ZUNZAM MORNING NEWS ( 9.4.2025)

Nimin khan Lunglei DC chuan Ralvawng a tlawh

Nimin khan Lunglei DC Office hmalakna in District mipuite'n chiang zawka sawrkar hma lakna an hriat a, an chhawr ṭangkai theih nana an kawt kaia kal chilha service hrang hrang chhawp chhuah sakna, "I Kawtkaiah Sawrkar" (Pra-sha-san Gaon- Ki- Ore) hun chu Ralvawng khaw mipuite tan VC House, Ralvawngah buatsaih a ni.

Lunglei District Bawrhsap Pi Navneet Mann chuan Lunglei District thingtlang khaw kilkhawr zawka chengte'n sawrkar hma lakna hrang hrang an hriat a, awlsam zawka sawrkar office an dawr theihna tura office inpho chhuakte hnenah lawm thu sawiin, he hma lakna hi >chhawr ṭangkai tum ṭheuh turin Ralvawng mipuite chu a chah.

He hun hi Lunglei District Additional Deputy Commissioner Pi Zoramdini chuan a kaihruai a. Office hrang hrang - Deputy Commissioner, Election Branch, Agriculture, Horticulture, Power & Electricity, Irrigation & Water Resources, Block Development Office, Animal Husbandry & Veterinary, Social Welfare, District Civil Supply Office, Commerce & Industries, Health & Family Welfare, Land Resources, Soil & Water Conservation leh SBI Lead Bank Office te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, member belh/paih leh ration card leh Aadhar link, bank account hawn thar, sawrkar scheme hrang hranga inziah luhna leh mipuiin harsatna an thlenna hun te buatsaih a ni.

Lunglei District Bawrhsap Pi Navneet Mann chuan Ralvawnga zirna in te leh Health & Wellness Centre te tlawh kualin, an dinhmun a enfiah nghal a ni.

FMGE&W Gen. Confe in Healthcare Scheme hman rih loh nise an ti 

Lunglei.9.4.25 : - Nimin a FMGE&W) Gen Confe vawi 33- na Vanapa Hall-a neih naah FMGE&W President Er. R. Lalrammawia chuan, Mizoram sorkar hnuaia thawkte hi platform hrang hrang atanga beihna kan tawk ta nual a, hemi chungchangah hian keini sorkar hnathawkte atang hian kan insawifiah ve ngai lem lova, mahse, tunlaia kan dinhmun thlirin sorkar hnathawk ten Mizoram tana theihtawp chhuaha kan hnathawh thinte puan chhuah leh tarlan ve thin hi a ngai ve tawh niin a langa, Tin, Mizoram sorkar hnuaia hnathawk zawng zawng ten Central/State sorkar danga kan counterpart te aia hlawh sang zawk la anga an tarlang ta fo mai te hi a dik tawk loh thu leh Dearness Allowance (D.A) ah pawh Central sorkar hnathawktute chuan ni 1.1.2025 atang khan D.A. 55% an la tawh a, keini erawh chuan 40% chauh kan lak thu te, hamthatna kan neih thin hrang hrangte pawh tunah chuan a awm tawh loh deuh vek thu sawiin Mizoram sorkar hnathawk ten hamthatna kan dawn ve chhunte zinga mi Medical Reimbursement (MA Rules 1944) pawh MUHCSa thlak a lo ni ta tih a sawi bawk. 

An thurel langsar zual zingah - 1.Mizoram sawrkar hnuaia hna lak te hi public interest thlir in Department in an mamawh ang zelin rualkhai zawka lak ni rawh se. 2. Mizoram sawrkar-in a hnuaia thawkte tana Guidelines for framing of Service Rules/Recruitment Rules a siam a qualifying service ngai zat hi a pumpui a ennawn ni rawh se. 3.Vacancy Based Roster (VBR) chungchangah relaxa on a awm leh theih nan hma lak leh ni rawh se. 4. FMGE&W office building neih a nih theih nan hma lak ni rawh se. 5. Central sorkar hnathawkte DA pun rual a Mizoram sawrkar hnathawkte DA a pun ve zel theih nan hmalak zui zel ni rawh se. 6.Mizoram sawrkar hnathawkte kan hnathawh na hmun theuh ah ram leh hnam tana thahnem ngai tak leh neitu rilru pu chunga thawk zel turin in fuih thar ni rawh se. 7. Affiliated AssociaOon Member On ten FMGE&W inrel bawlna leh hmalakna hrang hrang senso atan he ang hian sum thawh theuh ni rawh se -Group A – Rs. 400/-, Group B – Rs. 300/-, Group C – Rs. 200/- ,Group D – Rs. 100/-, 11. Mizoram Universal Health care Scheme (MUHCS) chung chang chu ngun takin kan sawi khawm a, affiliated associaon aiawhte pawhin an pawl ngaihdante an sawi bawk a, FMGE&W Gen confe chuan Special Assembly thuthlukna lo siam tawh chu a nemnghet a, MUHCS hi a system a la felfai tawk loh avangin sorkar hnathawk te hi huam rih lo tura sorkar nawr chhunzawm ni se tiin thutlukna siam a ni.

Central YMA in hrem ngei phut

File. Pic

Central YMA chuan thuchhuah siamin, Henry Lalbiakzinga Chhundeng leh a thurualpui ten an phu tawk anga dan hmanga hremna an chunga lek a nih ngei theih nan Central YMA chuan a thlir zui reng tih an tarlang. CYMA thuchhuah - Ni 15.3. 2025- a Mizoram Police ten ruihhlo (Heroin) thahnem tak, Hawng 440 lai mai leh hemi a inhnamhnawiha puh, Henry Lalbiakzinga Chhun deng, Dinthar, Aizawl leh a thurual puite an man hi lawmawm kan ti a, Mizoram Police-te thawhrimna kan chhuang tak zet a ni. Kan thalai tam tak ruihhlo bawia an tan mek lai leh nunna hial an chan tawh laia, ruihhlo hmanga sumdawnna kal pui a ni hi kan haw tak zet a, Henry Lalbiak zinga Chhundeng leh a thurualpui te hi an phu tawk anga dan hmanga hremna an chunga lek a nih ngei theih nan Central YMA chuan a thlir zui reng a. Hemi kaihhnawiha Kulikawn Branch YMA leh Ramhlun North Branch YMA-te hmalak na pawh tha kan ti a, kan thlawp tlat a ni. Kan rama ruihhlo hluar chho zelah, YMA chuan theihtawp chhuahin hma a la zel a. Central YMA pawhin Central AntiDrugs Squad (CADS) din thar lehin, March 15, 2025 atangin hma a la tan leh bawk a. Branch, Group leh Sub- Headquarters YMA-te pawh, mahni huamchhungah tha thlah lova theihtawp chhuaha ruihhlo leh a kaihhnawih thil tha lo do zel turin kan inchah thar leh a ni.

Gas ti chingpen lai an man 

Tunlaiin eirawngbawlna gas tih chingpen a hluar hle tih hriat anih vang leh Cylinder gas hmante a zang chho leh viau nia a lan avangin CYMA Kumpuan Comtt -te chu gas tih chingpen thin vengin Khamrang kawngpui leh a chheh velah tlaivarin an duty ta a. CYMA Kumpuan Comtt hian gas tihchingpen lai tak an man a, thuneitute'n hma an lak chhun zawm zel turin an kutah an dah. CYMA Kumpuan Chairman Professor Lalnuntluanga CYMA Vice president ni bawk chuan, Chhungkua tin deuh thawin a kan hman kan mamawh gas tih ching pen a ala ni fo mai hi a pawi hle. Mipuite kan than harh a, sual dona kawngah sorkar tha ti chak a kan za vai a YMA member nu leh pa kan tan tlan a pawi mawh tak zet zet a ni,' a ti.

Chief Minister leh NCB Director General te an inkawm 

Nimin chawhma khan CM Lalduhoma chuan a officeah Anurag Garg, IPS, Director General of the Narcotics Control Bureau (NCB) a kawm a, Mizoram paltlang ruihhlo tawlhruk hmachhawn dan turte a sawipui. CM hian an hmalakna tichak thei tur rawtna an neih hrang hrangte chu ziaka pe turin NCB Director General hi a hrilh a, 'Khaw chhak lam atanga ruihhlo lo lut nasa tireh thei tur hian ramriah infrastructure tha kan neih belh a tul a, thawktu indaih (manpower) kan neih a ngai. Chuvang chuan central sorkarah pawh rawtna te kan thlen a, Mizo Territorial Army min dinsak turin Ministry of Home Affairs lam te pawh ka ngen a ni, a ti. Anurag Garg hian, Mizoramah hian Zonal Office puitling awm thei se tha a tih thu a sawi a, thawktu lam neih belh pawh a tul thu sawiin, thawktu, Mizo tawng thiam an mamawh hle tih CM hi a hrilh.

Vengchhungah Raltlan khuahkhirh dawn 

Aizawl Chanmari Local Council leh Chanmari branch YMA ten an veng chhunga foreigner raltlan awmte chhiarpui an nei dawn a. Raltlante dawr luah tir lo turin an ngen bawk. Chanmari Veng chhunga Foreigner raltlan awm zawng zawngte chuan Mizoram Sorkar siam Temporary ID neih vek tur a ni. A la neiloten a ranglamin Chanmari LC hnenah form dil theih a ni. Chanmari LC/ YMA hriatpuina tel lovin foreigner raltlante in luah tir lo turin kan inhriattir, LCYMA pem lehkha neilote in luah tir lo turin kan inhriattir, Foreigner raltlante vengchhung mipuiten dawr luah tir lo turin kan inhriattir, Hnamdang sumdawngte inremsiama Mizo hming hawh tir lo turin mipuite kan inhriattir a.Hetiang ti hria kan awm a nih chuan LC/YMA hriattir turin kan inngen a ni. Remchang hmasa berah LC leh YMA ten endikna hun an nei ang, an ti.

Raltlante hnawk tihna tawngkam tam ta MZP-in pawi ti 

Nimin khan, MZP Pisapui-ah MZP Gen Hqrs Extended OB leh Adviser meeting neih a ni a. Mizoram a raltlante dinhmun sawiho a ni, raltlante hnawk tihna tawngkam a tam ta pawi an ti a, in-unau-na tichhe thei zawnga hmalakna leh tawngkam chhakchhuak lo turin mitin an ngen. Meeting chuan, raltlante Mizoram-ah an tam tawh avangin hnawk tihna tawngkam pawh a tam ta hle a. Raltlante zingah thil tisual an awm chuan, dan anga hrem thin turin thuneitute a ngen a. Chutih rualin eng emaw hlekah raltlante phih awhna tur dap a, raltlante tih hmingchhiat nana thu thehdarh ching an awm ta fo chu vanduaithlak a ti a. Hei hian Zofate inpumkhatna leh in unauna a ti chhe hle a ni, an ti.

Nizan khan Dinthar thalai engemawzat chu Dinthar kawn ah pungkhawmin ruihhlo an duh loh thu an au chhuahpui

Thudawn danin nizan khan Dinthar veng YMA chu Pu Henry Lalbiakzinga Chhundeng te chungchang ngaihtuahin an thukhawm a, hetihlai hian zan dar 9 vel atangin thalai inpunkhawmin YMA rorel thuchhuak an nghak a, Hawng 440 kan duh lo, YMA  hian thuchhuah siam thuai rawh se, ti te in an au rual a, bveng chhung timualphoitu a nih avangin an veng chhunga awm atan an duh loh thu an sawi.

 YMA thukhawm chuan Henry Lalbiakzinga Chhundeng te chhung ensan relin YMA membership fee leh chhiatni fund pekkir nise tih an rel nia thudawn a ni a, hemi chungchang hi Local Council kaihhruaiin Joint NGO meeting a, sawi leh tura thu dah nia hriat a ni.

Thalai pungkhawm te hian tharum an thawh lo a, val upa ten zai zapin zan dar 12:30 velah thalai pungkhawmte hi an tindarh thei a ni.

Lengpui Airport Forum chuan Home Minister hnenah lawmthu an sawi 

Airports Authority of India (AAI) in Lengpui Airport a lak theih nana hma a lak avangin Lengpui Airport Forum chuan India Home Minister Amit Shah hnenah lawmthu an sawi a. Mipui leh pawl hrang hrangte ngaihtha zan ngam lo chunga state sorkarin Indian Air Force kuta hlan a tintuah mek laia a lo inrawlh hi lawmawm an ti tih lehkha thawnin an sawi.Lawmthu sawina lehkha hi Aizawla lo zin India Minister of State for Home Nity-anand Rai kutah Lengpui Airport Forum convener Lalthuamliana'n a lo pe a ni.

Pro Volleyball League khel tur team tinin zo hnahthlak pathum bakah state dang atangin player an la lut thei dawn.

Mizoram Volleyball Association chuan kum kal ta ang bawkin Pro Volleyball-a tel turte tan state dang atangin player an duh zat zat lak luh a phalsak a, mahse, inkhel paruk zingah pakhat bak an tel thei dawn lo. Anni bakah hian Division hniam lama inziak lut lai emaw inziak lut lo emaw pawh zo hnahthlak an nih chuan player pathum lak luh a phalsak tel a, hei hian tual chhunga Mizo player-te bakah Mizoram pawna zo hnahthlak a huam a ni.

April 29 khian LPS Arena, Falkland-ah Pro Volleyball vawi riatna tan a ni dawn a, kar hmasa khan mipa playoff atangin division hniama awm lai Anastasia leh Hunthar an tling a, team tichak turin player an lak belh thei dawn a, Pro Division-a awm sa Thutak Nunpuitu Team, Tuichangral, Khawbel leh Sihphirin an duh chuan an lak belh thei dawn bawk.

Tun season-a Pro Division mipa team paruk zinga tel Chhinga Veng Spikers leh Durtlang North-in inrelbawlna lama harsatna an tawh avangin Pro Volleyball an khel thei dawn lo va, chutih laiin player-te Mizoram volleyball inelna sang bera tel tur team-ten an duh chuan an la lut thei ang.Season liam ta khan Huntharin Delhi atangin Anurag Rawat la lutin team tan vawi sarih a khelhah point 188 hlawh chhuakin 73 a hloh a ni. Hetih lai hian 2023 khan TNT-in state dang player tel lovin trophy an la a, Pro Volleyball chanchina Mizo hlanga champion thei awm chhun an ni.

Hmeichhe team pathum an inel dawn bawk a, Pro Volleyball-a an tel hmasak ber 2023 khan Luangmual an champion nghal a, Gujarat atanga an lak luh Nipa Barad chuan best spiker lawman a dawng. Mahse, season liam ta khan Luangmualin Mizo hlangin title an humhim a, kuminah Bungkawn leh Kolasib nen champion nih an inchuh dawn a ni.

US President Donald Trump chuan China lakah tariff  104% in vawiin atangin a tipung ta a, US leh China inkar boruak asang tawh hle.

Dionald Trump chuan a lo sawi lawk tawh angin US in China lakah 34% Tariff a tihsan chhanlet nan China in US bungrua a ,tariff a lak chu 34% ah a tisang a,  US President chuan China in US bungrua a, tariff a tihsan chu darkar 24 chhunga asut loh chuan China bungrua a, tariff lak chu za a 50 a, tihsan belh a ni ang, a ti a. China chuan engmah a tih tak loh avangin vawiin atangin US chuan China bungrua a, tariff lak chu 50% a tihsan belhin avaiin china bungrua a tariff lak chu 104% a ni ta a ni. Thla hlui thleng khan US chuan China bungrua ah tariff 10% ala a, China chuan US hnuaia kun atum loh bakah US hi ahlau bik lo a, a tawp thlenga US nena tariff war an neih hi kalpui a tum tih a lo sawi tawh a ni.