ZUNZAM NEWS ( 29.4.2025 )

MZP Headquarters: Lunglei ten ATL kawngpui dan chu an la chhunzawm zel. 

MZP Hqrs Lunglei chuan A-T-L Road siamna tur sum pawhpen nia an sawi chungchanga pek let an ngiatna avanga Pukpui daia kawng an dan chu an la chhunzawm zel a, vawiin atangin Pukpui bakah, Hrangchalkawn ah kawngpui hi dan chhunzawm an tum a ni, 

Mizo Zirlai Pawl Headquarters: Lunglei hi nimin khan Sawrkar chuan tuna sum awm dah let emaw, CRRI te ruaia hmalakna thar neih ah te duh thlang turin a ti a. MZP Hqrs. Lunglei chuan an resolution angin, tuna sum awm pawh pen dahlet bakah, chumi in adaih lohna pawh ruahman belh tura written assurance pek an phut a. Hetih lai hian Minister thenkhat ten MZP Lunglei lam rawn bia in MZP te duh ang tihhlawhtlin tuma ziaka intiamna rawn siam an tiam chu duhthlan tur an rawn siam chu invauna a tel nia hriain an lungawilohna chu kalpui tlang an la tum a. Tukin zing atang khan Hrangchalkawn a tanga lirthei lut tur pawh an dang leh tan a ni.

================================

Lengpui khaw dai, Pukpui tuikhawhthla bula lung tla-in nimin chawhnu lam khan motor pakhat a delh a, motor-a chuang mi 3 an boral a, Bung Bangla ah pawh truck a chesual bawk.

Thudawn danin, lung tla in a delh tak motor-a chuangte Pu Lalrinliana te chhungkua, Falkland Veng Aizawla cheng te an ni a. An fanu Vanlalhruaii State pawna awm chawlh hmanga rawn haw chu Lengpui Aiport-ah an lo hmuak a. Aizawl pana an tlan mek laiin vanduaina tawkin kawng chhaka lung tlain an chuanna motor chu a delh ta a ni. Motor-ah hian mi 4 an chuang a, mi 3 - Pu Lalrinliana, a nupui Pi Lungtiawii leh an fanu Vanlalhruaii te chu a hmunah hian an boral nghal a, lirthei khalhtu an fapa Lallawmzuala erawh boral lo in hliam na tak a tuar thung a, vanduaina tawk chhungkua hi Falkland Veng Aizawla cheng an ni.  

Lung tla in a delh tak Car hi MZ-04 - 0330 - grand i10 nia hriat a ni a, lung tla hian car hi a delh chhe hneh hle a,  ruang lak chhuah pawh hi a harsat phah a, motora chuang te an lak chhuah hlim hian a dam awm chhun Lallawmzuala chu lak chhuah hlim a nihin a la biak theih a, a hliam tawh hi a nat em avangin a ngaihtuahawm hle nia thudawn a ni a

Thudawn danin, vanduaina tawka boralte hi Lengpui Branch YMA leh Lengpui Model Branch YMA ten kuang nen an thlah dawn a, an ruang la tur hian Falkand Branch YMA ten Lengpui hi an pan a ni.

Nimin vek chawhnu dar 2:30 vel khan Champhai atanga Aizawl pan Tata Ace Truck MZ04A - 3453 chu Bung Bangla ah kawng thlangah a tlan liam a, ft 20 vel a lum a. Chhiat tawhna hmuna kal Bungbangla YMA hruaitu Pu Fela hnen atanga thudawn danin, motor-ah hian a khalhtu Pu Sawma, kum 60 mi vel Champhai vengthlang North nia hriat chauh a chuang a. Lirthei chet sualna hmun atang hian kawngpui ah a vak chhuak a, ruahsur lai vel khan a chetsualna bul hnaia In awmah a lut a, a hnuah a awmna hriat zui a ni ta lo.

Bung Bangla YMA hruaitute chuan lirthei neitu leh a khalhtu Pu Sawma hian Aizawl lam a pan nge hmun dangah a insaseng hriat a ni lo a, a accident naa a insawhnaah a chiang vak lo nia an rin thu an sawi a, he thu buatsaih lai hian an la zawng mek a. Motor hi a ruak niin a lum thui lo a, a chhe nasa lo bawk a, midang chuang an awm lo niin thudawnna chuan a sawi.

==========================================

Health Minister Pi Lalrinpuii hovin Mizoram Health Department officials te'n Thailand-ah an Health System kalphung an zirchiang.

Thailand Health System zirchianna hi nimin atanga May ni 5 chhung neih tur a ni a, Health Minister Pi Rinpuii leh Health Department-a thawkte hi National Health Security Office (NHSO) Thailand in an lo dawngsawng a, nimin khan Mizoram team te leh NHSO hotute chu Centura- Life Convention Centre, Bangkok-ah inkawm in Health System kalphung inhrilh hriatna hunte an hmang a, an cham chhung hian Thailand ram Health security te leh Public Health Care System chungchang te an an zirchian dawn bakah Public Hospital te, Primary Health Centre te a hmun ah ah tlawh dawn bawk a ni.

He learning visit hi Mizoram State Health- System Strengthening Project hnuaia tih tur hmachhawp pakhat a ni a, kum 2021 atanga he programme hi ruahman tawh niin, harsatna hrang hrang vangin tunah hian alo hlawhtling thei ta a, a senso pawh MHSSP hian a sponsor vek a ni. 

Khawvel ram 50 chuangin an lo zirchian tawh Thailand Health System hi Mizoram Health Official te pawhin Kum 2019 khan zirchianna hmasa an lo nei tawh a, tunah hian Mipui Health care buaipuitute leh Health Department Official hrang hrang ten chik zawka zirchianna an nei leh ta a ni.

=================

Lunglei District ODOP  hmalak zel naah, Mausen khua ah balhla atanga la- duang siam chhuahna bun turin sawrkar ah cheng vaibelchhe 1 hu, ruahmanna leh rawtna thehluh a ni.

"District khat, thar chhuah chi khat" (One District One Product) hnuaia Lunglei a "balhla" thar chhuah leh sawngbawl chungchanga Lunglei District-a hmalakna kal mek  thlirho leh hmalak zel dan tur sawi hovin niminn khan Lunglei DC Conference Hall-ah District Bawrhsap Pi Navneet Mann hovin ṭhutkhawm ani a, line department hrang hrang ai awhte leh PMFME District Resource Person te an tel a. Meeting hmasa- thu rel bawhzui dan leh hmalakna hrang hrang report ngaihthlak a ni.

Lunglei District-a balhla hmanga sum chang thil, siam chhuaktu (entrepreneur) pathum -Bawbawihi- Food Processing, Pachuau Banana Chips leh Rafa Pro- Biotics Juice te hnenah letter of appreciation pek niin, balhla hmanga kamram, chhangphut leh um tui an siamte chu ODOP logo chuanna branding, QR code generation leh Udyam registration tura hmalak fel tawh a ni a. Horticulture Department aṭangin Mausen khua ah balhla aṭanga la duang siam chhuahna (banana fibre extraction project) bun turin sawrkarah cheng vaibelchhe 1 hu ruahmanna leh rawtna thehluh anih thu ngaihthlak a ni bawk.

Lunglei District-a balhla thar chhuah tipung tur leh balhla hmanga thil siamtu- tam zawk an awm theih nan Mualthuam North leh Mausen khua atangin, hma la thei tur mi panga thlan chhuah niin, balhla chin tamna Rangte lamah pawh, hma la thei tur zawn belh ni se tih ani a. May thla chhungin District chhunga training buatsaih emaw, Mizoram Food Processing Research & Training Centre, Seling a training tur intirh emaw tum niin, balhla hmanga thil siamtu te'n bultan nana PMEGP, PMFME leh loan pung tlem dang, an lak theih dan tur ngaihtuahpui zel tum ani bawk. Yashowati Bio-Multi-techs Unit te'n, MOVCD-NER scheme hnuaia Mausen Village Banana Grower Association member, balhla chingtu chhungkaw 30 tana hectare 22.05-a zauva damdawi tel lova balhla chinna, organic banana cultivation kalpui nana cheng nuai 4 senga, kum 3 chhung atana hmalakna tur rawtna (project proposal) an siam chu, sum hmuhna hnar tur zawn a, bawhzui ni se, tih ani bawk.

============================================

MNF President Pu Zoramthanga'n a lehkhabu ziah MNF din tirh atanga, Inremna lo thlen thlenga, an party- chanchin kimchang tarlan chu khawvel lehkhabu- publisher hmingthang tak, Penguin Publisher in, an publish sak dawn tih a sawi.

He thu hi nimin a MNF office Mizo Hnam Runa chhung inkhawm an neihna ah a sawi a, Pu Zorama chuan a lehkhabu ziah (Auto-biography) ah hian ram buai hma leh buai hnu history te, East- Pakistan-a awm lai leh Dacca- fall lai te, Arakan ngawpui atanga Akyab, Rangoon, Karachi leh Islamabad-a an tlanbo thu te, India- sawrkar-in Pu Laldenga- sawrkar thlak tuma an beih leh, in-thlim kual vel dan te ziah lan anih thu a sawi a, zirlai te'n an chhawr tangkai ngei arin thu a sawi bawk. 

MNF President chuan, Mizo hnam damchhuahna awm chhun chu nationalism anih thu sawiin, Israel-te pawh nationalism bang a, inhung tur an nih laiin an inhung phui zo lova, hnam sawm, an ral tihte, kum 2000, an vahvaih hnu ah, Juda leh Benjamin hnam tlem (Isarel)-te an dingchhuak a, kum 1948 khan an nationalism-in, a dinchhuahtir chauh tih sawiin, hetiang bawk hian Mizo hnam damna tur chu nationalism a nih thu a sawi. 

Chhung inkhawm hi MNF Legal Board Chairman Pu C Lalramzauva'n a kaihruai a, Upa Sanghmingthanga H Pautu Ex MLA & Adviser MNF Gen Hqrs chuan hunserh ahmang bawk a ni.

===================

Nimina ZPM General Headquaters chuan Party Office-ah chhung inkhawm EF&CC etc. changtu Minister  Pu Lalthansanga (Chatea) chuan, ZPM Party in Pathian leh Mipui zara Sorkarna a chan hnuah ram hmasawnna ropui tak tak a thlen tawh thu a sawi.

Forest Minister Pu Lalthansanga chuan, “ZPM Party hi tawngtaina hmanga din a ni a, vawiin thleng hian bang lova tawngtaipuitu kan nei reng hi kan lawmna leh kan chakna a ni. Chuvang chuan vawiin thleng hian kan Sorkar hian hmasawnna rah ropui tak tak kan hmu chho mek a, kan Chief Minister Pu Lalduhoma chungah Central Sorkarin Zoram hmasawnna turin rinna an nghat mek a, chu chuan Central Sorkar duhsakna tam tak kan ramah a thlen mek a ni. Budget kan pharh ve hmasak ber atangin inrenchem kum kan puanga, theih tawp kan chhuah hnuin RS.900 Vbc zet kan hum thei hi thil ropui tak a ni. Mithenkhatin kan Sorkar thil tih thatte hmu thei lovin rem leh rem lova Sorkar demna tur hlir an zawng thin hi pawi ka ti a, mipui tana Sorkar hmalakna chhuanawm tak takte hliah khuh an tum thin hi Polictics ramhlui zia a ni a, kan kalpelh a hun tawh hle a ni,” a ti.  

Nimin chhung inkhawm hi Dr.C.Lalrammawia General Secretary ZPM General headquarters in a kaihruai a,  Vice President Pu VL Zaithanzama MLA in mithar lawmluhna hun a hmang bawk.

=======================================

BJP MLA Pu K. Hrahmo chuan Mizoram a Autonomous District Council pathum huam chhunga mipui te'n Development pe thei tur party chu, BJP a nih zia an hmu chho mek a, BJP lam an hawi thup tawh tih a sawi.

He thu hi nimin a BJP pisa a chhung inkhawm an neihna ah  Pu K. Hrahmo chuan ADC pathumah hian arual a Sorkarna siam thei, tute Party mah, an la awm ngai lo tih leh BJP chiah hi Sorkarna siam thei tur awmchhun an nih thu a sawi a, ADC mipuite hian tawngka chauh a 'hmangaihna' ni lo, a taka lantir tu- party an duh tawh tihte, BJP-ah beiseina an neih avangin, BJP lam an hawi thup tawh tih asawi a, ADC mipui mamawh ber chu Development ani a, Development pe thei tur party chu BJP anih zia an hmu chho mek zel a ti.

Pu K. Hrahmo chuan Lengpui Airport-ah Central Industrial Security Force-te an duty tawh a, tunah chuan Airport hi Airports Authority of India (AAI) kutah a awm tawh tih sawiin, Political-a, thutlukna avangin Assam Rifles te sawn chhuah ani tawh tihte, Zoram mipuite mamawh ang hi Central hian a ti hlawhtling chho mek zel tih a sawi a. Mizoram sorkarin sum lamah harsatna a tawh mek thu sawi bawkin, state sorkar hi mahni kea kal thei a ni si lova, BJP hi thawhpui thiam ni sela, tuna kan harsatna te hi chu sutkian a harlo hle, a ti, Central Sorkar hian Mizoram a duhsak in a hmangaih hle a, hetih lai hian Mizoram Sorkar in, chu hmangaihna chu  a hre thin lo chu pawi a tih thu asawi bawk a ni.

===========================================

Vawk Pul hri African Swine Fever avangin kumin ah vawk sangthum chuang an thi tawh.

AH&Vety Department in an chhinchhiah danin kumin kumthar a, vawk hri ASF alen thar leh hnu hian vawk 3,146 an thi tawh a, hri darh zel tur ven nan vawk 991 suat ani leh tawh a, vawiin report bik ah vawk thi hi 54 niin vawk suat 5 a awm.

Kuminah hian ASF hian Mizoram chhim lam leh khawthlang lama district 4 huam chhungah khaw 46 atuam mek a. Siaha District in tuar nasa berin Siaha dist chhunga khua/ veng 26 huam chhungah vawk 1,746 thi tawhin hri darh zel tur ven nan vawk 623 an suat tawh a. Lawngtlai District ah vawk 1,210 thi tawhin vawk 302 an suat tawh a, mamit District ah vawk 169 thi tawhin 44 suat an ni a. Lunglei Dist ah vawk 21 thi tawhin 22 suat ani tawh a ni.