Zobawkin Rs Nuai 300 bawr, Hauruangin Rs Nuai 100 vel chan mek ang an ni.

LMC atanga an chhuah theihna atan tangrualin hma an la dawn 

Zobawk leh Lungpuizawla tlawmngai pawl hrang hrang niminpiah khan Lunglei NRGSK House, Zobawk South thukhawm chuan Lunglei Municipal Council (LMC) atanga an chhuah theih nan hmalak an rel. Lungpuizawl leh Zobawka tlawmngai pawl hruaitute thukhawm hian LMC huamchhung atanga an chhuah theih nana hmala tu tur Joint Action Comtt dinin, June, 2025 atangin hmalak tan nise, an ti. Zobawkah hian Local Council pahnih awm in, YMA-ah chuan branch 4 a awm thung. Tarlan tawh thin angin Pukpui leh Hauruang

pawhin LMC atanga chhuah hi an duh a ni. Veng 5 ten LMC atanga chhuah leh an duh chhan tlangpui chu LMC a din hnua pawisa chawi ngai hrang hrang leh chawi tur la awm turte mipui nawlpuiin a la zawh loh vang leh NREGS a tawp tak avanga mi tam takin harsatna an tawh phah vang a ni.

Zunzam news chuan  K Lalremruata (Tuaia ) ziak a hmuh ang chuan Lunglei Municipal Council a awm  hma, NREGS a awm lai khan Zobawk North ah Job card 326 a awm a, Zobawk South lamah Job Card 488 a awm thung, a zavaiin Job Card 814 a awm tihna a ni. LMC ah lut lo in NREGS la chhawr thei ta se, job card pung lo mahse mipui inhlawhna atana Kum 2025-26 chhungin Rs. 2,28,73,400/- (Nuai 228 chuang) a lut thei anga, Material component ah dan ang takin kal se Nuai 70 vel an dawng thei bawk ang. A vaiin Nuai 300 bawr vel an dawng thei dawn tihna a ni.

Hauruangah hian LMC awm hma khan Job card 299 a awm a, pung miah lo pawh nise mipui inhlawhna atan Rs. 84,01,900/- (Nuai 84, sing 1 leh zakua) an dawng thei ang a, material component ah Rs. Nuai 30 bawk an hmu thei bawk ang. A vaiin cheng  Nuai 100/- bawr vel an khuaah a lut thei dawn tihna a ni. 

Zohnahthlak chhhuanawm tlangval 2 te

Jeffrey Hmingchullo (45) s/o Lalkhawthlang, Rengkai, Churachandpur chuan niminpiah khan Rashtrapati Bhavan ah President Droupadi Murmu hnen atangin sipai huaisen chawimawi na Shaurya Chakra a dawng. 

Jeffrey Hmingchullo hi CRPF ah Inspector a ni a, kum 2023 khan Jharkhand ah hel pawl Maoist te nen an inkah naah huaisen tak leh rem hre taka che in hel pawl pahnih a kap hlum a, a thiante pawh an him theih phah a, hei vang hian sipai huaisen chawimawi na hi hlan niin, a rual hian Shaurya Chakra hi mi 33 hnenah hlan an ni. 

CM Lalduhoma chuan social media kaltlangin India sorkarin mi huaisen bik te hnena chawimawi na a pek thin, peace time Gallantry Award sang pathumna, Shaurya Chakra dawngtu Inspector Jeffrey Hmingchullo, CRPF, chu a lawmpui leh a chhuan thu a sawi a, a thil tih chuan Zohnahthlakte a chawimawi a, midangte tana entawn tur thil tha a hnutchhiah tih sawiin mahni inphata ram hmangaih turin mitin a ko tih a sawi.

UPSC Combined Defence Services ah inziak tling

Nizan hmasa khan UPSC Combined Defence Services 2024(II) All India Merit List a tih chhuahah, Andy L Khobung s/ o Lalhmingsanga Khobung Chanmari West tlangval chu mi 510 ah AIR 304 na hauhin a inziak tling a. 

Andy L Khobung unau pa Dayne Thiamsangliana Chanmari West, Aizawl chu UPSC in NDA & NA 2019 result a tih chhuah ah khan alo tling tawh bawk

Thenzawl Peace City din a duh thu NITI Aayog Governing Council Meeting-ah CM in a sawi

Chief Minister Pu Lalduhoma’n Operation Sindoor hlawhtling taka neih a nih avangin Prime Minister Pu Narendra Modi lawmpui na a hlan a. Mizoram mipui ten an thlawp tlat thu a sawi. Inrinni a New Delhi-a Prime Minister Pu Narendra Modi kaihhruai NITI Aayog Governing Council vawi 10 naah he thu hi sawiin Chief Minister chuan sawrkar laipui hmalak na an thlawp tlat thu a sawi a, Mizoram chu tunhnaiah fully literate statea puan a ni a. 

Hei hian Mizoram chu chhawr tlak mihring nei tura a inbuatsaih nasat-zia leh a hlawkpui zia a tilang tih sawiin hnathawh tur neilo chu za zela 2.2 % a ni a ti a, hna hrang hranga hmeichhe telna chu 45% lai a ni tih sawiin Kut themthiam kawngah khawvel huap inel naah India aiawh thei khawpa tha Mizoram in an nei tih a sawi. Chief Minister chuan NITI Aayog State Support Missions kaltlangin hma lakna chak takin an kalpui tih sawiin Viksit Bharat 2047 an thlen theih nan Dept tin te chu an ruahman na an thehluhtir a ti a, Viksit Bharat 2047 atana an hmalakna langsar tak chu Bana Kaih Scheme a ni tih sawiin Ram hmasawn na atana thawhpui tlak progress partner mi 517 an thlang fel tawh a ti a, Central scheme nena kal dun zel tura duan a ni tih a sawi. 

Pu Lalduhoma chuan Mizoram kut hnathawktu te tan Market Support System tha tak an kalpui a ti a. Kutkawih eizawnna bultantu te tan hmalakna tur remchang leh hamthatna an siam tih sawiin infiamna lamah theihna sang tak thalai ten an neih avangin naupang talent nei te zawn chhuaha, chher puitlinna tur Empowering Mizoram Sports an kalpui mek tih a sawi bawk. Chief Minister chuan Aizawl chu a tawt chhoh zel avangin thalaite chu Primary sector atanga Industry leh Service sector lama tam zawka an luhna tur an dap a ngai a ti a, khawpui thar, mipui nuai sawm atanga nuai sawm panga vel khawsakna tur ThenzawlPeace City din an duh tih sawiin hemi kawngah hian Ministry of Housing & Urban Affairs in an thawhpui tha tih a sawi bawk

NI 26.05.2025 (Thawhtan morning ) NEWS

  NI 26.05.2025 (Thawhtan ni ) NEWS: 

 

1. NIMINAH PALESTINIAN 23 THIH BELH: Hamas Official sawi danin nimin ni 25.05.2025 khan Israel kutah Palestinian 23 an thih belh. Thi zingah hian Journalist 1 Hassan Majdi Warda, Jabalia khua a mi leh leh a chhungte engemaw zat an tel. Chubakah Israel thlawhtheihna-ten  Nuseirat an beihnaah senior official Ashraf Abu Nar, civil emergency service a an senior official leh a nupui an tel. Tihian tuntum Israel leh Hamas inbeihnaah hian Journalist 220 an thi ta a ni. Hamas sawi dan chuan an  indonaah hian Palestinian thi zawng zawng chu 53,900 aiin an tam tawh.

 

2. RUSSIA IN UKRAINE KHAW 30 A BEI: Nimiin khan Russia chuan Ukraine khaw lian deuh deuh 30 drone leh missile in vawi 367 an kap a, mi 9 an thi a mi tamtak an hliam.Kar hmasa a Turky a Russia leh Ukraine inbiakna a mitang 1,000 ve ve in chhuah tawn an remtih angin sipai 303 ve ve an in chhuah sak a. Nimin piah lam khan sipai 307 leh civil mi 390 an in chhuah tawn sak tawh bawk. Tin, Russia sipaite hian Ukraine khaw 3, (Donetsk bialah khaw 2 leh Sumy biala khaw 1) an lak belh leh a ni. 

3. THIL LAIHCHHUAH TURAH GREENLAND LEH DANISH-FRANCH INREM: US President Trump a beisei em em Greenland a leihnuai thil laihchhuah tur aluminum, culsium leh micro silica siam nana pawimawh em laihchhuah phalna license chu ni 21.05.2025 khan Greenland Sorkar chuan kum 30 chhung atan Danish-French mining consortium hnenah a pe. Trump hian engtin tak ngai ang maw.  Greenland hi lei a tum a, a lei theih loh chuan tharum hmanga lak hial a lo tum thu a sawi a nih kha. 

4. A CHHUNGTE HMUH LAIIN BALOCH JOURNALIST KAHHLUM A NI: Inrinni zing dar 3:00 khan Baloch Journalist huaisen Abdul Latif Baloch chu a inchhungah a nupui leh fate hmuh laia kahhlum a ni. Baloch Yakjehti Committee chuan, "Abdul Latif hi Sorkar backed armed groups kahhlum a ni," an ti. Abdul Latif hian Pakistan sipaiten Human Right thuthlung nasa taka an bawhchhiat thu chanchinbuah a chhuah thin a ni. Thla hmasa khan a fapa Saif Baloch leh an chhungkaw member dang 7 te chu secutity force-ten an rubo a, a hnu lawkah an ruang hi hmuh a ni. Baloch ho hi hun rei tak Pakistan laka independent sual, Pakistan sipai leh an chhungte tam tak tunhnaia thattute an ni. Pakistan phalna a mining hnathawk Chinese Engeneer thenkhat pawh an that tawh. -T. Sangkunga

VAI COMPANY HI KUM 15 DAIH KAWNG SIAMTUTE AN NI CHIAH LO A ANG!

Article. ~ Zoa Tlau, (25.05.25) Chawlhni 

Buannel Cabin

VAI COMPANY HI KUM 15 DAIH KAWNG SIAMTUTE AN NI CHIAH LO A ANG!

(April, 2025-a siam kha May ni 22, 2025-ah chuan 'repair' a ngai ta e)_

"Kawng tlo lo lutuk hi ZPM a sorkar ruala tihbo kan tum a ni," tiin Vanapa Hall-ah ZPM mipui pungkhawm hmaah Pu Lalduhoma'n a sawi a, kutbeng thawm a ring hlê a nih kha. A 'video clip' hi en mai theih turin 'social media' lamah pawh a la tam hle.

ZPM-in kum 15 daih tur kawng siam dan an hria:

Kum 15 chhung daih tura tlo kawng siam dan tur a hriat thu Pu Duhoma hian a sawi chamchî a, an sorkar hunah kawng an siamṭha dawn tih a sawi ngun viau. An sorkar ta a, April ni 15, 2025-ah Aizawl bikah Bawngkawn leh Ramhlun South inkar kawng siam hna ṭan a ni a, thla 1 awrh daihin, May ni 20, 2025 chhovah chuan thawm ṭhat ngai khawpin a chhe hman tawh!

PWD Minister-in ribbon chep chatin bul a ṭanpui:

"Zaninah hian kawng ṭha kan nei dawn a ni tih bulṭanna'n he ribbon hi ka chep chat e," tiin April ni 15, 2025 zan khan PWD Minister Pu Vanlalhlana chuan Ramhlun-Bawngkawn kawngpui siamṭhat _(resurfacing)_ bulṭanna a hmanpui a nih kha.

Aizawl chhung bîk kawngpui siamah hian km. 84-a thui siam a ni dawn niin sorkar lam thuchhuakin a tarlang a. PWD Aizawl Road North Division hnuaiah km. 44 leh PWD Aizawl Road South Division hnuaiah km. 40 a ni.

Kawng siamtu Vai Company:

Aizawl khaw chhung kawng siamtu chu tu dang ni lovin kan ṭhenawm Assam-a vai Company an ni leh ta mauh mai! A siamtu tura thlan te hi Nidhi Creative Infrastructure, Silchar, Assam an ni a, km. 84-a thui hi thla 18 chhunga siam zo tura ruahman a ni. Kawng an siam zawh hnu hian a siamtute hian kum 3 chhung an enkawl zui dawn nghe nghe.

Tlangkawmna:

Hot Mix Plant an bunnaah buaina a awm a, tihchhiatsak an la ni zui a. Kumin April ni 15-a Aizawl khawpui chhung kawng siam hna ṭan ṭhenkhat chuan harsatna an tawk a. PTC Lungverh lamah te Hot Mix Plant la awm te hmangin hmun ṭhenkhat chu hna an la kalpui thung.

Kawng tlo tak min tiamtute kawngpui siam hian thla 1 a daih awrh a, a chhe zui. Vanglaini Daily Newspaper-in April ni 21, 2025 khan Editorial-ah 'Kawngpui Siam Vil Uluk Ni Rawh Se' tih a ziak daih tawh a. Vil uluk ngaiin a lo hre tawh a ni.

"Kawng siam hi ṭha leh tlo a nih theih nan contractor thlan an uluk thu te, kawng siam dan tur ang taka siam a ni em, bitumen pawlh dan, temperature, a chhah zawngte uluk taka vil zui a nih dawn thute PWD Minister-in a sawi. Hei hi a pawimawh hle mai a, kawng siam dan tura tih ang takin a siamtute'n siam se, sorkar pawhin uluk takin vil ngei rawh se," tiin Vanglaini Editorial hian a ziak a. Contractor an thlang uluka Assam ami an ko lût a, hei le, kan chhe nghal ta si.

TURKEY ZIN AN ṬHULH NASA, INSUMDAWN TAWNNA A TAWP! THIL MAN A TO DAWN

Article.  .........~ Zoa Tlau       Buannel Cabin (24.05.2025) Inrinni.

TURKEY ZIN AN ṬHULH NASA, INSUMDAWN TAWNNA A TAWP! THIL MAN A TO DAWN

(Georgia, Greece, Thailand adt. India khualzin ten an hawi...)

'Operation Sindoor' bawk hi sawi a ngai leh ṭhin. Kumin May ni 9 chhoa India-in April ni 22-a Pakistan firfiak te Pahalgam hmuna râwng taka a chetna thungrulhna kha a ni miau a! Pakistan an ṭan avangin India mipui te chuan Turkey leh Azerbaijan te chu an ensan ve mêk a, kar kal ta khan an rama India khualzin zaa 60 lâiin a tlahniam a. Ram pahnih tlawh tura 'booking' ti vek tawh ten an ṭhulh (cancel) leh deuh vek niin Reuters chuan MakeMyTrip leh EaseMyTrip Company hnen aṭangin thu a dawng.

'Turkey leh Azerbaijan kawmserh a lâr:'

India mipui te an thinurna a sosâng laklawh tawh a. He ram pahnih kawmsêrh hi a hluar chho hle a. Turkey hian Operation Sindoor neih lai khan Pakistan a thlâwp tlat a, April ni 22-a Pahalgam-a thil rapthlak tak thleng pawh kha a dem lo. Hetiang chiah hian Azerbaijan hian Pakistan a thlawp ve bawk, he ram hi Asia leh Europe inzawmna vel bawra awm, tun hmaa Soviet Union awp ni ṭhin niin, oil lamah a hausa a, a ram erawh intluktlanna awm lohna a ni thung.

Zinna tur sawn a lâr thar:

Turkey khan India beihna tur drone ṭhahnem tak Pakistan a pe a nih kha. EaseMyTrip Chairman chuan India mite chuan Turkey leh Azerbaijan zin tum te chuan; Greece, Serbia, Georgia, Thailand leh Vietnam lamah an zirnna tur an sawn nasa hle tih a sawi.

EaseMyTrip bik ringawtin an chhût danin Operation Sindoor vang khan Turkey-a zin tum zaa 22 ten an ṭhulh a, Azerbaijan-a zin tum 'book' lawk vek tawh zaa 30 ten an ṭhulh bawk.

Nikum khan EaseMyTrip kaltlangin India khualzin 287,000 ten Turkey an tlawh a, 243,000 ten Azerbaijan an tlawh. MakeMyTrip kaltlangin hetiang zat vel hi an kal bawk a, ram pahnih te sumdawnna hi a tlakhniam phah ve dawn a ni.

Bungraw lakluh  titawp vangin thil man a sâng dawn:

India-in Turkey aṭanga a thil lakluh a titawp ta nual a, hei vang hian thil man sâng nghal tur leh a nghawng mipuiin kan tawrh tur a awm nual. India-in marble a lakluh zawng zawng zaa 70 hi Turkey aṭanga a lakluh a ni a, apple ton nuai 1.29 hi Turkey aṭanga a lakluh a ni bawk.

Ram pahnih insumdawn tawnna tihtawp mêk hi Turkey-a thawnlut hnem zawk India pawh hian a tuar dawn hle.

Turkey aṭanga a lakluh te chu; carpets, decorative items, furniture, silk, linen, olive oil, cherries, dried fruits, spices, herbal drinks, industrial machinery, leh agricultural hmanrua te a ni a. Turkish Kunafa, Kebab, Shawarma, dessert Kunafa, Turkish Tea te hi India-ah a lâr em em a ni.

India hlawk zawk ṭhinin a hloh dawn em:

India hian Turkey nena insumdawn tawnnaah hian hlawkna a têl nasa zawk a. Kum 2024-25 sorkar kum chhunga an insumdawn tawnna sum vir zat chu dollar billion 10.43 a ni a, India-in a thawn chhuah hi dollar billion 6.65 man niin, Turkey aṭanga a lakluh hi dollar billion 3.78 man a ni thung.

India-in Turkey-a a thawn luh tam ber chu; mineral fuels, auto parts, chemicals, leh textiles a ni a. A lakluh nasat chu marble, gold, apples, leh mineral oil a ni.

Tlangkawmna:

Operation Sindoor-ah khan khawvela 'defence' lam mithiam bîk te chuan India chuan hnehna a chang niin an pawm thlap a. Hneh satliah mai ni lovin, chiang takin sipai indonaah chakna a chang an ti a, he ngaihdan neitu zingah hian John Spencer, prominent U.S. military veteran leh Urban Warfare Studies, Modern War Institute New York ami pawh a tel nghe nghe.

Tun hnai indona erawh India hian a tuar lo thei lo a, Turkey te leh Bangladesh te nen insumdawn tawnna an titawp chho ta rap rap a. Pakistan lahin hlawkna chan an lo tum ve sek a, China lah a inrawlh chho zêl a. Geopolitical in nêkna ṭeuh neuh awm hian nakin huna sumdawnna a nghawng chho tura ngaih a ni.

BJP President in Mizoramah Prime Minister scheme te a nihna tur angin hman that a ni ngai lo a ti.

BJP Mizoram State President Pu Vanlalhmuakan Mizoramah Prime Minister scheme te a nihna tur angin hman that a ni ngai lo a ti.

Nimin zirtawp ni a an party pisa, Aizawla thu a sawinaah he thu hi sawiin Pu Vanlalhmuaka chuan Housing For All kaltlanga insak ṭanpuina chu sawrkarin a nih dan turin hmang se, tunah hian Mizoramah in neilo tam takin in an nei ngei tawh dawn a ni a ti a. Free Gas Connection, PM Mudra Loan, PM Kisan/Kisan Credit loan te pawh Central Sawrkar sum kaltlanga chhungkaw intundinna  tur a awm tih sawiin nimahsela Mizoram mipui ten an chhawr thei thin lo chu a kalkawngah fello a awm thin vang a ni a ti.

Pu Vanlalhmuaka chuan Mizoramin Central ah Project tam tak theh lut ṭhin mahse Project tam takte chu hmuh a ni ngailo tih a sawi a. Sorkar laipui chuan sum an pek chhuah tur reng reng an enfiahna pakhat chu an sum pek chu tu te nge chhawr ṭhin?tih kha a ni ṭhin a ti a. Mizorama Budget aṭanga sum tam ber chu Sorkar hnathawk hlawhah kalin mipui tan erawh tlem tê chauh a awm thung a ti a. Chutiang chiah chuan Mizoram sum hmuh chu mi tlemte chauhin a an hman theih te, an ṭangkai pui te chauh a nih thin avangin Project tam tak Mizoramin a hmuh loh phah a ni a ti.