Lunglei khawpui chhunga kawngsir a thil zuar a in pho thin te'n ID Card siam ngei ngei a tul tawh

Lunglei khawpui chhunga kawngsir a thil zuar a in pho thin te mumal zawk a an awm theih nan ID Card siam ngei ngei a tul tawh 

Lunglei 30/7/2025: LMC Town Vending Committee chu LMC Chief Executive Officer Pu Donny Lalruatsanga kaihhruaiin LMC BoC Meeting Hall-ah a tumkhat nana an thu khawm chuan Lunglei khawpui chhunga kawng kama thil zuara inpho thinte chungchangah inkaihhruaina leh inkhuahkhirhna felfai zawka kalpui dan tur an ruahman.

LMC CEO Pu Donny Lalruatsanga chuan Mizoram sawrkarin 'The Mizoram Street Vendors (Protection of Livelihood and Regulation of Street Vending) Rules, 2017' a siamin 'Vending Committee' din tura a phut angin LMC Vending Committee chu din a nih thu leh kum thum chhung atan member-te pawh ruat an nih thu a sawi a. Tun dinhmunah Lunglei khawpui chhungah kawng kama thil zuara inpho theihna hmun, vending zone 10 a awm mek thu sawiin, hmun thenkhatah erawh inpho/inzuar an awm tawh ngai lo tih a sawi. 

Vending Committee thu khawm chuan Lunglei khawpui chhunga thil zuar inpho phalna leh phal lohna hmun, 'vending zone' leh 'no vending zone' hman lai en nawn leh siam that chungchang an sawi ho va. Zone awmna veng Local council leh ward thu neitute'n lo thlithlai hmasain, August 2025 chhungin Committee-ah an hma lakna report theh lut se tiin, chumi zul zui chuan hma lak chhunzawm ni se, an ti. Kawng kama inzuar thin (street vendor)-te tan dan felfai tak siam niin, kawng kama inzuar/inphote chuan an nihna finfiahna, ID (identity) card an neih ngei a tul bakah, khua leh tui dik tak an nih a tul bawk a. 

ID card hi LMC-ah dil theih niin, a dil turte chuan an awmna veng Local council leh YMA te hriatpuina lehkha an neih a ngai a ni. Zan lama inpho thinte pawhin ID hi nei vek tura ruahman a ni a. A bik takin, Venglai leh AOC Ramthara zan lama inpho, street food zuarte chungchang pawh sawi ho niin, mumal zawka zir chiang turin Ward No. IV Councillor kaihhruainain Local Council Lunglei President, YMA Sub-Headquarters President leh Lunglei OC te ruat an ni. District Urban Development Officer Pi Lalhruaitluangi chuan City Street Vending Plan Lunglei awm tawh thu sawiin, vending zone, restricted vending zone leh no vending  zone te tun hmaa lo ruahman tawhte a tar lang a. Thil zuarah pawh ID pek danah temporary, permanent leh stationary te an thliar thu sawiin, thil zuarho zir chianna te pawh kalpui a lo nih tawh dan te a sawi lang a. Committee chuan he Plan awm sa hi a tulna apianga hman turin a pawm.

Tuialhthei harsat vangin Lunglei aṭanga Tlabung panna National Highway 302 sial hna pawh a nghawng

Tuialhthei vân avanga harsatnain Mizoram pum a tuam hman avangin, Lunglei aṭanga Tlabung panna National Highway 302 sial hna pawh a nghawng hman nual tih, Lungleia NHIDCL hotuten an sawi. 

Harsatna lian tham thleng loin National Highway 302 sial hna hi tluang leh chak taka thawh ni mah se, tun hnaiah Mizoram puma tuihalhthei a vân hman avangin, harsatnain contractor-te a tlakbuak hman tih, Lunglei Project Monitoring Unit hotute chuan an sawi a, kawng sial hna thawhna tam zawkah lirthei hman a ngaih tlangpui tawh avangin, khawl tihnunna tur tuihalhthei a awm lo chu an buai phah hle tih an sawi a, hetih lai hian Mizorama tuialhthei phurtute chu dan pangngaia an tlan ṭan leh tak avangin tuialhthei bikah chuan an harsatna tawh a ziaawm chhoh phah dawna an ngaih thu, an sawi a ni. 

Social Media hmanga midangte zahawmna ti bawrhbangtu te hremna dan hrang hrang zir ho.

Vawiin chawhnu khan Govt.J Buana College, Lunglei ah Protection of children from sexual offences act 2012, Ending cyber bullying leh child related laws te zirhona neih a ni. 

He zirhona hi District Child Protection Unit, Lunglei, Superintendent of Police, Lunglei, District Programme Officer(WCd) leh Equal Opportunity Cell, GJBC te tang hova buatsaih a niin Pu David Zaitinvawra, DCPO Lunglei chuan zirlai naupang te hriattur hrang hrangte, mizo mipa te tan lak a tul zia leh damdawi hmansual kawngah thalai te kan fimkhur a tul hle a ni tiin Naupang venhim kawnga tan lakpui turin zirlai naupang kalkhawm te a sawm.

He hunah hian Pi S Lalrotluangi, LPO, DCPU Lunglei chuan hursualna laka naupangte venhimna dan leh a bawhchhetute hremna dan (POCSO Act,2012 ), he dan hnuaiah hian thi tur hial a hrem theih a nih dan te zirtirna pe in,  Pi C Ramnunmawii DSP,Lunglei chuan Cyber bullying chungchang Social Media hrang hrang hmanga midangte zahawmna tih bawrhbangtu te hremna dan hrang hrang te hmangin zirtirna a pe bawk. He hunah hian college zirlai naupang mi 250 chuang an tel a ni.

ZUNZAM MORNING NEWS COLLECTION ( 29.7.2025)

Lunglei District Bawrhsap Pi Navneet Mann hovin nimin khan Lunglei DC Conference Hall-ah National Highway- 54 (Aizawl—Tuipang kawngpui, Lunglei District chin) leh National Highway 302 (Lunglei—Tlabung) kawngpui laih zauh hna leh siam ṭhat hnathawh mek dinhmun thlir hoin hmalak zui dan tur ruahmanin sawrkar official-te, kawng enkawltu NHIDCL (National Highways & Infrastructure Development Corporation Limited) leh hnathawktu contractor-te an thukhawm.

Theiriat a leimin vanga PWD kawng chhia leh NH-302 kawng ahnawh thin chungchang leh hmalak tawh chin sawi ho niin, PWD Road chhia siam that dan tur chu uluk zawka zir chian a, bawhzui ni se, tih ani a. Tun dinhmunah, lei min in, kawng ahnawh thian fai turin contractor lamin JCB 2 an dah reng thu tarlangin, lei min in, kawng a hnawh changa chak lehzuala thian fai thin turin contractor-te chu chah anni. NH-302 kawngpui Hauruang leh Sazaikawn inkar kawng chhia ah pawh contractor-te chu JCB dah belh tur leh a chhiat zualna ah GSB phah belh tura tih niin, rang taka siam ṭhat leh then fai hna, thawk ṭhin turin hriattir an ni bawk.

Joint verification team-in June ni 26, 2025-a Ṭawipui North-II khaw bula lirthei chetsual fona hmun an endikna report leh hmalak zui dan thlir ho niin, kawng luan (seal coating) nal deuh lai metre 300 vela thui chu BRNIPL te'n an hai khawh tawh thu leh kawng kual ulh lai, ti-ziaawm turin laih belh dan tur ruahman anih thu tarlan a ni a. A ṭul anga bawhzui zel ni se, tih a ni.

District Monitoring Committee-in NH-302 kawng laihna leivung paih dan an endikna report thlir ho ni bawkin, NH-302 kawng laih meka leivung paihna hmun 32 ruahman ataka kalpui a nih dan an sawi ho a. Spoil bank ṭhenkhat ah leivung dawlna, la peih fel lohna ah chuan leivung paih rih lo tur leh lungrem hna, thawk zo thuai turin contractor-te chu hriattir an ni a. Leivung paih in, Ruangte lui leh achhunga nungchate a nghawng dan leh chumi tiziaawm tura hmalak dan tur te, leivung paihna hmun ṭhenkhat ṭangkai zawka hman anih theih nana eco- park siam theih dan tur ruahmanna te sawi ho ani bawk.

He ṭhutkhawm ah hian NH-54 leh NH-302 kawng laih meka hmasawn dan thlir ho a nih bakah, kawng laitu te'n harsatna an tawhte leh ram neitute atanga harsatna awmte thlir ho niin, hmalak zui dan tur sawi ho a ni .

He ṭhutkhawma tarlan anih danin, NH-302 Package A (km 37.42-a thui)-ah hna 63.67% thawh zawh tawh niin, Package B (km 37.53-a thui)-ah hna 60.95% thawh zawh tawh ani a. NH-54 kawngpui package- 3, 4, 5, 6 & Hnahthial By Pass Road, belhkhawm a km 169.078-a thui (Hnahthial District leh Lunglei District bakah, Lawngtlai District chhung km 15)-ah, hna 97.56% vel thawh zawh tawh a ni.

===========

State Emergency Operation Center in, an chhinchhiah danin, kumin chhungin ruahsur nasa avanga In chhia 283 a awm a, In chhe zinga engemawzat hi In chim niin In rauhsan 345-a awm bawk.

Mizoram chhunga ruahsur nasa avanga In chhia leh In chim hi Serchhip district-ah atam ber a, 102 a awm a, In ruahsan 125 a awm bawk. Aizawl district ah In chhia 20 awmin In rauhsan 119 a awm a. Champhai district ah In chhia leh In chim 41 a awm a, Lunglei district-ah 26, Siaha district-ah 30, Kolasib district-ah 24, Lawngtlai district-ah 7, Mamit district-ah 6, Saitual district-ah 9, Khawzawl district-ah 10 a awm bakah Hnahthial district-ah 8 a awm bawk. 

State Emergency Operation Center-in a chhinchhiah danin district hrang hranga In rausan zat hi Lunglei district-ah 37, Siaha district-ah 26, Champhai District-ah 5, Kolasib district-ah 6, Mamit district-ah 1, Saitual district-ah 3, Khawzawl district-ah 14 leh Hnahthial district-ah 9 a awm a ni. Kumin ruahsur nasa kaihhnawih a chhiatna thleng vangin mi 6 in, nunna an chan tawh a ni.

============

US President Donald Trump chuan Ukraine nena an indona ah inkahhai nei tura Russia- laka hun a bituk chu pawt tawiin, ni 10 emaw 12 chhung hun a pe.

US President chuan remna siam tumna lam, a awm chuanloh avangin, nghah rengna chhan tur a awm lo a ni, a ti. Chawlhkar hnih kalta ah khan President Donald Trump hian Russia President Vladimir Putin chu ni 50 chhunga Ukraine nena an indona titawp tura tiin atitawp lo anih chuan Russia- lakah chhiah sang tak lak anih tur thu a sawi.

Scotland a news- conference aneih ah Trump chuan thawhtan emaw thawhleh ah emaw a deadline siam chu, a ti nghet dawn tih sawiin Russia- bungrua a, chhiah sang tak lak tur anih thu asawi nawn a, July thla chawhma lam khan Russia- sumdawnpui ramte lakah chhiah 100% lak mai theih thu a lo sawi tawh a ni.

UK Prime Minister Keir- Starmer nena Scotland-a an inhmuh hnu ah Trump hian Ukraine laka Russia- President Vladimir Putin chet dana a lawm loh thu a sawi. Tunhnaia US President thusawi hi Russia President Vladimir Putin chuan a chhang zen zen ngai lo a ni.

BJP, ZPM, MNF, CONGRESS- Party te tunhnai chanchin...

BJP Mizoram Pradesh president Dr K. Beichhua chuan tunhnai khan Union Finance Minister Pi Nirmala- Sitharaman chu kawm in, Mizoramin sum lama harsatna aneih te zirchian sak turin a ngen.

He an inkawmna ah hian Dr K. Beichhua chuan tun dinhmuna Mizoramin chhan hrang hrang avanga harsatna atawh mekte leh sum lama harsatna aneih te chu lo zirchiansak tur leh, tanpuina awm thei te a, kawng lo dap pui turin Pi Nirmala-i hi angen a ni. Union Finance Minister Sitharaman chuan an thil thlente chu lo enzuisak atum thu sawiin, remchang hmasa berah Mizoram rawn tlawh atum thu a lo hrilh a ni. 

Delhi a cham mek, Mizoram BJP President chuan zanin hian Union Minister dangte pawh dawr chhunzawm zel atum a ni.

================

ZPM Party Consultant Rev. K.Thanzauva chuan ZPM kan sawrkar theihna chhan pawimawh tak pakhat chu, "corruption kan ti ve dawn lo” tih kha a ni a, vawiin thlengin kan la fihlimin ka hria’,” a ti.

ZPM Party chhung inkhawm nimina ZPM Gen Hqrs Office, Aizawla neihah thu sawiin Rsv. Dr.K.Thanzauva chuan ZPM Vision chu Pathian rorelna ram a ni,. ZPM kan sawrkar theihna chhan pawimawh tak pakhat chu, Çorruption kan ti ve dawn lo, tih kha a ni. Kan MLA candidate zawng zawngin Pathian hmaah an intiam a, vawiin thleng hian an la fihlimin ka hria a, ka lawm tak zet a ni. Kawng a chhia tih pawh kan hria, siam that a la ni  zel dawn. Corruption erawh chu CBI, ACB, Lokayukta ten man lovin court-ah te thiam chang mah se an asset neih zat kan hria a, Mizoram mipui rilruah thiam an chang chuang lo. Tuna kan ram hruaitute hi term tawp thlengin lo rinawm zel u la; tichuan, kan thlang tling leh ang che u,’ a ti.

Pu Thanzauva chuan, ‘Zofate hian ruih kan bang lo va; Zu, sakhua, Politics, drugs, social media leh cellphone kan rui a. Tunah erawh sorkar, kohhran leh tlawmngai pawlte hmalaknain hma thar lak a ni ta a. Hulhliap Short Stay Center-ah pawh an taksa, rilru leh thlarau lamah an hrual hnuin thiam thil an neihna turin an la um zui zel dawn a ni, a ti.

He hun hmanna hian Pu TBC Lalvenchhunga, ZPM Legislature Party Secretary chuan Khamrang leh Buichali inkar kawng thawm that dan report a pe a. Inkhawm hi Pu TBC Lalthanmawia, General Secretary chuan inkhawm a kaihruai a ni.

============

MNF Senior Vice President, Dr.R.Lalthangliana'n ZPM kaihhruai sorkar hnuai ah Goods and Services Tax, a tlakhniam nasat thu leh GST hniam reng reng chu, Finance Commission atangin sum an dawng tha thei ngai lo tih a sawi.

He thu hi nimin a MNF party- office Hnam Runa chhung inkhawm an hmanna ah asawi a, Dr Thangtea chuan Kum 2017-18-a, GST dan hmanga, chhiah lak anih tangin avawi khat nan kum 2024-25 ah Mizoram GST lakkhawm atlahniam duai duai tih te, Kumthar ah pawh ziaawm lam aiin GST khawn, a tlahniam chhunzawm zel tih asawi a, tunhnaia GST khawn nasa taka a tlakhniam chhan chu restricted tender leh departmental-a, contract hna- inpek anasat vang pawh ani thei a, GST hniam reng reng chu Finance Commission atangin sum an dawng tha thei ngai lo ati. ZPM kaihhruai sorkar chu Finance enkawl ah ahlawhchham nia puhin, sorkarin sum apuk tam tawh thu leh GSDP percent atanga chhut pawhin, Mizoram leiba san ber kum anih thu asawi.

MNF Senior Vice President chuan sorkar tha leh rintlak chu hun harsa alo thlen changa huaisen taka mawhphurhna la ngam, midangte puhmawh leh, dem mai mai ching mi ani tur ani lo tih sawiin, Good Governance chuan sorkar hmasa- thil tih that chu, a chhunzawm mai tur a ni, ati a. MNF kaihhruai sorkar hnuaiah GST lakluh apun thute, inkalpawhna kawngpui thar sial kawngah, an thawh hlawk thute asawi bawk.

=======

Pu Ngurdingpuia Pachuau, Sr. Vice President MPYCC chuan "Congress party chu kan hruaitu zahawm tak Pu Lal Thanhawla atang tawha thutiam hlen thin, kan ti ang tih tihlawhtling thin kan ni" a ti.

Nimina Congress Bhavan-a MPCC Political session ah thu sawiin Pu Ngurdingpuia Pachuau chuan "Zoram hmasawnna rahbi pawimawh hi Congress party tuk a ni deuh vek a. Congress Sawrkar laia engkim tihfel tawh, MNF party ten chhunzawm zel tlak lohin an chhuah chu Pu Lal Thanhawl kaihhruai Congress Party sawrkar a lo lang leh chuan thar thawh lehin tunah chuan Mizorama Hospital kan neih that ber leh changtlung ber a lo ni ta. ZMC&H tun dinhmun a thlen theih nana sulsutu pawimawh ber chu Pu Lal Thanhawla kaihhruai sorkar laia Health Minister leh kan president ni mek Pu Lal Thanzara hi a ni, a ti.

MPYCC Sr. Vice President chuan "ZMC atang hian Doctor zir chhuak mi 265 lai awm tawhin, final result nghak mek hi 22 an awm bawk a. Doctor zir chhuak tawh zinga 169 hian Internship training an ti zo tawh a, 96 in internship an ti mek bawk. ZMC ah hian Foreign atangin Medical Doctor 12 laiin internship hi an rawn ti zo ve tawh a ni.Congress Party in Zoram hmasawn nana a lo thawh nasatzia hi miten an chhut chiang a, an hre chho zel a. Congress party boruak a eng chho zel a, mipuiin kum 2028 Inthlan huna party  future bright berah an ngai mek a ni, a ti.

‘Min enchhin ve rawh u’ titu ZPM te kan thlang tling a, Zoram mipui hmaa an lo tiam zawng zawng te an palzut a,  Term khat an chelh zawh meuh chuan duhlotu an ngah tawh viau ang tih hi mipui tam zawk titi a ni" tiin MPYCC Sr. Vice President chuan a sawi bawk.

Political Session hi Pu R. Vanlalvena, Ex-MLA Gen. Secy. MPCC chuan a kaihruaia ni.

Lungleiah CM's Special Package hnuaia orientation training dan tur sawi ho.

Lungleiah CM's Special Package hnuaia bana kaih turte hnena sum pek chhuah dan tur leh orientation training buatsaih dan tur sawi ho a ni.

Lunglei, 2025 Vawkhniahzawn thla ni 28: Vawiin khan Mizoram Bana Kaih (Handholding) Scheme hnuaia Chief Minister's Special Package kal tlanga Lunglei District-a bana kaih tur (progress partner)-te hnena sum pek chhuah dan tur leh orientation training buatsaih dan tur sawi hovin line department hotute chu District Bawrhsap Pi Navneet Mann hovin a hna thawh pindanah an ṭhu khawm.

CM's Special Package hnuaiah Lunglei District chhungah bana kaih tur (progress partner) 362 an awm a. [Commerce & Industries — 130; Horticulture — 78; Animal Husbandry & Veterinary — 77; Fisheries — 46; Agriculture & Farmers Welfare — 14; Land Resources, Soil & Water Conservation — 13; Tourism — 2 & Sericulture — 2.] Progress partner-te hma lakna tura kaihhruaina leh thil pawimawh zirtirna atan July ni 31, 2025 (Nilaini)-ah BCM Hall, Serkawnah orientation training buatsaih tura ruahman niin, Lunglei West bialtu MLA Pu T. Lalhlimpuia chu khuallian tura beisei a ni.

CM's Special Package sem chhuah tur chungchanga State sawrkar aṭanga ruahmanna awm sa angin, orientation training buatsaih ni-ah emaw, a tukah emaw ṭanpuina sum hi a dawngtu turte bank account-ah direct benefit transfer hmanga thun fel hman tum a ni a. Orientation training-a mahni (progress partner) ngei kal lote chu ṭanpuina sum hi pek theih an ni dawn lo va; bana kaih turte chu orientation training-ah hian mahni ngei inlan tur leh an bank account number theh luh ngei passbook keng bawk turin hriattir leh ngen an ni.

Sawrkar ruahmanna anga harsatna awm lova progress partner-te bank account-ah ṭanpuina sum thun fel thuai a nih theih nan line department-te'n an hnuaia ṭanpuina dawng turte hming leh nihna kimchang leh an bank account te orientation training buatsaih hmain lo endik fel vek se, tih a ni a. Ṭanpuina sem chhuah aṭanga thla hnih hnuah bana kaih ṭanpuina dawngtute hma lak dan chu a hmunah kal chilha endik tura ruahman niin, an hma lak dan leh hmasawn dan te uluk taka vil chhunzawm zel a ni bawk ang.

AIZAWLA LIRTHEI INTLANCHHAWK DAN THAR ENCHHIN TUR A A THUCHHUAH

LIRTHEI INTLANCHHAWK DAN THAR ENCHHIN TUR CHUNGCHANGA AIZAWL SP THUCHHUAH

Dated Aizawl, the 28th July, 2025 : Co-Ordination Committee on Traffic Management (CCTM) Meeting minutes vide Memo No.M-13/209/2025-UD&PA Dt.22.07.2025-in Aizawl khawpui chhunga lirthei intlanchhawk dan tur a ruahman leh Section 115 of MV Act, 1988-in thuneihna a pek angin Pu Ruatsanga Ralte, Sr. Superintendent of Police, Traffic, Aizawl chuan ni 01.08.2025 atanga ni 31.08.2025 thlenga enchhin turin a hnuaia mi ang hian lirthei tlandan tur ruahmanna a siam.

1. Lirthei intlanchhawkin a huam chin tur kawngpui:

1. Bawngkawn leh Kulikawn inkar main road: Chaltlang leh Ramhlun peng, Bawngkawn atanga Kulikawn (Ngaizel, Tlangnuam leh Pika Road peng thleng) inkar via Chaltlang/ Ramhlun (Laldenga Road) - Chanmari - Lower & Upper Zarkawt - Dawrpui - Upper Khatla - Sikulpuikawn - Kulikawn.
2. Sikulpuikawn leh Khatla inkar: Sikulpuikawn atanga MINECO peng (Marova Point)/ 23 sector A.R gate bul thleng via Peter Street, Khatla.
3. Khatla leh Vaivakawn inkar: Khatla Kawn atanga Vaivakawn Taxi Stand, Bazar Bungkawn peng thleng via Temple Squar

2. A chunga kawngpui dung tarlan loh zawngah chuan tlan theih vek a ni anga, hei hian lirthei entry period nei hrangte erawh a huam lo.
3. Lirthei zawng zawng (mimal motor, sorkar motor leh bungraw phur lirthei leh
District dang lirthei leh State pawna lirthei register te pawh huamin) intlanchhawk hian dar 09:30am atanga dar 06:90pm thleng • a huam ang. Lirthei intlanchhawk hian Inrinni (Saturday), Pathianni (Sunday) leh Sorkar Holiday te a huam lo ang.
4. Intlanchhawkin a huam loh tur lirthei; Public Notice vide No.RO/TRF/SP-Noti-7/08/2064 Dt.19.2.2022 hmanga lo chhuah tawh chu hman chhunzawm zel tur a ni. 

5. Taxi (LMV leh Two-Wheelers) te tlan dan tur:

1. Taxi (LMV leh Two wheeler) te chu Group nga (5) A, B, C, D leh E ah then an ni ang a. Kar khat chhungin group tinin nikhat zel tlan loh ni an nei ang.
2. Taxi intlanchhawk hian Thawhtanni atanga Zirtawpni apíangin dar 09:30 a.ni atanga dar 6:00 p.m inkar a huam ang.
3. Taxi intlanchhawk hian Inrinni leh Pathianni te a huam lo ang.