Mizoram -ah ration card sen dawngtu mi 29,785 an awm tawh.

 SPECIAL RATION CARD

Mizoram sorkarin khawsak harsa zawk te tana State Special Ration Package a duan hnuaiah ration buhfai (ration card sen) man tlawma dawngtu mi 29,785 an awm tawh.

Nikum December 2024 atanga khan Mizoram State Special Package  hi hman tan a ni a, he ruahmanna hnuaiah hian mi pakhat tan buhfai Kg.8 zela sem niin, kg ah cheng 20 in an khul thei a ni. Heng mite hi kg khat cheng 30/-a buhfai la thin card var neitute zing ami an ni hlawm. Food, Civil Supplies and Consumer Affair department chuan card sen mamawhte tan mahni bialtu DCSO-ah dil theih a nih thu hriattirna a tichhuak a. 

Tun dinhmunah AAY (card eng) hnuaiah Mizoram-ah ration card 25,750 awmin, hlawkpuitu mi 62,964 vel an awm a. PHH (card pawl)  hnuaiah ration card nuai 1, sing 5 leh 555 awmin, a hmang tangkaitu mi nuai 6, sing 3, sang 3 leh 980 vel an awm thung. Mizoram puma non-NFSA (card var) hnuaia ration card hi nuai 1, sang 6 leh 589 niin, a hmangtu mi nuai 4, sing 4, sang 1 leh 902 an awm mek. 

Hetih lai hian ration lakna atana hman ni lo NER (not entitled ration card) 206 a awm mek a, heng ration card hi document atan chauha hman tur a ni a, NER chungchangah hian Food, Civil Supplies & consumer Affairs Department chuan nikum July thla khan thuchhuah siamin Minister, MLA leh Group 'A" officer chinte chu NER card-ah inlet vek turin a lo hriattir tawh a ni, tunah hian group 'A' chin list dil mek nia thu dawn a ni.