Lungleii Post Office-in IT-a hmasawnna kawng zawhin Zotlang leh Luangmual inkar Home delivery tih tumin hma la mek

Lungleii Post Office-in  IT a hmasawnna kawng zawhin Zotlang leh Luangmual inkar  Home delivery  tih tumin hma la mek.

Lunglei 1st Aug. 2025: Lunglei Dak In pui,Post Office chu Sorkar laipuiin tunlai thiamna IT 2.0 kalpui  tur a tih angin  vawiin atanga 5th Aug thleng in buatsaih nan dawr theih an ni dawn lo. Thil inthawn nan te leh pawisa chevel(Transaction) tih nan Software thar hman dan te leh thil tul te tihfel a ngaih vangin vawiin  atanga 5th Aug.20225(Tuesday) thleng hi in buatsaih nan hman an tum tih Pu Thanghmingliana Post Master chuan a sawi.

 Speed Post te pawh Gpay hmang a tih theih turin QR Code an dah dawn a, bungraw lian chah tu te pawhin dak In a an bungrua lak ngai kher tawh lovin an Inah an  dahsak(Home delivery) ve thei dawn a, mahse hei hian Zotlang leh Luangmual inkar a huam rih ang  a ti. Dak In a thil thawn te hi Bar Code pek a nih hlawm tawh dawn avangin  thil thawn te pawh a chhui theih vek tawh dawn a, thil thawn bo tih ang chi chu awm tawh lo tur a ngaih a ni a ti.

Dak Inah hian pawisa him taka dah theih a niin Saving a a punna hi 4% lai a ni a, a tih dan phung leh a system hi a awlsam bawk si avangin a hre thang chuan an bawr hle a, Saving a/c hi Post Office-ah hian hawngin Moble phone-ah <Postinfo> hi download in pawisa dah dan, a pun dan, lak chhuah theih hun tih te leh kan thil thawn kal kual vel dan tih leh thil dang mahni pawhin a enfiah zung zung theih tawh a, mipui tan service tha tak pek chu an tum a ni tih an sawi. Tuntum a IT 2.0 hi India ram pum a hman tur a tih a niin Mizoram hi a hmang hmasaber(model) tur  a ni a, State dangah chhunzawm tur a tih a ni.Post Office Lungleiah hian PostMaster hovin thawktu 24 an awm mek.

Akashvani Aizawl din champhaphak vawi 60-na vawiinah lawm a ni

 AKASHVANI AIZAWL DIN CHAMPHAPHAK VAWI 60-NA LAWM A NI

Dated Lunglei, the 1st August, 2025: Nimin khan Akashvani Aizawl Multipurpose Hall-ah Akashvani Aizawl din champhaphak vawi 60-na lawm a ni a. Pu Ashish Bhatnagar, Additional Director General (A,BO&CO) (North East Zone), Akashvani & Doordarshan, Guwahati chu khuallian niin he hun hi a hmanpui a ni.

Khuallian Pu Ashish Bhatnagar chuan Akashvani Aizawl-in kum 60 hmel a hmu chu a lawmpui thu a sawi a. Akashvani chu hnam zia humhalhtu pakhat a ni tiin, khawvel changkanna mila a inher rem thei chu fakawm a tih thu a sawi a. President thusawi leh Prime Minister 'Mann ki Baat' programme-te'n Akashvani kaltlanga mipuite beng a thleng chu inchhuanna tlak a nih thu a sawi bawk.

Additional Director General chuan mahni tawnga radio neih a pawimawhzia sawiin, India hmarchhak atangin tawng leh hnam bil tawng hrang hrang 90 hmanga radio programme pekchhuah a ni, a ti a. Mipuite'n sawrkar scheme an hmelhriat theihna atana duan, 'Janahit Yojana ek Samiksha’ programme leh ngaithlatute atanga fakselna dawn theihna tur app, hmarchhak state-a engineer-te siamchhuah, RAISE (Radio Audience Interactive Survey and Evaluation)-te chungchang a tarlang bawk a ni.

Akashvani Aizawl-in rimawi hmanga intihsiakna te, inkawmkhawmna hun te leh duh duh sawi hun, ‘Meri Baat’ programme a huaihawt thin chu tha a tih thu sawiin, radio chakna hnar chu mipui aw tlangaupuitu a nihna hi a ni, a ti a. 'Happiness Officer' ruat turin a hrilh bawk a. Hruaitu hmasa leh sulsutute hre renga hmasawn zel tur leh hemi kawnga I&PR department leh ngaithlatute nena thawhhona tha nei chhunzawm zel turin a chah a ni.

Akashvani Aizawl din champhaphak vawi 60-na lawmnaah hian Pu D.R. Lalropuia, Director (E) & Cluster Head, Akashvani Aizawl chuan kalkhawmte lawmna thu sawiin, July ni 31, 1966-a Akashvani Aizawl din a nih atanga hna an thawh chhoh dan te, rambuai laia mipuite tana a tangkaizia te leh an hmachhawpte a tarlang a. Tunlai khawvel changkanna mila Akashvani Aizawl pawh a inher zel thu leh digital platform leh online streaming-te kalpui a nih thu a sawi bawk.

Thusawitu dang, Pi Mina Zoliani, Information & Public Relations (I&PR) Jt. Director pawhin Akashvani Aizawl chu rambuai laia din a nih atanga vawiin thlengin Mizote tana inthlunzawmna tha, chanchin thar thehdarhtu tangkai leh mipuite tana thu tha leh rimawi ngaihthlakna pawimawh tak a nih thu sawiin, I&PR nena thawhhona tha tak neih zel a nih theih a beisei thu a sawi a. Kum 60 kal ta chhunga an hnathawh pawimawh tak chu hun lo kal zelah pawh chhawm nung zel turin duhsakna a hlan a ni.

He hunah hian Pu Ashish Bhatnagar chuan Akashvani Lunglei hnenah hmarchhak state-a Akashvani-te zinga an Facebook page-a ngaithlatu inziaklut ngah ber an nih lawmpuina thilpek a hlan a. Agartala-a neih zawh tak, Parliamentary Committee on Official Language Inspection (PCOL)-a Akashvani & DD Aizawl aiawha telte ngaihhruina thilpek dawn a sem bawk a. Akashvani Aizawl-te'n an thawhpuite, tunhnaia Emmy Award dawng, BBC Documentary, 'Myanmar's Civil War’ siamtute zinga tel, Pu HC Vanlalruata leh Pu Isaac Zoramsanga-te chawimawina thilpek an pek chu a hlansak bawk a ni.

Anni bakah hian Pu Biakchungnunga, AD(P), Head of Programme, Akashvani Aizawl; Pu Gin Gangte, AD (News), Akashvani Aizawl; Pu Nampibou Marinmai, Director (News), Doordarshan Kendra, Aizawl-te'n thu an sawi bawk a. Ngaithlatute atangin Dr. Rualkhuma Colney, Mizoram Law College Principal (Rtd.) leh Pi Lallianvungi, Zemabawk HSS Lecturer-te'n thusawina hun an hmang a. Pi Ramchullo Hmar, Hindi i/c Akashvani Aizawl leh Pi Jenny Laldingliani, Hindi i/c, DDK Aizawl-te'n Parliamentary Committee on Official Language Inspection report tawi an pe bawk a. Pi Judy Darhmingmawii, PEX(CO), Akashvani Aizawl chuan  lawmthu sawiin hun a khar a ni.

MNYF chuan ZPM MLA ten, kawng chhe siam, an vil chu, intihlar tumna drama mai mai a ni an ti.

MNYF Headquarters chuan ZPM MLA ten, kawng chhe siam, an vil chu, in tih lar tumna drama mai mai ani an ti.

MNYF Headquarters hruaitute chuan an Vice President Pu Lalnunmawia Pautu hova en in, nitina vil tura, in ti, ZPM Minister leh MLA-te duty dan ahmun ah an enfiah a, MLA te ahmuna an duty dan chu INTIH-LAR tumna Drama bawk ani tih an finfiah a. Sum ti-hek tu, Engineer te leh hnathawktute tibuaitu mai mai anni an ti.

MNYF chuan Zoram mipuite'n kan châk lakluhna kawng ber achhiat em avangin mipuite, sumdawngte, lirthei neitute leh khalhtu te'n harsatna namen lo kan tawk mêk a. Nikum lama PWD Minister-in thral hmasa bera kawng siamthat anih tur thu asawi hnu ah leh kawng siamna tur tia, sawrkarin petrol/diesel cess ti a, mipui sum, cheng vbc 25 alaksak hnu pawha kan kawngte heti êm êma achhia hi ZPM sawrkâr inthlahdah vang ah MNF Thalaite chuan an ngai a. 

Kawnpui to Khamrang road hi Mizoram sawrkârin a enkawl reng a. An mangan tawp, furpui hnu, July ni 7 2025 ah chauh, NHIDL kuta hlan ani a. Heti chunga ZPM sawrkârin mahni- insawi-fihlim nan leh mipui bum nâna NHIDCL, a burbun ta vek mai hi MNYF-te chuan avanduaithlâk an tiin mawhphurh na la- ngam sawrkâr, kan mamawh takzet a ni tiin an tarlang.

PWD Minister chuan National Highway-6, kawng thawmthat hna kalpui mek chu a hmun ah kalin a endik.

Nimin khan PWD Minister Pu Vanlalhlana chuan National Highway-6, Sairang - Buichali - Kawnpui inkar kawng thawmthat hna- kalpui mek chu ahmun ah kalin a endik a. Kawng thawmthat hna hi Section pathum a, then niin, PWD Engineer ten an riahchilh a ni.

PWD Minister hi Sports & Youth Services- Minister Pu Lalnghinglova Hmar leh Pu Lalchhuanthanga, MLA-te bakah Er. H.Zoramliana, E-in-C, Er. David Sapzova, CE (Roads), PWD-a thawkte leh Kawnpui leh Khamrang khawtlang hruaitu ten an tawiawm a. PWD Minister Pu Vanlalhlana chuan Kawnpui leh Sairang inkar athat tawk loh avanga harsatna thlengte sutkian anih thuai theih nan Sawrkarin ruahmanna asiam thu leh, kawng siamthat hna pawh ngawrh taka kalpui mek zel anih thu asawi a. Kawng thawmthat hna, chak leh sawt zawka kalpui anih theih nan Minister leh MLA te'n nitin an vilpui bakah PWD hotu te'n ahmun ah, riahchilh a, an vil thu a sawi.

Sairang leh Kawnpui inkar kawng thawmthat hna hi Section pathum a then niin Section-I hian, Sairang atanga Buichali thleng a huam a. NHIDCL hnuaiah BR Goyal- Infrastructure chuan a thawmthat hna hi thawkin Mizoram PWD chuan atul apiangah khawl leh hmanrua te nen, an pui reng bawk. Section-II hian, Khamrang atanga, Kawnpui to Aizawl peng thleng ahuam a, Section -III hian Kawnpui - Aizawl peng atangin Kawnpui khaw chhung thleng ahuam bawk.

Heng section pathum vil hian PWD atangin, Er. Eddie C.Zothansanga, Superintending Engineer, Highway, Circle-I, Executive Engineer 2, SDO leh JE te'n ahmun ah an riahchilh a. Kawng thawmthatna tur lung lak khawmna kawngah harsatna a awm tawh loh thu thawktute hian sawiin nimin ah lung trip 152 hman anih thu leh lirthei tang, hnuk chhuak turin, kawng chhe zual lai ah duty siam anih thu tarlan a ni a. Ruahsur leh lirthei lian tlan tam avangin, duh anga hnathawh asawt theih loh thu thawktute hian an sawi bawk a ni.

MSU hruaitu ten Chief Minister chu Dan anga dik leh felfai taka hma la zel tur leh Dan lova hna a, luh tum chu huaisen taka hnawl ngam turin an ngen.

Mizo Students’ Union (MSU)  hruaitu ten Chief Minister, a Pisa ah, hna lak leh thil pawimawh dang an sawipui.

MSU chuan Mizoram Public Service Commission (MPSC) hnuaia hna hrang hrang lak mek te leh la lak chhunzawm zel tur te chak taka lak anih theih nan te, District hrang hranga Exam Centre awm trul, an tih thu an thlen a,  CM chuan tha atih thu leh hma alak tur thu alo hrilh bawk a ni.

Mizoram Sawrkar hnuaia Department-hrang hranga hna lak mek leh, la lak tur te hi Dan anga dik leh felfai taka la zel tur leh Dan lova hna a, luh tum chu huaisen taka hnawl ngam turin CM-hi an ngen a ni. Chief Minister-chuan MSU thu thlen hi tha ati in tunhnai ah Department hrang hrangah Dan hrul deuha hnathawk tam tak ten, an thawh rei tak avanga, nghet mai tura, an inngaih avanga, Dan nilova ngheh phut an awm thin chu tha lo atih thu MSU-hruaitute alo hrilh a. MSU pawhin Sawrkar huaisen taka akal ngam hi athlawp tlat a, Dan ang thlap zela kal chhunzawm zel turin angen nghal bawk.

Zirlaite Study Tour- Fund, Cheng Nuai 50 awm sa chu MSU ten vbc 1.5 tal a, tipung tura an ngen chu CM hian Supplementary Demand kaltlanga Department-hnen ah dilna thlen turin MSU alo hrilh a ni. 

Mizoram ah nitin mamawh lo lut a la beitham hle

Mizoram ah nitin mamawh lo lut ve reng mahse, lo lut a tlem thei hle a, alo lut chhun pawh an thangrei thin avangin, nitin mamawh thenkhat a la harsa hle.

July ni 30 zing dar 9:00 atanga nimin  zing dar 9:00 thleng a, Vairengte supply check gate kaltlanga nitin mamamawh loluh dan chu Bazar buhfai, quintal 610. Alu quintal 425, Purun sen quintal 505, Dal quintal 243, Tel case 2300. Maida quintal 846, Artui case 102, Amul bawnghnute case 3086 alo lut a. Cement pawh bag 5,294 alo lut a ni.

Hetihlai hian Oil lam pawh tlem tlemin alo lut ve reng a, Diesel hi Truck 24 phur (Kilo litre 366), Petrol truck 22 phur (Kilo litre 265), XP truck 1 phur (Kilo litre 8) alo lut a. Eirawngbawlna gas (LPG) Truck 24 phur, Cylinder 8004 alo lut bawk a ni.

Mizoram Polytechnic Lunglei chung chang Supreme Court in Guwahati High Court thutlukna ah diklo engmah an hmulo.

Mizoram Polytechnic Lunglei  chung chang Supreme Court in Guwahati High Court thutlukna ah diklo engmah an hmu lo.

Mizoram sorkar ukil ten Mizoram Polytechnic Lunglei (MPL) ram luah chung changa thubuai kal zelah  Guwahati High Court in condonation of delay an dil na an hnawl sak chu a case merit a enfiah sak na an dil chu Supreme Court in Guwahati High Court thutlukna ah diklo engmah an hmulo a mahse an ukil ten a case merit a ennawn an dil ngawrh viau avangin Guwahati High Court in hearing neih sak na hun pe leh turin a phal sak a . 

Mahse ram neitu Pu Vanlaldawngliana laka FIR thehluh a , man zui a nih na ah a case kal lai chu ti tawp nghal turin Mizoram Sorkar chu a hriattir a ram neitu Pu Vanlaldawngliana pressure pek nan leh sorkar hian an dikna thai lan tum avanga thubuai hi siamsak niin a lang a , civil case anih angin High Court in a ram buaina chungchang hi a ngaihtuah tha anga , criminal case inrawlh tir hi a dik lo e a ti tih thudawnna chuan a sawi. 

Tarlan tawh angin Mizoram Polytechnic, Lunglei ram luah man sorkarin a pek hun hnuhnung chu Lunglei District Court-in ni 5-in a pawt sei hnuah July 25, 2025 ral hmaa ram luah man pe tla turin Mizoram sorkar a lo hriattir tawh a. Hetih lai hian, ram neitu nia inchhâlin ram pass a tihnun (renew) danah signature lem a awm nia hriain Mizoram Polytechnic hotute’n Lunglei Police Station-ah FIR an thehlut a, ram neitu fapa hi July ni 21 khan  Police-in an lo man tawh a ni.

Mizoram Polytechnic ram chungchanga thubuaiah hian Lunglei District Court chuan June 25, 2025 khan thupek tichhuakin, January 1, 1983 aṭanga January 31, 2022 thlenga ram luah man Rs 88,13,268 chu ram neitu nia inchhál Vanlaldawngliana s/o H Sporta (L), Theiriat, Lunglei hnenah pe turin Mizoram sorkar a hriattir. Court thupek angin, Polytechnic building-te chu June 27, 2025 khan kalh a lo ni tawh bawk. 

Supreme court hian mizoram sawrkar chu ram luahman an ba chu a bo bang awm loin kar 4 chhungin Guwahati High Court ah deposit turin a hrilh a , 25% chy ram neitu hnenah hian pek nghal ani anga , a bang zawng chu High Court in case a rel dan a zirin pek in pek loh ani ang.