Lungleiah BJP-ah member thar 15 lawm lut

Lunglei 6/6/2025: Vawiin chawhnu khan BJP Lunglei chuan an Office ah BJP sorkar kum 11 tlin lawmin Pu Vanlalhmuaka State BJP President chuan an party ah mi 15 a lawmlut nghal.

     Pu Vanlalhmuaka chuan in neilo tan In sing 5 chuang sak a niin ,gas connection neilo sing 6 pek a ni a, hmeichhia ten tui an chawi phal tawh lovin thingtlangah tui connection pek zel a ni a ti. Lengpui airport khu ZPM in IAF hnen ah Rs vbc 50 lekin hralh an tum a, mahse kan party leh zoram mipuiin kan duh lo a, PM leh Home minister hnen a kan thlen angin AAI in an la dawn ta a ni a ti. 

 He kum 11 kan sorkar chhung hian chhinchhiah tur thil tha tam tak a thleng a, Aizawl khawpui atanga Sipai sawn chhuah tumahin an thei lo, mipui duhdan sawiin Zokhawsanga sawn turin HM Amit Shah kan ngen a, sawn chhuah a ni mai.  BJP chuan kan ti ang kan tih hi kan ti thin a, chu chu kan danglamna a ni, a ti. Lawmluh te hi Lunglei khawpui a Pu Modi-a ambasador tur in ni ti a sawiin kum 2019 a memorundum kan thehluh angin 4 lane kan nei dawn ta a ti. 

    Pu Hmuaka chuan BJP chu an sakhua Hindu ah an rinawm a, sakhua a rinawm lo chu ram rawngbawl tlak a ni lo an ti hmiah a, keini pawh hi kan sakhuaah rinawm ang u a ti. Mizoram chhung kawng hi khawiahmah a chhe tur a ni lo tih sawiin Pukpuia Engineering College hi tan theih loh chuan central in a sak man Rs vbc 36 an thing tawh a ti. BJP kha lo thlang tling ula chuan MZU Southern campus in nei tawh ang a ti bawk. Mizorama Sorkar hrawn tawh te hian 'kan ti ang' an tih an ti lo zel a, he Modi sorkar erawh in a sawi ang a ti zel tiin a sawi. Development lo chu Pu Modi-a hian a buaipui lova, bawngsaah kan buai ve lo a ti. 

   He hunah hian Dr K Beichhua MLA pawhin ZPM sorkar ah Development holiday a awm a, BJP kan sorkar chuan development holiday a awm ve lovang a ti.

Youth Icon 2024 Top 10 tangkawp ten Charity Concert a buatsaih dawn.

LPS Vision Production leh Youth Icon 2024 10 te tangkawp chuan tunhnaia Mizoram chhunga leilung chhiatna thleng tuartute tanpuina turin naktuk June ni 7 zanah Charity Concert a buatsaih dawn.

Charity Concert hi zan dar 8 ah neih tan tur a ni a, programme neih chhung hian tanpui ngaite pui duh tan mipuite tan luanchhuahna hun siam a ni dawn a, tanpuina sum hi QR code hmanga pek tur a ni dawn a, Charity Concert-ah hian Youth Icon 2024 Top 10 te an zai dawn a ni.

Khuarel chhiatna tuartute puihna tura vehbur khawnsakna Charity Concert hi LPS Studio atanga neih tur a ni a, LPS 1-ah leh LPS Youtube Channel ah te Live-in pek chhuah a ni dawn.

PHE ten an tuisem tle nuar nuar an sawifiah

 

Lunglei 5/6/2025: Tunhnaia PHED Lungleiin Lunglei khawpui chhung hmun thenkhata tui an sem chu  tuizem a a luh hnuin a chunglamah tle ner nuar a awm a, heivang hian mi engemawzat chiai in an awm a, an tui dawn tawhsa te an leihbua a ni.

Hemi chungchangah hian vawiin khan  Pu V.Laldanmawia EE LWSM chuan a Office Chamber-ah Lunglei Dist. Consumer Association(LDCA) leh thuthar lakhawmtu te kawmin thil awmdan a sawifiah.  Pu V. Laldanmawia chuan tunlai hian tui a nu a, chuvanga chuan a tihfim nan a sawngbawl naah  chinai telh a ngai thin tih sawiin tui an thlitfim dan chipchiar takin a sawi a, ngaihthat lohna tur a awm hran lo a ti.

He hunah hian   Dr. ZR. Thasangzuala EE RW Lunglei pawhin tuntuma tui tle chung chang sawiin lo hmang hman an awm pawhin chhiatna a thlen a ringlo tih sawiin tui tih thianghlim nan a an hman kha tuiah a lo inchiahzawp ve lova, chuvang chuan thil tle niar niar angin a lo lang ta a, a hmel a mawi lovin hmuh a nuam lo tih loh chu mihring tan a hlauhawmna tur a hriat loh thu a sawi. Hetihrual hian kan tui dawn thin pangngai ang tho PHE chuan sem an tum leh tih sawiin  ngaihthat nan a duh apiangin an tui lo dawn tawhsa paih theih a ni a, mipui ngaihthatna an duh ber avangin PHED pawhin an tui pump tawhsa pawh an paih vek tih a sawi.

Hetianga tui pump tawhsa an paih leh avang hian mipui tan chiai tur a ni lo tih uar taka an sawi rualin ni 2/3 chu tui pump a mumal lo mai thei a, mipui ten lo hrethiam hram se an duh tih PHED hotu te hian an sawi nghal a ni. Consumer Assn hruaitu te pawhin PHED Lunglei in mipui rilru damna tur a hma an la nghal chu lawmawm an tih thu sawiin mipui te tan chiai na tur a awm lo ni a an hriat thu meeting-ah hian an sawi lang a ni.

Lungleiah World Environment Day pual Thingphun

 World Environment Day pual Thingphun

Lunglei 5/6/2025: Vawin  khan Northeast Initiative Development Agency(NEIDA)  leh Lunglei Forest Division te tangkawp chuan World Environment Day pual in Summual Zau, Vanhne ah thing tiak 100 an phun. Thingphun hma hian inkhawm tawi  neiin Summual Zau huan neitu te hnenah Summual zau tuihna humhalh leh ramngaw humhalh pawimawhna te, plastic lam chi hman tlem tulna te zirtir an ni a.Tuntuma thingphun te enkawl zui a, theihtawp lo chhuah tur leh thing phun uar zual zel tur in an ngen a ni. Heng thing phun tiak te hi Lunglei Forest Division ten an  tum sak a ni.

Dist. Cooperative Union ten Conf. an nei

Lunglei 5/6/2025:  Vawiin khan Lunglei Dist Cooperative Union (LDCU) Ltd.chuan Sub.Hqtrs.YMA conf Hall Lungleiah Inkhawmpui vawi 28-na an hmang a, Pu V.Malsawmtluanga Vice Chairman HPC chu khuallian a ni.

   

Pu K.Darlawma, President LDCU kaihhruaiah hian khuallian chuan Apex Bank hi Mizoram pual Bank anih ang in mitinin A/c hawn vek nise tiin amah pawhin Account hawn nghal a tum tih a sawi a, LDCO office chei that nan HPC fund atangin nuai 5 a pek dawn thu leh Nghasih zau tih changtlun nan HPC fund Rs nuai 8 a pe dawn tih a sawi bawk.  Pu V. Malsawmtluanga chuan  Cooperative society tan theihtawp a chhuah dawn tih sawiin thalai te pawh he movement ah hian an harh thar a ni a ti. Awareness pawh uar zawk a kalpui a tul thu a sawi.

    Society din kawngah Mizo ten thawhho kan thiamlo thin tih sawiin society tam tak aiin tlem remrawm ngelnghet tak din chu kan that pui a rin zawk thu a sawi. Society tan sorkar a tlan chhe dawn lo tih a sawi rualin Siciety hi sumdawnna rilru a ni tel tih vawng turin a chah bawk.That leh that chhuah hi sumdawn naah a in nghat tur a ni lova, profit atang zawkin that kan chhuah zawk tur a ni a ti. HPC V/C hian Society ngelnghat tak chu awmse sawhthing hralh kawngah kan awlsam phah ngeiin a rinawm a ti. Heyihrual hian PACS pawh theihtawp lo chhuah zel turin  sawm nghal.

     He hunah hian Vice Chairman MCAB Ltd, Chairman MIZOFED, President MSCU ltd te pawhin thu an sawi a ni. 

    Pu Joash Lalchhandama BOD chuan inlawmna thusawiin CEO Pu K.Malsawmsawngliana pawhin report a pe a, chawhnu lamah rorel a ni.

Leilet neitute tawrhna chuan DAO Lunglei a ti mangang ru hle

Leilet neitute tawrhna chuan DAO Lunglei a ti mangang ru hle

Lunglei 3/5/2025: Pu VL. Hmangaihchhuanga DAO Lunglei chuan tun ruahsur nasa avang hian Lunglei Dist chhungah buh leh bal chinna  nasa takin a nghawng a, Haulawng leh a  chhehvel, Thingva,Dengsur, Bunghmun etc-ah chuan leilet a Power tiller te pawh tuilianin a lenbo a, thlam tihchhiat chu sawi loh, leilet bial kotlang te a chhia in Tractor luhna tur kawng te pawh nasa takin a  chhia tih kan palai a hrilh.  

Pic : File

 Leiletah buh la phun chiah lo mahse buh chi kuina tulianin a tihchhiat nual avangin kuminah hian buh thar pawh a tlahniam duai mai ang tih chu thil hlauhwm tak a ni a ti. DAO Lunglei hian loneitu te’n tuilian an tawrh dan hi an lakkhawm mek thu leh a zat chiah hriat a la ni lo tih sawiin Deptt-ah sum leh pai awmsa awm lo mahse an remhriat dan ang ang in hmala in loneitu te tawrh dan an la khawm mek tih a sawi.

Hetih rual hian Vikshit Krishi Sankalp Abhiyan (VKSA) Campaign neih tur a ruahmanna an lo siam tawh pawh khuain a bumro vangin khaw that veleh kalpui theih an in beisei a ti. DAO Lunglei hian Lunglei Dist-a khaw 15-ah  Chemical tello, Natural Farming chu Cluster 15-ah kalpui an tum tih sawiin hei hi Central Sorkar pawhin a ngaihpawimawh a niin hmanlai kan pi leh pu ten damdawi tel lova lo leh huan an neih ang kha kalpui tum a ni a ti.

 Mega Oil Seed an tih mai Thlai hriak nei chi chhawhchhi, bekang leh Oil Palm te pawh uar tur a Sorkar laipuiin ruahmanna a  siam anga kalpui tum mek a nih thu leh Oil Palm bik phei chu kumin April-May chhung khan 600 qtls zet Lunglei Dist atanga hralh a ni a, tunah hian Pananjali Company nen tangrualin ruahmanna thar nen theihtawpa hmalak an tum tih a sawi bawk. 

Company hian Lawngtlaiah Oil Factory din turin hma an la mek a, hei hi a puitlin hunah chuan Bukvanneiah hralh ngai tawh lovin Chhim lam a Oil ching tu te chuan awlsam zawkin an hralh thei tawh dawn a ni  tiin Oil chingtu te pawh rilru thar leh ngaihtuahna thar nen theihtawp chhuah turin a ngen nghal tih a sawi,

Power lama harsatna Lunglei in a tawrh dan

 Power lama harsatna Lunglei in a tawrh dan:

Lunglei 1/6/2025: Tunhnaia ruah leh thlipui vangin hmun hrang hrangah Power supply a khaihlak nasa em em a. Power lak luhna (hruipui) leh sem chhuahna (hruite) hmun tam takah a chhiain,electric ban tam tak a tlu  a, Transformer lian leh Transformer te pawh a chhe nual a, hmun then khatah phei chuan leiminin a hnawl te pawh a awm. Lunglei Dist a Power network chhia report an dawn tlangpui dan:

Power an dawnna pui ber (main line) - 132kv Melriat to Khawiva line a fault avangin power a pek theih loh a, 132kV line Kawmzawl to Bukpuiline thing tlu-in a vaw chhe bawk.132kV Sub-Station, Kawmzawl ah 2.5MVA, 33/11 kV transformer a chhia; Lunglei khawpui chhung hmun hrang hrang ah 11kV line leh LT line chat leh ban tlu a awm nual a; 33kV Sub-Station, Lungleiah 11kV cable a kan chhiat avangin Lunglei khawpuiin power an hmu thei lo; 33kV line fault a awm avangin, Kawmzawl atangin 33kV Sub-Station, Mualthuam a pek theih loh a, hemi Sub-Station-in a chawm khua ten power an dawng thei lo.

Lunglei BSF camp bula lei min avangin, Zotlang pekna 11kv line a chhia. Tlabung leh Borapansury inkar ah thing tlu in 33kV Iine a vaw chhia.Lungsen leh Chawngte inkarah Thingzar tliakin 33kV line a vuak chhiat avangin, 33kVSub-Station Chawngte leh Bungtlang 'S' ten power an dawng thei lo.Khaw hrang hrang ah 11kv line leh LT Line siam that ngai a tam hle a ni.