Hnahthial ah sawrkar hmalakna - Bana Kaih scheme thlai thar lei hralh kharna hun hman a ni.

Nimin  khan Hnahthial DC Conference Hall-ah sawrkar hmalakna - Bana Kaih scheme hnuaia kum 2024-25 chhung atana thlai thar lei hralh kharna hun hman ani a. Bawrhsap leh District Agricultural Marketing Committee (DAMC) Chairman ni bawk, Pi K. Vanlalruati chu khuallian a ni.

Bawrhsap chuan Sawrkar flagship scheme, Bana Kaih hnuaiah thlai chi dang dang awm mahse tun dinhmunah chuan sawhthing hi Hnahthial District chuan an buaipui bik thu atarlang a. Sawhthing mai ni lovin thlai dangte pawh buaipui chhoh zel an beisei thu sawiin phurna thar leh rilru thar nen loneitute chu hna thawk chhunzawm zel turin a sawm a ni.

He hunah hian DAO leh DAMC Member Secretary ni bawk, Pi Julie Zodinpuii chuan report a pe a. Hnahthial District ah Phase-1 ah Sawhthing Quintal 4669.15 lei niin phase-2 na ah allotment, quintal 9650 aia tam, quintal 11,703.20 lei a nih thu tarlan a ni a, Sawhthing hi Sawrkar-in kg ah cheng 50 zelin a lei a ni. Phase 1 leh 2 a sawhthing lei tawh zat belhkhawm hi quintal 16,372.35 niin Sawrkar-in a hralhna man atanga a hmuh let paih hnuin sawhthing leina atana sum senso tur zat hi avaiin Rs.nuai 671,sing 80,444 a chhut a ni a. Phase -2 a Sawhthing leina man hi invoice, la upload kim loh deuh a  ni.

Pi Lalrinpuiin Zoram Medical College & Hospital (ZMC&H), Falkawn a tlawh.

 Health Minister Pi Lalrinpuii chuan nimin khan Zoram Medical College & Hospital (ZMC&H), Falkawn tih changtlunna tur atana hmalakna hrang hrang a endik a, ZMC&H ah hian khum 46 hawn thar nghal a ni.

Pi Rinpuii chuan ZMC&H hnuaia thawktu hrang hrangte chu tlawh kualin an harsatna leh mamawh an sawite a ngaihthlak sak a, sawkar chuan thawktute leh mipuite tan theih tawpa hma a lak zel tur thu leh, thawktute inpekna ah lawmawm a tih thu sawiin hmalakna kal mekte pawh zawh fel thuai a beisei thu a sawi bawk a ni.

Sorkar thuchhuahin a tarlan danin, Gynaecology Ward, khum sawm (10) awmna te, cabin sawm (10) leh Medicine Ward, khum sawmhnih paruk (26) awmna te chu hawn thar a ni a. Heng bakah hian Mizoram Universal Healthcare Scheme kalpui a nih hnuah Cabin sawm (10) hawn belh a lo ni tawh a, Orthopaedic Ward khum sawmhnih paruk (26) awm thin ah khum sawm thum (30) dah belh a ni tawh a. Hmachhawp zingah Integrated Care Unit (ICU) awm tawh sa sawmpathum (13) bakah sawm pathum (13) dang hawn thar a ni dawn a, khawl remkhawm hna buaipui mek a ni. Operation Theatre panga (5) – Gynaecology (2), Cardiology (1), Neurology (1), General (1) hawn thar tura hmalak mek a ni a, tun dinhmunah OT hi panga (5) hman theihin a awm mek a. Cardiology Ward thar, khum paruk (6) awmna chu hawn theih tura chak taka hmalak mek a ni bawk.

Thawktu indaih lohna phuhru turin MUHCS Multi-task Worker mi sawmhnih (20) leh Casual Nurse sawmruk pali (64) lak thar an ni tawh bawk a, heng bakah hian Junior Resident (JR) lakna tur buaipui mek ani bawk. Dr Zothansanga Zadeng, MCH Neurosurgery (Super Specialist) chuan, a zirlai zir zo in, ZMC&H a zawm leh tawh a, mipui tan inentir a theih leh tawh  bawk.

Congress leh MNF ten ZPM Sorkar an dem ve ve

MNF-in ZPM sawrkar chu kuthnathawktute Ipte-a pawisa thun tlem ber an ti

July 2, 2025 : MNF chuan June ni 30-a Chief Minister Lalduhoma chuan Irrigation & Water Resources department conference hall-ah ZPM sawrkar chu kuthnathawktute Ipte-a pawisa thun hnem ber a nih thu a sawi a. A thu sawi hi belhchiandawllo, amah ngei pawhina a awih loh tur a ni a. Lalduhoma hian eng tehna nge a hman tih hi MNF chuan a zawt a ni.

MNF sawrkar liam ta khan SEDP ‘Pilot Project’ atan kum 2019-2020-ah vawk vulhtu chhungkaw 220-te hnenah Rs.300,000 (nuai thum) theuh, a vaiin Rs. 66,000,000/- (vaibelchhe ruk leh maktaduai ruk) an Ipte-ah a thun sak a. Ar ‘Broiler leh Rainbow Rooster’ vulhtu chhungkaw 800 hnenah Rs.150,000 ṭheuh, a vaiin Rs. 120,000,000/- (vaibelchhe sawm leh pahnih) a pe bawk. Sericulture hnuaiah chhungkaw 425 hnenah Rs 150,000 ṭheuh, a vaiin Rs. 63,750,000 (vaibelchhe ruk maktaduai thum nuai sarih leh singnga) kuthnathawktute Ipte-ah a thun sak bawk a.

Hemi hnu hian hripui lêng, Covid-19 pandemic vangin SEDP chu chhunzawm theih ni rih lo mah se, kum 2021-2022 Financial Year atan SEDP hnuaiah kuthnathawktu chhungkaw 60,000 (sing ruk) te tan Rs. 1,500,000,000 (vaibelchhe za sawmnga) pek an ni a. Kum 2022-2023-ah cheng veibelchhe 150 pek leh an ni. Kum 2023-2024 atana cheng vaibelchhe 150 dah fel sa erawh chu MNF sorkar khan a hmang hman ta lo a. Chuti chungin kuthnathawktute bulṭanna tur leh an intunna tura ṭanpuina pek zat chu avaiin Rs. 3,249,750,000 (vaibelchhe zathum sawm hnih pali maktaduai kua nuai sawmsarih panga) a ni.

Hetiang hi Covid-19 hripuiin ram Economy a tihchhiat kârah pawh MNF sawrkarin kuthnathawktute ipte-a pawisa a thun dan a ni a. Hetih laia Pu Lalduhoma’n cheng vaibelchhe 90.4 sawhthing lei nan an hmang chu, ti tha ber anga a insawi hi, MNF chuan inngaihtuah nawn se an duh. 

RTI zawhna Agriculture department-in a chhan dan chuan ZPM sawrkar hian nikum 2024-a kuthnathawktute Sawhthing an chin tir zat chu quintal 2,74,173 a ni a, thar chhuak tura a beisei zat chu quintal 14,83,256 a ni. June ni 27, 2025 thlenga an lei zat erawh chu quintal 2,33,604 chauh a ni a. Hei hi thar chhuak tura beisei zat aṭanga chhûtin za zelah sawm leh panga (15.7%) chauh an lei sak tihna a ni a! Sawhthing lei kawngah ZPM sawrkar a 'fail' chiang hle a, 'Pass mark' an hmu pha lo tih hi MNF chuan Chief Minister Lalduhoma leh a kaihhruai sawrkar hi a hriat tir duh a ni, an ti.

==========================

ZPM-in dawt nen tan an la - Lal Thanzara

Vawiin (2.7.2025) hian Aizawl South II Block Congress Committee buatsaih Block Extended Meeting neih a ni a, an hun hmanpuitu MPCC President Lal Thanzara chuan ZPM chu dawt nen tan laa puhin, Chief Minister Lalduhoma thusawi duh dan mak a tih thu a sawi.

MPCC President chuan, 'Tuna kan sawrkar hrawn mek hi mipui duh danin enchhin a lo ni a, kan hotupa ber kan CM hi House chhungah leh pawnah pawh rawngbawltu ni si a thusawi duh dan hi a mak ka ti. Nimin piah Remna ni lawmnaah pawh khan zirlai naupang politic la hrethiam lote hmaa a thusawi duh dante kha a mak a, mi rilru a dik lo lama hruaikawi thei a ni. MP atanga an ban dan a sawi te kha, ka hriat hi a sual ta emaw ni ka ti, an ban dan kha Anti-defection vang niin ka hria. Hetianga a tawng fo chuan kan politic-te hi a kal dik lo chho mai ang tih ka hlau a ni,' a ti.

AMC inthlan hi a hun tak chu nakum kumtir lam a nih thu sawiin, 'Tuna kan sawrkar mek hian VC leh LC inthlan pawh an boruak that lai chuhin an pawt hma duh a, AMC pawh hi an pawt hma leh duh mai dawnin kan hria. ZPM hian sawi hreh an nei lova, social media-ah pawh dawt nen nasa takin tan an la a, hei hian kan ram politic a ti chhe mek a ni. Central-in a hrek mek avangin sum lengvak a tlem a, sualna a pung a, ruihhlo tawlh a hluar mek a ni. Heng lak atang hian zoram hi chhanchhuah a ngai,' tiin Zoram chhanchhuak thei turin mipuiin Congress Party an beisei niin a sawi.

Deputy Commissioner of State Tax ten SGST hmuh tura beisei nasa takin hmu pha lo

Lunglei 2/7/2025: Deputy Commissioner of State Tax, Lunglei Zone chuan chuan kumin June thla bikah khan kawng hrang hranga Tax an hmuh zat chu Rs 57,01,403/- a ni. Head hrang hrang zingah State GST-ah Rs 33,50,123/- an hmu. GST-ah hian May thla kha nasa takin an phak lova, May thlaah khan Rs 232,40,186/- an hmu phak a ni. Petrol leh diesel mipuiin an leina atanga Sorkar in chhiah a hauh, Road Maintenance leh Social Infrustructure & Services-ah Quarterly a report lak thin anih vangin June-ah record la peihfel a ni lova, May thla khan Rs 48,23,116/- ve ve Road Maintenance, Social Infrustructure & Services-ah Cess hmuh a ni a, avai chuan  Rs 96,46,232/-  a ni.  Profession Tax-ah May thla a an hmuh erawh an khum a, May-ah khan 9,48,854 chauh a nih laiin June ah chuan Rs 22,36,280/- an tlin thung a ni.

Deputy Commissioner of State Tax, Lunglei Zone hian SGST-ah Budget Estimate(Target) Rs ( Nuaih 2390 chuang ) 23,90,45,000 neiin May leh June thlaah an hmuh zat hi Rs (Nuaih 265 vel chauh ) 2,65,90,309 ni mahse Over Target an tih(hmuh ngai) hi nasataka phak lovin minus - Rs ( Nuaih 212 )  212,454,691 /- lai a ni.

ZUNZAM NEWS ( 2.7.2025 )

Mizoram Sorkar-Sawhthing Qlts 233603 man lei tawh 

Mizoram sorkarin kumin chhungin sawhthing quintal 2,33,603 cheng vbc 96.4 man vel a lei tawhin loneitute thlai thar h r a l h chhuahna tur buaipuitu a din, Mizoram Agricultural Marketing Board (MAMB) hmalakna hnuaiah kumin Feb. 20 khan sawhthing lei tan a ni a, April ni 21 atangin a thawh hnihna atan sawhthing lei leh a ni a, vawiin thlengin sawhthing quintal 2,44,603 cheng vbc 96.4 man a lei sak tawh a, loneitute sawhthing chu a lei zawh sak tawh ni-in an sawi. Hetih lai hian lei tawh, pawisa pek chhuah tur, portal-a la upload kim loh a awm avangin pawisa pek zawhah data chiang a awm chauh dawn niin MAMB member te chuan an sawi a ni. Sawhthing bakah hian Mizoram sorkar chuan nikum kum tawp atang khan loneitu te thar chhuah Mizo buh quintal 1,437, Rs 44,18,400 man, Aieng quintal 400, hmunphiah empan nelled buyer, Non-empanelled buyer leh ZOHANCO kal tlangin quintal 40,327 a lei sak bawk. 

Journalist pahnih lawmpuina hlan 

I&PR minister-in Emmy Awards dawngtu Mizo Journalist pahnih lawmpuina a hlan. I&PR Minister, Dr. Vanlalthlana chuan tun hnaia Emmy Award dawngtu BBC team zinga tel Mizo Journalist pahnih HC Vanlalruata leh Isaac Lalramsanga te chu nimin khan a pisa-ah lawmpuina a hlan a. Mizo Journalist zingah khawvel huap chawimawina dawng thei an awm chu a chhuan thu leh I&PR minister lo nih ve ringawt pawh a inchhuan thu a sawi. Tarlan tawh angin June ni 26 khan khawvela Journalism chawimawina ngaihhlut Emmy Awards hi New York-a Palladium Times Square-a sema ni a, hetah hian BBC in 'Myanmar’s Civil War' tih thupui hmanga short-form documentary an buatsaih chuan Emmy Awards hi a dawng a, BBC team-ah hian Mizo journalist - HC Vanlalruata leh Isaac Zoramsanga te hi an tel a, field producer hna an thawk a ni. I&PR Minister hian chawimawina thuziak bakah sumfai Rs. 10,000 ve ve a pe a ni.

Central-ah eng Party pawh kan thawhpui thei - CM 

Chief Minister chuan inkalpawhna kawngah Mizoram chhim lam leh hmar lam atangin nasa takin hma an sawn dawn tih a sawi a. Hnam dang, sakhaw dangte nen tun aia hnai zawkin an khawsa chho zel dawn tih sawiin, Mizo nationalism hi vai huat tihna a ni lo. Nationalism dik tak chu hnam dangte thian a siam a, an hmasawn anga hmasawn ve a, a tul anga an hnen atanga zir leh thawhpui a ni. Central sorkar nena kan inrema kan kal dun thiam a ngai, tiin, Mizoram tana a that phawt chuan central-ah eng party pawh sorkar se, an thawhpui thei tur tih a  sawi.

Mizoram State chuan Sawhthing hi lar pui kan tum 

Chief Minister Lalduhawma chuan sorkarin thlai thar lei a kalpui chu kumin hi a bul tan kum niin, inzir chunga kalin an hlawhtling thawkhat hle niin a sawi. kumin chhunga sorkarin thlai thar lei a kalpui kharna inkhawm buatsaihah Chief Minister Lalduhoma chuan A bul tan kum a ni a, inzir chungin kan kal a, mahse kan hlawhtling thaw khat hle, tiin loneitute pawh an lawma a hriat thu a sawi. Lalduhoma chuan thlai pali tinzawn mah se, Mizo buh pawh hi an titel hram a. 

Thlai panga kan lei ta tih sawiin, Heng thlai thlan bik panga zingah hian sawhthing leh hmunphiahah tlem han khaih lak zeuh a awm tih loh chu, a dang pathumah hian harsatna kan tawk lo. Hmunphiaha kan buaina bul chu grade-a then tur kan ti kha a ni a. Loneituten chu chu an harsat a, tun hnuah chuan grade a then tawh loh kan ti ta a ni, a ti. Chief minister chuan kumin February 20 atanga sawhthing lei kalpui a nih atangin, vawiin (nimin) a thla li leh ni 10- na chiah a ni a. Tunah chuan a mothar a awm tawh si a, khar rih mai hi thaa an hriat thu a sawi. State dang chuan kawng hrang hrangin an hming an chher tawh. Meghalaya chuan Lakadong Aieng an larpui mek a, Himachal Pradesh state chuan Apple an larpui. Keini hian Sawhthing hian hming chher ve kan tum ang

=================

Youtuber-te'n CM an kawm 

Mizo Youtuber Assn (MYA) chuan vawiin (1.7.2025) chhun khan Chief Minister Lalduhoma an kawm a, thu pahnih an thlen. MYA tarlan danin, Chief Minister hian ?ha taka a lo dawngsawng in khawvel changkang zela digital media pawimawh zia a hrechiang hle a, inkawmna tha tak an nei. C.M hnena an thu thlen - 1. Application for Affiliation and Empanelment of Government Approved Youtubers in Mizoram under Information Public Relations Printing & Stationery Department. 2. Addition of Digital Media and New Media Subjects under IPRP&S in the Schedule IX: I&PR, the Mizoram Government Allocation of Business Rules 2019. te a ni.

===================

Bana Kaih (Handholding) Scheme hnuaia loan dilna  25 an pawm.

Mizoram State Policy Coordination Committee (MSPCC) an Vice Chairman Pu KC Lalmalsawmzauva hova vawiina thukhawm chuan Commerce & Industries Department hnuaia Bana Kaih (Handholding) Scheme hnuaia loan dilna te enho in, dilna 25 an pawm. Heti hian Bana Kaih Implementing Department hrang hrang a dilna lut zawng zawng atangin MSPCC chuan dilna  613 a pawm tawh a ni.

Heng dilna lut te hi a luhna (concerned) Department in uluk taka a enfiah a, diltute nen inbia a, a hmunah te an finfiah hnu ah thlifim in, Department committee, Minister ho a thu chuan MSPCC in a pawm turin a thehlut a. 

MSPCC in heng dilna lo lut te hi lo thlangchhuak lehin, Partner Bank te kutah a thawn leh thin a ni. Partner Bank te hian dilna an dawn atangin Loan la tur awm te hnenah loan hi an pe dawn a ni. Bana Kaih Scheme a dilna enfiah leh thlitfim hna hi a la kal mek zel a ni.

MSU-in unqualified part time Asst. Prof. chhawr zuina tur hriattirna hal.

Aizawl: MSU General Headquarters hruaitute chuan nimin khan Unqualified Part Time Asst. Professors mi 29-te chhawr chhunzawm zelna tur sorkarin notification order a tihchhuah duh lohna lantir nan an hal a. July 6, 2025 ral hmaa an ngenna sorkarin a tihhlawhtlin loh chuan kawngzawh huaihawt an tum.

MSU chuan August 9, 2024 khan sorkarin part time asst. professor a rawih mekte chu February 28, 2025 thleng chhawr chhunzawmna lehkha a tihchhuahah, hemi hnu lama pawtsei tawh loh tura an tih tawh a inziah hnuah, February 21, 2025 khan hun pek belhna notification a tichhuak leh chu pawi tiin, notification thar tihchhuah leh duh loh zia entir nan notification (February 21, 2025-a tihchhuah) hi an hal a ni.

Higher & Technical Directorate kawtah notification halna hmunah MSU President B. Lalkhawngaihzuala chuan zirna tha siam tumin zirtirtu tling lote sorkarin a ruai reng chu hriatthiam har a tih thu a sawi a. Zirtirtu qualify loten zirna an pek theihna tur atana sorkarin humanitarian ground tia a chhawr hi chhuanlama langsar taka dan bawhchhiatna a nih thu a sawi.

Notification an hal chhan sawiin MSU president chuan kumin March 13 khan thu thar thehdarhtute hmang mai bakah vawi tam tak education minister hnenah an thlen tawh a, June 9, 2025 khan chief minister hnenah thlen tawh bawkin, an thu thlenin awmzia a neih loh avangin leh ngaih pawimawh a hlawh loh avangin notification order hi an kal tih a sawi.

Notification an hal zawh hian MSU chuan director hnenah lehkha an pe nawn leh a, July 6, 2025 ral hmaa an ngenna ngaih pawimawh a nih loh chuan kawngzawh huaihawt an tum thu an sawi a. Kawngzawhin awmzia a neih loh pawhin a tawp thlenga hmala zel turin rua-hmana an siam thu an  sawi.

‘PWD Minister hian hma a la ngam lo a nih chuan bang mai se’ 

- Pawl 4 thuchhuah Aizawl.2.7.25: - Mizorama pawl pali (4) ten Mizoram kawngpui pawimawh Kolasib - Sairang chu Mizoram mipuite tana pawimawh (life line) a nih avangin sawrkarin hma rang taka a la lo a nih chuan mipuite hnatlanga chhuah a ngai mai dawn niin an sawi. 

Nimin a Press mite Press Club-a an kawm naah thuchhuah intawm siamin, Mizoram Kawngpui National Highway 306&06 (Kolasib to Sairang) kawng zawh hleih theih loh khawp a chhia te, Motor tlu leh tang khawp a a awm te, kan chak leh mamawh lak theihloh khawpa awm hi keini Pawl hrang hrang pali(4) te Mizoram Transformation Movement (MTM), Centre For Environment and Social Justice (CED), Mizoram First (MF) leh Citizen Alliance for Truth and Justice (CATA) te chuan pawi kan tiin, kan rilru a na em em a, Kawng chhia a dahtute hi kan dem tak zet a ni. He Kawng hi PWD Minister in June 30’25 a sawidanin khan Mizoram PWD mawhphurhna a ni lo tia sawiin, Mahse, NH 06 package 8 (Kawngpui to Khamrang) hi vawiin thlengin Mizoram PWD enkawl a la ni a, PWD Minister hian thudik ziktluaklo mipuite rilru hruaikawi nan a sawiah kan ngai a, a pawi kan ti hle a ni. 

Tin, he Kawng pawimawh tak hi tu enkawlna hnuaiah pawh awm se, a ram neitu Mizoram sorkar mawhphurhna niin kan hria a, Mizoram Tripper Assn. mangang pawhin siam tura hma an lak ngam chuan sorkar meuh chu a mawhphurhna la a, hmahruai turin kan beisei tlat a, Kawng siamna tur Boulder trip 50 vel chauh thawh chhuah pui tum mai lovin, hmanrua tha ber ber nen a thawk chhuak nghal turin kan beiseiin kan thlir reng a ni. He kawng hi Mizoram mipui zawng zawng tana pawimawh (Life-Line) a nih avangin Sorkarin hma rang taka a la lo a nih chuan Mipuite hnatlanga chhuah a ngai mai dawn a, Hetiang ngai lo tur hian sorkarin hnathawk nghal turin kan beisei tak meuh meuh a ni an ti. 

Zawhbelhna hrang hrang an chhan naah, ‘PWD Minister hian hma a la ngam lova, a kut a sil a nih chuan bang mai teh se’ tiin an sawi bawk. Press mite zawhna chhangin, Boulder chang tha zawk a tul leh Meghalaya State a mite pawh a lak theih a, State thenkhat kawng siam a Bangladesh atanga Boulder chang tha Trip 200 chuang an lakluh dan te pawh sawiin, Kawng siamtute hian an kawngsiam a sakhat (solid) tawk thin loh avanga Ruahtui leh Tuihawk a luh theih thin avanga Kawng a chhiat hma thin thu sawi an sawi bawk. Eng Party Sorkarah pawh helai Kawng (Life-Line) chhiat avanga Mizoram mipui tawrhna thleng ziah thin hi ngaih pawimawh a hlawh tawk lohzia ti langtu nia an hriat thu an sawi bawk.

JUNE 2025 THLA CHHUNG INDIA GST KHAWN ₹ 184,597 CRORE A NI, MIZORAM KHAWN A TLA HNIAM ZEL.

India ramin June 2025 thla chhunga GST chhiah a khawn zat chu ₹ 184,597 crore a ni, nikum June 2024 thla khawn zat ₹ 173813 crore aiin 6.2%  ₹ 10,784 crore in a tam zawk. Thla  hmasa May 2025 khawn  ₹ 201,050 crore aiin ₹ 16,453 crore in a tlem  zawk  tih Finance ministry thu chhuah chuan a tar lang.

Mizoramin June 2025 thla chhunga GST chhiah a khawn zat chu Rs 30 crore a ni a, nikum 2024 June thla khawn zat Rs 42 crore chu Rs 12 crore in a phak lo a ni. A phak lohna hi (-) 29% niin Union Finance Ministry thu chhuah chuan a tar lang. 

India ram GST khawn hi nikum 2024 June  thla nena khaikhin (year on year) a punna chu 6.2% a ni. Financial year 2025-26 chhung hian Government of India chuan GST aṭang hian Rs. 11.78 lakh crore hmuh a beisei a, kum hmasa aiin 11% a pung turin a beisei (projected) a ni. 

India ram chhiah khawnna atan GST hman anih July 2017 aṭangin COVID-19 hun chhung tih lohah chuan a hma kum (year on year) a khaikhinin GST khawn zat hian hma a sawn nasa hle a ni. 

June 2024 leh June 2025 GST hmuhna ke hrangte hetiang hian thliar sin a ni (Rupees in crore) : 

              2024        2025

CGST - 32,627    34, 558

SGST - 40,715    43,268

IGST -   87,310   92,280

Cess  - 13,160    13,491

Total  173,813  184,597

NE State te khawn zat

June 2025 chhunga NE State te GST khawn zat leh June 2024 nen khaikhinna chu hetiang hi a ni,(Rupees in crore). 

State   Jun24  Jun25  %

ASM   1,448   1,405 (-)  3  

SIK       318       364     15

MEG    180       172  (-)  4  

TRI         74         87      18 

ARU       91         88  (-)   3

MAN      62        40  (-) 36

NAG      49         84       71   

MIZ       42         30  (-) 29 

Note :

Nikum nen khaikhinna hi GST Council chhut chhuah sa a ni. 

Nikum June 2024 thla GST chhiah khawn zat kumin June 2025 ah khawn tling lo state 10 an awm laiin nikum aia khawn tam zawk State 23 an awm. Manipur (-) 36%, Mizoram (-) 29% hi nikum khawn phak lo nasa zual an ni. 

Khawn tam state

June 2025 thla chhunga GST chhiah khawn tam state te (rupees in crore) :

Maharashtra  30,553

Karnataka       13,409

Gujarat            11,040

Tamil Nadu     10,676

Haryana            9,959

U. P                    9,248

Khawn tlem

State lian leh mihring tamna GST  khawn tlem state te (rupees in crore) :

W. Bengal          5,551

Telengana         5,111

Odisha               5,079

Rajasthan          4,522

M. P                    3,889

Andra Pradesh  3,634   

Kerala                 2,856

Bihar                   1,709

HEI VE THUNG HI

Financial year thar April 2025 aṭangin Mizoram State GST khawn hian a hma kum (year on year) aiin a hniam chho zel a, NE State dangte chhiah khawn hi tlak hniam thla awm ve bawk mahse Mizoram tlak hniam dan ang hi an awm lo. 

Kumin Financial year 2025-26 thla 3 chhunga Mizoram GST khawnin nikum 2024-25 thlà thum chhung khawn a phak lohna chu :

April    (-) 28%

May     (-) 26%

June    (-) 29%

State dangte nen khaikhin a Mizoram GST chhiah khawn hniam fal bik lutuk ṭhin muangchang loa inenfiah a, hma lak zui nghal a ṭul tak zet a ni.

TIH NGAIHNA AWM LO PWD MINISTER

                                                                                      - Zairemthanga

A nawi reng mai dawn a nih hi. ZPM Sawrkar tirh khan Vaivakawn Zohnuai kawng chu an rawn siam nghal a, lawmawm ka tih êm avangin post meuh siamin Minister chak tak a nih thu ka sawi ve hial a, khami hnu khan ATL Road chu 'MINISTER PWD' tih inziahna kawr ha chungin a en leh a, tuna ATL kawng dinhmun erawh kan hre vek. A department a hre chiang lo hle a, a hneh ngang lo a ni tih a lang reng mai. 

Kawng a that chuan, "Kan sawrkar chak tak" tiin kan fak luai luai a, Bawngkawn kawng an han siamte khan nasa takin an theh darh a, sawrkar an fak luai luai a ni. A siamtu kha Company an ni a, PWD an ni lo. Mahse, kawng chhia kan buaipui em em, kan ei leh bar lak luhna kawng a han chhiat erawh chuan, "kan kut a ni lo. Company lam thiam loh a ni" kan ti a, kan kut kan sil leh daih thung. 

Kan ram chhunga hna thawh a ni a, a chhawrtu leh a tuartu pawh kan ni. Eng vangin nge an enpui ve loh? Eng vangin nge an nawr ve loh? Sawrkar ve meuh chuan an vil tur a ni dawn lo'm ni!? Engah nge kut kan sil leh daih? 'Lung a ngaihtuahsak dawn' han tihte kha thil zahthlak lutuk a ni. 'lo chawl tawh ula, Department in theihtawpin kan lo khawih chhunzawm ang e' tih zawk âwm tak a nih laiin. 

Chhiah chawitu leh Cess pawh pe rengtu zawktute'n kawng an siam mai hi a dik lo hrim hrim a, tlâwmah kan Minister hian la teh se. Kum tluana Fur ruah tla reng ang maia kan kawng a chhia hi a mak. 'ka thianpa pawh a pass bik lo' ti-a sawrkar hmasate dem reng a hun tawh lo a, Distinction-a pass tura intiam an nih angin pass ngei tum teh se. Pass loh avanga thiante Fail sawi sawi a ngai lo. 

 

'Lunglei Ni' buatsaih dan tur ngaihtuahin Organising Committee an ṭhu khawm

Lunglei, 2025 Vawkhniahzawn thla ni 1: Lunglei Municipal Council (LMC) ruahmannaa 'Lunglei Ni' hman tur atana LMC Executive Council-in hma latu tur Organising Committee a din chu vawiin khan Lunglei Convention Centre-a LMC BoC Hall-ah a ṭum khat nan an ṭhu khawm.

June ni 6, 2025-a LMC Board of Councillors ṭhu khawmin 'Lunglei khawpuia cheng, ṭhang leh thar zelte'n Lunglei khawpui hmangaihna thinlung an put thar zel theih nan Lunglei puala ni bik hman' chungchanga inrawn khawmna buatsaih ni se a tih angin, June ni 16, 2025 khan inrawn khawmna hi buatsaih a ni a. He inrawn khawmnaah hian 'Lunglei Ni' hman chu ṭha tih a nih angin LMC chuan Organising Committee a din nghal a. Organising Committee-ah hian LMC Chief Executive Officer (CEO) Pu Donny Lalruatsanga chu chairman niin, co-chairman-ah Lunglei Sub-Headquarters YMA President Pu K. Lalfakzuala leh secretary-ah Sub-Headquarters YMA Secretary Pu Zothanzuala Hnamte te ruat an ni a. Sawrkar official-te, pawl hrang hrang ai awhte leh Lungleia mi hming ṭha leh langsar ṭhenkhatte chu member-ah ruat an ni bawk.

Vawiina Organising Committee ṭhut khawm hi Chairman Pu Donny Lalruatsanga chuan a kaihruai a. Secretary Pu Zothanzuala Hnamte chuan thu ngaihtuah turte sawi zauvin, 'Lunglei Ni' hman chungchanga thil pawimawh hrang hrang sawi ho zui a ni.

Organising Committee chuan Lunglei puala ni bik hman tur hi a hmingah 'Lunglei Ni' vuah ni se, an ti a. A hman hun chhung atan mei mit lova Lunglei luah ṭan a nih hun nia hriat, March 1889 thlir chungin February - March 2026 tin zawn a ni a. Lunglei din ni chungchanga chhinchhiahna awm sa nem ngheh nan National Archive-ah lehkha pawimawh leh chhinchhiahna hluite hai a, zir chian ni se, chumi hnuah a ni tak tur chu la rel ṭhat ni se, tih a ni. 

Organising Committee chuan Lunglei Ni buatsaih tura mawhphurhna hrang hranga hma la tur committee peng hrang hrang an din a. Hun hman dan tur chungchanga rawtna hrang hrang sawi ho niin, mi tin huap zo tur leh Lunglei khawpuia mihring chengte'n Lunglei hmangaihna kawnga hma an sawnpui ngei theih dan tura hun ruahman ṭha tih a ni a. Hun hman dan tur chungchangah mipuiin ngaih dan leh rawtna an theh luh theihna tur ruahman ni bawkin, rawtna theh lut duh tan link tar lanah hian theh luh theih a ni: 

Deptt.hrang hrang hetiang hian an siam

Souvenir committee

Media & Publicity

Ushering & reception

Refreshment

Events committee

Programme committee

Decoration committee

Ground committee

Sanitation committee.

Budget atan Rs.15,00,000 ruahman chhin a ni a, daih dawn lova hriat a nih avangin a tul anga tihpun ni se an ti.

He ni pual hian Volley Ball competition buatsaih ni bawk se, Lunglei Ni nopui dawm thei awm mi an awm chuan chawimawi ni se, chawimawi tlak dang an awm chuan chawimawi  ni bawk se an ti.

OB ten Sub. Committee puipa tur lo ruat se,meeting lehah thlir ho ni se, an ti.

ZUNZAM MORNING NEWS ( 1. July.2025 )

Motor accident duhna hmun Tawipui kawng en fiah.

National Highway-54 kawngpui Tawipui North-II daia lirthei chetsual tamna hmun endik a, hma lak dan tur zir chiang tura Lunglei District Bawrhsapin a din, joint verification team chuan Zirtawpni khan he lai kawng hi en fiahin, hma lak zui dan tur an sawi ho. Joint verification team hi SDO(Sadar) Pi TT Beikhaizi chuan hovin, PWD, I&PR leh LA Branch official-te, NH kawng enkawltu NHIDCL leh contractor BRN Infrastructure Pvt Ltd ai awhte, Tawipui N-II VC, Sub-Hqtrs YMA, Tawipui Group YMA leh Tawipui N-II Branch YMA ai awhte an tel a. 

Kawng luan (seal coating) nal deuh lai metre 200 vela thui chu BRNIPL te'n a chung tithap turin hma la nghal se tih niin, an hna thawh dan hi Tawipui N-II Branch YMA hruaitute'n lo enpui se, tih a ni. Kawng kual ulh lai tiziaawm turin laih belh a tul dawn nia a lan avangin thuneitu sang zawkah thlen ni se, tih a ni bawk. Chetsualna thleng thei lakah he lai kawnga lirtheia tlante an lo him zawk nana hma lakna hmasa atan, Lunglei DC leh SP te ruahmannain 'fimkhur tura inhriattirna' chu an lo tar tawh. 

=================

MUHCS zawmtu damdawiin a tlawh 

H&FW Minister Pi Lalrinpuii chuan Aizawl khawpui chhunga Private Hospital hrang hrang, MUHCS zawm thar - Kidney 360° Superspeciality Clinic & Dialysis Centre, Bazar Bungkawn, Nazareth Hospital, Chaltlang, Nazareth Hospital, Ramhlun leh Redeem Hospital, College Vengte a tlawh. Health Minister chuan MUHCS tihlawhtling tur hian Sawrkar hospital hrang hrangte theihtawpa thuam that chhoh mek an nih thu a sawi a, Pensioner pangngaiin a huam loh, Central Scheme hnuaia hlawh la thawktu te pawhin zawm an rawn dil thu tarlangin, an dilna lutte ngaihtuah thin a ni a ti. 

Tun dinhmunah MUHCS hnuaia inziaklut tawh hi ABPMJAY hnuaiah 2,19,002, Mipui (Contributory Beneficiaries) 9069, Pensioner 9310 leh Sawrkar hnathawk 55470, avaiin 2,92,851 an awm tling tawh a ni. Hospital-te hnenah hian kartin bill pek chhuah thin a ni a, June ni 24, 2025 thleng khan mi 12,917 hnenah bill Rs 15,12,17,890/- (crore 15.12) pek chhuah tawh a  ni.

==============

BJP President thar Dr.K.Beichhua 

Dr. K. Beichhua, MLA chu BJP Mizoram State President thar atan puan a ni. Central BJP-in National RO for Mizoram atana an ruat, BJP National Mahila Morcha President Pi Vanathi Srinivasan chuan nimin khan Atal Bhawan, Aizawlah BJP Mizoram State President thar atan Dr. K Beichhua chu chuhtu awm lova President atana thlan a nih thu a puang a. Pi Vanathi Srinivisan chuan Pathianni khan BJP Mizoram State President thar hi inlungrual taka thlan a nih thu sawiin, inthlanna chuhtu awm chhun, Siaha Bialtu MLA nilai, Dr. K. Beichhua chu kum 2027 thleng President a ni ang a ti a, term hnih chhung BJP Mizoram State President lo ni tawh Pu Vanlalhmuaka a thlak dawn a ni. BJP Mizoram State President thar Dr. K Beichhua chuan an party chu a bulthut atanga tihchak a ngaih thu a sawi a. Unit tam zawk nei thei turin hma an la chho zel dawn tih a sawi . Mizoramah BJP chu Kristian dotu party tih deuhthawa hriat a ni thin tih sawiin Mizo mipuite hnenah BJP chu Kristian dotu party ni lovin PM Narendra Modi-a'n ram tihhmasawn, Viksit Bharat, Viksit Mizoram chu a thupui ber a ni tih zirtir a pawimawh hle tih a sawi a. BJP in hmasawnna a ngaih pawimawh zia mipuiten an hmuh thu sawiin mi tam takin an party an zawm belh zel a beisei thu leh, kum 2028-ah chuan Mizoramah sorkarna an siam ngei a beisei thu a sawi. BJP Mizoram State President kalchhuak Pu Vanlalhmuaka chuan amah thlaktu, President thar Dr. K. Beichhua chu a lawmpui thu a sawi a. Hmasawnna chu khawpui ni lovin thingtlang atangin a in tan a ti a, party-a an awm chuan hruaitu tura an President thlan chu mi eng ang pawh ni se, a chak chuan a rualin chak takin a hnung an zui ang a, a chak loh chuan amah tichak turin hna an thawk tur a  ni  a ti.

Mizo nula Police in Gold Medal a la

Mizo nula Lalhumhimi chuan World Police Championship 2025 neih mekah Judo kg 52 huangah Gold Medal a la a. Amah hi Indian Police Sashastra Seema Bal (SSB) tang lai a ni.““Inelna hi Alabama, USA-ah neih ani a, Zemabawk North nula Lalhumhimi hi a rihzawng inang zingah a chungnung ber a. Nikum June thla khan Guwahati-ah All India Police Judo Cluster Championship-ah Lalhumhimi hi a chak ber avangin World Police Championship 2025 hi a khelh theih phah a ni. 

Lalhumhimi hian National Games 2022 leh North East Games 2016-ah te pawh khan Gold Medal a lo la tawh a, Mizoram tan medal tam tak a hlawh chhuak tawh bawk a ni.““Home Minister Pu K. Sapdanga leh Sports & Youth Services Minister Pu Lalnghinglova Hmar te chuan social media kaltlangin Lalhumhimi an lawmpui thu a sawi a. Pu K. Sapdanga chuan Police nih leh taksa hrisel neih chu a inhmeh tih sawiin, chutiang mi ni zel turduhsakna a hlan a, Lalhumhimi chuan khawvel hriatah Indian Police hming a ti tha a, a sulhnu chu a lawmawmin a chhuanawm takzet a ni,  a  ti. 

Football ngainatu ten Damdawiin a damlo tan sum thawh

LDFA buatsaih C.Thuamluaia Mual-a Hospital Poor Patient Fund tur atana Charity Football Match an buatsaih atanga sum an hmuh in Lunglei Civil Hospital, Christian Hospital (Serkawn Lunglei) leh John Williams Hospital (Chanmari Lunglei) te hnenah an damdawiina damlo harsa zawk te tanpuina atan Rs 36,700 theuh an hlan.He Charity Football Match-ah hian Mizoram Professional Footballers' Assn (MPFA - XI) chuan Lunglei District Professional Footballers (LDPF - XI) chu 2-1 in an hneh a ni.

=================

Sairang khua te chuan Highway 4-lane aia tui thianghlim an mamawh zawk avangin 4-lane hi alingnment pangngai ah kal rawh se an ti.

Sairang, Sairang Sihhmui leh Sairang Dinthar VC leh heng VC area a, tlawmngai pawl hrang hrangte chuan development avanga an tuitlan hnar chhia leh an lui leh thing hring chereu avanga an tawrhna hrang hrang, an tu leh fate, an tuchhuan lo awm zel turte thlenga an tawrh zel turte ngun taka an ngaihtuahin National Highway 306 new alignment hi an duh lo tih thuchhuah siamin an tarlang a, Alignment hmasa/ a pangai ah, chu pawh leilung, thing leh mau, lui lian leh lui te dimdawi taka laih nise an duh tih an tarlang.

NABARD loan puka Khamrang to Selesih laih in, hun rei tak an tuitlan hnar a chhilh a, tui an harsat phahin LPS special report ah pawh an lungawiloh thu an auchhuah pui tawh tih an sawi a, NABARD kawng laih vungin an tui lakna lui a chhilh a, tui an hmuh chhun pawh a nut vek avangin, tui thianghlim lo an in a ngai a, heivang hian taksa lam harsatna, zun kawng thalote pawh an neih nasat phah nia an hriat thu an tarlang.

Sairang khuate chuan Rel kawng chung lama 4-lane a kal leh chuan Sairang leh a chhehvela cheng te chu thlaler ramro vaivut hmunah tui thianghlim tlan tur nei lovin an awm dawn avangin New Alignment hi engti zawng mahin an duh lo tih an tarlang.

========================

Lunglei District PYD ten "Mizo tawng hman dik leh hman uar inzirtirna" hun an hmang.

Inzirtirna hun khatna hi Rev. Jerry Lalmuanawma, Chairman, Literature and Publication Board, Lunglei District-in a kaihruai a. Hun khatna ah hian, Pu KF. Lalthuamluaia, Chanmari, Lunglei chuan "Mizo ṭawng hman dik leh hman uar - Social Media-ah" tih thupui hmangin zirtirna a pe a, "Ṭawng aral chuan culture pawh a ral ve nghal a ni mai a. Social media khawvelah, Mizo ṭawng neitu Mizote hian kan ṭawng hi kan humhalh a, kan hman dik a, kan hman uar a ngai a ni" a ti.

Hun hnihna hi Bro.Dr.R.Vanlalhmangaihsanga, Treasurer, Literature and Publication Board, Lunglei District-in a kaihruai a. Pu TC. Jonunsanga, Venglai, Lunglei chuan "Mizo ṭawng hman dik leh hman uar inzirtirna - Kohhranah" tih thupuia hmangin zirtirna a pe a, "Kohhran huang chhungah, kan ṭawng kan hman fimkhur loh avangin kan ṭawng ahim loh phah thei. Kan vawn zahawm a, kan hman dik a, kan hman uar a ngai,"  ati a. Sawi hona hun hman chhunzawm a ni.

===================

Bihar a, cheng vbc 100 hmanga kawng zauhna ah Forest deptt. nena inrem theih loh vangin thing kit lovin kawng siam a ni.

He kawng hi Jeha-nabad a, Patna-Gaya kawng km 7.48 a thui ani a, district administration in kawng zauhna tur project-ah hma la in forest department ah thing kih phalna an dil a, mahse an dil ang chu forest department chuan pe lovin compensation atan hectare 14 a zau, forest land an phut a, district thuneitute hian an ngenna ang hi an ti hlawhtling thei lo a, thing kit lo chuan thing awmna velah chuan kawng an siam ta a. Kawngpui laiah te chuan thing ading ta thluah a, thing te hi line fel tak anih loh avangin kawng zauhna a, tlan tan chuan thing hel zak zak angai a, kawnglai ah thing sut vangin chetsualna pawh athleng nual tawh nia report a ni.

====================

Israel sipaite chuan Gaza- strip hmun hrang hrang an beihna ah Palestinian 95 an thi a, engemawzatin hliam an tuar.

Aljazeera in apuan danin Israel sipaite hian thawhtanni khan Gaza hmun hrang hrang an bei a, hengah hian mi 95 an thi a, thi zinga 62 chu Gaza- city leh hmar lam ami anni a, Israel navy te chuan Gaza city, mediterranean tuipui kam a, cafe pakhat Al-Baqa Cafeteria kap fuh in, mi 30 chuang an thi a, mi tam takin hliam an tuar tih Aljazeera chuan a puang.

Thi zingah hian hmeichhia te, naupang leh journalist te an tel a, he cafe hian internet access tur apek chhuah avangin mi tam takin an pan a ni.