ZUNZAM EVENING NEWS ( 8.4.2025 )

 PHED in local council,Sub.Hqtrs YMA leh MJA te an pun

Lunglei 8/4/25: Vawiin khan PHE Deptt Lunglei chuan PHE SE Conf. Hall-ah Lunglei khawpui chhunga Tuikhur tui chungchangah  Awareness Campaign an buatsaih a, he hunah hian Veng tin atangin Local Council te Sub.Hqtrs YMA aiawh leh MJA te an ko khawm.

    He hun hi Pu V.Laldanmawia EE LWSM chuan kaihruaiin Lunglei khawpui chhungah tui a harsat avangin tuikhur tui kan chawi nasa a, mahse kan tuikhur tui a thianghlim lo vek a, hei hian natna hrang hrang a thlen theih avangin  harsatna thleng thei laka him nan a  lo inhmakhua nan he hun hi buatsaih a ni a ti.

      Sr.Chemist Pu Lalnghakliana chuan Projector hmangin Tui dinhmun a sawifiah a, tui thianghlim chu a fim tur a ni a, a thur/al tur a ni lova, rim a nei tur a ni lova(dar rim tlem nam a pawi lo va), natna hrik lakah a fihlim tur a ni a ti. Arsenic a awm chuan vun natna, cancer te a thlen thei tih a sawi bawk. Fluoride a tawk chauh chu ha ti var tu a ni a, a tam lutuk chuan ha leh ruh a ti chhe thei a ni a ti. Mercury awm na hi khawih a in miah loh tur a ni tih sawiin lei tih thatna Nitrates hi naupai tan a him lova, naupiang hlimin  thisen a ti tlachham thei tih a sawi bawk.

   Hardness tui erawh mihring tan a pawi lutuk lova,chloride, Iron te pawh a tawk chauh chu kan mamawh niin a sawi.    Kan him nan kan tui tlan te a zing thei ang berin Lab. ah test thin tur a ni a ti.Tui tih thianghlim nan chhuanso, chlorine pawlh te a tha tih a sawi.Lunglei tuikhur dinhmun sawiin tuikhur 87 ah  natna a awm tih hmuhchhuah a ni a ti. 

   Pu V.Laldanmawia EE LWSM chuan kan tun dinhmunah kan tuikhur zawng zawng in natna hrik a pai vek a, chuvangin tui chhuahso a chlorine telh thin a pawimawh a, kan tuikhur hnar ah ranin, ekin leh bawlhhlawh paih te kan sim a ngai a ni a ti.

2 DAY NATIONAL REVIEW CONFERENCE AH PI LALRINPUII, SOCIAL WELFARE, WOMEN & CHILD DEVELOPMENT DEPARTMENT MINISTER TEL

8th April, 2025 : Ministry of Social Justice & Empowerment, Government of India buatsaih ni hnih awh National Review Conference chu Ni 7-8 April, 2025 chhung hian Dehradun, Uttarakhand ah neih a ni a. He hunah hian Union Minister, MoSJE Dr Virendra Kumar a hovin, Minister of State pahnih - Shri BL Verma leh Shri Ramdas Athawale te bakah State hrang hrang Social Welfare ministers leh officials ten Ministry of Social Justice & Empowerment hnuaia scheme hrang hrang hmalaknate thlir hovin, hmalakna nei thate hnathawh dan an zirho bakah hmalak theihna hrang hrangte an sawi ho bawk a ni.

A ni hnihna - vawiin khan Pi Lalrinpuii chuan thu sawiin, kan CM zahawm tak Pu Lalduhoma hova Ruihhlo Do nasa taka kalpui anih dan a tarlang a, National Action Plan on Drug Demand Reduction leh Nasha Mukt Bharat Abhiyan hnuaia hmalakna piahlama kan hmalakna te min tanpui ve theihna tura ruahmanna siam turin Ministry lam hotute a ngen a ni. Mizoram sawrkarin Disability pension leh tar pension chu thlatin Rs 100 atanga Rs 1000 a a tihpun anih thu a tarlang a, thingtlang mipui harsatna chhawk zangkhai tura State Sawrkar hmalakna 'Ruang Phurh' chungchang pawh a tarlang tel bawk.

He hunah hian beggary chungchang mai bakah Indore khawpuiin 1st beggar free city of India an nihna kawnga hma an lak dan hrang hrangte an zirho a, central atanga fund release dan kalphung zirchianna an neih bakah state hrang hrang ten social welfare lamah an hmalakna thabik te pawh an rawn tarlan a ni.

RUIHHLO NGAI ENKAWLTUTE TRAINING PEK AN NI

Dated the 8th April, 2025 : Mizoram Social Defence & Rehabilitation Board, Directorate of Social Welfare, Government of Mizoram leh National Institute of Social Defence, Ministry of Social Justice & Empowerment, Government of India tangkawp chuan “3 days Training programme on Drug Abuse Prevention for Outreach Drop-In Centre (ODIC) and Integrated Rehabilitation Centre for Addicts (IRCA) Functionaries” chu ni 7th - 9th April, 2025 hian MSD&RB Training Hall, Chaltlangah a buatsaih a. Training hi resource person ruihhlo leh a kaihhnawih lama mi thiam leh tawnhriat ngah tak tak Dr. RL Sanghluna, Director Synod Hospital Durtlang, Pu Peter Zohmingthanga, Joint Commissioner, Excise & Narcotics Department, Dr. Chawnglungmuana, CEO SHALOM leh Pi Zothansangi Pachuau, Public Prosecutor ten zirtirna hi an pe  a ni.  

He training ah hian Mizoram chhunga ruihhlongaite enkawlna hmun (Drug Rehabilitation Centre) hrang hranga thawktute lo telin, dan chungchang (Legal awareness) te, Mizoram chhunga ruihhlo lo luh dan leh tuna kan dinhmun te, Zu chungchang leh a nghawng thalo-te leh Ruihhlo leh a kaihhnawih hrang hrangte leh ngawlveinain a nghawng thalo te zirtir an ni a. Ruihhlo ngaite'n nun thar an neih lehna tura centre a thawktute pawimawhna leh mawhphurhna te, ngawlveina lak ata khaichhuaktu an nih theih dan te uluk taka zirtir an ni bawk a ni. Training a tel zawng zawng-te hi Certificate pek vek an ni.

Chief Minister Pu Lalduhoma chuan vawiin khan a pisa ah mi pawimawh hrang hrang hmu in hmasawnna tura hmalak dan tur an sawiho.

Pu Lalduhoma hian Director General of the Narcotics Control Pu Anurag Garg a kawmna ah Mizoram paltlang ruihhlo tawlhruk hmachhawn dan tur sawipuiin an hmalakna tichak thei tur rawtna an neih hrang hrang te chu ziaka pe turin a hrilh a. Khaw chhak lam atanga ruihhlo lo lut nasa tireh thei turin ramriah venhimna kawnga hmasawnna hnathawh hrang hrang an mamawh a ti a, thawktu indaih zawk an neih a ngai tih sawiin sawrkar laipuiah rawtna an thlen a ti a, Mizo Territorial Army dinsak turin Ministry of Home Affairs ngen an ni tih a sawi bawk.

Pu Anurag Garg hian, Mizoramah Zonal Office puitling awm thei se tha a tih thu a sawi a, thawktu lam neih belh pawh a tul thu sawiin Mizo tawng thiam ngei thawktu an mamawh hle tih Chief Minister hi a hrilh bawk.

Vawiin vek khan Chief Minister chuan a office-ah IFAD Design team te a kawm a. Mizorama FOCUS 2.0 kalpui dan tur an ruahmanna enpuiin Pu Lalduhoma chuan FOCUS 2.0 atana an thil ruahmanah belh deuh hlek tula a ngaih te a hrilh a, scheme dang nena kalkawptir a that a rin thu sawiin hmalakna inbawhthuah a awm loh nana department dangte nena inhre tawna kal a pawimawh thu leh thil thar chin chhuah lama hmalak uar a thaa a hriat thu a sawi bawk.

Pu Piyush Kanal, Country Programme Analyst, IFAD & ICO chuan kum 2019 atanga bul tana, kum 2024 a tawp ta, FOCUS Mizoram district 6 a khaw 272 a cheng chhungkaw 55,000 te tana hma an lak dan tlangpui a tarlang hmasa a. An hmalakna zarah chhungkaw 41,888 te chuan sik leh sa inthlak tuar thei eizawnna an thlang zui ta nia an hriat thu a sawi.

FOCUS thawh hnihna hi Mizoram district 11 a RD Block 26 huama khaw 700 huapa kalpui tura ruahman a ni a, hmalakna tura hmachhawp zingah tharchhuah tihpun leh khaw awmdan inthlak zel tuar thei chi thlai uar tura ruahman niin Mizoram sawrkarin Zau Policy a kalpui tur nena kal tlang thei tura ngaih a ni a, heng bakah hian Bana Kaih nena inhne rual taka kalpui tura ruahman a ni bawk.

Central YMA chuan vawiin khan thuchhuah siamin March ni 15-a Mizoram Police in Ruihhlo thahnem tak Hawng 440 lai leh inhnamhnawiha puh Henry Lalbiakzinga Chhundeng, Dinthar, Aizawl ami leh a thurualpuite an man chu lawmawm an tih thu an sawi.

Central YMA thuchhuah tarlan danin thalai tam tak ruihhlo bawiha an tan mek laia Ruihhlo hmanga sumdawnna kalpui ani chu an haw takzet an ti a, Henry Lalbiakzinga Chhundeng leh a thurualpuite chu an phu tawk anga dan hmanga hremna an chunga lek ngei anih theih nan Central YMA chuan a thlir zui reng dawn a ti a, hemi kaihhawiha Kulikawn Branch YMA leh Ramhlun North Branch YMA te hmalakna chu an thlawp tih an sawi bawk.

Central YMA chuan ruihhlo hluar zel tur ven nan theihtawp an chhuah tih sawiin Central Anti Drugs Squad (CADS) an din thar leh an ti a, hmun hrang hranga YMA ten mahni huamchhungah tha thlah lova theihtawp chhuah zel turin an chah tih an sawi bawk.