'

ZPM Party Media dept. ten mipui mamawh – buhfai, tuialhthei, gas - dinhmun a tha rih hle tih an sawi.

Nimin khan ZPM Media Department chuan Supply Department Office leh Kudam thenkhatte an tlawh a; Supply Minister Pu B. Lalchhanzova leh Department hotute hmalakna avangin mipui mamawh – buhfai, tuialhthei, gas - dinhmun a tha rih hle tih an sawi.

ZPM thuchhuah chuan tuna buhfai chhek khawl mek FCS&CA kudama buhfai awm zat chu quintal 1,71,704 a ni tih tarlangin August, 2025 thla thleng hi Food Security sem vek tawh a ni a; August thla hian Non-Food Security-a mi, card var leh card sen tlem te chauh pek tur a ni tawh. Food Security atang hian Quintal 54798 leh Kg 33 hi thla tin a lak theih a, thla thum quota kha sem lawk a nih avangin August thla thleng hi lak tawh a ni. Open Market Sale Scheme atangin FCI dawr a ni bawk a, vawiin August ni 1, 2025 hian release order dawn theih beisei a ni. Open Market Procurement’ atangin a remchan dan ang angin buhfai lakkhawm a ni bawk a. Tunah hian Mizoram hmun tinah buhfai dinhmuh a tha rih tih an tarlang.

Kawng dinhmunin duhthu a sam lo chungin, Tuialhthei phurtuten theihtawp an chhuah a, an chungah pawh kan lawm hle a ni. Tukin report-ah khan, Gas tak hi chu sem chhuah reng a nih avangin stock ang zawng chuan sawi kim vek theih a ni lo a. Petrol leh diesel pawh stock a tha a, free sale theih vek a ni. July ni 31 zana Kawnpui atanga Aizawl pana lirthei lo chho hi 138 a ni a. LPG phur – 25, petrol phur – 19, diesel phur – 23, petrol leh diesel phurh pawlh – 6 an awm a ni. July 26 – August 1 chhunga LPG – trip 82 (bur 27548), diesel – trip 163 (Litre 2596000), petrol – trip 163 a lo lut a, tukin pawh khan filling station zawng zawng deuhthawah free sale theih niin report an dawng tih an tarlang bawk.

HATIM-AH ni hnih awh International Conference an hmang.

Higher and Technical Institute, Mizoram (HATIM) leh Centre for Humanities and Social Sciences Research (CHSSR) tangkawpte chuan “Navigating Diversity: Identity, Culture, Belonging, and Trans-humanism” tih thupui hmangin ni hnih awh International Conference, July Ni 30 leh 31 khan an hmang.

He Conference hi India rampawn paruk Australia, Bangladesh, France, Italy, Papua New Guinea, Turkey leh India ramchhung state sawm leh pathum (Assam, Himachal Pradesh, Kerala, Maharashtra, Manipur, Meghalaya, Nagaland, Punjab, Rajasthan, Sikkim, Telangana, Uttar Pradesh, Uttarakhand) atangin an chhim a ni.

Khuallian Rev. Vanlalmuankima, Associate General Secretary (Service) chuan Conference a hawng a. “Culture, Diversity and Equity” tih thupui hmangin Dr. Sabitra Kaphle (Central Queensland University, Australia) chuan Keynote address a pe. Plenary Session neih chhunzawmah Prof. NVR Jyoti Kumar (Mizoram University) chu Resource Person niin, Indian Knowledge Systems (IKS) chungchang a sawi.

Ni hnih chhungin Technical Session sawm pali a awm a. Technical Session te hi ni hniha thren an ni a. Offline Session-ah paper 38 a awm laiin, paper 84 Online Session-ah a awm thung. Offline Mode a thusawitu 67 awmin, Online Mode a thusawitu 160 an awm bawk.

Valedictory Programme-ah Ferigul Gungoren, Turkish Aerospace-a Innovative Leader-in Keynote Address a pe a. Rev. Dr. H. Lalthlamuana, General Secretary, Baptist Church of Mizoram, Valedictory Programme Khuallian chuan thu a sawi bawk.

MNF GS chuan ZPM sawrkar chu cheng vaibelchhe 6424 chuang puk tawh leh a ruka State Capital sawn tumah a puh.

MNF General Secretary Pu Zodinpuia chuan, ZPM sawrkar chu kumkhat leh a chanve chhung leka cheng vaibelchhe 6424 chuang puk tawh leh a ruka State Capital sawn tumah a puh.

Nimin MNF Office Mizo Hnam Runa Chhung Inkhawm an neihah thu sawiin Pu Zodinpuia chuan, “kum 2023 December ni 8 a ZPM sawrkar lakluh a nih atangin RBI ah cheng vbc. 4233.49 a puk tawh a, hmundang atangin cheng vbc. 2191.25 zet an puk tawh bawk. Kumkhat leh a chanve chhung leka ZPM sawrkar sum puk hi cheng vbc. 6424 leh nuai 74 a tling tawh. Thla tin nuai 35693 puk reng ang a ni, a ti a, heti chung hian sawrkar hmasain a tihduh loh mipui fairel bel rawk zawngin chhiah tam tak an la tihte, Buhfai man an tipung a, petrol leh diesel man an tisang a, tuialhthei atanga chhiah an lak ringawt pawh nuai 5109 zet a chuang tawh tih a sawi.

MNF General Secretary chuan, sawrkarin peace city project a buaipuina ah thuzep ruk lian tak a nei niin a sawi a, Chief Minister Pu Lalduhoma hian sorkar laipui-a sum dil nan Mizoram state capital Aizawl chu sawn turin ngenna a lo thlen reng a, hei hi vawiin thlengin Mizoram mipui hmaah a zep tlat tih a sawi a. Kumin 2025, April ni 24 khan Seema Rani, section officer, MoHUA, New Delhi chuan Chief Secretary leh Resident Commissioner, Mizoram hnenah, “shifting of State Capital from Aizawl to Thenzawl, Mizoram” tiin DPR siamna tur chungchang lehkha a thawn a. Hei bakah hian sawrkar lehkha kan hmuh theih hrang hrangah Mizoram state capital Aizawl sawnna tur thu hi a chuang a ni. Mizoram leh Aizawl mipui rawn na neilo a; Mizoram state capital Aizawl a ruka sawn tumna lo awm reng hi sawifiah ngei turin Chief Minister ka ngen a ni, a ti bawk.

Chhung Inkhawm hi Pu Rochungnunga, President MNA, MNF Gen. HQ-in a kaihruai a ni.

Congress hotuin BJP ten Kristian pui thlavang hauha an auchhuak lo chu vanduai thlak a tih thu a sawi.

Congress president Pu Lal Thanzara'n Kerela Kristian rawngbawltu nu pahnih BJP firfiak ten dawta an puhna boruakah Mizoram kristian ram hruaituten an Kristian pui thlavang hauha an la auchhuak lo chu vanduai thlak a tih thu a sawi.

Nimna Congress Bhavana Political session an neihnaah MPCC president Pu Lal Thanzara chuan Kerala-ah rawngbawltu Nun 2 te chu Chhattisgarh ah BJP firfiakte'n dawtin kristiana inleh luih tir tum angin an puh bakah mihring ruk bo tum angin an puh a, harsatna an tawk mek tih a sawi a, hemi chungchangah hian ring lo mi zawk Congress hruaitu te'n rawngbawltute thlavang hauha an au laia Mizoram Chief Minister, Lok Sabha leh Rajya Sabha MP te an la ngawi tlat chu vanduaithlak a tih thu a sawi a, BJP President thar, Dr. K. Beichhua pawh kohhran upa a ni a, hetiang hunah a ngawi leh ta hlauh si chu zia lo a tih thu leh an lalna te leh hun thra an neih laia an au chhuah chu a tul tak zet zet tih a sawi a, CM hlui Pu Lal Thanhawla kha rawngbawlna lamah che thuk lo mah se Kristiante tawrhna a thlen hian rawngbawltute thlavang hauhin a au chhuak thin a, President leh prime minister hnenah te lehkha ziakin hma a lo la tawh thin tih a sawi.

Pu Lal Thanzara chuan rorel lai ZPM kaihhruai sorkarah mi tam tak an beidawng mek tih sawiin, enchhin sorkarah hian mipui mai bakah an Minister leh MLA, an hnathawktute chuan an campaign laia an tum ram chu an hotupa hian a thlenpui dawn lo nia an hriat tawh thu a sawi a, ZPM mite chuan an chuanna motor-in an tum ram a thlenpui dawn loh chuan zuanthlak mai an duh a, an hotupa erawh chuan an tum ram thlakthleng mai a duh zawk nia a lan thu a sawi a, ZPM in Mizoram an kaihhruai dan chu a vanduaithlak chho zel tih a sawi bawk.

Nimin Party chhung inkhawm an neihah hian Congress president chuan Congress party zawm thar chhungkaw hnih a lawm lut a ni.

======

ZPM Legislature Party ruahmanna angin MLA ten Sairang atanga Kawnpui thlengin an tlawh chhuak.

ZPM Legislature Party-in ruahmanna a siam angin Kawnpui to Sairang Kawng chhe lai siamthat hna thawh mek chu Minister leh MLA-ten nitin an la invil chhawk zel a, nimin khan Pu VL Zaithanzama, MLA leh Pu Lalramliana (Papuia), MLA ten he kawng hi Sairang atanga Kawnpui thlengin an tlawh chhuak.

Pu VL Zaithanzama, MLA chuan, “Sorkarin tran tak tein tran a la a, MPWD leh NHIDCL te thawhhona pawh a thain ka hria. Hmanrua tunah chuan a thleng ruih ruih mek a, a lan danah chuan rei loteah mar tha pangngai tak a nih theih tawh ka beisei. Thawktute an inthlahdah lo tih kan hmu a, kawng chungchangah hetiang taka Sorkar, company leh mipuite thawhhona tha hi hriat tur a la vang khawpin ka hria," a ti.

Pu Lalramliana, Lunglei South bialtu MLA pawhin, "An sawi ang leh ka beisei ang aiin kawng ka hmu thra a, a chhe lai tlema zawng la awm hi an hnawhkhah zawh hunah chuan kawng pangngai tak a ni thuai turah ka ngai. Hna pawh an thawk chak a, mamawh engkim deuh thaw chhawp a nih tawh avangin kaltlang theihna tur kawng kan neih thuai ka beisei a ni, a ti.

======

Lungleiah Ban Inelh runpui a awm dawn

LUNGLEI ARM WRESLING CHAMPIONSHIP

on 9th . AUGUST. 2025

@ District Education Office (DEO) Hall

Near Sobji Bazar

Kawnpui to Sairang inkar Kawngpui chhiat chhan CM in MCS conference na ah a sawi ta. ( Video nen )

Kawnpui to Sairang inkar Kawngpui chhiat chhan CM in MCS conference na ah a sawi ta.

Khulai kawngpui khu Sawrkar hmasa hunlaia Satguru Co. ho siam ani a. An liability period pawh ala tawplo kum 2025 a tawp tur a ni. Chumi chhunga khu Kawngpui khu a chhiatchuan an repair tur ani. Mahse kawng maintain na atana sum dah chu an agreement angin Nuaih 12 chauh ani. Kum 5 chhung Cheng Nuaih 12 chauhin tuin nge maintain duh ang le...?? An maintain loh khan company lam te an hlawk zawk tlat alawm. Kawngpui khu chhelo chi anilo.

Khu Contract phenah khuan sawrkar chanchhe sa ranin, Contractor te duhsak ran in Contractor te hlawkna chu tem ve duhna vangin leh chantlan duhna avangin Officer tam takte Contractor/Supplier lamah kan tang thin, hei hi tawp rawh se. Kan sawrkar hnu ah Contractor/Supplier te hamthatna lam rawng kai siam anla awm chuan Action kanla zel dawn. Hei hi a reh hmak tawh tur a ni.

~Lalduhoma

Chief Minister