Lung natna chungchang PHC, Dist.Hospital leh UPHC hrang hranga thawk ten an zir ho.

                                        

 

Sawrkar Damdawiin (PHC, CHC, UPHC leh District Hospital) Doctor ten Cardiovascular Diseases (lung natna) chungchang zirhona nei.

Aizawl the 21st August, 2025 : Mizoram Health Systems Strengthening Project (MHSSP) hmalakna in doctor hmun hrang hranga thawkte tan lung natna chi hrang hrang hriat chhuah hma dan, inven dan leh enkawl dan chungchang training ni 2 chhung awh tur vawiin chawhma dar 10:00 khan Civil hospital Aizawl ah neih tan a ni. Cardiology Department, Civil Hospital Aizawl a lung natna lama thiam bik Dr. Loncy V. Lalzarliana, Dr. Mary C. Lalnuntluangi leh Dr. Isak lallawmkima ten zirtirna an pe.

He training hawnna-ah hian Dr. Lily Chhakchhuak, Mission Director NHM/Project Director, MHSSP in hmanpuiin kalkhawmte lawmna thu a sawi a. Dr Lily Chhakchhuak chuan hriselna lama thawktu te tan inzirbelh zel a pawimawh zia sawiin, Mizoramah chuan sum harsatna avang te leh inkalpawhna avanga harsatna te avangin duh thusamin training an buatsaih theilo thin a. 

Hemi hria in MHSSP in doctor leh nurse te thiamna tahhriam kawngah hmalakna nasa tak an nei hi lawmm a tih thu sawiin mobile application CKSI app hmanga mahni awmhmun theuha an inzirna tur siam anih bakah an thiamna tih ngheh zual nan practical training “Skill workshop” buatsaih thin ani tih a sawi bawk. 

Heng skill workshop hi vawi 5 neih tawh niin workshop tinah hian Health Department data atanga natna hluar leh training kan mamawh na lai te thlan thin a ni.

Dr. Lily chhakchhuak chuan lung natna pawh hi mizorama harsatna kan tawh nasat leh hnuk hnaih em em thil anih si avangin training neih a pawimawh em em a, khawvel puma thihna tam ber te zing a mi a nih thu a sawi a. 

Kum 2022 khan khawvel pumah mi maktaduai 19.8 chu lung natna avangin an thi a, hei hian thihna zawng zawng zaa 35 a tling pha hial a, heng zinga thihna tam ber chu lungphuchawl leh stroke anni a ti. 

Lung natna avanga thihna hmun 4 a thena hmun thum lai hi ram hnufual zawk leh ram thrang lai mek te atangin a nih thu sawiin Kum 2021 a kum 70 hnuailam thihna maktaduai 18 zinga zaa 38 chu lung natna vang a nih thu a sawi bawk. 

Lung natna tam zawk hi chu nundan hrisel leh ei leh in hrisel kan ei a, ruihhlo laka kan insum chuan a in ven ve theih a. Lung natna te hi hmuhchhuah hma a pawimawh hle a, NHFS-5 Key indicator Mizoram (2019-21) in a tarlan danin mizoramah mahni rihna tur aia rit mipa ah 31.9% leh hmeichhia ah 24.2% an awm tih tarlangin hei hi ram pum ai pawhin a san zawk thu a sawi bawk. 

Thisen sang hi mipa 33.6% niin hmeichhia ah 23.4 % kan awm bawk a, zunthlum hi mipa 17.3% leh hmeichhia 15.2 % an awm a, Hei hian a entir chu Mizoram hi ram pum huap pawh a rit lutuk te thisen sang leh zunthlum nei kan tam avangin tun kan mamawh hun takah training buatsaih a ni hi a lawmawm hle a, PHC, CHC, leh district hospital ah te pawh lung natna vei rang taka kan lo hriat theih a, enkawlna te kan pek bakah refer a tul hun thlenga kan hriat thiam a pawimawh hle a ni a ti. 

Trainingna a tel Doctor zawng zawng te uluk taka ngaithla a, mithiam bik te hnen atanga inzirna hun tha kan neih te a hlawk thei bera hmang turin a chah bawk a ni.

Dr. Loncy V. Lalzarliana’n lung pawimawh zia sawiin Leviticus bung 17 chang 11 a inziak ang khan ‘Thil nung reng reng, an nunna chu an thisenah a awm a’ tih anih ang khan taksa peng dangte anglo takin lung hi a thatloh tawh chuan nunna atan a derthawng thei a, thin te chuap te , thluak te thleng pawhin a chanve chauh hmagin kan nung thei a, lung erawh chu a theih veloh a ni a ti. 

Lung natna chi hrang hrang te tarlangin a enkawl dan tur te, natna a zir a damdawi hman tur chi hrang hrang te a hrilhfiah bawk.

Dr. Mary C. Lalnuntluangi hian Lung natna lo awm chhan hrang hrang te sawiin kan tih danglam theihloh entirnan kum upatna te, inthlahchhawn te, chhung hnai te a lungnatna nei an awm te bakah mipa te ah a tam bika. 

A chhan tam zawk erawh kan tih danglam theih niin, thisen sang, zunthlum, meizuk, thau lutuk, ei leh in hrisello, zu in nasa, mu thalo leh rilru hah nasa ah te hian a awm duh a ni. Lung natna tam zawk te hi chu nunphung hrisel zawk, taksa sawizawi tam, ei leh in hrisel te hmangin kan ti tlem thei a ni a ti.

Dr. Isak Lallawmkima chuan lung natna lo lanchhuah dan te sawiin, natna lan chhuah dan Atangin eng ang natna ber nge tih hriat hran dan te a hrilhfiah a, lung lam harsatna nei damlo a lo kala lo hriat hran vat dan te leh endikna hrang hrang tih tur te, xirtirin ECG a lung natna hrang hrang awmdan te pawh a sawifiah bawk.

Training-ah hian PHC, CHC, UPHC leh District Hospital hrang hranga Medical Officer thahnem tak telin naktuk ah zawh tur a ni.

NH 302 Ngaihven Pawl leh Tlabung Welfare Committee ten hma la zel

                                            

 

Tlabung khawtlang aiawhin nimin khan, Tlabunga NH 302 Ngaihven Pawl hruaitu ten hmaichhan ah NHIDCL Executive Director an kawm.

NH 302 Ngaihven Pawl hruaitute chuan, ziak leh tawngka in kawngpui sial hna- kaihhnawih thil chi hrang hranga veiawm an tih leh an ngaimawh te thlenin, Tlabung leh a chhehvel chu Mizorama hmun pawimawh anih avangin ngaihsak a ngai hlea an hriat thu, an sawi a, lung leh hmanraw dang hman chungchanga an duhkhawp lohna te, leivung paih dan dik loh vanga kawng hrang hranga an tawrhna te, NHIDCL Executive Director hmasa hnena an thu thlen bawhzuina a awm loh thin thu leh, tuna ED erawh a chanchin an hriat danah beiseina sang tak an neih thu thlenin, hmun tam taka kawng siam tawh sa, chhe leh zui nghal bakah culvert leh Lei dawlna chim nual te chu a hmuna enfiah turin NHIDCL Executive Director Pu Adelbert- Susungi hi an ngen a ni.

NHIDCL Executive Director Pu Adelbert Susungi pawhin, NH 302 Ngaihven Pawlte thu thlen chu theihtawp chhuaha en zui a lo tiam thu sawiin, tun dinhmunah Mizoramah mumal takin la inbengbel lo mah se, remchang hmasa berah Tlabung chu tlawh ngei a tum thu, a lo hrilh a, an inkawm lai hian telephone hmanga NHIDCL hotu dangte be kualin, NH 302 dinhmun a zawt fiah a, NH 302 Ngaihven Pawlten phek 40-a chhah, kawngpui sial dana an duhkhawp loh lai an tarlan te chu uluk lehzuala lo zirchian a tum thu, a lo hrilh a ni.

NH 302 Ngaihven Pawl leh Tlabung Welfare Committee: Aizawl hruaitute hi Central YMA hruaitu thenkhatten tawiawmin, Tlabung chu ramri depa khaw pawimawh a nih avangin Lunglei thlang lama khaw hrang hrang chu ngaihven ngaia an hriat thu, an sawi a, a bikin Mizote chu tlem zawk chan chang mah se, nghet tana hnam tan an ding thinte chu chhuanawm an tih thu, an sawi.

Chakma pahnih leh Karimganj mi te kut atangin ruihhlo tam tham tak an man.

                                            

 

Special Narcotics Police Station (CID Crime) leh 225 Battalion CRPF, Aizawl te chuan August ni 18 khan Muallungthu leh Hualngohmun khua a joint operation an neihna ah Mahindra Bolero atangin Methamphetamine mum kg 7.955 a rit, cheng vaibelchhe 1, nuai 3, sing 4, sang 1 leh 500 (₹10,341,500) man hu leh aneitu a puh mi pahnih Shanti Jeeban Chakma (30) leh Brighu Dhan Chakma (31) te an man.

Hei bakah hian Champhai Police hnuaia Hnahlan Beat Post te chuan August ni 17 zan khan Hnahlan khaw dai ah EECO Van atangin Heroin hawng 240, cheng nuai 17, sing 20000 (₹17,20,000) man hu an man a, ruihhlo tawlhna a mawhphurtu a puh Ahmed Ali (26), Karimganj an man bawk a ni.

ZWO- in, High Court-a, PIL an thehluh thu kal zelah Mizoram sorkar commission din turin hma ala zel

                                

 

Mizoram ah State- Human Rights Commission din anih theih nana Zofa Welfare Organisation (ZWO) in, High Court-a, PIL an thehluh thu kal zelah Mizoram sorkar commission din turin, hma ala zel a, tun dinhmun ah cabinet pawmpui na nghah mek a ni.

Zofa Welfare Organisation hruaitute chuan nimin khan Aizawl Press Club-ah thuthar thehdarhtute an kawm a, an legal- adviser, Pi Rosalynn L Hmar chuan Mizoramin State- Human Rights Commission aneih ve theihna turin September ni 2, 2021-ah Gauhati High Court-ah PIL an theh luh thute,  hemi chungchang ngaihtuah hian vawi 46 din anih tawh thu leh order tum 46 chhuah tawh anih thute a sawi a, Commission din anih theihna tura an hmalakna, Court-a an thu thlen chungchangah hian state sorkar lamin chhanna mumal an pek lawk theih loh thute, sorkarin chhuanlam hrang hrang asiam thute a sawi a, Gauhati High Court pawhin nikum September ni 6 khan Mizoram sorkar chu thla hnih chhunga State- human right commission din thuai tura hriattirna khauh tak apek tawh thu a sawi.

Pi Rosalynn-i chuan Court-in PIL an thehluh, a ngaihtuahna kal zelah kumin June ni 4-a court in a ngaihtuahna ah chuan Mizoram sorkar ukil in report apek na ah State Human Rights Commission Rules, Home Department in, a draft chu, Law & Judicial lamah enfiah tura thawn ani a, May ni 26, 2025 ah chhui chian anih bakah, chhuah a hmabak tawh mai tur thu, sawrkar ukil in a report a, July ni 14, 2025-ah chuan MSHRC Rules chu, Law & Judicial department kuta ala awm thu leh siamthat ngai, a awm neuh neuh thu a report tihte a sawi a. 

Court-in angaihtuah hnuhnun ber July ni 30, 2025 ah chuan MSHRC Rules chu Law & Judicial department in a enfiah tawh thu leh cabinet in  an pawmpui an nghah thu sawrkar ukil lamin report an thehlut tih a sawi a. Commission hi din anih hun ah Commission chairperson leh member turte chu thlan uluk atul thute a sawi bawk.

ZWO-in Mizoram chhunga jail hrang hrang chhe lutuk chungchanga PIL an thehluh chungchang sawi bawkin, an zualkona chu vawi 49 ngaihtuah ani a, order vawi 49 tih chhuah anih tawh thute an sawi a, state sorkar ukil ten Court-a report an theh luhnaah Mizorama jailte thawm thatna turin cheng vaibelchhe 36.30 chu, PWD kutah hlan a ni tawh tihte,  Lunglei, Siaha, Champhai leh Mamit district jail thawm that hnathawh tan a ni tawh a, a bak jail dangte ah, hnathawh tan ala nilo tih an report thute an sawi bawk

Mizo Talent 2025 Top 10 result puang.

                                

 

LPS Vision Production buatsaih Mahindra XUV 3XO Mizo Talent 2025 Top 10 result an puang fel tawh a, top 10-a mi 10 tling te bakah intihsiakna la hmachhawn zel thei turin wild card hmangin mi 4 an tling bawk. 

Top 10-a tling ta te hi zanin dar 8:00 atang hian intihsiak leh dawn a ni. Mizo Talent 2025 Top 30 intihsiak chu Aug 14-16 khan LPS Arena, Falkland-ah neih niin, heta tanga intisiakna a la tel chhunzawm zel thei turte hi Thawhtan ni zan khan puan an ni tawh a, top 10 bakah judge ten wild card hmangin midang 4 an thlang chhuak bawk a. 

Mizo Talent intihsiakna sang hi LPS Arena-ah bawk neih chhunzawm a ni dawn a, zan khatah mi 14-te hi an inlan nghal vek ang. Show hi LPS 1-ah live-a pek chhuah a ni leh ang a, LPS Vision YouTube channel-a live chu member tan a en theih dawn a, a hmunah mipui tan a chhim theih dawn bawk a ni. Intihsiak hmachhawn tur zingah hian Lam thiam mite ngaihzawn rawn Kolasib nula Lucy-i chu mipui beisei ang ngeiin a tling leh a, Nalzawl rawlthar phenglawng tum thiam Rinawma pawh a hmel kan hmu leh dawn a, ventriloquist Lalawmpuia, Ramhlun North pawh a in lan leh dawn bawk.

TOP 10 TE - Aizawl Breakerz, Jacob Lalhmingmawia, Lucy Lalthazuali, Lalawmpuia Tochhawng, Lalrinawma, TG Reeds, Team Unknown, Vanlalhlupuia, Zomuani, 2MG (2 Magician), WILD CARD - Margareth Malsawmzuali, Lalrintluanga, Dp-i, Elisha Lalramdina te an ni.

Ruihhlo ngai Hulhliap Short Stay Center a chhuak mi 200 vel ten ruihhlo an la fihlim san niin hria.

                                 

Hulhliap Short Stay Center – a enkawl chhuah zinga mi 200 velin ruihhlo an la fihlim san ni a chhinchhiah a ni. Hulhliap Short Stay Center Core Committee hi an Chairman Pu Malsawmzuala Ralte, MYC Chairman ni bawk hovin nimin khan an thukhawm a. He huna tarlan anih dan chuan, Hulhliap batch 1-na ah khan a tawp thlengin mi 116 an awm a, heng hi an chhuah hnuah Volunteer mi 43 in Follow-up psychosocial-counselling neiin home visit vawi 4 an nei tawh a, heta an hmuh danin mi 46 te chuan ruihhlo an la fihlim san a ni. Batch 2-na ah hian mi 263 awm tluanin anni pawh hi Volunteer 53 in an umzui nghal a. Home visit vawikhat nei tawhin mi 162 chuan ruihhlo an la fihlim san bawk a ni. Hulhliap atanga camp chhuak te tan hian followup bakah skill training hetiang hian ruahman mek a ni a, Mistiri Training – mi 50 tan, Plumbing – mi 30 tan, Aluminium Fabrication - mi 30 tan, Assisstant Electrician - mi 30 tan, Basic Food Processing Course – mi 25 tan tih a ni a, Skill Training hi September ni 1 atanga neih tan theih beisei a ni bawk. Hulhliap Camp atanga chhuak hi an vaiin mi 379 an awm tawh a. Batch 2 atan hian Task Group hrang hrang sum hman tur hi cheng nuai 81 sing 9 & 3,852 pek chhuah tawh a ni a. Batch 3-na hi August ni 25 ah tan leh tur niin Hulhliap SSC Program hi thla tin nakum March thla thleng chhunzawm tura ruahman phawt a ni. Hetih lai hian Lunglei leh hmundangah pawh ruihhlo ngai te pual camp hi neih a lo ni tawh a, tunah hian hriattheih chinah BCM Ramthar Lunglei Kohhran pawhin Baptist Camping Center Ramzotlang Serkawnah camping an nei mek a, camper mipa 30, hmeichhia 2 = an vaiin 32 an camp mek a ni. 

Foreign Kuhva tawlhruk la awm reng, Kuhva chingtu pawlin hriatthiam harsa ti

                                   

 

Mizoram Kuhva Chingtu Pawl  ( MKCP ) chuan tunlai a, Foreign Kuhva smuggling a sumdawng an la awm reng chu a pawi a tiin Ramleilung fa Kuhva chingtu ten mahni ramchhung ngeia an Kuhva thar chhuah hralhna kawngah harsatna a thlen thin an ti. 

Kuhva rah thar a hun leh dawn a, kut hnathawk tuten harsatna an tawh loh nan Mizoram sorkar a thu neitu leh an police te pawh in nasa leh zualin hma la se, an duhin an beisei bawk. 

August thla chhung ngawt pawh khan Police leh Assam Rifles ten hmun thum ngawt a dan lova foreign Kuhva ro tawlh luh an man hi Mizoram kuhva chingtu pawl General Hqrs chuan lawm awm an tiin, Mizoram Police leh AR te rintlak zia leh fakawm zia a takin an hmu chu lawmawm an ti a, thlamuan thlak an ti. 

MKCP member zawng zawngten foreign Kuhva ro dona kawngah hma chak zawk a la turin Hqs chuan ruahman na a siam dawn a, khaw hrang hrang a, MKCP Branch leh member te Foreign Kuhva ro smuggling do turin lo in kau reng turin a chah bawk.