlawm bik leh zel a. Mi harsa zawk te ban phak facility changtlung tak, Super Specialist thutchilh ni bawk si a nihna hian he centre hi a tihlu a ni, a ti.

Pi Grace Lalmalsawmi, Director chuan lawmthu sawiin inkhawm a khar a ni.

Motor chesualah Lunglei Bazarveng Tlangval a hmunah boral.

Motor chesualah Lunglei Bazarveng Tlangval a hmunah boral.

Vawiin chawhnu dar 2:00  vel khan Jio motor Bolero chu Lunglei atanga kalin Tawipui North II luh hma  kawngthlanga tlan liamin a chesual a. He motora chuang C. Lalremtluanga 29 (hmang mek ) Tluangtea tia koh A pa  C Lalbiakenga, Bazarveng Lunglei,(Kikawn) chu thui tak a lumpuiin hmanni lawka Truck accident la phawrh chhuahloh zuk delh chiahin Tluangtea hi a delh ni a sawi a ni a, a hmunah hian a boral nghal a ni. Driver Lalbiaktluanga kum 50 vel nia rin chu hliam na tak nei chungin a lo vak chhuak a, an liam chhan hi hriat a la nilo a ni.

He lai bul hnai Tawipui North II khawtlang mipui leh  YMA ten hma la vatin dar 4:00 vel khan Tluangtea ruang hi an la chhuak a, Tawipui North II YMA ten khuaah la lutin kuang an siam sak nghala, Driver Lalbiaktluanga hi Lunglei lamah phurh phei nghal a ni a,  Police te thlengin a tul ang te an ti nghala, chanchin buatsaih lai hian Tawipui N II-ah an la awm mek a ni. Tluangtea hi Reliance Jio Lunglei a Jio Point Lead (JPL) hna thawk lai a ni a, Duty-in Lawngtlai lama kal tum an ni a, an motor hi Private motor niin Jio Company hian a hire nia sawi a ni. A ruang hi an in Lunglei Bazarveng a phurphei a ni ang.

Tv Tluangtea hi tlangval fel tak niin KOhhran ah pawh mi tangkai tak, talent nei tha, music pawh thiam tak a ni a, nizan pawh khan a nu te group, BKHP Group Zai Kikawn te keyboard tumin hla a zirpui a ni. Unau pathum zinga upa ber niin anau te nula 2 leh a nu leh pa te a kalsan a ni.

Tawipui N II

ZUNZAM NEWS (2.5.2025 )

DCSO Lungleiin in LPG commercial cylinder hmanna tur a ngenna a siam

Lunglei 2.5.2025 : Lunglei District Civil Supply Officer Pu Lalremruata Sailo chuan mipuite hnena hriattirna chhuahin, Mizoram hmun hrang hrangah LPG commercial cylinder hmanna tur hotel, restaurant, zirna in, biak in leh vantlang ruai buatsaihna hmunah te LPG domestic cylinder hmang an tam hle tih hriat a nih thu leh hei hi dan phalloh zinga mi a nih thu a tarlang a. 

Dan kalha chetna hi tihtawp a nih theih nan FCS&CA Lunglei chuan hotel, restaurant, zirna in, biak in leh vantlang ruai buat saihna ah te danin a phut angin LPG commercial cylinder chauh hmang turin a ngen @@ Nimin khan MINECO, Aizawl a Pu Lalnghinglova Hmar, Sports minister officeah Samagra Shiksha Mizoram leh Mizoram State Sports Council (MSSC) te chuan Grassroots Sports Development Programme (GSDP) kalpui dan tur inremna, Points of Agreement an ziak fel.

Synod Hospital Durtlangah Financial year liam ta chhungin damlo awm man pe thei lo mi 882 tana Charity Fund apek sak zat chu cheng nuai 196, sing 3, sang 5 leh 969 a ni.

Synod Hospital Board thukhawm chuan sawrkar kum kal ta chhung khan damlo awm man pe theilo mi 882 te chu Charity Fund atangin atangin pek sak annih thu an tarlang a, heng zingah hian Presbyterian Kohhran mi 626 niin Charity Fund atang cheng nuai 136, sing 7 sang 5 leh 102 pek sak an ni a, Presbyterian Kohhran nilo mi 256 te tan Charity Fund atangin cheng nuai 59, sing 6, leh 867 pek sak a ni bawk. Synod thuchhuah tarlan danin Charity Fund pe theilo zingah hian Presbyterian Kohhran za zela 69.65 chu pek sak an ni a, Presbyterian Kohhran nilo za zela 30.35 pek sak an ni bawk.

Synod Hospital hian kum tin Charity Fund pual hian damlo awm man pe theilo te an lo tanpui tawh thin a, nikum khan damlo 863 te awm man chu Charity Fund atangin cheng nuai 218 sang 4, 753 an lo pek sak tawh bawk a ni.

===============

Rail line check tu engine chuan Sairang a rawn thleng tawh 

Bairabi atanga Sairang rel kawng km 32 a thui hi July a zawh fel hman tura tih a ni a,  hun bi tuka zawh hman tumin Railway lam pawh an thawk ngawrh hle nia thu dawn a ni. Commission of Railway Safety chuan nikum August ni 22 khan bairabi atanga Hortoki km 16.725 chu bungrua leh passenger kal phalna a pe tawh a. Rail line check tu engine chuan Sairang a rawn thleng tawh a. Nimin tlai khan General manager Northeast Frontier Railway special train chuan rawn enfiahin Sairang railway station athleng a, CRS(commission of Railway safety ) ten May ni 27 ah final inspection an rawn nei leh anga, CRS ten green flag an pek hnuah a pangngaiin rel hi atlang thei tawh ang. CRS tawp ber hawn anih tawh chuan passenger phur pawh a tlan thei dawn tihna a ni.

Bairabi- Sairang rel kawng siam mek ah hian Rel station pali [ Hortoki, kawnpui, Mualkhang leh Sairang Suihhmui te a awm dawn a, leihnuai kawng (underground tunnel) 32 awmin lei (brifge) lian 55, lei tenau 89 a awm dawn a, Lei sang tak 6 awmin a sang ber tur chu metre 114 a ni a, lei 5 chu main road chungah a kal a, 4 chu main road hnuai ah a kal a ni.

Mizo zirlai tam takin an lo chhawr tangkai tawh Lynchpin leh Zalen buatsaih Edufest 2025 - The Aizawl Career Fair chu May ni 6th-7th,  2025 hian Millenium Center, Rooftop ah 9AM-5 PM chhung hian neih a ni leh dawn.

"Pawn lam college-a zirna dap mek te tan zirna In (University/College) a thawkte ngei, a kara midang tla zep lo a hmaichhana indawr tir hi Edufest in atum ber chu a ni a, internet lamah thil tam tak hriat theih ni mahse hmaichhan ngeia indawr tluk a awm lo," tiin huaihawttu lam chuan an sawi a.

A rawn tel tur zirna In te hi UGC/AICTE accredited vek niin Paramedical courses, nursing , pharmacy, engineering civil, petroleum, computer science, agriculture, humanities, science, commerce, allied science, graphic designing, medical, engineering, management, fashion desinging (NIFT) leh a dangte dawr theih an ni dawn a. College thenkhat hian scholarship an pe thei a, spot admission bakah free counselling a awm leh bawk ang. 

Edu Fest hi Mizo zirlai tam takin an lo chhawr tangkai tawh a, phaia college leh univesity-ah admission te hmuin hna hmuh kawngah an tangkai pui tawh thin a ni.

Chief Ministerin Sawrkarah aikal la an awm tawh loh kan beisei a ti

Lunglei, the 2nd May 2025: Chief Minister Pu Lalduhoma chuan nimin khan Secretariat Conference Hall-ah Environment, Forest & Climate Change Department te hnathawh dan thlirpuina Review Meeting a nei.

Chief Minister thusawi thenkhatte:

1. Sawrkarah aikal la an awm tawh loh kan beisei a. An la awm chuan action lak nghal tur. Hun kan inpe rei tawk tawh.

2. Officers thenkhat sawrkar facilities mahni kawl theih chin (entitled) bak lo kawl kan la awm chuan, kan sawi tawh thin angin lo kir vek se a finthlak ang.

3. Biometric attendance tha taka kalpui kan duh a. Sawrkar hnathawkte hian hun kan vawng dikin kan hlawh phuin hna kan thawk tur a ni. Service Review Committee te pawhin hna an thawh tawh hlawm kan beisei a, chhawr tlak ngang loh hnathawktu chu special pension kha pek mai tur a ni.

4. Hmasawnna hnathawh dawnah forest clearance hi lak zel a ngaih avangin, hmasawnna hnathawh chak taka kan kalpui theih nan lo tanpui thin turin ka ngen che u a. Kan ram hian hmasawnna hmel thar hi hmu thuai thuai se kan duh a ni.

5. e-office hi kalpui tumin kan inpuahchah mek a. Sawrkar hnathawkte kan intuaihriam ve reng a tul tih hria ang u. Tin, contract inpekna kawngah miin a duhsak zawng ringawt a pek thin loh nan Integrity pact kan siam a, zawm vek kan tum dawn nia.

6. Project reng reng hi Planning Department hriatpui lo va kalpui kan rem ti lo va. Planning Department ah thlen zel tur a ni. Department ten inhre tawn lovin project inang tak tak te, inhnaih tak tak te kan kalpui hian ramin a hlawkpui tur angin a hlawkpui loh phah thei, tih te a ni.

Lungleiah kawng siam nan Tuialhthei hralhna atangin Rs nuai 18, sing 7, zaruk 60 Cess hmuh a ni

Lungleiah Tuialhthei hralhna atangin  kawng siam nan Rs nuai 18, sing 7, zaruk 60 (18,70,660) Cess hmuh a ni

Lunglei 1/5/2025: Pu Lalrothanga, Deputy  Commissioner Taxation Deptt.Southern Zone Lunglei chuan kum 2024  Sept atang  khan Road Maintenance Cess atangin Rs 18,70,660/-an hmu tih sawiin  Social Infrustructure and Services Cess nen an  hmuh in zat in  Rs 18,70,660/- bawk a ni  a, hei hi Lirthei neitu ten Petrol/Disel an thunna atangin a ni, a ti.  

Lirthei neitu te hian Tuialhthei an Motor-ah ani emaw Bur a an dawh anih pawhin  Litre 1-ah Rs 2+2= Rs 4 zel khi mi head atan khian an chawi a, chu chu Mizoram Sorkar sum bawm a chhun luh tur a ni. Tihian kum 2024  September thla atanga  Tuialhthei lei nan a Lunglei mipui leh midang ten Taxation Deptt.Lunglei a chhiah an chhunluh zat chu Cheng nuai 37, Sing 4, sangkhat, 320(Rs 37,41,320/- )a ni. Hetihlai hian Lunglei khawpui  chhung a Petrol Pump lian deuh deuh, MIZOFED  Pump, K. Siangling Filling Station, Jedaz Feeling Station leh Punte Filling Station Tlabung te erawh chuan Aizawl North-II Division-ah Cess(chhiah) hi an chhunglut thung a ni. Lunglei Taxation Office a Cess chhunglut te hi HPCL leh BHEL Company hnuai a mi te chauh an ni.

Deputy Commissioner hian April thla kan hman liam takah khan Road Maintenance Cess atang in  cheng Nuai 7, sing 4, sang 9 zakua sawmruk pahnih (Rs 749,962/-) leh Social Infrustructure and Services Cess atangin Rs 749,962/-hmuh a ni tih sawiin a pumpuiah cheng nuai 14, sing 9, sang 9, 924(Rs 14,99,924/- )a ni a ti a, April thla a hmuh ni mahse kumin ami a la tel lova, quarterly a chhunluh thin anih vangin January,February leh March thla a Cess lut tur chu May or June velah pawh a lo lut ang tiin a sawi.

Taxation Deptt Lunglei hian a pumpuiah Head hrang hrang atangin kum 2023-2024 chhung khan Chhiah Rs 9,11,90,173/- hmu in kum 2024-25 FY liamta chhung khan cheng vaibelchhia 29, nuai 33, sing 3, sang khat ,zakua paruk(Rs 29,33,31,906/-) an hmu a, kum kalta an khumna hi Rs Vbc 20, nuai 44, sing 9, sang 5, zali 77  a ni.

Taxation Deptt.Lungleiah hian Officer 3: Deputy Commissioner-1, Asst.Deputy Commissioner-1 leh STO-1 awmin STO hian Lunglei Dist.chhunga dawr zawng zawngah Sorkar a luttur chhiah khawnin a vak chhuak reng a, an thawhchhuah ngaihtuah chuan an indaihlo hle niin kan palai chuan a hmu a  ni.

ZUNZAM News chuan MIZOFED  Pump, K. Siangling Filling Station, Jedaz Feeling Station leh Punte Filling Station Tlabung te chhiah hmuh  zat te hi zawhchhuah leh a la tum a ni.

MPS a tling thar Nikhatah darkar 8 vel lehkha zir thin Zodinsanga Khiangte

MPS a tling thar Nikhatah darkar 8 vel lehkha zir thin Zodinsanga Khiangte

MPSC in Combine Competitive Exam-2024 a buatsaih a, nimin mai a result a tih chhuahah Lunglei Centre atanga MPS a  in ziak tling, Ranking No 29-na Zodinsanga Khiangte S/o Dr. K. Lalsanga & Pi Lalthakimi,  Chanmari, Lunglei kawm lawk ang aw..

“Zodin” tiin a rualpui leh a thiante chuan an ko mai thin a, Class II hi Holyfaith School Lungleiah kal in F.LKM  School Lungleiah Class III a zir a, Class IV hi  Assam Rifle School Shillong-ah zir in Class VI hi Sainik School, Imphal-ah zir lehin Class XII thleng Sainik School-ah hian a kal a, Science subject a la a, Distinction-ah a pass. Sainik School-a a luh lai atang hian Civil Service hi a tum a ni a,  hei vang hian Sipai Officer nih aiin Civil Service nih a tum a,  St. Edmunds College Shillong-atangin Commerce Subject-ah a Graduate ta a ni.

Sainik School-ah lut mahse Army lamah chuan luh a tum hran lova, an inenkawlna erawh tha a tiin a Career chhertu ber ni in a hria a, curricular activities an tih thin chuan a nun a kaihruaiin Combine Competitive a Exam thleng hian a pui niin a sawi. MPSC buatsaih Combine Competitive hi a vawi 2 beihna a ni a, MPS hi a first Choice a ni.

An chhungkaw thla

Exam tur a a inbuatsaih nan hian nikhatah chawhrualin darkar 8 te hun a hmang thin a, an inah hian PG Hostel an siam a, chutah chuan room pakhat chu lehkhazir nan a hmang a,a inkhung deuh chawt a ni ber.

Zodina hian UPSC  buatsaih Civil Service exam chu a tum lian ber a nih thu sawiin Delhi-ah te pawh Rau’s Coaching Academy-ah a lo kal ve tawh thin thu a sawi a, MYC in Supper IAS Coaching a thlan ALS Academy-ah erawh a zir ve hran lo. ‘Enga tinge ALS-ah i zir ve loh?’ tih zawhna chu ‘Delhi khaw pawn deuh a  awm a ni a, khawchhung Environment awmna deuh zawk a zir ka duh vang a ni” a ti. Delhi-a Coaching a kal zawh hian Lunglei Chanmari-a an in ah hian MPSC buatsaih Exam hmachhawn tur hian a in khung a, study material hrang hrang pawh Internet kaltlang in harsatna awm lovin a in buatsaih thin  a ni.

A hlawhtlin naah hian a nu leh pa te support-na lawmawm a tih thu a sawi a, “Ka Goal ka hre chiang a, chu chuan min pui hle a ni’ a ti. Sports lam te pawh ti ve thin in Football a tuina ber a ni a, Messi a ngaisang a, Mizoah Lallianzuala Chhangte a ngaisang hle bawk.

Mizoram Police in enkawl dan tha a ti a, State dang Police nen a khaikhinnin Mizoram, Police te fakawm a ti a, hmasawnna tur erawh a awm a, abik takin Technology lamah  hmasawnna tur a tam niin a hria. “Mizo zirlai te chuan lehkhazirah Vai kan tluk lo a, vai ho chuan an zir nasa a, 'nasa' tih piahlam a ni” a ti. Kohhran leh khawtlangah inhmang nasa lutuk lo mahse Chanmari Presbyterian Kohhran KTP-ah chuan zaipawlah a tel ve zeuh zeuh thin.

Competitive Exam-ah Essay a pawimawh a, writing practice a tih nasat thu leh a ziah zat tur phek a bithiah hmasa a, chumi phek mil chuan ziah  tur siamin ‘Minute 20 chhunga zo turin ka in buatsaih’ a ti. Tun tumah khan Essay-ah ‘Destination of Education in a Class Room” tih chu an topic a ni.Zodina hian Sam 121:1   “Tlang lamah te khian ka mit ka len chho ang...” tih chu a chang duh ber a ni.

Zodina nu, Pi Lalthakimi chuan a fapa in hlawhtlinna a chang chu Pathian vang liau liau a ni tih a  sawi a, tleirawl sual nei lo a niin Niak Inah pawh lam kual ver thin a ni, tin,  inchhungkhur chet engkim a tih tir vek thin thu leh nizan mai a MPS-ah a tling tih an hriat pawhin inchhung a la phiat fai a, thawhhreh a nei lo a ti. Christmas leh  hun puiah pawh chhungkua a hun hmang thin an niin a thian te nen a hranpa a hun an hman ngai loh thu leh lirthei pawh lawm lo tak niin Car tak ngial pawh la khalh thiam thathum lo a ni a ti a, ‘MPS-a a tlin lawm nan Cell Phone thar erawh kan lei sak ve ang chu..’tiin hlim takin a sawi.

Total Band neih tur an thulh. ZPM Lungleiin thuchhuah an siam zui nghal.

Total Band neih tur an thulh

Lunglei 1/5/2025: Vawiin ni 1 May, 2025 (Ningani) chawhnu dar 12:30 p.m khan Pu Johan Hmangaihzuala Ralte President MZP Hqrs.:Lunglei kaihhruaia Emergency Meeting chuan ATL road sum pawhpen duh loh lantirna chungchanga an kal zel dan tur an ngaihtuah a,  Meeting chuan sorkar atanga an thil phut ATL road siamna tur sum pawh pen dah let tura a ngiat cheng vaibelchhia 44.89 aia tam cheng vaibelchhia 58.99 an dahna order bakah CRRI mithiamte’n zirchiang tura ruahmanna an chhawp chhuah leh tuna sawrkar in an sum dah baka a daih loh chin zawng pawh dah zel a nih tur thu an dawn avangin meeting chuan ngun taka ngaihtuahin Total Bandh neih tura ruahmanna a lo siam tawh chu a 'Call-Off'.

MZP Hqrs.:Lunglei President Pu Johan Hmangaihzuala chuan hmalakna an neih chhung zawng a theihtawp chhuaha thlawp tlat tute leh thil pek pe tute zawng zawng chungah lawmthu a sawi a. Lunglei leh Chhim mipuite tanrualna vang liau liau a ni  a ti. Mizo Zirlai Pawl Headquarters: Lunglei chuan hmalakna a neih chhunga mipuite leh khualzinte  harsatna a thlen avangin an hriatthiamna a ngen a. 

    Hmalak a nih tan tirh atanga theihtawp chhuah a thlawp tlattu pâwl hrang hrangte leh Chhim mipuite inpekna vang liau liau a hlawhtlinna hi chang a ni tih in hriaiin, an chungah lawmthu kan sawi tak meuh meuh a ni, an ti. Hetih rual hian MZP Hqrs.: Lunglei chuan Sawrkar chu a intiamna-ah a ding nghet em tih a enfiah in a enzui zel dawn a. Chhim mipuite tana kawng tangkai tak ATL road hi an siam tirh atanga a tawp thlengin a vil zui zel dawn tiin thuchhuah an siam.

ZPM Southern Headquarters : Lunglei chuan thuchhuah siamin ATL Road chung changa Chief Minister chunga an lawmna thu chhuah an siam.

Dated Lunglei: the 1st. May. 2025 : An thuchhuahin a tarlan danin ATL Road chungchanga ngaihdan in ang lo awm avanga hmalakna inhnerem lo avangin Chhim mipuite leh MZP Hqrs Lunglei ten he kawng atanga sum tlingkhawm  cheng Vbc 90.69 atanga Vbc 45.89 ruahman fel anih hnuah a bak la awm Vbc 44.89 pawh pen nia sawi chu Mizoram Chief Minister Pu.Lalduhoma’n he kawng hi tha taka siam a tumna leh hemi atana CRRI ten Estimate siam se cheng Vbc. 100 chuang pawh a tul anga Sanction zui leh tura a ruahmanna lo neih chu nghah zawh a nih tak loh avangin Chief Minister Pu.Lalduhoma chuan cheng Vbc 58.99 a rawn ruahman belh ta mai hi  ZPM Southern Hqrs Lunglei chuan lawmawm kan ti tak zet a, pawhpen nia an sawi cheng Vbc 44.89 aia tam daih mai ruahman sak kan ni hi Chhim mipuite min duhsakzia chiang takin a tilang a ni.

ATL road siamna tura sum sanction PWD manual angin  cheng Vaibelchhe 104.88 lai mai a ni chho ta a. Hei bakah hian he kawng tlo leh tha zawka siam anih theih nan Central Road Research Institute (CRRI) ten Scientific Researh an neih theihna tura ZPM sawrkarin hma alakna chu kalpui chhunzawm zel tura tih a ni hi kan Chief Minister chungah lawmthu kan sawi nghal a ni. ATL Road chungchanga Chhim bial mipui harsatna lian tak mai sukiang tura Chief Minister Pu.Lalduhoma bakah kan Chhim lam MLA te leh kan Party in hma an lakna hi ropui kan tiin, ZPM Southern Hqrs. Lunglei chuan an chungah lawmthu kan sawi a, kan chhuang tak zet zet a ni.

ATL Road chungchanga  rilru leh ngaihtuahna senga veitu zawng zawng te leh kan NGO zawng zawng te chungah pawh ZPM Southern Hqrs Lunglei chuan lawmthu kan sawi bawk a ni.

ZUNZAM NEWS ( 1.MAY.2025 )

Mizoram Public Service Commission chuan Mizoram Civil Services (Combined Competitive) Examinations - 2024 result a tichhuak a, Samuel Malsawmzuala (27), S/O JH Laldingliana, Serchhip Tuikhuah veng chu topper a ni.

Samuela hian Marian high School Serchhip atangin HSLC a pass a, Mizoram pumah palina a ni a, St, Pauls atangin HSSLC pass in Science stream ah pahnihna a ni a, PUC ah B.A zawmin Arts line ah akal a, economics subject ah topper ani leh a, University of Hyderabad atangin M.A zo lehin economics ah bawk topper a ni a, M.A a zawh hnuin Delhi ah coaching a kal a, Mizoram Civil Services (Combined Competitive) Examinations - 2024 ah avawi khat nan exam beiin a inziak tling a, topper ah a inhlangkai ta a ni.

Mizoram Civil Services (Combined Competitive) Examinations - 2024 atan a, dilna thehluttu zawng zawngte tan PreIiminary Examination chu Ni 27.06.2024 khan Aizawl khawpui chhung Centre hrang hrangah leh District Headquarters zawng zawngah buatsaih a ni. Tun tumah hian Applicant 5,854 awmin, Preliminary Examination paltlang a, Main Examination hmachhawn thei chin hi an vaiin mi 346 an ni a, chung zinga mi 344 te chu un-reserved candidate niin, Reserved Candidate (PwBD) mi 2 an awm a ni.

Preliminary Examination paltlang mi 346 atangin mi 319 ten Ni 22-25 October, 2024 chhung khan MPSC Examination Hall-ah leh Govt. Higher Secondary School, Lunglei ah Main Examination hi an nei a ni.

Ni 28th March, 2025 khan Main Examination Written Results tihchhuah ani a, MPSC Guidelines hman mek angin Personal Interview (Pl) nei thei tur hian mi 68 an tling a. Personal Interview hi Ni 22.04.2025-30.04.2025 chhungin buatsaih a ni a, candidate mi 68 te chu he Interview hmachhawn tura koh anni a, an vaiin an inlan vek a ni. Nimin khan Personal Interview zawh niin, result chu tihchhuah nghal a ni a, Mi 34- te chu tlinga puan an ni ta a ni.

Post awm dan chu MCS ah 14 bakah PwD atana reserve 1, MPS - 8, MF&AS - 8, MIS - 3 a ni.  MCS a tlingte chu Samuel Malsawmzuala Serchhip, Lalhriatpuii Phutin Serkawn Lunglei, Vanthangpuia Nursery veng, Aizawl, Lalawmpuia Ramhlun North, Aizawl, J.Lalawmpuia, Kulikawn Aizawl, Lawrence Lalhlanthara Sesawng, Isaac Malsawmtluanga Zemabawk, Aizawl, C.Lalchhandami Kanan veng, Aizawl, Lalnunchhani Hnamte Sateek, Lalrinchhani Lawngtlai bazar veng, Lalchhuanawma Ralte, Durtlang, R,.Lalrinhlua North vanlaiphai, Lalrindika Salem veng Aizawl. Lalhruaizela, Dinthar Aizawl bakah Lalnunfela Chhangte Tlangnuam vengthar te an ni a.

MF&AS pekte chu Emily Lalnunthari Ralte Khuangpuilam Kolasib, C.Lalremsanga Bawngkawn South Aizawl, Zothanzuala Zote Reiek, H.Zoliansanga Upper Republic, Benjamin Lalrinawma Bungtlang South, Lalhmingmawia Ramhlun Venglai, Ramtharlawmi Thuampui Aizawl, C.Ramdinpuii Zorem Serkawn te an ni. 

MPS pek te chu Lalthlamuana Serchhip vengchung, Ashish Upadyaya Aizawl Venglai, PC Lalchhanchhuaha Tlangnuam Aizawl, Zodinsanga Khiangte Chanmari-II Lunglei, Albert Malsawmtluanga Mission veng Aizawl, B.Lalthakima Champhai Zion veng, Andrew C.Zonunmawia Bethlehem veng Aizawl, Andrew Laldosanga Ralte- Reng<si Kanan veng Aizawl

MIS a tling te Lalchungnungi Lakher, Ainawn veng,  Teresa Vanmalsawmi Mission veng Aizawl, R.Vanneihtluanga Tlangnuam veng Serchhip, te an ni.

Police ten Meth an man chhuah dan  an puangzar

Mizoram Police chuan an hnuaia CID (SB) ten niminpiah a methamphetamine kg. 47.511 an man chungchangah thuchhuah an siam a.Mizoram Police tarlan danin, CID (SB) te hian an thu dawn bawhzuiin April 29, 2025 zingkar atangin Tuirial leh Zemabawk inkarah operation an nei a ni. Champhai atanga Aizawl pan mek lirthei pahnih chu chawhma dar 11:30 khan Zemabawk North Presbyterian Biak In bulah lo ti dingin uluk taka en fiah an nih hnuah heng a hnuaia tarlan te hi lirthei pahnih atang hian man a ni :- 

1. Methamphetamine mum - tel 20, a belhkhawma kgs. 18.939. Heihi KIA Seltos car B/R No. MZ 01 AD 6157, T. Vancheuliana (37) s/o Thangchhunga, Champhai Vengthlang khalh body lining leh dashboard beam chhunga char hnan atangin man a ni. 

2. Methamphetamine mum - tel 29, a belhkhawma Kg 28.572. Heihi KIA Sonet car B/R No. MZ 01 AC 3237, Samuela (38) s/o Tlangluta, Champhai Vengthlang khalh body lining leh dashboard beam chhunga char hnan atangin man a ni. Methamphetamine man belhkhawm hi Kg 47.511 niin Rs 6.176 crores man hu nia chhut a ni. 

Heng ruihhlo, a phurhna lirthei leh a khalhtute hi dan hnuaiah man nghal an ni a, Special Narcotic PS (SNPS) kutah hlan an niin, SNPS Case No.16/25 Dt. 29.04.2025 u/s 22(c)/25/29(1) ND&PS Act ziah luh a ni.

Everhome Pro Volleyball, LPS Arena Falkland a khelh zan hnihna ah Khawbelin Hunthar set hloh lovin champion lai Hunthar  an hneh.

Ashwal Rai chuan Khawbel tan a khelh vawi khatnaah point 32 hmuin vawi hnih chiah a tisual a, 25-21, 25-20, 25-23-a an chak rualin Kuriz Player of the Match-a thlan a ni.

Season liam ta khan Anurag Rawat chuan Hunthar an champion theih nan a thawh hlawk hle a, tun tumah erawh thil awm dan a danglam a, point 34 thawk chhuak mah se 13 hlohin set khat mah la lovin league bul an tan a ni.

Set khatna tir atangin Khawbelin hma an hruai a, Set hnihnaah a hma aiin Khawbelin inkhel an thunun hneh a, Huntharin an hnaih zo lo tluan a, point ngaa inthlau chungin Khawbelin set an la zawn a. Hunthar lamin set thumna lak ngei tumin an nawr  a, 22-19-in an sang hman a, mahse set thumna pawh an hloh leh ta a ni.

Champion lai lakah set thum faia an chak nghal avangin Khawbelin hlim takin hnehna an lawm a, Zirtawpni zanah Khawbelin an khel leh dawn a, ani ang bawka Pro Volleyball team thar Sihphir an hmachhawn ang. Inrinni zanah Huntharin anni ang bawka bultan fuh lo leh Tuichangral laka tlawm tawh TNT an khelhpui ve thung dawn a ni.

Kumin-ah ruihhlo vanga thi an tam tawh

Mizoramah kumin thlengin ruihhlo vanga thi mi 1,895 an awm tawh. Excise & Narcotics dept chhinchhiah danin kumin-ah ruih hlo vanga thi mi 16 an awm tawh a. Ruihhlo vanga thi te hi mipa 14 leh hmeichhia 2 an ni a, heroin leh damdawi dang tihpawlh hman sual vanga thi an ni. Hetih lai hian nikum 2024 chhunga ruihhlo hman sual vanga thi mi 67 an awm a, mipa 58 leh hmeichhia pakua an ni a. 

Ruihhlo ti thinte thihpui tam ber hi heroin a ni a, a bak dang pawh hi heroin leh ruihhlo dang tikawpte an ni. Kum 1984 atanga kumin thlengin Mizo ramah ruihhlo vanga thi mi 1,895 an awm tawh a, chung zinga 1,667 chu mipa niin hmeichhia 228 an awm bawk. Chhinchhiahna atanga a lan danin kum 2004 kha ruihhlo vanga thi an tam ber kum a ni a, hemi kum hian damdawi hman sual vangin mi 143 an thi a ni.

Mizorama Casual Teacher lungawi lo ten  School an kal lo

Mizorama Casual Teacher Assn chuan an mahni lak dawna engagement order awm sa anga March thla hlawh an lak loh avang leh extension order chu kum khat atana pawhsei sak lova thla 6 chhung chauh pawh sei sak annih avangin sorkar laka lungawilohna lantir nan nimin khan sikul an kai lo. 

Mizoram Casual Teacher Assn thuchhuah tarlan danin an hna pawhsei sak chu kum khat chhung tura beisei anih laiin thla 6 chhung chauh pawhsei sak an ni a, heng bakah hian Extension order hi sikul kai hma ngeia chhuah fel tur anih laiin vawiin thlenga ala fel loh avang leh Office lam ngenna avangin dinhmun chianglo takin thla khat sikul an kal tawh an ti a, Dan in a phut ang thlapa lak Casual Teacher te chu zirtirtu dang te aia dinhmun tha lo leh ban mai mai theih a an ding chu sorkarin ngaihtuah leh rawh se tiin thuchhuah an siam a ni.

India leh Pakistan te chuan an ram boruaka thlawhna thlawh an in khapsak tawn.

India leh Pakistan te hian an airspace ah an in block tawn ve ve ta a, airlines piah lamah millitary flight te pawh ahuam tel vek a ni.

He thil hi Jammu & Kashmir, Pahalgam a Pakistan nena inkungkaihna nei firfiak ten tourist mi 26 an kahhlum boruak atanga kal zel ani a, Pakistan hian India sipai ten an beih mai ringin an inralring hle a ni.

India in Pakistan tana a airspace akhar tak avang hian Pakistan atanga Southeast Asia leh Oceania pan turte chuan, India an hel angai tawh dawn a, hei hian nasa takin thlawhna ah senso a tipung dawn a, India tan pawh international flight thenkhat Delhi a chhuak te chu a kawng a thui dawn a, hei bakah nghawng engemawzat a nei dawn a, flight hrang hrang ten an route an siam tha hlawm a ni.