ZUNZAM EVENING NEWS ( 28.3.2025)

RATION CARD EKYC UPDATE HUN A TAWP DAWN TA

Lunglei 28/3/25: Central sorkar in ration card neitu te e-KYC chu tih ngei ngei tur ti a thu a lo chhuah tawh angin march ni 30 ,2025 chu a hun tawp ni tur a ni. Hei hi diktak a buhfai sem a nih theih nan leh  Public Distribution System hman sual loh nan a ruahman a ni.e-KYC ti ve lo chu buhfai subsidy a la thei lo tur a tih an ni.

     

Lunglei DCSO huam  chhungah pawh Ration card pawl nei te chuan buhfai an lakna retailer ah e-kyc hi an ti hlawm a, card a hming chuang zawng ten an tih a ngai a ni. e-KYC tifel tawh hi chhungkaw 74230 vel an ni tawh a, Zin bo,damlo leh chhan dang vang a tihloh awm thei a ni a, retailer te hi e-kyc ti ve lo te inah a theih ang ang a hmala tur a beisei an ni tih kan thudawnna chuan a sawi.

Lungleiah District Task Force on Immunisation an ṭhu khawm

Lunglei, 2025 Vau thla ni 28: Vawiin khan Lunglei District Task Force on Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District-a kum 2024-2025 chhunga naupang leh raipuarte hnena natna hri leng inkai chhawn theih laka invenna (vaccine) pek dan dinhmun thlir hovin, hri danna pek kalpui chhunzawm zel dan tur an sawi ho.

He hunah hian Lunglei District Immunisation Officer Dr Christina Zonunmawii chuan kum 2024 April leh kum 2025 February inkar chhunga nausen hri danna la kim (fully immunised children) dinhmun tar langin, Lunglei District chhunga nausen target 2,147 awm aṭangin nausen 1,665 (77.6%)-in hri danna an la tih a tar lang a. Hetah hian March 2025 report a la tel loh avangin la pung chho tura beisei a nih thu a sawi. 

He hunah hian Lunglei District chhungah ṭha leh hlawhtling zawka vaccine pek kalpui a nih theih nana rawtna hrang hrang sawi ho niin, department hrang hrang nen ṭang tlanga hma lak theih dan turte sawi ho a ni bawk a. Lunglei District-a mihring awm zat leh hriselna kaihhnawiha an dinhmun data dik leh rin tlak a awm theih nana Health & Family Welfare Department, Lunglei District-in digital population counting system an ruahman chu thlir ho a ni bawk.

Hma lakna hrang hrangah ruahmanna leh target ṭha taka siam a, hmasawn dan dik taka teh a nih theih nan population data dik tak neih a pawimawh a. Hemi kawngah hian data dik leh rin tlak a awm theih nan H&FW Lunglei District chuan an huam chhung Lunglei District leh Hnahthial District-ah digital population counting system siamin, data lak khawm hna kalpui mek a ni a. He hma lakna kal tlang hian data dik leh tharlam neih theih a nih bakah, mihring pun dan leh danglam chhoh dan pawh a hriat theih dawn a. Health programme hrang hrang bakah, school education department leh women & child development programme-ah te, department hrang hrang data mamawhah te pawh ṭangkai takin a hman theih beisei a ni.

Digital population dat lak khawmnaah hian khaw chhunga mi cheng nghette, hna thawh/ei zawnna avanga hmun dang aṭanga awmte, a khaw mi hmun danga hna thawh vang emaw, zirna vang emawa awmte pawh chhinchhiah vek an ni a. Mitthite chhinchhiahna pawh dah tel niin, nu nau pai mek te, natna inkai chhawn theih loh (NCD), a bikin zunthlum vei mek leh thisen sang neite pawh chhinchhiah nghal an ni a. Tun dinhmunah Lunglei leh Hnahthial district-a khaw 102 aṭangin data lak khawm mek niin, mipa 53,052 leh hmeichhia 54,213, an vaiin mi 1,07,265 chhut luh tawh an ni.

Lungleiah Bawrhsap hovin ODOP balhla chungchanga Lunglei District-a hma lakna kal mek thlir ho a ni

Lunglei, 2025 Vau thla ni 28: Sawrkar laipui hma lakna, "District khat, thar chhuah chi khat" (One District One Product) tih hnuaia Lunglei District thar chhuah atana thlan, "balhla" thar chhuah leh sawngbawl chungchanga Lunglei District-a hma lakna kal mek thlir ho leh hma lak zel dan tur sawi hovin vawiin khan Lunglei DC Conference Hall-ah District Bawrhsap Pi Navneet Mann hovin ṭhut khawm buatsaih a ni.

He hunah hian DC office bakah, line department hrang hrang - Horticulture, Agriculture, Commerce & Industries, Cooperation, DRDO, I&PR, NIC, KVK leh MOVCD-NER Phase-IV Team ai awhte an tel a. Meeting hmasa thu rel bawhzui dan leh hma lakna hrang hrang report ngaihthlak niin, ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktu tam zawk an awm theihna tur te, hmanraw mamawh bunna tur leh a hralhna chungchanga hma lak dan tur rawtna hrang hrangte sawi ho a ni.

Lunglei District thar chhuah balhla leh balhla aṭanga thil siam chhuahte felfai taka chhinchhiah leh vawrh lar a nih theih nan NIC enkawl Lunglei District website-ah ODOP page (https://lunglei.nic.in/odop/) siam niin, ODOP balhla chungchang leh a kaihhnawiha hma lakna hrang hrang pawh dah luh ṭhin a ni a. Sawrkar leh pawl hun hmanna hrang hrang leh khual ṭhate thilpekah ODOP balhla hmang uar tura ngenna chu DC office aṭangin office hrang hrangah thawn chhuah tawh niin, Chapchar Kut leh hun pawimawh dangah te pawh hman chhoh mek a ni a. Mausen khuaa balhla chingtute tan nikum khan metric ton 20 leng, khawl hmanga balhla um hminna, "Banana Ripening Chamber" bun niin, training buatsaihsak an ni bawk a. 

Lunglei District-a balhla hmanga sum chang thil siam chhuaktu (entrepreneur) pathum -Bawbawihi Food Processing, Pachuau Banana Chips leh Rafa Pro Biotics Juice te'n balhla hmanga kamram (chips), chhangphut (flour) leh um tui (juice) an siamte chu ODOP branding, QR code generation leh Udyam registration tura hma lak tawh niin, exhibition, fair leh hun hrang hrangah te an thil siam chhuah hi pho chhuah ṭhin a ni.He hunah hian Lunglei District-a balhla thar chhuah tipung tur leh balhla hmanga thil siamtu tam zawk an awm theih nan a tui mite zawn chhuah a, hma lakpui ni se, tih a ni a. 

KVK, SIRD&PR, Polytechnic, ITI leh RSETI te nen ṭang tlanga balhla chingtute tana training leh workshop buatsaih dan kawng zawn te, balhla hmanga thil siamtute bul ṭan nana PMEGP leh PMFME loan an lak theih dan tur ngaihtuahpui te rel a ni a. RD Department hnuaia PMKSY, MGNREGS leh NRLM te nen ṭang tlanga balhla chingtu leh balhla hmanga thil siamtute hma lakpui dan tur te, MOVCD-NER scheme hnuaia organic banana cultivation kalpui theih dan tur leh balhla chin tamna khaw ṭhenkhatahte hmanraw hrang hrang - banana ripening chamber, solar crop dryer, farmgate pack house leh primary processing unit te bun a nih theih nana hma lak dan tur te sawi ho a ni bawk.

MIZORAM EDUCATION REFORMS

COMMITTEE THUKHAWM

Lunglei, the 28th March, 2025: Mizoram Education Reforms Committee (MERC) thutkhawm vawi 10-na chu vawiin chawhma dar 11:00 khan an Chairman Dr. Vanlalthlana, School Education leh Higher & Technical Education Minister kaihhruaiin Directorate of Higher & Technical Education Conference Hall-ah an thu khawm.

Meeting-ah hian Private School Recognition Rules chungchangte, Mizoram Education Transfer & Posting Rules chungchangte, State Level Public Consultation chungchangte leh Education Reforms Campaign chungchangte sawi ho a ni a. Heng bakah hian MERC hnena lehkha lut 13 te sawi ho a ni bawk.

MERC meeting vawi 10-na hi Sawrkar kum kallai mek 2024-25 chhunga thutkhawm hnuhnung ber tur a ni a. Din a nih chhante bawhzuiin, Mizorama zirna siam that nan zirchianna leh rawtna hrang hrangte Sawrkarah an thlen thin a ni.

Anganwadi Worker te, MHIP Gen Hqrs leh

College zirlai tangkawpun NMBA hnuaiah

Ruihhlo do beihpui thlak dawn.

Lunglei the 28th March, 2025 : Nasha Mukt Bharat Abhiyaan (NMBA) Drug Free India Campaign  Aizawl District chuan Aizawl DC Er. Lalhriatpuia, Chairman-na hnuaiah  Aizawl district a college students atanga Master Volunteers 50 te leh Nodal teachers 10 te hnenah “One day training on Drug Abuse prevention for Master Volunteers & Nodal Teachers” chu Lianchhiari Run, I&PR Department, Treasury Square, Aizawl ah vawiin khan a buatsaih a. He hunah hian  Pi Lalzarmawii,Commissioner & Secretary, Social Welfare, Tribal Affairs, Women & Child Development Department chu khuallian a ni.

Ministry of Social Justice & Empowerment, Govt. of India chuan National Survey leh Narcotics Control Bureau tarlan angin ruihhlo hman sual hluarna bik  district te a thlangchhuak a, kum 2020, August ni 15 khan Nasha Mukt Bharat Abhiyaan (Drug Free India Campaign) chu ram puma hman turin a ti a. Tunah hian district thlanchhuah 372 ah kalpui a ni a, district tin Deputy Commissioner Chairman-na hnuaiah kalpui niin Mizoramah pawh district sawmpakhat (11) ah kalpui mek a ni.

Aizawl district bikah hian hmlakna hrang hrang kan lo nei tawh a, sub committee te lo din tawh niin, chungte chu;

1.    Sub-Committee for Schools and Colleges

2.    Sub- Committee on Drug abuse prevention among women leh

3.    Sub- Committee on Task Group te an ni.

Sub-committee for Schools and Colleges hnuaiah hian nikum 27th August,2024 khan Aizawl district chhung a college thlanchhuah 10 atangin Master Volunteers  50 te leh Nodal teachers 10 te chu Social Welfare Minister zahawm tak Pi Lalrinpuii kaihhruaina hnuaiah training kan lo neihpui tawh a, hma an lak zelna atan tanpuina cheng singkhat theuh college 10 te hnenah pek an lo ni tawh a ni. Tunah pawh hian an dawng leh dawn a ni. Anni hian an thalaipui te zingah ruihhlo that lohna te leh ruihhlo hmansual chungchanga hriattur pawimawh te an zirtir chhawng ve leh thin a ni. 

Sub- Committee on Drug abuse prevention among women hnuaiah pawh hian hmeichhia te zingah hmalak niin MHIP Gen. Hqrs te nen tanghovin 27th September, 2024 khan Master Trainers Training on Drug Abuse prevention chu neih a ni a, an hmalak zelna atan tanpuina cheng nuai khat pek an lo ni tawh bawk a ni. Tunah pawh an hmalak lehzelna atan pek an ni leh dawn a ni.

Task group Sub- Committee te pawhin theihtawpin Aizawl khawpui chhung a damdawi zuar te zingah, damdawi ruihtheih chi kum naupang te zingah hralh lo tura ngenin, inspection te anlo neih tawh a. Tunah hian an hmalak leh zelna  atan tanpuina cheng singnga pek an ni leh dawn bawk a ni.

He hunah hian MHIP Gen Hqrs atang leh Anganwadi Workers (Directorate of Women & Child) lam te pawh sawm tel an ni.

Lunglei HPC Vice Chairman Pu V.

Malsawmtluanga'n Zotuitlang khaw kum 50

tlin lawmna huna hmanpui

Lunglei, 2025 Vau thla ni 28: Vawiin khan Lunglei District-a Zotuitlang khuain kum 50 an tlin (golden jubilee) lawmna chu Zotuitlang Field-a "Zo Run"-ah hman niin, Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan khuallian niin a hmanpui.

Khuallian Pu V. Malsawmtluanga chuan golden jubilee lungphun (monument) khuh hawngin, Zotuitlang khaw kum 50 tlin hriat rengna souvenir, "Zo Run" chu a tlangzarh bawk a. Zotuitlangin kum 1975 aṭanga mei mit lo leh harsatna leh khuarel chhiatna te thleng lova golden jubilee an thleng thei chu a lawmpui thu sawiin, Zotuitlang khua dintute leh khawtlang hmasawn nana hruaitu lo ni tawh zawng zawngte zahna chibai a buk a. Zirna, infiamna leh hmasawnna kawng hrang hranga khaw hlawhtling leh chhuanawm ni zel turin duhsakna a hlan a ni.  

Pu V. Malsawmtluanga chuan bialtu MLA a nih anga Zotuitlang khaw tana hma a lak tawhna ṭhenkhat tar langin, Zotuitlang khaw tui harsatna phuhru tur leh tui hnianghnar tak an neih nana hma lakna kalpui tum a nih thu te, link road laih chhunzawm zel tura hma lak a nih tur thu leh Zotuitlang khaw hmasawnna tura theih tawp chhuahpui zel a tum thu te a sawi a ni.

Bialtu MLA Pu V. Malsawmtluanga hma laknain Zotuitlang khaw tan hian Valcheng tlang link road chu laih niin, phase 1, 2 & 3 awm tura ruahman a ni a. Zotuitlang khaw chhungah PCC Pavement metre 100-a thui chhun a ni bawk a. Nikum lam khan Zotuitlang English Medium School Principal kum khat hlawh tumsakin, Zotuitlang High School silver jubilee lawm nan pawisa fai a pe bawk a. Tun ṭuma Zotuitlang golden jubilee lawmna atan hian ₹ 3,00,000/- (nuai thum) a pe bawk a ni.

Zotuitlang khaw golden jubilee ni tak chu February ni 17, 2025 kha niin, zirlaite exam lai a nih avangin a lawm hun hi ni dang ruahman a ni a. Zotuitlang kum 50-na lawmna pual hian March ni 27 (Ningani) zan, March ni 28 (Zirtawpni) chawhma, chawhnu leh zan lamah te vantlang inkhawm buatsaih a ni a. Zirtawpni tlaiah hian jubilee lawmna ruai buatsaih a ni bawk.

Zotuitlang hi kum 1975 February ni 17 aṭang khan mei mit lova dingin, tunah hian in 136 leh mihring 650 vel an awm mek a ni.

Hnahthial District Phaileng South ah 2nd. HT Laltanpuia Memorial Volleyball Tournament tan a ni

 Hnahthial District Phaileng South ah 2nd. HT Laltanpuia Memorial Volleyball Tournament tan a ni.

Lunglei 28.3.2025: Vawin 28 March 2025 khan 2nd. HT Laltanpuia Memorial Volleyball Tournament South Phaileng Sporting buaitsaihin South Phaileng-ah khelh tan a ni a, Chhun Dar 12 khan Tournament tanna neih a ni a, he hunah hian Pu. H. Hmingthanzuala President Sub. Hqrs. YMA Hnahthial chu khuallian a ni. 

Khuallian chuan HT.Laltanpuia Hriatrengna Volley Ball Tournament Sponsore tu Pu. T. Ramliana South Phaileng te chhungkaw chungah leh South Phaileng Sporting Club te chungah lawmthu sawiin Thalaite tana sum tam tak senga hetiang an buatsaih thei hi fakawm a tih thu a sawi a, Inkal pawhna that tawk loh avang District boundary chhunga miten harsatna kan tawh mek chungchangah pawh Mat lei dawhtu Urban Infra Project Ltd. te pawh Sub. Hqrs. YMA Hnahthial leh DC te chuan chak tak leh tha taka hnathawk turin a beisei a, hunreilo te ah District khata awm a, awlsam zawka kan inkalpawh thei tawh tur hi lawmawm a tih thu a sawi.

 

Player kalkhawm te hnenah infiammi tana fuihna thutawi sawiin Infiamma ah eizawnna tlaka theihtawp chhuah a, Ruihhlo laka fihlim turin a fuihin 2nd. Laltanpuia Memorial Volleyball Tournament hi a hawng a, Organising te senso atan Rs. 5,000/- a hlan bawk. 

He Volleyball Tournament ah hian South Phaileng, Haulawng, Pangzawl, Mausen, Chengpui, Thuampui leh Hnahthial atangin Team 13 an tel a, karleh 2nd. April 2025 hian Final khelh tura ruahman a ni.

ZUNZAM MORINING NEWS ( 28.3.2025)

Kumin March thla chhungin Champhai District Police-ten ND&PS Act, 1985 hnuaiah case 15 an ziaklut a, mi 22 man anni tawh a, Excise & Narcotics Department Champhai te chuan ND&PS Act, 1985 hnuaiah case 7 ziak lutin mi 5 an man tawh bawk.

Champhai District Level Narco Coordination Centre (NCORD) Committee chu nimin tlai dar 3:00 khan Champhai Bawrhsap Pu Mohammad Aaquib kaihhruaiin an ṭhukhawm a, he huna tarlan anih danin Champhai District Police, Excise & Narcotics Champhai, line Department hrang hrang ten ruihhlo do kawnga hma an lakna te ngaihthlak ani a. He huna tarlan a nih danin March 2025 chungin Champhai District Police-ten ND&PS Act, 1985 hnuaiah case 15 an ziaklut a, mi 22 man an ni. Heroin  7.415 Kgs, Methamphetamine kgs 22.105 leh caffeine kg 3,000 man ani a, a hlut zawng hi nuai 553 (₹ 5,53,34,500) man hu an man a.  Excise & Narcotics Department Champhai te chuan  March, 2025 chhungin ND&PS Act, 1985 hnuaiah case 7 ziak lutin mi 5 an man a. Heroin gram 392 leh Phensydyl, 36 litres an man bawk.

He thutkhawmah hian District bawrhsap Pu Mohammad Aaquib chuan Champhai District chhunga ruihhlo dona kawngah, sawrkar thuneitute leh tlawmngai pawlte inkara thawhhona tha tak a awm thin chu chhunzawm zel tul a tih thu a sawi a ni. 

Champhai SP Shivendu- Bhushan chuan ruihhlo tawlh leh hman sualna a pung nasa hle tih sawiin District NCORD member te chu ruihhlo dona kawngah theihtawp chhuah awmze nei zawk leh mumal zawka khuahkhirh anih theihna tura ngaihtuahna seng zel turin a chah a ni.

Kulikawn Vengthlang a YMA member kutthlak chungchanga mawhphurtute, an phu tawka hrem annih loh chuan Central YMA chuan ngawih a tum lo.

Central YMA chuan thuchhuah siamin March ni 22 a Central YMA in Aizawl khawpui chhunga ruihhlo do hnatlang abuatsaih ah Kulikawn Vengthlang YMA member pakhat chu ruihhlo zuar, hek a, man tirtu nia puh in; March ni 23 (Pathianni) chawhma dar 11:00 bawr velah tu tih hriatloh mipa hmaituam rual ten, an in atanga ko chhuak a, kut an thlak rawn chiam mai chu pawi ati in a hrethiam lo tak zet tih an tarlang a. He thil thlenga a mawhphurtute, rang taka Kulikawn Police Station ten an man chhuak nghal hi lawmawm ati a, la man loh te pawh arang thei ang bera man tur leh an phu tawk hremna pe ngei turin an ngen nghal bawk. Hetiang thil hi athleng leh ngai tawh tur ani lo tiin he thil thlenga mawhphurtute an phu tawka hrem an nih loh chuan, YMA angawi dawn lo tih an tarlang.

CYMA chuan March ni 22 (Inrinni)-a Central YMA in Aizawl khawpui chhunga Branch YMA hrang hrang te ‘Ruihhlo do hnatlang’  abuatsaih a; thahnemngai taka thawk chhuakte chungah lawmthu an sawi bawk.

THLAWHNA TICKET TLAWM TURIN CENTRALIN STATE TIN TE A NGEN

Sawrkar laipui chuan thlawhna ticket man a tlawm theih nan State tinte chu Aviation Turbine Fuel (ATF) a VAT an lak ti tlem turin a hriattir.Vawiin Lok Sabha inkhawmah Union Civil Aviation Minister K Rammohan Naidu chuan zawhna chhangin he thu hi a sawi a. Thlawhna ticket to chhan zaa 45 hi hi ATF-a VAT lak vang anih thu sawiin state thenkhat chuan zaa 29 te an lak thu a sawi a. VAT hi zaa 5 a tihniam state an awm laiin thenkhatah chuan ala sang hle a ti a. Thlawhna chuan man chu che reng anih thu leh mamawh dan azirin a man a sang thin tih a sawi a. Pu Naidu chuan thlawhna ticket man hi sawrkarin a bituk lo tih a sawi bawk a ni.

INDIAN ARMY LA DAWN

Lunglei 28th of March, 2025 : Indian Army chuan Agnipath Scheme hnuaiah a hnuaia tarlante hi Recruiting Year 2025-26 chhungin a la dawn a, Online-in Application submit theih a ni. 

Lak tur te:- Agniveer (General Duty)   Agniveer (Technical)  Agniveer (Clerk/ Store Keeper Technical)

Agniveer (Tradesmen 10th Pass)  Agniveer (Tradsemen 8th Pass)

Online Registration hi 12th March, 2025 atanga 10th April, 2025 thleng www.joinindianarmy.nic.in -ah tih theih a ni. Hre chiang duh tan www.joinindianarmy.nic.in -ah emaw Army Recruiting Office, Supply Point, near State Bank of India (SBI), Zemabawk, Aizawl ah zawhfiah theih a ni.

ZUALKO

1) Pu C. Lalmalsawma (51) S/o Pu C. Lalsangliana IIS (L), Bazarveng,Lunglei, ILBS Delhi ah a boral a. A ruang hi  Dt. 28.03.2025 (Zirtawpni) hian Delhi atangin 10:30 a.m ah ruang Mizoram ah rawn chhohpui tur niin Lengpui ah chhun dar 12:40 noon vel ah rawn tum tura beisei a ni. A ruang hi Zan lamah an chenna In ah tlaivar pui a ni ang. SAwma hi AMC ah Town Planner thawk lai a ni.

2) Pu Lalruatkima, Mualțhuam North a nupui Missionary Pi Malsawmsangi Hnialum, An ni hi a nupui thawhna  Ngengpuitlanga awm mek an ni a, nimin dt. 27.3.2025 (Ninga tlai) khan an hnatlang haw an bathroom-ah a boral thut a, thudawnnain a sawi danin inbual tuma lut chu a chhung ten thawm ridut an hria chu an ko eih theih tawh lova, kawngka an tih chhiat chuan chhan tur a lo awm tawhn lo a ni. a thih chhan hi a tlusualpalh nge, Tuilumna ah Current ina man nge?  Hearth Acctack nge tih pawh hriat a ni lova, a taksaaj engmah hliam an hmu lo bawk a ni. 

Nizan Dar  10:30 pm vel khan a ruang Ngengpuitlang atangin an lo chhuahpui a , Mualthuan N panpui a ni ang. An thawhpui Missionary  then khat ten an rawn zui bawka, Mualthuam N-ah vui a ni ang.

ZUNZAM EVENING NEWS ( 27.3.2025)

 Mizo Inneih, Inthen leh Rokhawmna Dan ennawntu Committee thukhawm

Dated Lunglei: the 27th March 2025 : Vawiin khan Mizo Inneih, Inthen leh Rokhawmna Dan ennawntu Committee chu an Chairman, Pu Zahmingthanga Ralte, Addl. Secretary, Law&Judicial Department hovin Secretariat Conference Hall-ah an thukhawm a. MKHC, CYMA, MHIP, MUP, Women Commission. leh Mizoram BAR Association aiawhte bakah helam a tui mi leh mithiam bik te chu committee-ah hian an tel a ni.

Vawiin a thutkhawmah hian Inthen leh a kaihhnawih hrang hrang naupang enkawltu tur te, inrem leh theih dan tur te, nupui fanau chawmna chungchang leh inthen thulh a Ro insem dan tur lai te ennawn a ni.

Chairman Pu Zahmingthanga Ralte chuan thutkhawmah hian thu sawiin, Kan Inneih, Inthen leh Rokhawm chungchangah Kum 2014-a Mizoram Legislative Assembly-in Dan a pass chauh chu hman tawh tur a ni a ti a. Tin, nupui pasal inthen tur reng rengin Mizo-vin Inthen Dan kawng kan neih: Mak, Sumchhuah leh a dang te la hmang tho in Court hnai berah Inthenna lehkha lak tur a nih thusawiin, chung inthen dilnate chu Court-in thla ruk chhungin a chingfel dawn a ni a ti.

Pu Zahmingthanga Ralte chuan sawi zawmin tunlaiah Mizo nulate, hnam dang (Foreigner) pasal nei eng emawzat Kohhran-in a lo Inkutsuih tir te an awm a. Hengte hian Mizo Inneih Inthenna leh Rokhawmna dan, 2014 hnuaiah Inneihna an kalpui thei lovin, Dan chuan a huam lo tih a sawi a. 

Mizoram-a Inneihna zawng zawng chu Supreme Court thupek angin Law &Judicial Department chuan Veng tin leh Khaw tina Registrar of Marriages kal tlangin a chhin chhiah vek a, Marriage Registration Certificate a pe thin tih tarlangin. He Certificate hi India Sawrkar leh Ram dang Sawrkar pawhin an pawm a nih avangin fimkhur taka kal pui a tul a. Kan Mizo hmeichhia ten ram danga harsatna an tawh palh loh nan Inneih sawngbawl leh a Dan hman tur thuah fimkhur taka ngaihtuahna hmang turin Mizo mipuite a chah a ni.

Vawiin a thutkhawmah hian Member-ten siamthat ngai tia an lungrual theihna eng emawzat a awm a. he ennawn hna hi zawh fel thuai tum niin,  Zawh fel a nih hunah Sawrkar-in tul a tih angin Legislative Assembly-ah Dan siamthat turin a la pu lut dawn a ni.

LOK SABHA MP LEH AIR CHIEF MARSHAL INKAWM

Dated Lunglei the 27th March, 2025 : Nimin March ni 26, 2025 tlai khan Lok Sabha MP Pu Richard Vanlalhmangaiha chuan Chief of Air staff, Air Chief Marshal AP Singh chu Air Headquarters Office ah kawmin Mizo thalai te tana hamthatna awm thei te a sawipui.

Pu Richard Vanlalhmangaiha chuan Air Force a Mizo thalai te tan hna awlsam zawka an dil ve theihna turin Mizoramah recruitment nei ve turin Air Chief Marshal hi a sawipui a. Air Chief Marshal hian Air Force Recruitment hi India ram hmun hrang hrangah an nei thin a, Mizoram ah pawh neih ve ngei a nih theihna turin hma alak tur thu alo hrilh a ni. 

Lok Sabha MP chuan Indian Air Force in Mizoram hmun hrang hranga an hmunhma neih te civil mi in tangkai taka an hman ve theihna turin changtlung taka siam turin a ngen a. Chhingchhip Sainik School a Jet Fighter Display dah ve turin Air Chief Marshal hi a sawipui bawk a ni.

Lungleiah Bawrhsap hovin Healthy Lunglei District Campaign hma lakna thlir ho a ni

Lunglei, 2025 Vau thla ni 27: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah Healthy Lunglei District Campaign hnuaia inkai chhawn theih loh natna (non-communicable disease) laka him nana inzirtirna beihpui thlak mek thlir ho niin, hma lak zui zel dan tur sawi ho a ni.

He hunah hian Deputy Commissioner office, Health & Family Welfare leh Information & Public Relations official-te leh Mizoram Ṭhalai Kristian Pawl (MṬKP) Secretary te an tel a. Sub-Deputy Commissioner Pi Lalhlimpuii Pachuau, District Immunisation Officer Dr Christina Zonunmawii leh MṬKP Secretary Rev. F. Zorinkhuma te'n Healthy Lunglei District Campaign hnuaia hmun hrang hranga hriselna endikna leh inzirtirna kalpui dan report an pe a. Healthy Lunglei District Campaign-in a rah chhuahte sawi ho niin, hma lak zel dan tura rawtna hrang hrang sawi ho a ni bawk.

District Bawrhsap Pi Navneet Mann chuan nikum June thlaa Healthy Lunglei District Campaign kalpui a nih aṭanga hriselna lama a rah chhuah hmasawnna lo lang chu lawmawm a tih thu sawiin, he campaign hnuaia hmun hrang hranga NCD endikna aṭangin mahni thua inentir nachang hre lote leh mahni dinhmun inhre lo tam takin an dinhmun an hriat chian phah te, ei leh in leh nunphung hrisel inzirtirna nasa taka kalpui a ni te chuan a ṭha zawngin rah a chhuah ngei a beisei thu a sawi a. He campaign zara NCD natna chungchanga Lunglei District dinhmun tlangpui hriat theih a ni ta chuan hma lak zelna turah pawh kawng hmang nei zawka ruahmanna siam a tisam dawn a ni, a ti.

Healthy Lunglei District Campaign hi Lunglei District-in hriselna lama hma a sawn theih nana ruahman niin, June ni 12, 2024 khan Health Minister Pi Lalrinpuii'n a hawng a. He campaign hnuaiah hian Lunglei khawpui chhungah natna inkai chhawn theih loh, non-communicable disease (NCD) chungchang inzirtirna leh hriselna dinhmun endikna (screening) buatsaih ṭhin a ni a. MṬKP nen ṭang kawpin nikum December thla aṭang khan Lunglei khawpui chhungah pilot project kalpui ni bawkin, khawpui chhunga pastor bial ṬKP pathum - Bazarveng, Rahsiveng leh Theiriat bial leh an hnuaia unit 14 te nen kawng hrang hranga hriselna lam hawi inzirtirna leh puanzarna leh member-te hriselna atana hma lakna hrang hrangte kalpui a ni bawk. 

Healthy Lunglei District Campaign hnuaiah hia kum 2024-2025 1st - 4th quarter chhungin kohhran ṭhalai, pawl (association) hrang hrang, sawrkar office hrang hrang zingah leh hun pawimawh hrang hrangah te NCD Awareness & Screening ṭum 39 buatsaih niin, mi 1,863 (mipa 903 leh hmeichhia 960) chu an hriselna dinhmun endik a ni a. He screening aṭang hian thisensang (hypertension) tih hriat chhuah thar 282 (mipa 165 leh hmeichhia 117) leh inhre sa endik nawn 112 (mipa 79 leh hmeichhia 33) an awm a. Zunthlum (diabetes mellitus) hriat chhuah thar 126 (mipa 73 leh hmeichhia 53) leh inhre sa endik nawn 82 (mipa 60 leh hmeichhia 22) an awm bawk.

Healthy Lunglei District Campaign hi Lungleia MLA ṭhahnem ngaite sum pek leh DC office aṭanga a ṭul anga sum sih chhuah bakah, health programme leh department dang programme hrang hrang nena kai kawpa kalpui chhoh niin, he campaign kalpui zelna atan hian nikum October thla khan Lunglei Deputy Commissioner office chuan RailTel Corporation of India Limited, New Delhi te nen Corporate Social Responsibility (CSR) kal tlanga ṭanpuina sum ₹ nuai 18.92 hmuhna tur inremna thuthlung (memorandum of understanding) an ziak a. Ṭanpuina sum hi ṭum khatah ₹ nuai 4.73 zela ṭum lia pek tlak tura ruahman niin, 1st instalment dawn tawh a ni a. Hemi hmang hian campaign hi ngawrh taka kalpui chhoh mek a ni.

LADC IN CHAIRMAN THAR NEI 

Lunglei 27.3.2025 : Lai Autonomous District Council Chairman atan T.Zakunga Vawmbuk bialtu MDC chu chuhtu awm lova thlan a ni. Chairman VL. Hmuaka LADC leh Dy Chairman H. Lalmuansanga te chuan tun thla ni 19 khan banna an theh luh avangin, LADC Sorkar chu Chairman leh Dy. Chairman nei lovin a awm a, Governor chuan lehkha tichhuakin, C. Biakthansangi, MDC chu Protem Chairman LADC atan a ruat a, chuhtu awm lovin niminah khan T. Zakunga thlan a ni ta a ni. LADC CEM V. Zirsanga chuan Chairman thar kaihruaina hnuaiah an house fel fai tak leh tluang takin ro a rel a beisei tih a sawi. 

DILTLANG 'S' KANGMEI CHHUAK A HMUNAH ENFIAH A NI

Lunglei  27th March 2024 : Nizan zanlai dar 12:30 a Diltlang 'S' khuaa kangmei chhuaka chenna In kangte chu vawiin khan Deputy Commissioner, Lawngtlai thupek angin sawrkar hotuten a hmunah an enfiah.

Kangmei chhuakah hian chenna In pakua (9) chhungkaw sawm pasarih (17) luah lai chu a kang ral vek a, nunna chân erawh an awm lo a ni. Kangmei chhuahna khua Diltlang 'S' hi vawiin khan Pu Collin Hlychho, BDO, Lawngtlai leh Zonal Officer on Dissaster Management - nibawk chuan kalchilhin enfiahna a nei a ni. Kangmei tuartute hnenah hian DC Office chuan CYLA kaltlangin Silpaulin -10 hlan nghalin, BDO Office, Bungtlang ' S' in Silpaulin- 6 an  hlan bawk.

Deputy Commissioner, Lawngtlai chuan  kangmei tuartute hnenah hian tanpuina pek an nih tur thu an tarlang nghal a ni.

Mahlima MLA in Ph.D hmu thar te chawimawina thilpek a hlan

Vawiin khan Pu T. Lalhlimpuia, Lunglei West bialtu MLA chuan, a bial chhung a, Ph.D hmu thar te chawimawina leh MUP Bazar veng te hnenah thilpek hlanna a chenna in Venglai, Lungleiah a nei.

Pu Mahlima chuan, a bial chhunga zirna kawnga hlawhtling, Doctorate degree hial la thei khawp a, mi chhuanawm chawimawi theitu a ni chu, a lawm hle thu a sawi a.

A tih theih tam lo mahse, a bial chhung atanga zirna kawnga mi hlawhtling te  an awm fo chu, a lawmzia sawiin, zirna kawnga kan thanharh chhoh zel a tulna te sawi langin, PhD hmu thar te hnenah hian Chawimawina Citation mawi tak leh Pawisa fai a hlan theuh a.

MUP Bazar veng Branch te hnenah, Carrom board, Chess Board, Checker Board, BP checkna leh Blood sugar checkna a hlan bawk.

Pu Mahlima chuan, upa te mamawh thlen thil te tham tak tak, tihsaktu a ni thei chu, a lawmzia sawiin, kum lama upa te ngaihsak kawngah kan insanmar zel a tul hle tawh a ni, a ti bawk.

Chawimawina thikpek dawngtute leh MUP Bazar Veng branch te pawhin, lawmthu sawina neiin, a ngaihna hria bialtu MLA an nei chu vannei an intih thu ngaihnawm takin an sawi bawk. 

Ph. D degree hmu thar te chu, Pu Mahlima'n chawimawina a hlan te chu.. 

1) Dr. Jonathan Zodintluanga S/o. P. Lalrongenga Venglai, Lunglei

2) Dr. Esther Lalruatpui D/o. CD. Laltanpuia, Bazar Veng, Lunglei

3) Dr. C. Lalremtluangi D/o. C. Hrangzuala Venglai Lunglei te an ni.

ZUNZAM MORNING NEWS (27.3.2025)

South Diltlang khua Lawngtlai District a  ah In pasarih chhungkaw 9 in a kang

Lunglei 27:3.2025 : Nizan zanlai dar 12:35 Am vel khan Lawngtlai District a South Diltlang khua ah In pasarih chhungkaw 9 in, chenna atan leh dawr atana an luahte bungrua engmah chuh hman lovin a kangral vek. 

Kangmei chhuak In pasarih hi chhungkaw pakua in, an luah ani a, heng zinga In pali te hi dawr a luah lai a ni a. Kan thudawnna in a sawi dan in kangmei hi Pu Lalchhuana In atanga chhuak ni a hriat a ni a. In hnuai a chhang chhumna atanga in tan nia hriat a ni. Heng chhungkaw 9 in an luah bakah hian chenna In rellai RCC inhnuaia bungrua leh thingzai pawh a kang vek a, dawr pakhat chu thiah a ni.  Heng dawr pali te hi Chawngte 'P' road peng chhak BCM Biak In, Diltlang zawn, kawng kual lai taka awm a ni a, chenna In bakah hian Bike pakhat leh vawk pakhat a kanghlum bawk ani. 

Kangmei a chhuak tih Ditlang khawtlang in an hriat veleh theihtawp chhuahin mi tlawmngai ten an thleh mit theih ta ani. Heng kangmei chhuak avang hian nunna chan leh hliam an awm hriat ani lo a. Central YLA chuan kangmei tuartu chhungkua te an tawrhpui thu leh a tul anga hmalak zel an tum thu an sawi ani

Kangmei tuar chhungkua te chu Lalchhuana, A.Thansangi, H.Lalmuanpuia, Denis Lalremruata, Zarbawihi, Benota, Elizabeth, Rualthankhumi, K.Lalbiakzama, Lalrawngbawla leh Laltlanzuala te an ni a, Pu Laltlanzuala hi RCC In rellai neitu a ni.

Nimin tlai khan Aizawl khawpui bawlhhlawh paihna hmun, Solid Waste Management Center (SWMC), Tuirial a bawlhhlawh tawih thei lo (dry waste) paihna chu a kang.

Fire & Emergency Services Department leh Aizawl Municipal Corporation a thawk ten theihtawpin thelh hna an thawk a.  Kang thelh motor 3 ten  tuia an pohuh hnuah a rem duak a, mahse a kang chhuak leh thin a, nimin tlai lam khan a kang zual leh hle nia thu dawn a ni a, thudawn danin tukin lamah chuan kang nasa tak awm tawh lovin a la khu chuai chuai a ni.

Kangmei chhuah chhan hi chiang taka hriat ni lo mahse bawlhhlawh in upin methane gas a siam atanga kang nia rin a nih thu Aizawl Mayor Pu Lalrinenga Sailo chuan LPS a hrilh a, a kan chhuah loh lai pawh hian Gas insiam avang hian a sa nasa thei hle tih a sawi a.  Bawlhhlawh tawih atanga bio gas chhuak avang leh chhun boruak lum, thli lum a tleh leh chuan kang chhunzawm leh mai thei a la ni .

Kangthelh hna tibuai lo tur leh kangmei chhuak avanga chhiatna nasa zawk thleng thei veng turin SWMC, Tuirial hi khar rih a ni a; thuchhuak awm leh hma chu bawlhhlawh paih theih a ni dawn lo a, hei hian PPP mode-a Local Council kaltlanga khawn leh, Private bawlhhlawh paih zawng zawng a huam a ni. SWMC, Tuirial chhungah phalna nei lovin tumah luh phal ani lo a, Rag-picker leh Scrap Dealer te pawh luh phal ani lo. He khapna hian Sawrkar leh AMC official, kang thelh hna thawktute ahuap lo ang.

Bawlhhlawh paihna hmun khar lailawk a nih avang leh khar hun chhung tur hriat theih a nih loh avangin Aizawl khawpui chhungah bawlhhlawh, lo khawn rih lo turin Local Council te hriattir an ni a. Mipuite pawhin mahni inah tha taka bawlhhlawh lo khawl tha rih tur leh tuiluan kawr leh lui dungah te, paihna hmun tur ni lovah te, paih lo turin Aizawl Municipal Corporation chuan a ngen a ni.

Village Council/Court -II Lungsen chuan thawhtanni khan Block Horticulture Office Lungsen tlawh in, Office hawn anih ngailoh dan te, ahmun a kal in, a enfiah a, function tir thuai turin sorkar an ngen.

Block Horticulture Office Lungsen hi kut hnathawktute tan Department tangkai leh Lungsen khua leh a chhehvel kuthnathawktu te tan pawha chhenfakawm tak alo ni tawh thin tih sawiin hun rei tak dawr theihloh a, a awm hnu in, kum 2021 khan staff quarter leh Office building te chu luah theih tura sak zawh niin thawktu Pali an awm mek a. 

Beiseina sang tak nen Office dawr theih hun tur mipui ten nghakhlel taka an thlir mek laiin a thawktu- Staff Pathum te, District Horticulture Office Lunglei a attached anni vek nia sawiin hriatthiam har an tih thu an sawi a. Block Horticulture Office hi anihna tur ang taka mipui ten an chhawr theih tura function anih theih nan sawrkarin hma lak sak se an duh a, atul angin hma ala chhunzawm zel dawn tih an tarlang.