Vawiin 29.4.2025 ( Tue ) hi Mizoram Board of School Education chuan HSLC Examination, 2025 result tihchhuah a tum ni a ni.

 Vawiin 29.4.2025 (Tue) hi  chhûn dâr 12:00 hian  Mizoram Board of School Education chuan HSLC Examination, 2025 result tihchhuah a tum a. Hemi hriattirna bawhzui hian, Result hi MBSE Regional Office Lunglei-ah Lunglei District, Lawngtlai District, Siaha District leh Hnahthial District te tan en theihin a awm ang. Heng a hnuaia website – 

(a) www.mbse.edu.in 

(b) www.mbseonline.com –ah te hian

en theihin a awm bawk ang. A mamawh tan MBSE Regional Office Lunglei ah result bu hi lei theihin a awm dawn a, heng a hnuaia number tarlanah te hian office hun chhungin result ngaihven theih a ni ang. 

Contact No : WhatsApp & Phone Call : (1) 9863519718 (2) 9612226288 

Lunglei MZP ten kawng dan tawp mai an la tum lo

MZP Hqrs.Lunglei te chu an Sawrkar aṭanga thu lawmawm engmah kan hmuh loh avangin ATL road an dan mek chu tawp mai an la tum lo.

Lunglei 28.4.2025: Aizawl-Thenzawl-Lunglei ATL Road siamna sum dah phut-a lungawilohna lantir mek Lunglei MZP chuan Sorkar in duhthlan tur thil chi hnih a pek chu invaunaah ngaiin Kawng dan chhunzawm zel nise an ti.

 MZP te hian vawiin khan Health Minister Pi Lalrinpuii, CM Adviser Pu Lalmuanpuia Punte leh Pu V.Malsawmtluanga ten an rawn biak thu sawiin an thu rawn thlenin an lungawina a thlen lo tih an sawi a, Sorkar in duhthlan tur a pek chu CRRI ten project an siam hunah cheng vbc 44.89 aia tam pawh an pe thei a, a daih bak erawh chu sawi theih anih loh thu an sawi a, a pahnih naah cheng vbc 44.89 chu a pek theih a, mahse CRRI te project a siam tir theih lovang tiin duh anthlang tur a ni an ti. 

MZP chuan an resolution ang in pawisa pawhpen dah let leh chu an thil phut a nih thu leh CRRI ten project an siamah an ngaih a ngam lo tih an sawi. Invauna awka ah an ngai tih sawiin naktuk zing dar 7 atangin Hrangchalkawnah duty leh nghal an tum a ni.

Puan tawh angin, Lunglei MZP Headquarters huaihawtin tukin  dar 7 atang khan  Aizawl atanga Lunglei kalna kawngpui Pukpui daiah dan a ni a. MZP leh a thlawptute hian Pukpui-ah lirthei lut leh chhuak tur an dang a. MZP te hian ATL Road siamna tur cheng vbc 90 leh nuai 69 chu ATL Road siam na’n hman vek an duh laiin cheng Vbc 45 leh nuai 60 chauh dah a Mausen leh Pukpui inkar kawngpui kilometre 14 chin chauh siam na’n Sorkar in a dah chu an hriatthiam loh thu an sawi a, MZP te hmalakna hi Lunglei mipui tam takin thlawpin Maxi-Cab Service pawhin vawiin hian an thlawpna lantir nan an service lo a ni.

Rorellai ZPM Southern Headquarters, Lunglei chuan ATL Road chungchangah chhim lam mipuite rilru natna chu awm an tih thu leh mipui rilru damna tur thutlukna sorkarin a siamsak hma chuan an party pisa-ah hna engmah thawh rih loh ni se an ti a, chhim mipuite beiseina angin ATL road siamna tur ruahman sak thuai turin sorkar an phut tih sawiin April ni 7 khan Lunglei West bialtu MLA leh ZPM Southern Hqtrs-in ATL Road bik enkawl tura an dah Pu T. Lalhlimpuia chuan ATL kawngpui chu ZPM Southern Hqrs anga a mawhphurhna a nih angin sorkarin a siam dawn lo a nih chuan MLA atanga chawlh a hreh loh thu Lunglei leh chhim mipuite’n hriatpui an duh thu an Party chhung inkhawmah a lo sawi tawh a ni.

                         

ATL Road siamna tura atan a Sorkar in sum a pawhpen hi dahlet leh turin Sorkar ka ngen a ni.- Lalruatkima, Treasurer, MNF Gen. Hqrs, Aizawl.

ATL Road siamna tura atan a Sorkar in sum a pawhpen hi dahlet leh turin Sorkar ka ngen a ni. LC leh VC kha a hun takah inthlang i la, Sorkar lai Party hian seat an la tlem hle ang.  - Lalruatkima, Treasurer, MNF Gen. Hqrs, Aizawl.

Mizo National Front General Headquarters, Aizawl in ruahmanna a siam ang in, vawiin tahrik ni 28. April, 2025 (Ṭhawhṭanni) hian, MNF, Sub-Hqrs, Lunglei chuan, Lunglei District huamchhunga MNF Party aṭanga Local Council leh Village Council a thlan thar mi 137- te chawimawina hun Mizo Hnamrunah an hmang a. He hunah hian Pu Lalruatkima, Treasurer, MNF, Gen. Hqrs, Aizawl chu khuallian a ni a, Gen. Hqrs aṭangin mi 13 in an rawn hmanpui a ni. Thu sawiin Rk-a chuan, LC leh VC member tling thar te chu mipui tana thawk tur an nih ang taka, an mahni thlangtling tute tan a rinawm taka thawk turin a chah a, Mizo nationalism vawng nung zel tur leh Party dangte aia danglam ngam turin kalkhawm te a chah bawk. 

He hun hi Pu Vanlalhmuaka, President, MNF, Sub-Hqrs chuan kaihruai in, Rev. R. Lalnunzira'n hunserh a hmang a, Martarte sunna hun hman a ni.

Khuallian Pu Lalruatkima chuan thusawiin, LC/VC inthlan kha a hun takah inthlang lovin, kuthnathawktute'n sorkar-ah beiseina an neih vung vanglai takin inthlanna an buatsaih a, a hun takah inthlang ila rorel lai Party hian seat an lak tlem a rin thu a sawi. Gen. Hqrs, Treasurer chuan dan lova kuva mansa te chu phuahchawp lutukin Sorkarin a Auction a, Lunglei khawpuiah thil lungchhiatthlak tak vawiinah hian a thleng a, kan zirlai pawl te'n ATL Road dangin hun an hmang mek a, hei hi MNF Party chuan kan thlawp tlat a, Sorkar in ATL Road siamna tur sum a pawhpen hi ATL Road siam nan a hmang ngei turin Sorkar a phut thu a sawi.

Mizoram Universal Health Care Scheme chung chang sawiin He scheme-a a inziah luh man a sang lutuk hi mirethei leh harsa zawk te tan a luhai thlak a, inziah luh hun an hawn tawh hnua a kalphung tur ngaihtuah a midang kalphung zirchiang tura an la intir mek te hi kalngaihna an hriatloh thu Pu Lalruatkima chuan a ti bawk.

Pu LT. Kima Fanai, Gen. Secretary, I/c GAD, MNF Gen. Hqrs leh Pu Vanlalpeka Ngente, Gen. Secretarty, I/c GAD, MNF Sub-Hqrs te'n report an pek bakah, Pi PC. Lalmuanzuali leh Nl. Vanlalzahawmi te'n zaiin mipui an awi a. Pu H. Lalremruata, Treasurer, MNF, Sub-Hqrs, Lunglei in lawmthusawiin hun a tih tawp.

Central Young Lai Association, Hqrs Lawngtlai chuan thuchhuah siamin MZP Hqrs Lunglei te hmalak mekna thlawpna thu an puang ve leh ta.

ZPM Southern Hqrs. Lunglei chuan vawiin khan thuchhuah an nei ve leh ta.

ROAD CHUNGCHANGAH CHIEF MINISTER HMALAKNA A NGAIHTHAT-THLAKIN LAWMAWM KAN TI.  tiin

ZPM Southern Hqrs. chuan MZP leh a thlawptu pawl hrang hrang te thlawpna hnuaia Pukpui daia lirthei dan an kal pui mek laiin thuchhuah An thuchhuah an siam ve leh ta. An thuchhuahin a tarlan dan in:

ATL road (Aizawl-Thenzawl-Lunglei) chungchangah, chhim lama MLA te bakah ZPM Southern Hqrs. Lunglei hruaituten  theihtawp tak meuh meuh chhuaha, Chief Minister Pu Lalduhoma, ATL road sum chungchang an sawipuina-ah, Chief Minister Pu Lalduhoma’n tha tak leh inhawng taka ATL Road siamna tur sum chungchang alo sawipui hi ZPM Southern Hqrs. Lunglei chuan lawmawm kan tiin, ngaihthat thlak kan ti hle a ni.

Chhim lam MLA ten Chief Minister an sawipui lai ngei hian MZP Hqrs. Lunglei hruaitu lam pawh Phone hmanga bia-in, tuna an ngiat cheng vaibelchhe 90.69 zat ve cheng Vaibelchhe 44.89 la bang nia sawi hian kawng siam ngai hmabak chin hi a daih dawn loh avangin, a daih lo tur inpek ai chuan tunah Central Road Reasearch Institute (CRRI) te estimate siam turin tih an ni a. Anni hi an rawn thawk chhuak mek a, a vaia kawng siamna daih turin Estimate siam law law se, a tul ang zat zat (Vaibelchhe 44.89 aia tam zawk) Estimate peihfel rualin approve nghal Chief Minister hian a tiam a ni .

Chief Minister Pu Lalduhoma chuan kawng siamna daih lo tur inpek ai chuan a daih ngei tur zat chhut chian veleh, a daih zat tur pek min duhpui zawk hi chhim mipui leh ATL Road hmangtute tan pawh a tha zawk hle a, hetianga kawng siam ngei a nihna tura sum tul zat zat min pek a tiam avang hian ZPM Southern Hqrs. Lunglei chuan lawmawm a ti hle a. Kawng dan pin avanga mipuiten harsatna lehzual an tawh lohna turin, Chief Minister min tiamna hi MZP Hqrs. Lunglei te pawhin min pawmpuia, an hmalakna titawp   turin kan ngen a ni. 

Chief Minister Pu Lalduhoma hian, Lunglei mipuiin ZPM Sawrkarna an pek chungchangah lawm-tha ba hi, ZPM Sawrkar chuan a pe dawn a, hun rei lo te ngaichang turin chhim mipuite min ngen tak meuh meuh a ni tiin Rodingliana Khiangte General Secretary Media, Information & Publicity ZPM Southern Hqrs, Lunglei chuan a hming a ziak a ni.

MZP Hqrs Lunglei ten ATL Road Pukpui dai ah tukin zing dar 7:00 atang khan lirthei lut leh chhuak tur an dang tan.

MZP Hqrs Lunglei ten ATL Road Pukpui dai ah tukin zing dar 7:00 atang khan lirthei lut leh chhuak tur an dang tan.

Lunglei 28/4/2025: MZP  Headquarters, Lunglei chuan Aizawl-Thenzawl-Lunglei Road siamna tur sum pawh pen nia an hriat, dah let tura sorkar an ngen na kalzelah tukin dar 7:00 khan Pukpui dai, khualzin te tawngtaina hmunah Lunglei atanga Motor chhuak tur leh Aizawl lam atanga Motor lut tur an dang ta. 

Kawng dan chhan leh hma an lak dan sawiin hun kalpui hmasak a ni a, he hunah hian MZP hmalakna tawiawmtu pawl thenkhat te pawhin thu an sawi.

MZP President Tv Johan Lalhmangaiha chuan Kan sorkar in hria se a duh chu he kawng siamna tur Rs Vbc 90.69 hi rawn dah let se kan duh ber a,  kawng siamna tur a daihlohna pawh hi rawn hnawhkhat se kan duh a ni a ti. MZP hian kuanglo a nawr ngai lova, kan ram leh hnam tan eng pawh kan hma zel ang a ti. Thusawi mai maiah MZP chu a lungawi dawn lova, a tawp thlengin kan tang zel dawn a ni a ti. Pawl hrang hrang te MZP hmalakna tawiawm tu te chungah lawmthu a sawi nghal.

MSU Regional Hqrs President Pu Lalthangliana pawhin thusawiin ATL Road siamna tur pawisa awmsa pawhpen a,  Aizawl khawpui kawngtha sa min siam khum hi a na kan ti a, Lunglei mai ni lo, Chhimlam inzahloh naah kan ngai a ti. Kawngpui siam tur hawn vawikhatna Aizawl a hman a nih kha kan rilru ti na a,  kan sum an pawhpen kha an rawn dahlet kan phut tlat a ni a ti.

Chhimbial Chhantu aiawhin Pi Dengsailovi pawhin thusawiin helai kawng chhawrtu zawng zawng te vei em em, a thatna tur a MZP  in ke a penchhuak chu lawmthu sawiin RTPC, HPC  thiah chungchang rilruah a lan thu leh tunah ATL Road siamthat nan a hmalak a ngaita hi heti lo zawng hian ram hruaitu ten hma la se a duhawm hle a ti. Kan ngawih hian kan na lo tihna a ni lo,. kum 15 vel lungawilohna Lungleiah lantir a ni tawh lova,  Kan ngawih hian kan dawih tihna a ni lova, theihtawp kan chhuah zel dawn a ni a  ti. Vawi engemawzat ATL  Road siamthat nan a ngenna in awmzia a nei lo chu ngen dan kan thiam lo nge, engpawhnise  a hlawhtlin theih nan kan thiam ang ang in kan ngen zel ang a ti.

ZDU Sub.Hqtrs aiawh a thusawitu pawhin MZP hmalakna chu a tawp thlengin an thlawp dawn tih sawiin he hmalakna ti thuanawp tur a tu ten emaw sum an tawktarh anih chuan ZDU chuan a duh ve ngai dawn lo a ni a ti.

Maxicab Assn aiawh a thusawitu chuan kawngpui tha zawk an neih theih nan an passenger te hnenah pawh theihtawp a an lo campaign ve thin thu a sawi a, mahse ZPM thlan tlin anih hian an beisei ang anih loh thusawiin beidawnthlak a tih thu a sawi. He kawngpui hi zawh tamber an nih thu sawiin kawngpui a chhe lo ti tu te chu Sumo-ah phurh kan chak hle a, an hre ve mai ang a ti.

He hunah hian Resolution siamin  'ATL road siamna tur sum vaibelchhia 90.69 atanga an pawh pen vaibelchhia 44.89 hi dah let ni se, a daih loh chin zawng siamna tur pawh hi written assurance awm rawh se' tiin kalkawmte chuan ban dinglam phar in he resolution hi an pass a ni. 

Duty naah hian Magistrate leh Police te pawh awmin tun thleng hian harsatna engmah a la thleng lova, Vai sumo chinchang hrelo a lo kal te chu an Motor hun tirin Taxi ten Lunglei pan tir an ni bawk.

Rs Vbc 90 ngawr ngawrah ngaihtuahna sen tur a ni lova, a aia tam pawh dah theih a ni” CM

“Rs Vbc 90 ngawr ngawrah ngaihtuahna sen tur a ni lova, a aia tam pawh dah theih a ni” CM

Lunglei 28/7/2025:   Chief Minister Pu Lalduhoma chuan  Year of Consolidation kum 1 chhung an puang a, chu kum chu a zawh hnuah thla 1 emaw chauh hun an la hmang a, chuti chung chuan theihpatawp a hma an lak thu sawiin Lunglei lam tan phei chuan hma la nasa ve hle a an in inhriat thu sawiin Mausen to Lunglei khawchhung  atan Rs Vbc 18 te, Buarpui to Bunghmun, Vaisam to Zehtet tan Rs Vbc 10, LGWSS atan Rs Vbc 55 te dah a ni tawh tih a sawi. ATL Road chungchangah Vbc 90 ngawr ngawrah ngaituahna sen tur a nih loh thu sawiin Mausen - Kanghmun S chu Central Road Research Institute(CRRI) ten an zirchian a, estimate an siam hnuah, a tul ang zat zat dah an in huam tih a sawi bawk. 

ATL Road chungchangah Chief Minister Pu Lalduhoma chuan Vbc 90 ngawr ngawrah ngaituahna sen tur a nih loh thu sawiin  Mausen to Pukpui aia thui, Mausen - Kanghmun S chu Central Road Research Institute(CRRI) ten an zirchian a, estimate an siam hnuah, a tul ang zat zat dah an in huam thu a sawi. 

Hemi chungchangah hian Lunglei North bialtu MLA Pu V. Malsawmtluanga leh Lunglei South bialtu MLA Pu Lalramliana Papuia te chuan  nizan khan Chief Minister Pu Lalduhoma chu a chenna inah hmuin  CM chuan ATL Road chungchangah Vbc 90 ngawr ngawrah ngaihtuahna sen loh tur a nih thu a sawi a. Pukpui -  Mausen  siam nan cheng Vbc 45 an dah phawt a,  tuna siam tur  bak zawng, Mausen -  Kanghmun S inkar chu Project siam thiam leh rintlak, Central Road Research Institute ten an zirchian hnuah Estimate an thehlut dawn a, cheng Vbc 100 leh a aia tam thleng ruahman a tul thei nia sawiin a tul zat zat dah belh an in huam thu a sawi a. CRRI te chu karleh lamah an rawn thlen beisei a ni  a ti.

Chief Minister chuan ATL Road siam nan a tirah cheng Vbc 100 chuang pawh sanction se, thawklehkhatah an hmang seng tak tak dawn chuang lo niin a sawi a, Estimate a awm phawt loh chuan Administrative Approval leh Expenditure Sanction pek theih a nih loh thu sawiin  sorkar a in hawn lai a, an ngaithiam lo lui tlat dawn a nih chuan Politics a in rawlh em tih a awl thei a, NGO phei chu inrawlh lo se a duh tih a sawi. Chief Minister chuan ATL Road chungchangah nawrh hial tum an awm chu an sawi dan fuh chiah loh vang leh thil nih na tak hriat chian loh vang a nih theih thu a sawi  bawk.

CM hian ATL Road siam hi inthlan hma a a an au hla a nih thu leh nawr hranpa pawh ngailo a an in dah thu a sawi a, abiktakin LMC-ah hnehna an chan vek avang khan Lunglei tan bat an nei lian hle ni a sawiin an phu reng bawk a ni a ti.

He kawng danpin hi  Political Party zingah ZPM Southern Hqtrs. Lunglei chuan an thlawp thu chhuah in vawiin hian an Party Office-ah eng hna mah thawh an tum loh thu an chhuah a, Lunglei Dist Congress Commmittee(LDCC) pawhin an thlawp thu chhuahin vawiin hian an Party Office khar a, thawhtanni a pianga a regular a an hman thin Political Session chu naktuk Thawhlehniah hman an tum tih nizan khan thuchhuah an siam.  MZP hmalakna hi Lirthei a sumdawng zawng zawng ten thlawp in Lunglei to Aizawl Maxi Cab service pawh an chawl a, ZDU Sub.Hqtrs. Lunglei te, Pick-Up Assn, Two wheeler Taxi, Auto Rickshow Assn, Chawngte Jt NGO, Lunglei & Hnahthial Thalai Pawl, Chhimbial Chhantu ten an thlawp thu an chhuah tawh bawk. 

Hetih lai hian MZP te hian tukin zing dar 7:00 atang hian Pukpui thlang Ṭawngṭaina hmunah lirthei dan an tum chu an thulh thu hriat a la nilo a ni.

Bible Society of India, Lunglei North Branch chuan Annual Meets leh Thanks Giving Service an nei ..

Bible Society of India, Lunglei North Branch chuan Annual Meets leh Thanks Giving  Service an nei mek.

He an programme  hi  April 26-27 chhungin The Salvation Army,Lunglei Corps Biak In (CITADEL) Venglai ah an nei a,  Seminar leh Vantlang Inkhawm in hun an hmang deuh bera, Vawiin Pathian ni chawhnu hian Annual meeting Service neiin Upa C Vanlalmuana Asst. Secy in kaihruaiin Branch report ngaihthlak a ni a, hei bakah sum dinhmun report a ni bawka, kum 2024-2025 chhungin an sum hmuh zawng zawng Rs 5,52,865:00 niin an senral chu Rs 1,96,878:00 niin tun dinhmunah Rs 3,55,987 a ni tih report chuan a  tarlang a, heng sum te hi collector te leh chhungkaw hrang hrang thahnemngaite thawhkhawm a nih thu tarlan a ni bawk.

Vawiin chawhnu inkhawmah hian  Lunglei Corps Citadel Brass Band leh Timbrel Display Lunglei Bazar Corps Home League ten  an nei a, hei bakah Lunglei North Area chhunga Bible kuta lo ziak chhuak tawh te mi 11 ( sawmpakhat )te hnenah lawmpuina thuziak leh Mizo Study Bible an hlan a ni, hemi hnu hian Rev JC Vanlaluaia BCM Serkawn Bialtu in thuchah a sawi a ni. Zanin hian  Pathian boak Inkhawm neiin Rev PC Liandulan a kaihruai anga, Zaipawl te zai bakah Rev R Lalrintluanga AGS Mission BCM in thuchah a sawi ang.