ATL Road chungchanga Pu T Lalhlimpuia MLA Lunglei West in ZPM Chhung Inkhawma a thusawi laktawi a ni
( Amah in Zunzam Online news a thawn lo chhuahchhawn a ni e - Online Ed. )
==================================
Chumi bawhzui chuan hma ka la ta a, Department lam an phur hle a, department lam chu an inring sa a, case nei a nih avangin Ajoy Roy, he case-a Ukil Delhi mi chuan kan inbiakna atangin 2024 December 6 -ah chuan he pawisa hi a lakchhuah theih thu ah min hrilh a, amaherawh chu he pawisa la chhuak tura kan inbuatsaih lai hian fixed deposit a dah chu April 2025 a mature tur chauh a lo ni a, kan CM leh PWD Minister te ka hrilh chuan sum indaih lo karah mamawhna a tam vang leh working season chhunga ka hma theih ang ang siam theih beiseiin a hun hmain lakchhuah mai tha tih a ni a, mahsela a amount a tam tham avangin HDFC Bank Aizawl ten an release ngawt theih loh avangin Mumbai lam te ah thlenin January 2nd week vel khan State Account ah thun fel a ni a, PWD lamin sanction dilin a theih ang angin an bei a, tun hi kan thleng ta a ni.
ZPM Party ang pawhin kawng siamna tur hi min vei pui em em a, a bik takin Kan CM leh PWD Minister leh PWD a kan Officers te leh Party hruaitute hian min veipui em em a, ATL Road bik hi a bilha tho tawh lo a nih avangin ruahmanna mumal tak awm ngaiin ka hria a, sorkar hmasa te pawhin an hlawhchham tawhna a ni a, chuvangin fimkhur takin plan mumal tak neia kal a tul kan ti a, hun hmasa lamah pawh blacktop dum zan-a sum tam tak hman a ni tawh thin a, a foundation atanga fail a nih avangin rei a daih ngai lo a, political issue ah chantir loh theih lohin thu a tam thin hle a, chuvangin mawhphurhna ka lak takah chuan mithiam leh PWD te nen pawh kan sawiho a.
Sorkar hmai phihfai nan hian he kawng hi vawi leh khata Black Top pawp, rulngan pa ang zara dum tih kha he kawngpui damna hi a nilo tih hriat a nih avang leh , a hnuai (Foundation) atanga kan siam nghal zelloh chuan he nakin lawk ah a chhe leh mai dawn a, a tuartute chu keini Lunglei Mi, leh chhim mipui te kan ni. A bik takin Khualzin te, Damlo inphurphei te, Sumo Driver te, Truck driver leh mimal zin nasa te hian he kawng hi an hrechiang a , tha taka siam hi a ngai tak meuh a ni.
Lunglei Division bik hi a chhiat chhan hi hriatthiam a har hle a, tunah hian PWD lam chuan an hna hmasa atan Central Road Research Institute (CRRI) ten kawng hnuai scientific research nei turin Central-ah ngen an ni a, reilo te ah kan hre chiang zual turah ka ngai. He kawng hi haw haw chiam a, innawr chiam chiam a, a hunlaia Lunglei mipui demand a sosan avanga siam a nih thin avangin hmanhmawh taka siam a ni zelin a lang a, chuvangin tun tuma kawng kan siam turah hian Lunglei mipui te tuarchhelin space min pe ula la duh hle mai. Hna thawk thei turin rinna kan chunga nghat turin ka ngen a ni.
ATL Road repair work hi Firm leh Company engemaw zatin an thawk tawh a, he kawng hna thawktu hrang hrang te ka kawm a, ATL Road contract hna thawh hi hrehawm an lo ti tlang hle mai a, World Bank project a, tlawng leh Pukpui inkar thawh a nih lai pawh khan pressure tam tak avangin vai hnathawk te pawh hlau chungin thawk an awm tih te an sawi a, a tak nge dawt erawh ka prove lo a, thu leng vak a ni, chuvangin contractor pawh hi tlawmngaia lo inngen te pawh an nei nawk tawh thin a ni awm e. Tuna Sekhum daia Sorkar hmasa-in contract a pek LMC inthlan dawn a, kan Chief Minister khan kal paha order a rawn pek phei kha tuna thawk mek Pu Zoremtluanga pawh hian vawi tam tak terminate turin ka hnenah min ngen a, mahse tlawmngai turin kan inthlem ngat ngat a ni.
ATL Road hi World Bank hun laia siam a nih khan Kawngpui chhah zawng hi 1 Msa thleng la dawl zo tura siam niin 380mm a chhaha siam a ni a. Kum 15 chuang meuh a han vei hnu chuan Motor rit tak tak beisei aia tam a tlan tak avangin Traffic count neih niin tunah chuan 4Msa dawl zo tura siam a lo ngai ta a, kawng chhuat chhah zawng tur pawh 485mm a ngai ta a ni.
Tun tumah hian First phase atan Pukpui-Mausen-Haulawng siam turin kan inbuatsaih mek a, tha taka siam ka duh avangin a estimate amount pawh a te lo hle a, MLA pui te Lunglei nilo tan pawh thik tham a ni tawh a, hemi rual hian he kawng tha siam tura kan beisei leh mitthla hi tum khatah reilote in emaw traffic dang lo-a siam thei bik tur chuan ZPM sorkar hi min ngai lo sela ka duh hle mai a, hna mumal taka kan tan chuan he kawng hi khar a ngai fo dawn a, Dawn kawng Zobawk lamah pawh kan kal a ngai dawn hmel a, kawng tha kan duh chuan tuar kan huam ve a tul dawn a ni. Lunglei mipui leh he kawng hmang tute ka ngen nghal bawk a ni.
Tichuan he kawng hi sorkar zai ngai tak maia kalpui hi a hun tawhin ka hria a, 2017 velah tlawng kawng haw haw-in YMA hmalakna in hna kan thawk a, hun dangah pawh PWD Hotu lian te transfer rap rap-in Lunglei hian hma kan la tawh thin a, amaherawh chu Mahatma Gandhi khan India Independence a sual lai kha a innghahna kha enge ni kan tih chuan Non-violence tih kha a ni a, a ni chuan tharum hmang loin a hlawhtlin pui a, Lunglei kawng pawh hi hei leh chen hi kan sual tawh a, kan sual danah tute emaw mawng hiata thil tih a awm em aw tih tur zel hian kan kal thin a, tunah pawh heti lo zawnga Lunglei Zoramin lehkha thiam chhuahna hmun mi tak awmna hmun hi retreat leh ila, back to the furture an tih angin Lunglei hian ngaihtuahna thar i siam teh ang u hmiang.
Tin, Session-a kan PWD Minister zawhna chhanna khan Lunglei mipui rilru engmaw zat a hliam tih ka hria a, pawi ka ti hle mai a, amaherawh chu mihring hi kan chem kal zawng riau te, kal loh riau bik lai te nei kan ni vek a. Zawhna a chhanna kan hmuin kan hria a, ‘ka bialnu pawh i hria a mi’ han tih te pawh a nei hial a, tawngkam chheh fuh lamah hian ngaihdam ngai a ni tih Zoram mipui hian kan hmu thei awm e, Amaherawh chu PWD minister hian minister ka nih hian ka eiru lo ang titu kha a la ni reng a, Zoram infrasture hmasawnna tur sum hi a nihna dik taka kalpui thei ber tur chu PWD minister hi a ni a, works zawng zawng deuh thaw a hnuai-ah a awm a ni. Chuvangin ring ila, ngaidam ila tih ka duh takzet a ni.
A sawi tum chu Lunglei kawng hi traffic kal reng a nih avangin tahtawla siam a ngai a, tuna sum awm pawh hian siam dawn ila tun working season atan chuan pawisa hi kan hmang zo dawn chuang lo a, chuvangin Aizawl mizoram hmel lanna hi thuam rih ila, a bak la bang hi chu kan la chhungkhat mai a niang chu a tihna a ni. Chu chu a benga vawi tam kan tihring a ni a, mahse session Hall chhunga a lei leh ka atanga chhuak chuan chu chu a sawi chhuak thiam lo a ni ber e. Tin, he pawisa hi a pung avanga tam a nih avangin hmuifang division kawng a pawisa lo kalna ber a that rih lai a nih avangin intheisem rilru pu leh road map mumal tak neia kan duan avangin hetiang hian a sawi ta a ni.
Eng pawh nise, hemi chungchang hi Zirtawp Ni khan Pu Lalduhoma Chief Minister nen pawh kan sawi dun a, Buangpuia Group YMA Conference a a khuallian zo haw ka lo nghak a, a hah em em chungin tha takin min lo dawng sawng a, MZP te, MSU te, Lunglei Thalai Pawl te thuchhuah avang te pawh ni tel thoin kan tum dan he kawng siamna atanga working road map kan lo duan ruk ve chu Lunglei mipui tih lunghnur ai chuan tiin he kawng siamna atana sum mamawh phuhruk tur hian hmanhmawh takin Estimate siam turin hma lo la a, a zawh huna approve turin kan inthen a, Zirtawp zan khan zangkhai takin Lunglei-a kohhrana ka mawhphurhna hrang hrang tihtur tih ngei ngei ngai thawk turin ka rawn tlan haw ta a ni.
Vawiinah hian Session kan neih zawh taka Lunglei MLA ten kan demand sawia thil tam tak Lunglei tana kan sawi te pawh tarlan ka chak viau nachungin hetia ATL Road vanga pressure group ten aw an chhuah takah chuan ATL Road hi sorkar hmasa leh ZMP Sorkar hmalakna han chhui ve lawk ila.
World Bank in kawng a siam zawh hnuin ATL Road (100-164Kmp) hnathawhna atan hian Kum 2017- 2025 thlenga Sawrkarin sum pek a chhuah tawh zawng zawng chu 118.28 crores a ni a, Kum 2024 & 2025 chhungin Sawrkarin sum Rs 63.07 Crores, a pe chhuak tawh a ni. Kum 2024&2025 chhunga sum pek chhuah tawh zat hi kawng siamna atana pek chhuah tawh zawng zawng atangin 53.32% a tling pha a ni.
Sorkar hmasa-ah khan 2018-2023 chhung khan Rs 54,84,82,187.93 an hmang a, heti hi min thlen a ni.
ZPM Sorkar hnu hian LMC inthlan dawn a, kal paha order an pek kha Kanghmun S - Mualthuam tan Group - A Between 100.00 - 120.00Kmp atan Rs 6,47,09,000.00 a ni a, Group-B Between 120.00 - 143.00Kmp Mualthuam to Tlawng Lei hi Rs 6,58,16,400.00 a ni a, Departmental Rs 2,43,00,000 nen a vaiin Rs 18,94,43,479/- sum hi 2023 khan thawk tanin sorkarna a an chang ta si lo a, pe tu tur an awm ta lo a, an pekna tur sum head lah SASCI atangin K-Deposit vek a nih avangin Sorkar thar chuan a pek ngei a ngai a, engmah thawk loin hengzat hi bul kan tan pui a ni.
Kawng incharge tura min tih khan kan sum hmuh chu a zo a ni si a, PWD nen estimate siamin session atanga ka demand 3.60 crore chu kan CM-in sum harsatna karah min pe a, tuna a khuar lunga hnawha chil mam leh Haulawng pelha PQC thenkhat te, tuna kawng chhe lai siam zawh tak chiah leh Sekhum khaw piaha PQC leh BC thawhlai mek te a ni a, ZPM sorkar chinah Sum a nihna anga a kal avangin hna pawh khi a tha thawkhatin ka hria, PQC hnuaia dry lean concrete chhun cement tlemte leh balu rawra chawlhpawlhin a hnuaia tui tai put thei tur technology hi an hre fuh thei lo a, sorkar hmasa-ah pawh Haulawng bawr chu video a viral vak tawh kha, tunah chuan kan hre ve tawh chuan ka hria.
Tichuan tunah hian Contractor, Bhagheeratha Engineering Ltd. (BEL) Security leh a pung Rs 90.69 Crores hi ATL Road Lunglei lam portion siam that nan Rs 45.89 Crores dah niin Aizawl khawchhung kawng siam that nan Rs 44.80Crores dah a ni thung a. Contractor, Bhagheeratha Engineering Ltd. (BEL) te hnathawhna portion Hmuifang Divisionah erawh sum indaih lohna avangin sum hi dah a ni ve ta lo a ni. Tin, he kawng hi ZPM hian PAC ah pawh a tha tur a ni tiin resolution a siam tawh a, nichina ka sawi ang khan Chief Minister chuan Lunglei mipui thlaphang lo tur leh setimate siam a, a bak hna zawm theih ang ang zawm tur a nih thu a hminga sawi tura min tih angin vawiin hian kan sawi a ni.
Lunglei ah hian Lunglei tana mi thahnem ngai, Lunglei tana au ngam kan la nei tih ka hria, FB leh Whataspp Group hrang hrangah, kawngtha duh, mi thahnem ngai, mi huaisen chhim Pa, Leitlangpui Pa kan la awm hian thla a ti muang hle a, ZPM Southern Headquarters a kan hruaituten min veipui em em a, min support a ka lawm hle bawk a ni. Tin, He kawng hi kan chak lakna a ni a, a pawimawh a, Politics taka lak thin a nih avangin hetiang hi kan thleng ta a, rala inchhaih lo hian Lunglei hi kan tanrual a hun zawk niin ka hria a, Lunglei mipui pawh kan mindset hi heti zawng hian i siam ve chhin ang u hmiang.
==============================
Peace Accord MNF Returnees Khuangchera Dist.( Lunglei) ten MZP Lunglei te hmalakna an thlawp thu an tarlang ve leh ta.
PEACE ACCORD MNF RETURNEES ASSOCIATION,
KHUANGCHERA DISTRICT LUNGLEI.
PRESS RELEASE.
ATL Road siamna tûr sum pawhpên chungchanga MZP Headquarters Lunglei in chhim lam mipuite hmakhawngai taka hma a lâk mêkna hi, keini Peace Accord MNF Returnees Association, Khuangchêra District Lunglei te chuan țha kan ti a, kan thlawp tlat a ni.
Kan Sawrkâr chak tak hian MZP Headquarters Lunglei te thil phût hi tihlawhtling ngei tûrin kan ngênin kan phût tlat bawk a ni.
ISSUED BY, PEACE ACCORD MNF RETURNEES ASSOCIATION, KHUANGCHÊRA DISTRICT LUNGLEI.
No comments:
Post a Comment